Mahabharata · Chapter 3.145

te śūrā sajjadhanvānastūṇavantaḥ samārgaṇāḥ /
baddhagodhāṅgulitrāṇāḥ khaṅgavanto'mitaujasaḥ //

parigṛhya dvijaśreṣṭhāñjyeṣṭhāḥ sarvadhanuṣmatām /
pañcālīsahitā rājanprayayurgandhamādanam //

sarāṃsi saritaścaiva parvatāṃśca vanāni ca /
vṛkṣāṃśca bahulacchāyāndadṛśurgirimūrdhani //

nityapuṣpaphalāndeśāndevarṣigaṇasevitān /
ātmanyātmānamādhāya vīrā mūlaphalāśinaḥ //

ceruruccāvacākārāndeśānviṣamasankaṭān /
paśyanto mṛgajātāni bahūni vividhāni ca //

ṛṣisiddhāmarayutaṃ gandharvāpsarasāṃ priyam /
viviśuste mahātmānaḥ kinnarācaritaṃ girim //

praviśatsvatha vīreṣu parvataṃ gandhamādanam /
caṇaaḍavātaṃ mahadvarṣaṃ prādurāsīdviśāmpate //

tato reṇuḥ samudbhūtaḥ sapatrabahulo mahān /
pṛthivīṃ cāntarikṣaṃ ca dyāṃ caiva sahasā'vṛṇot //

na sma prajñāyate kiñcidāvṛte vyomni reṇunā /
na cāpi śekustatkartumanyonyasyābhibhāṣaṇam //

na cāpaśyaṃstato'nyonyaṃ tamasā'vṛtacakṣuṣaḥ /
ākṛṣyamāṇā vātena sāśmacūrṇena bhārata //

drumāṇāṃ vātarugṇaānāṃ patatāṃ bhūtale'niśam /
anyeṣāṃ ca mahījānāṃ śabdaḥ samabhavanmahān //

dyauḥ svitpatati kiṃ bhūmirdīryate parvatonu kim /
iti te menire sarvepavanena vimohitāḥ //

te pathā'nantarānnvṛkṣānvalmīkānviṣamāṇi ca /
pāṇibhiḥ parimārganto bhītā vāyornililyire //

tataḥ kārmukamādāya bhīmaseno mahābalaḥ /
kṛṣṇāmādāya sangamya tasthāvāśritya pādapam //

dharmarājaśca dhaumyaś nililyāte mahāvane /
agnihotrāṇyupādāya sahadevastu parvate //

nakulo brāhmaṇāścānye lomaśaśca mahātapāḥ /
vṛkṣānāsādya santrastāstatratatra nililyire //

mandībhūte tu pavane tasminrajasi śāmyati /
mahadbhirjaladhāraurgharvarṣamabhyājagāma ha //

bhṛśaṃ caṭacaṭāśabdo vajrāṇāṃ kṣipyatāmiva /
tatastāścañcalābhāsaścerurabhreṣu vidyutaḥ //

tato'śmasahitā dhārāḥ saṃvṛṇvantyaḥ samantataḥ /
prapeturaniśaṃ tatra śīghravātasamīritāḥ //

tatra sāgaragā hyāpaḥ kīryamāṇāḥ samantataḥ /
prādurāsansakaluṣāḥ phenavatyo viśāmpate //

vahantyo vāri bahulaṃ phenoḍupapariplutam /
parisamasrurmahāśabdāḥ prakarṣantyo mahīruhān //

tasminnuparate śabdebāte ca samatāṃ gate /
gate hyambhasi nimnāni prādurbhūte divākare //

nirjagmuste śanaiḥ sarve samājagmuśca bhārata / pratasthire punarvīrāḥ parvataṃ gandhamādanam //