Mahabharata · Chapter 16.12

tato rajanyāṃ vyuṣṭāyāṃ dhṛtarāṣṭroṃ'bikāsutaḥ /
viduraṃ preṣayāmāsa yudhiṣṭhiraniveśanam //

sa gatvā rājavacanāduvācācyutamīśvaram /
yudhiṣṭhi mahātejāḥ sarvabuddhimatāṃvaraḥ //

dhṛtarāṣṭro mahārājo vanavāsāya dīkṣitaḥ /
gamiṣyati vanaṃ rājannāgatāṃ kārtikīmimām //

sa tvāṃ kurukulaśreṣṭha kiñcirthamabhīpsati /
śrāddhamicchati dātuṃ sa gāṅgeyasya mahātmanaḥ //

droṇasya somadattasya bāhlīkasya ca dhīmataḥ / putrāṇāṃ caiva sarveṣāṃ ye cānye suhṛdo hatāḥ /
yadi cāpyanujānīṣe saindhavāpaśadasya ca //

etacchrutvā tu vacanaṃ vidurasya yudhiṣṭhiraḥ /
hṛṣṭaḥka sampūjayāmāsa guḍokeśaśca pāṇḍavaḥ //

na ca bhīmo ddaḍhakrodhastadvaco jagṛhe tadā /
vidurasya mahātejā duryodhanakṛtaṃ smaran //

abhiprāyaṃ viditvā tu bhīmatasenasya phalgunaḥ /
kirīṭī kiñcidānamya tamuvāca nararṣabham //

bhīma rājā pitā vṛddho vanavāsāya dīkṣitaḥ /
dātumicchati sarveṣāṃ suhṛdāmaurdhvadehikam //

bhavatā nirjitaṃ vittaṃ dātumicchati kauravaḥ /
bhīṣmādīnāṃ mahābāho tadanujñātumarhasi //

diṣṭyā tvadya mahābāho dhṛtarāṣṭraḥ prayācate /
yācito yaḥ purā'smābhiḥ paśya kālasya paryayam //

yosau pṛthivyāḥ kṛtsnāyā bhartā bhūtvā narādhipaḥ /
parairvinihatāmātyo vanaṃ gantumabhīpsati //

mā te'nyatpuruṣavyāghra dānādbhavatu darśanam /
ayaśasyamato'nyatsyādadharmaśca mahābhujaḥ //

rājānamupatiṣṭhasva jyeṣṭhaṃ bhrātaramīśvaram /
arhastvamasi dātuṃ vai nādātuṃ bharatarṣabha //

evaṃ bruvāṇaṃ bībhatsuṃ dharmarājo'pyapūjayat /
bhīmasenastu sakrodhamuvāca vijayaṃ tadā //

vayaṃ bhīṣmasya dāsyāmaḥ pretakāryaṃ tu phalguna /
somadattasya nṛpaterbhūriśravasa eva ca //

bāhlīkasya ca rājarṣerdroṇasya ca mahātmanaḥ /
anyeṣāṃ caiva suhṛdāṃ kuntī karṇāya dāsyati //

śrāddhāni puruṣavyāghra mā pradātkauravo nṛpaḥ /
iti me vartate buddhirmā vo nandantu śatravaḥ //

kaṣṭātkaṣṭataraṃ yāntu sarve duryodhanādayaḥ /
yairiyaṃ pṛthivī kṛtsnā ghātitā kulapāṃsanaiḥ //

kutastvamadya vismṛtya vairaṃ dvādaśavārṣikam /
ajñātavāsagamanaṃ draupadīśokavardhanam //

kva tadā dhṛtarāṣṭrasya sneho'smadgocaro gataḥ / kṛṣṇājinopasaṃvīto hṛtābharaṇabhūṣaṇaḥ /
sārdhaṃ pāñcālaputryā tvaṃ rājānamupajagmivān //

kva tadā droṇabhiṣmau tau somadattopi vā'bhavat / yatra dvādaśa varṣāṇi vane vanyena jīvatha /
na tadā tvāṃ pitā jyeṣṭhaḥ pitṛtvenābhivīkṣate //

kiṃ te tadvismṛtaṃ pārthaka yadeṣa kulapāṃsanaḥ /
durbuddhirviduraṃ prāha dyūte kiṃ jitamityuta //

tamevaṃvādinaṃ rājā kuntīputro yudhiṣṭhiraḥ /
uvāca vacanaṃ dhīmāñjoṣamāssveti bhartsayan //