મહાભારત · અધ્યાય 3.122

ગયેન યજમાનેન સોમેનેહ પુરન્દરઃ ।
તર્પિત શ્રૂયતે રાજન્સ તૃપ્તો મુદમભ્યગાત્ ॥

ઇહ દેવૈઃ સહેન્દ્રૈશ્ચ પ્રજાપતિભિરેવ ચ ।
ઇષ્ટં બહુવિધૈર્યજ્ઞૈર્મહદ્ભિર્ભૂરિદક્ષિણૈઃ ॥

આધૂર્તરજસશ્ચેહ રાજા વજ્રધરં પ્રભુઃ ।
તર્પયામાસ સોમેન હયમેધેષુ સપ્તસુ ॥

તસ્ય સપ્તસુ યજ્ઞેષુ સર્વમાસીદ્ધિરણ્યયમ્ ।
વાનપ્રસ્થં ચ ભૌમં ચ યદ્દ્રવ્યં નિયતં મખે ॥

ચષાલયૂપચમસાઃ સ્થાલ્યઃ પાત્ર્યઃ સ્રુચઃ સ્રુવાઃ ।
તેષ્વેવ ચાસ્ય યજ્ઞેષુ પ્રયોગાઃ સપ્ત વિશ્રુતાઃ ॥

સપ્તૈકૈકસ્યયૂપસ્ય ચષાલાશ્ચોપરિશ્થિતાઃ । તસ્ય સ્મ યૂપાન્યજ્ઞેષુ ભ્રાજમાનાન્હિરણ્મયાન્ ।
સ્વયમુત્થાપયામાસુર્દેવાઃ સેન્દ્રા યુધિષ્ઠિર ॥

તેષુ તસ્ય મખાગ્ર્યેષુ ગયસ્ય પૃથિવીપતેઃ ।
અમાદ્યદિન્દ્રઃ સોમેન દક્ષિણાભિર્દ્વિજાતયઃ ॥

પ્રસઙ્ખ્યાનાનસઙ્ખ્યેયાન્પ્રત્યગૃહ્ણન્દ્વિજાતયઃ ॥

સિકતા વા યથા લોકે યથાવા દિવિ તારકાઃ ।
યથા વા વર્ષતો ધારા અસઙ્ખ્યેયાઃ સ્મ કેનચિત્ ॥

તથૈવ તદસઙ્ખ્યેયં ધનં યત્પ્રદદૌ ગયઃ ।
સદસ્યેભ્યો મહારાજ તેષુ યજ્ઞેષુ સપ્તસુ ॥

ભવેત્સઙ્ખ્યેયમેતદ્ધિ યદેતત્પરિકીર્તિતમ્ ।
ન તસ્ય શક્યાઃ સઙ્ખ્યાતું દક્ષિણાદક્ષિણાવતઃ ॥

હિરણ્મયીભિર્ગોભિશ્ચ કૃતાભિર્વિશ્વકર્મણા ।
બ્રાહ્મણાંસ્તર્પયામાસ નાનાદિગ્ભ્યઃ સમાગતાન્ ॥

અલ્પાવશેષા પૃથિવી ચૈત્યૈરાસીત્સમાચિતા ।
ગયસ્ય યજમાનસ્ય તત્રતત્ર વિશામ્પતે ॥

સ લોકાન્પ્રાપ્તવૈનૈન્દ્રાન્કર્મણા તેન ભરત ।
સલોકતાં તસ્ય ગચ્છેત્પયોષ્ણ્યાં ય ઉપસ્પૃશેત્ ॥

તરસ્માત્ત્વમત્ર રાજેનદ્ર ભ્રાતૃભિઃ સહિતોચ્યુત ।
ઉપસ્પૃશ્ય મહીપાલ ધૂતપાપ્મા ભવિષ્યસિ ॥
વૈશમ્પાયન ઉવાચ ।

સ પયોષ્ણ્યાં નરશ્રેષ્ઠઃ સ્નાત્વા વૈ ભ્રાતૃભિઃ સહ ।
વૈદૂર્યપર્વતં ચૈવ નર્મદાં ચ મહાનદીમ્ ॥

ઉદ્દિશ્ય પાણ્ડવશ્રેષ્ઠઃ સ પ્રતસ્થે મહીપતિઃ ।
સમાગમત તેજસ્વી ભ્રાતૃભિઃ સહિતો નઘ ॥

તત્રાસ્ય સર્વાણ્યાચખ્યૌ લોમશો ભગવાનૃષિઃ ।
તીર્થાનિ રમણીયાનિ પુણ્યાન્યાયતનાનિ ચ ॥

યથાયોગં યથાપ્રીતિ પ્રયયૌ ભ્રાતૃભિઃ સહ ।
તત્રતત્રાદદદ્વિત્તં બ્રાહ્મણેભ્યઃ સહસ્રશઃ ॥
લોમશ ઉવાચ ।

દેવાનામેતિ કૌન્તેય તથા રાજ્ઞાં સલોકતામ્ ।
વેદૂર્યપર્વતં દૃષ્ટ્વા નર્મદામવતીર્ય ચ ॥

સન્ધિરેષ નરશ્રેષ્ઠ ત્રેતાયા દ્વાપરસ્ય ચ ।
એનમાસાદ્ય કૌન્તેય સર્વપાપૈઃ પ્રમુચ્યતે ॥

એષ શર્યાતિયજ્ઞસ્ય દેશસ્તાત પ્રકાશતે ।
સાક્ષાદ્યત્રાપિબત્સોમમશ્વિભ્યાં સહ વાસવઃ ॥

ચુકોપ ભાર્ગવશ્ચાપિ મહેન્દ્રસ્ મહાતપાઃ ।
સંસ્તમ્ભયામાસ ચ તં વાસવં ચ્યવનઃ પ્રભુઃ ॥

સુકન્યાં ચાપિ ભાર્યાં સ રાજપુત્રીમવાપ્તવાન્ ।
નાસત્યૌ ચ મહાભાગ કૃતવાન્સોમપીથિવૌ ॥
યુધિષ્ઠિર ઉવાચ ।

કથં વિષ્ટમ્ભિતસ્તેન ભગવાન્પાકશાસનઃ ।
કિમર્થં ભાર્ગવશ્ચાપિ કોપં ચક્રે મહાતપાઃ ॥

નાસત્યૌ ચ કથં બ્રહ્મન્કૃતવાન્સોમપીથિનૌ । એતત્સર્વં યથાવૃત્તમાખ્યાતુ ભગવાન્મમ ॥