Mahabharata · Chapter 3.105

tānuvāca sametāṃstu brahmā lokapitāmahaḥ /
nirhrādinyā girā rājandevānāśvāsayaṃstadā //

gacchadhvaṃ vibudhāḥ sarve yathākāmaṃ yathepsitam /
mahatā kālayogena prakṛtiṃ yāsyate'rṇavaḥ //

jñātīṃśca kāraṇaṃ kṛtvā mahārājo bhagīthaḥ /
pūrayiṣyati toyaughaiḥ samudraṃ nidhimambhasām //

pitāmahavacaḥ śrutvā sarve vibudhasattamāḥ /
kālayogaṃ pratīkṣanto jagmuścāpi yathāgatam //
yudhiṣṭhira uvāca /

kathaṃ vai jñātayobrahmankāraṇaṃ cātra kiṃ mune /
kathaṃ samudraḥ pūrṇaśca bhagīrathapariśramāt //

etadicchāmyahaṃ śrotuṃ vistareṇa tapodhana /
kathyamānaṃ tvayā vipra rājñāṃ caritamuttamam //
vaiśampāyana uvāca /

evamuktastu viprendro dharmarājñā mahātmanā /
kathayāmāsa māhātmyaṃ sagarasya mahātmanaḥ //
lomaśa uvāca /

ikṣvākūṇāṃ kule jātaḥ sagaro nāma pārthivaḥ /
rūpasatvabalopetaḥ sa cāputraḥ pratāpavān //

sa haihayānsamutsādya tālajaṅghāṃśca bhārata /
vaśe ca kṛtvā rājanyānsvarājyamanuśiṣṭavān //

tasya bhārye tvabhavatāṃ rūpayauvanadarpite /
vaidarbhī bharataśreṣṭha śaivyā ca bharatarṣabha //

saputrakāmo nṛpatistapyate sma mahattapaḥ /
patnībhyāṃ saha rājendra kailāsaṃ girimāśritaḥ //

sa tapyamānaḥ sumahattapoyogasamanvitaḥ /
āsasāda mahātmānaṃ tryakṣaṃ tripuramardanam //

śankaraṃ bhavamīśānaṃ pinākiṃ śūlapāṇinam /
tryambakaṃ śivamugreśaṃ bahurūpamumāpatim //

sa taṃ dṛṣṭvaiva varadaṃ patnībhyāṃ sahito nṛpaḥ /
praṇipatya mahābāhuḥ putrārthe samayācata //

taṃ prītimānharaḥ prāha sabhāryaṃ nṛpasattamam /
yasminvṛto muhūrte'haṃ tvayeha nṛpate varam //

ṣaṣṭiḥ putrasahasrāṇi śūrāḥ paramadarpitāḥ /
ekasyāṃ sambhaviṣyanti patnyāṃ naravarottama //

te caivasarve sahitāḥ kṣayaṃ yāsyanti pārthiva /
eko vaṃśadharaḥ śūra ekasyāṃ sambhaviṣyati //

evamuktvā tu taṃ rudrastatraivāntaradhīyata /
sa cāpi sagaro rājā jagāma svaṃ niveśanam //

patnībhyāṃ sahitastatra ho'tihṛṣṭamanāstadā /
kālaṃ śambhuvaraprāptaṃ pratīkṣansagaro'nayat //

tasya temanujaśreṣṭha bhārye kalalocane /
vaidarbhī caiva śaibyā ca garbhiṇyau sambabhūvatuḥ //

tataḥ kālena vaidarbhī garbhālābuṃ vyajāyata /
śaivyā ca suṣuve putraṃ kumāraṃ devarūpiṇam //

tadā'lābuṃ samutsraṣṭuṃ manaścakre sa pārthivaḥ /
athāntarikṣācchuśrāva vācaṃ gambhīraniḥsvanām //

rājanmā sāhasankārṣīḥ putrānna tyaktumarhasi /
alābumadhyānniṣkṛṣya vījaṃ yatnena gopyatām //

sopasvedeṣu pātreṣu ghṛtapūrṇeṣu bhāgaśaḥ /
tataḥ putrasahasrāṇi ṣaṣṭiṃ prāpsyasi pārthiva //

mahādevena diṣṭaṃ te putrajanma narādhipa / anena kramayogena mā te buddhirato'nyathā //