Mahabharata · Chapter 2.28

evamuktaḥ pratyuvāca bhagadattaṃ dhanañjayaḥ /
anenaiva kṛtaṃ sarvaṃ bhaviṣyatyanujānatā //

taṃ vijitya mahābāhuḥ kuntīputro dhanañjayaḥ /
prayayāvuttarāṃ tasmāddiśaṃ dhanadapālitām //

antargiriṃ ca kaunteyastathaiva ca bahirgirim /
tathaivopagiraṃ caiva vijigye puruṣarṣabhaḥ //

vijitya parvatānsarvānye ca tatra narādhipāḥ /
tānvaśe sthāpayitvā sa dhanānyādāya sarvaśaḥ //

taireva sahitaḥ sarvairanurajya ca tānnupān /
ulūkavāsinaṃ rājanbṛhantamupajagmivān //

mṛdaṅgavaranādena rathanemisvanena ca /
hastināṃ ca ninādena kampayanvasudhāmimām //

tato bṛhantastvarito balena caturaṅgiṇā /
niṣkramya nagarāttasmādyodhayāmāsa phālgunam //

sumahānsannipāto'bhūddhanañjayabṛhantayoḥ /
na śaśāka bṛhantastu soḍhuṃ pāṇḍavavikramam //

so'viṣahyatamaṃ matvā kaunteyaṃ parvateśvaraḥ /
upāvartata durdharṣo ratnānyādāya sarvaśaḥ //

sa tadrājyamavasthāpya ulūkasahito yayau /
senābindumatho rājanrājyādāśu samākṣipat //

modāpuraṃ vāmavedaṃ sudāmānaṃ susaṅkulam /
ulūkānuttarāṃścaiva tāṃśca rājñaḥ samānayat //

tatrasthaḥ puruṣaireva dharmarājasya śāsanāt /
kirīṭī jitavānrājandeśānpañcagaṇāṃstataḥ //

sa devaprasthamāsādya senābindoḥ puraṃ prati /
balena caturaṅgeṇa niveśamakarotprabhuḥ //

sa taiḥ parivṛtaḥ sarvairviṣvagaśvaṃ narādhipam //
abhyagacchanmahātejāḥ pauravaṃ puruṣarṣabha //

vijitya cāhave śūrānpārvatīyānmahārathān /
jigāya senayā rājanpuraṃ pauravarakṣitam //

pauravaṃ yudhi nirjitya dasyūnparvatavāsinaḥ /
gaṇānutsavasaṅketānajayatsapta pāṇḍavaḥ //

tataḥ kāśmīrakānvīrānkṣatriyānkṣatriyarṣabhaḥ /
vyajayallohitaṃ caiva maṇḍalairdaśabhiḥ saha //

tatastrigartāḥ kaunteyaṃ dārvāḥ kokanadāstathā /
kṣatriyā bahavo rājannupāvartanta sarvaśaḥ //

abhisārīṃ tato ramyāṃ vijigye kurunandanaḥ /
uragāvāsinaṃ ramyaṃ rocamānaṃ raṇe'jayat //

tataḥ siṃhapuraṃ ramyaṃ citrāyudhasurakṣitam /
prādhamadbalamāsthāya pākaśāsanirāhave //

tataḥ suhyāṃśca colāṃśca kirīṭī pāṇḍavarṣabhaḥ /
sahitaḥ sarvasainyena prāmathatkurunandanaḥ //

tataḥ paramavikrānto bāhlīkānpākaśāsaniḥ /
mahatā parimardena vaśe cakre durāsadān //

gṛhītvā tu balaṃ sāraṃ phalgunaḥ pāṇḍunandanaḥ /
daradānsahakāmbhojairajayatpākaśāsaniḥ //

prāguttaraṃ diśaṃ ye ca vasantyāśritya dasyavaḥ /
nivasanti vane ye ca tānsarvānajayatprabhuḥ //

lohānparamakāmbhojānṛṣikānuttarānapi /
sahitāṃstānmahārāja vyajayatpākaśāsaniḥ //

ṛṣikeṣvapi saṅgrāme babhūvātibhayaṅkaraḥ /
tārakāmayasaṅkāśaḥ parastvṛṣikapārthayoḥ //

sa vijitya tato rājannṛṣikānraṇamūrdhani /
śukodarasamāṃstatra hayānaṣṭau samānayat //

mayūrasadṛśānanyānuttarānaparānapi /
javanānāśugāṃścaiva karārthaṃ samupānayat //

sa vinirjitya saṅgrāme himavantaṃ saniṣkṛṭam /
śvetaparvatamāsādya nyaviśatpuruṣarṣabhaḥ //