Mahabharata · Chapter 2.26
ṛṣestadvacanaṃ smṛtvā niśaśvāsa yudhiṣṭhiraḥ / dharma dharmabhṛtāṃ śreṣṭhaḥ kartumicchanparantapaḥ /
tasyeṅgitajño bībhatsuḥ sarvaśastrabhṛtāṃ varaḥ /
saṃvivartayiṣuḥ kāmaṃ pāvakātpākaśāsaniḥ //
prāptaṃ prāpya dhanuḥ śreṣṭhamakṣayyau ca maheṣudhī /
rathaṃ dhvajaṃ sabhāṃ caiva yudhiṣṭhiramabhāṣata //
arjuna uvāca /
dhanurastraṃ śarā vīryaṃ pakṣo bhūmiryaśo balam /
prāptametanmayā rājanduṣprāpaṃ yadabhīpsitam //
tasya kṛtyamahaṃ manye kośasya parivardhanam /
karamāhārayiṣyāmi rājñaḥ sarvānnṛpottama //
vijayāya prayāsyāmi diśaṃ dhanadapālitām /
tithāvatha muhūrte ca nakṣatre cābhipūjite //
vaiśampāyana uvāca /
dhanañjayavacaḥ śrutvā dharmarājo yudhiṣṭhiraḥ snigdhagambhīranādinyāṃ taṃ girā pratyabhāṣata //
svasti vācyārhato viprānprayāhi bharatarṣabha /
durhṛdāmapraharṣāya suhṛdāṃ nandanāya ca //
vijayaste dhruvaṃ pārtha priyaṃ kāmamavāpsyasi /
ityuktaḥ prayayau pārthaḥ sainyena mahatā vṛtaḥ //
agnidattena divyena rathenādbhutakarmaṇā /
tathaiva bhīmaseno'pi yamau ca puruṣarṣabhau //
sasainyāḥ prayayuḥ sarve dharmarājena pūjitāḥ /
diśaṃ dhanapateriṣṭāmajayatpākaśāsaniḥ //
bhīmasenastathā prācīṃ sahadevastu dakṣiṇām /
pratīcīṃ nakulo rājandiśaṃ vyajayatāstravit //
khāṇḍavaprasthamadhyastho dharmarājo yudhiṣṭhiraḥ /
āsītparamayā lakṣmyā suhṛdgaṇavṛtaḥ prabhuḥ //
Original text: Mahābhārata (southern recension) · Edition: Śrīman Mahābhāratam, ed. T. R. Krishnacharya and T. R. Vyasacharya, Nirnaya Sagar Press, Bombay 1906–1910; e-text by SARIT (Shrinivasa Varakhedi and others) · SARIT: Search and Retrieval of Indic Texts · SARIT (e-text) via Internet Archive · CC BY-SA 3.0