Mahabharata · Chapter 3.112

sā tu nāvyāśramaṃ cakre rājakāryārthasiddhaye /
sandeśāccaiva nṛpateḥ svabuddhyā caiva bhārata //

nānāpuṣpaphalairvṛkṣaiḥ kṛtrimairupaśobhitaiḥ /
nānāgulmalatopetaiḥ svādukāmaphalapradaiḥ //

atīva ramaṇīyaṃ tadatīva ca manoharam /
cakre nāvyāśramaṃ ramyamadbhutopamaderśanam //

tato nivadhya sā nāvamadūre kāśyapāśramāt /
cārayāmāsa puruṣairvihāraṃ tasya vai muneḥ //

tato duhitaraṃ veśyāṃ samādhāyetikāryatām /
dṛṣṭvā'ntaraṃ kāśaypasya prāhiṇodbuddhisammatām //

sā tatra gatvā kuśalā taponityasya sannidhau /
āśramaṃ taṃ samāsādya dadarśa tamṛṣeḥ sutam //
veśyovāca /

kaccinmune kuśalaṃ tāpasānāṃ kaccicca vo mūlaphalaṃ prabhūtam /
kaccidbhavānramate cāśre'smiṃ- stvāṃ vai draṣṭuṃ sāmpratamāgatāsmi //

kaccittapo vardhate tāpasānāṃ pitā ca te kaccidahīnatejāḥ /
kaccittvayā prīyatecaiva vipra kaccitsvādhyāyaḥ kriyate carśyaśṛṅgaḥ //
ṛśyaśṛṅga uvāca /

ṛddhyā bhavāñjyotiriva prakāśate manye cāhaṃ tvāmabhivādanīyam /
pādyaṃ vai te sampradāsyāmi kāmā- dyathādharmaṃ phalamūlāni caiva //

kauśyāṃ bṛsyāmāssva yathopajoṣaṃ kṛṣṇājinenāvṛtāyāṃ sukhāya /
kva cāśramastava kiṃ nāma cedaṃ vratambrahmaṃścarasi hi devavattvam //
veśyovāca /

mamāśramaḥ kāśyapaputra ramya- striyojanaṃ śailamimaṃ pareṇa /
tatrasvadharmo'nabhivādanaṃ no na codakaṃ pādyamupaspṛśāmaḥ //

bhavatā nābhivādyo'hamabhivādyo bhavānmayā /
vratametādṛśaṃ brahmanpariṣvajyo bhavānmayā //
ṛśyaśṛṅga uvāca /

phalāni pakvāni dadāni te'haṃ bhallātakānyāmalakāni caiva /
karūṣakānīṅgudadhanvanāni priyālānāṃ kāṅkṣitaṃ vai kuruṣva //
lomaśa uvāca /

sā tāni sarvāṇi visarjayitvā bhakṣyāṇyanarhāṇi dadau tato'smai /
tānyṛśyaśṛṅgāya mahārasāni bhṛśaṃ surūpāṇi ca modakāni //

dadau ca mālyāni sugandhavanti citrāṇi vāsāṃsi ca bhānumanti /
peyāni cāgryāṇi tato mumoda cikrīḍa caiva prajahāsa caiva //

sā kandukenāramatāsya mūle vibhajyamānā phalitā lateva /
gātraiśca gātrāṇi niṣevamāṇā samāśliṣaccāsakṛdṛśyaśṛṅgam //

sarjānaśokāṃstilakāṃśca vṛkṣā- nsupuṣpitānavanāmyāvabhajya /
vilajjamāneva madābhibhūtā probhayāmāsa sutaṃ maharṣeḥ //

atharśyaśṛṅgaṃ vikṛtaṃsamīkṣya punaḥ punaḥ pīñya ca kāyamasya /
avekṣyamāṇā śanakairjagāma kṛtvā'gnihotrasya tadā'padeśam //

tasyāṃ gatāyāṃ madanena matto vicetanaścābhavadṛśyaśṛṅgaḥ /
tāmeva bhāvena gatena śūnye viniḥśvasannārtarūpo babhūva //

tato muhūrtāddharipiṅgalākṣaḥ praveṣṭito romabhirānakhāgrāt /
svādhyāyavānvṛttasamādhiyukto vibhāṇḍakaḥ kāśyapaḥ prādurāsīt //

so'paśyadāsīnamupetya putraṃ dhyāyantamekaṃ viparītacittam /
viniḥśvasantaṃ muhurūrdhvadṛṣṭiṃ vibhāṇ़kaḥ putramuvāca dīnam //

na kalpitāḥ samidhaḥ kinnu tāta kacciddhutaṃ cāgniho'traṃ tvayā'dya /
na saṃsṛṣṭaṃ kriyate dvārabhāge suvṛkṣāṇā khaṇḍane kaḥ pravṛttaḥ //

sunirṇiktaṃ sruksruvaṃ homadhenuḥ kaccitsavatsādyakṛtā tvayā ca /
kopyāgataḥ śuśrūṣaṇāyeha putra kutaścitraṃ mālyamidaṃ pravṛddham //

na vai yathāpūrvamivāsi putra cintāparaścāsi vicetanaśca /
dīnotimātraṃ kimivādya khinnaḥ pṛcchāmi tvāṃ ka ihādyāgato'bhūt //