મહાભારત · અધ્યાય 2.84

પ્રવિશ્ય તાં સભાં પાર્થા યુધિષ્ઠિરપુરોગમાઃ ।
સમેત્ય પાર્થિવાન્સર્વાન્પૂજાર્હાનભિપૂજ્ય ચ ॥

યથાવયઃ સમેયાના ઉપવિષ્ટા યથાર્હતઃ ।
આસનેષુ વિચિત્રેષુ સ્પર્દ્ધ્યાસ્તરણવત્સુ ચ ॥

તેષુ તત્રોપવિષ્ટેષુ સર્વેષ્વથ નૃપેષુ ચ ।
શકુનિઃ સૌબલસ્તત્ર યુધિષ્ઠિરમભાષત ॥
શકુનિરુવાચ ॥

ઉપસ્તીર્ણા સભા રાજન્સર્વે ત્વયિ કૃતક્ષણાઃ ।
અક્ષાનુપ્ત્વા દેવનસ્ય સમયોઽસ્તુ યુધિષ્ઠિર ॥
યુધિષ્ઠિર ઉવાચ ।

નિતિર્દેવનં પાપં ન ક્ષાત્રોઽત્ર પરાક્રમઃ ।
ન ચ નીતિર્ધ્રુવા રાજન્કિં ત્વં દ્યૂતં પ્રશંસસિ ॥

ન હિ માનં પ્રશંસન્તિ નિકૃતૌ કિતવસ્ય હિ ।
શકુને મૈવં નોઽજૈષીરમાર્ગેણ નૃશંસવત્ ॥
શકુનિરુવાચ ।

યો વેત્તિ સઙ્ખ્યા નિકૃતૌ વિધિજ્ઞ- શ્ચેષ્ટાસ્વખિન્નઃ કિતવોઽક્ષજાસુ ।
મહામતિર્યશ્ચ જાનાતિ દ્યૂતં સ વૈ સર્વં સહતે પ્રક્રિયાસુ ॥

અક્ષગ્લહઃ સોઽભિભવેત્પરં ન- સ્તેનૈવ દોષો ભવતીહ પાર્થ ।
દીવ્યામહે પાર્થિવ મા વિશઙ્કાં કુરુષ્વ પાણં ચ ચિરં ચ મા કૃથાઃ ॥
યુધિષ્ઠિર ઉવાચ ।

એવમાહાયમસિતો દેવલો મુનિસત્તમઃ ।
ઇમાનિ લોકદ્વારાણિ યો વૈ ભ્રામ્યતિ સર્વદા ॥

ઇદં વૈ દેવનં પાપં નિકૃત્યા કિતવૈઃ સહ ।
ધર્મેણ તુ જયો યુદ્ધે તત્પરં ન તુ દેવનમ્ ॥

નાર્યા મ્લેચ્છન્તિ ભાષાભિર્માયયા ન ચરન્ત્યુત ।
અજિહ્યમશઠં યુદ્ધમેતત્સત્પુરુષવ્રતમ્ ॥

શક્તિતો બ્રાહ્મણાર્થાય શિક્ષિતું પ્રયતામહે ।
તદ્વૈ વિત્તં માતિદેવીર્માજૈષીઃ શકુને પરાન્ ॥

નિકૃત્યા કામયે નાહં સુખાન્યુત ધનાનિ વા ।
કિતવસ્યેહ કૃતિનો વૃત્તમેતન્ન પૂજ્યતે ॥
શકુનિરુવાચ ।

શ્રોત્રિયઃ શ્રોત્રિયાનેતિ નિકૃત્યૈવ યુધિષ્ઠિર ।
વિદ્વાનવિદુષોઽભ્યેતિ નાહુસ્તાં નિકૃતિં જનાઃ ॥

અક્ષૈર્હિ શિક્ષિતોઽભ્યેતિ નિકૃત્યૈવ યુધિષ્ઠિર ।
વિદ્વાનવિદુષોઽભ્યેતિ નાહુસ્તાં નિકૃતિં જનાઃ ॥

અકૃતાસ્ત્રં કૃતાસ્રશ્ચ દુર્બલં બલવત્તરઃ । એવં કર્મસુ સર્વેષુ નિકૃત્યૈવ યુધિષ્ઠિરઃ ।
વિદ્વાનવિદુષોભ્યેતિ નાહુસ્તાં નિકૃતિં જનાઃ ॥

એવં ત્વં મામિહાભ્યેત્ય નિકૃતિં યદિ મન્યસે ।
દેવનાદ્વિનિવર્તસ્વ યદિ તે વિદ્યતે ભયમ્ ॥
યુધિષ્ઠિર ઉવાચ ॥

આહૂતો ન નિવર્તેયમિતિ મે વ્રતમાહિતમ્ ।
વિધિશ્ચ બલવાન્રાજન્દિષ્ટસ્યાસ્મિ વશે સ્થિતઃ ॥

અસ્મિન્સમાગમે કેન દેવનં મે ભવિષ્યતિ ।
પ્રતિપાણશ્ચ કોઽન્યોસ્તિ તતો દ્યૂતં પ્રવર્તતામ્ ॥
દુર્યોધન ઉવાચ ।

અહં દાતાસ્મિ રત્નાનાં ધનાનાં ચ વિશામ્પતે ।
મદર્થે દેવિતા ચાયં શકુનિર્માતુલો મમ ॥
યુધિષ્ઠિર ઉવાચ ॥

અન્યેનાન્યસ્ય વૈ દ્યૂતં વિષમં પ્રતિભાતિ મે ।
એતદ્વિદ્વિન્નુપાદત્સ્વ કામમેવં પ્રવર્તતમ્ ॥