Mahabharata · Chapter 2.86

evaṃ pravartite dyūte ghore sarvāpahāriṇi /
sarvasaṃśayanirmoktā viduro vākyamabravīt //

mahārāja vijānīhi yattvāṃ vakṣyāmi bhārata /
mumūrṣorauṣadhamiva na rocetāpi te śrutam //

yadvai purā jātamātro rurāva gomāyuvadvisvaraṃ pāpacetāḥ /
duryodhano bhāratānāṃ kulaghnaḥ so'yaṃ yukto bhavatāṃ kālahetuḥ //

gṛhe vasantaṃ gomāyuṃ tvaṃ vai mohānna budhyase /
duryodhanasya rūpeṇa śṛṇu kāvyāṃ giraṃ mama //

madhu vai mādhviko labdhvā prapātaṃ naiva budhyate /
āruhya taṃ majjati vā patanaṃ cādhigacchati //

so'yaṃ matto'kṣadyūtena madhuvanna pīrakṣate /
prapātaṃ budhyate naiva vairaṃ kṛtvā mahārathaiḥ //

viditaṃ me mahāprājña bhojeṣvevāsamañjasam /
putraṃ santyaktavānpūrvaṃ paurāṇāṃ hitakāmyayā //

andhakā yādavā bhojāḥ sametāḥ kaṃsamatyajan /
niyogāttu hate tasminkṛṣṇenāmitraghātinā //

evaṃ te jñātayaḥ sarve modamānāḥ śataṃ samāḥ /
tvanniyuktaḥ savyasācī nigṛhṇātu suyodhanam //

nigrahādasya pādasya modantāṃ kuravaḥ sukham / kākenemāṃścitravarhāñśārdūlānkroṣṭukena ca /
krīṇīṣva pāṇḍavānrājanmā majjīḥ śokasāgare //

tyajetkulārthe puruṣaṃ grāmasyārthe kulaṃ tyajet /
grāmaṃ janapadasyārthe ātmārthe pṛthivīṃ tyajet //

sarvajñaḥ sarvabhāvajñaḥ sarvaśatrubhayaṅkaraḥ /
iti sma bhāṣate kāvyo jambhatyāge mahā'surān //

hiraṇyaṣṭhīvinaḥ kāṃścitpakṣiṇo vanagocarān / gṛhe kila kṛtāvāsām̐llobhādrājā nyapīḍayat /
sa copabhogalobhāndho hiraṇyārthī parantapa //

āyatiṃ ca tadātvaṃ ca ubhe sadyo vyanāśayat /
tadarthakāmastadvattvaṃ mādruhaḥ pāṇḍavānnṛpa //

mohātmā tapsyase paścātpatrihā puruṣo yathā /
jātañjātaṃ pāṇḍavebhyaḥ puṣpamādatsva bhārata //

mālākāra ivārāme snehaṃ kurvanpunaḥ punaḥ / vṛkṣānaṅgārakārīva mainādyākṣīḥ samūlakān /
mā gamaḥ samutāmātyaḥ sabalaśca yamakṣayam //

samavetānhi kaḥ pārthānpratiyudhyeta bhārata /
marudbhiḥ sahito rājannapi sākṣānmarutpatiḥ //

dyūtaṃ mūlaṃ kalahasyābhyupaiti mitho bhedaṃ mahate dāruṇāya /
tadā sthito'yaṃ dhṛtarāṣṭrasya putro duryodhanaḥ sṛjate vairamugram //

prātipeyāḥ śāntanavā bhīmasenāḥ sabāhnikāḥ /
duryodhanāparādhena kṛcchraṃ prāpsyanti sarvaśaḥ //

duryodhano madenaiva kṣemaṃ vyapohati /
viṣāṇaṃ gauriva madātsvayamārujatetmanaḥ //

yaścittamanveti parasya rājan vīraḥ kaviḥ svāmavamatya dṛṣṭim /
nāvaṃ samudra iva bālanetrā- māruhya ghore vyasane nimajjet //

duryodhano glahate pāṇḍavena prīyāyase tvaṃ jayatīti tacca /
atinarmā jāyate samprahāro yato vināśaḥ samupaiti puṃsām //

ākarṣaste'vākphalaḥ supraṇīto hṛdi prauḍho mantrapadaḥ samādhiḥ /
yudhiṣṭhireṇa kalahastavāya- macintito'bhimataḥ svabandhunā //

prātipeyāḥ śāntanavāḥ śṛṇudhvaṃ kāvyāṃ vācaṃ saṃsadi kauravāṇām /
vaiśvānaraṃ prajvalitaṃ sughoraṃ mā yāsyadhvaṃ mandamanuprapannaḥ //

yadā manyuṃ pāṇḍavo'jātaśatru- rna saṃyacchedakṣamadābhibhūtaḥ /
vṛkodaraḥ savyasācī yamau ca ko'tra dvīpaḥ syāttumule vastadānīm //

mahārāja prabhavastvaṃ dhanānāṃ purā dyūtānmanasā yāvadiccheḥ /
bahuvittānpāṇḍavāṃścejjayastvaṃ kiṃ te tatsyādvasu vindeha pārthān //

jānīmahe devitaṃ saubalasya veda dyūte nikṛtiṃ pārvatīyaḥ /
yataḥ prāptaḥ śakunistatra yātu mā yūyudho bhārata pāṇḍaveyān //