Mahabharata · Chapter 2.84

praviśya tāṃ sabhāṃ pārthā yudhiṣṭhirapurogamāḥ /
sametya pārthivānsarvānpūjārhānabhipūjya ca //

yathāvayaḥ sameyānā upaviṣṭā yathārhataḥ /
āsaneṣu vicitreṣu sparddhyāstaraṇavatsu ca //

teṣu tatropaviṣṭeṣu sarveṣvatha nṛpeṣu ca /
śakuniḥ saubalastatra yudhiṣṭhiramabhāṣata //
śakuniruvāca //

upastīrṇā sabhā rājansarve tvayi kṛtakṣaṇāḥ /
akṣānuptvā devanasya samayo'stu yudhiṣṭhira //
yudhiṣṭhira uvāca /

nitirdevanaṃ pāpaṃ na kṣātro'tra parākramaḥ /
na ca nītirdhruvā rājankiṃ tvaṃ dyūtaṃ praśaṃsasi //

na hi mānaṃ praśaṃsanti nikṛtau kitavasya hi /
śakune maivaṃ no'jaiṣīramārgeṇa nṛśaṃsavat //
śakuniruvāca /

yo vetti saṅkhyā nikṛtau vidhijña- śceṣṭāsvakhinnaḥ kitavo'kṣajāsu /
mahāmatiryaśca jānāti dyūtaṃ sa vai sarvaṃ sahate prakriyāsu //

akṣaglahaḥ so'bhibhavetparaṃ na- stenaiva doṣo bhavatīha pārtha /
dīvyāmahe pārthiva mā viśaṅkāṃ kuruṣva pāṇaṃ ca ciraṃ ca mā kṛthāḥ //
yudhiṣṭhira uvāca /

evamāhāyamasito devalo munisattamaḥ /
imāni lokadvārāṇi yo vai bhrāmyati sarvadā //

idaṃ vai devanaṃ pāpaṃ nikṛtyā kitavaiḥ saha /
dharmeṇa tu jayo yuddhe tatparaṃ na tu devanam //

nāryā mlecchanti bhāṣābhirmāyayā na carantyuta /
ajihyamaśaṭhaṃ yuddhametatsatpuruṣavratam //

śaktito brāhmaṇārthāya śikṣituṃ prayatāmahe /
tadvai vittaṃ mātidevīrmājaiṣīḥ śakune parān //

nikṛtyā kāmaye nāhaṃ sukhānyuta dhanāni vā /
kitavasyeha kṛtino vṛttametanna pūjyate //
śakuniruvāca /

śrotriyaḥ śrotriyāneti nikṛtyaiva yudhiṣṭhira /
vidvānaviduṣo'bhyeti nāhustāṃ nikṛtiṃ janāḥ //

akṣairhi śikṣito'bhyeti nikṛtyaiva yudhiṣṭhira /
vidvānaviduṣo'bhyeti nāhustāṃ nikṛtiṃ janāḥ //

akṛtāstraṃ kṛtāsraśca durbalaṃ balavattaraḥ / evaṃ karmasu sarveṣu nikṛtyaiva yudhiṣṭhiraḥ /
vidvānaviduṣobhyeti nāhustāṃ nikṛtiṃ janāḥ //

evaṃ tvaṃ māmihābhyetya nikṛtiṃ yadi manyase /
devanādvinivartasva yadi te vidyate bhayam //
yudhiṣṭhira uvāca //

āhūto na nivarteyamiti me vratamāhitam /
vidhiśca balavānrājandiṣṭasyāsmi vaśe sthitaḥ //

asminsamāgame kena devanaṃ me bhaviṣyati /
pratipāṇaśca ko'nyosti tato dyūtaṃ pravartatām //
duryodhana uvāca /

ahaṃ dātāsmi ratnānāṃ dhanānāṃ ca viśāmpate /
madarthe devitā cāyaṃ śakunirmātulo mama //
yudhiṣṭhira uvāca //

anyenānyasya vai dyūtaṃ viṣamaṃ pratibhāti me /
etadvidvinnupādatsva kāmamevaṃ pravartatam //