Mahabharata · Chapter 2.27

diśāmabhijayaṃ brahmanvistareṇānukīrtaya /
na hi tṛpyāmi pūrveṣāṃ śṛṇvānaścaritaṃ mahat //
vaiśampāyana uvāca /

dhanañjayasya vakṣyāmi vijayaṃ pūrvameva te /
yaugapadyena pārthairhi nirjiteyaṃ vasundharā //

avāpya rājā rājyārdhaṃ kuntīputro yudhiṣṭhiraḥ /
mahattve rājaśabdasya manaścakre mahāmanāḥ //

tadā kṣātraṃ viditvā'sya pṛthivīvijayaṃ prati /
amarṣātpārthivendrāṇāṃ taṃ sameyāya vārayat //

tatsametya bhuvaḥ kṣātraṃ rathanāgāśvapattimat /
abhyayātpārthivaṃ jiṣṇuṃ moghaṃ kartuṃ janādhipa //

tatpārthaḥ pārthivaṃ kṣātraṃ yuyutsuṃ paramāhave /
pratyudyayau mahābāhustarasā pākaśāsaniḥ //

tadbhagraṃ pārthivaṃ kṣātraṃ pārthenākliṣṭakarmaṇā /
vāyuneva ghanānīkaṃ tūlībhūtaṃ yayau diśaḥ //

tajjitvā pārthivaṃ kṣātraṃ samare paravīrahā /
yayau tadā vaśe kartumudīcīṃ pāṇḍunandanaḥ //

pūrvaṃ kuliṅgaviṣaye vaśe cakre mahīpatim /
dhanañjayo mahābāhurnātitīvreṇa karmaṇā //

tenaiva sahitaḥ prāyājjiṣṇuḥ sālvapuraṃ prati /
sa sālvapuramāsādya sālvarājaṃ dhanañjayaṭaḥ //

vikrameṇogradhanvānaṃ vaśe cakre mahāmanāḥ /
taṃ pārthaḥ sahasā jitvā dyumatsenaṃ mahīśvaram //

kṛtvā sa sainikaṃ prāyātkaṭadeśamarindamaḥ /
tatra pārtho raṇe jiṣṇuḥ sunābhaṃ vasudhādhipam //

vikrameṇa vaśe kṛtvā kṛtavānanusainikam /
etena sahito rājansavyasācī parantapaḥ //

vijigye śākaladvīpe prativindhyaṃ ca pārthivam /
śākaladvīpavāsāśca saptadvīpeṣu ye nṛpāḥ //

arjunasya ca sainyasthairvigrahastumulo'bhavat /
tānsarvānajayatpārto dharmarājapriyepsayā //

taireva sahitaḥ sarvaiḥ pragjyotiṣamupādravat //

tatra rājā mahānāsīdbhagadatto viśāmpate /
tenāsītsumahadyuddhaṃ pāṇḍavasya mahātmanaḥ //

sa kirātaiśca cīnaiśca vṛtaḥ prāgjyotiṣo'bhavat /
anyaiśca bahubhiryodhaiḥ sāgarānupavāsibhiḥ //

tataḥ sa divasānaṣṭau yodhayitvā dhanañjayam /
prahasannabravīdrājā saṅgrāmavigatakramam //

upapannaṃ mahābāho tvayi kauravanandana /
pākaśāsanadāyāde vīryamāhavaśobhini //

ahaṃ sakhā mahendrasya śakrādanavaro raṇe /
na śakṣyāmi ca te tāta sthātuṃ pramukhato yudhi //

tvamīpsitaṃ pāṇḍaveyaṃ brūhi kiṃ karavāṇi te /
yadvakṣyasi mahābāho tatkariṣyāmi putraka //
arjuna uvāca //

kurūṇāmṛṣabho rājā dharmaputro yudhiṣṭhiraḥ /
dharmajñaḥ satyasandhaśca yajvā vipuladakṣiṇaḥ //

tasya pārthivatāmīpse karastasmai pradīyatām / bhavānpitṛsakhaścaiva prīyamāṇo mayāpi ca /
tato nājñāpayāmi tvāṃ prītipūrvaṃ pradīyatām //
bhagadatta uvāca /

kuntīmātaryathā me tvaṃ tathā rājā yudhiṣṭhiraḥ /
sarvametatkariṣyāmi kiṃ cānyatkaravāṇi te //