Mahabharata · Chapter 14.15

sa samāśvāsya pitaraṃ prajñācakṣuṣamīśvaram /
anvaśāsata dharmātmā pṛthivīṃ bhrātṛbhiḥ saha //

yathā manurmahārājo rāmo dāśarathiryathā /
tathā bharatasiṃho'pi pālayāmāsa medinīm //

nādharmyamabhavattatra sarvo dharmarucirjanaḥ /
babhūva naraśārdūla yathā kṛtayuge tathā //

kalimāsannamāviṣṭaṃ nivārya nṛpanandanaḥ /
bhrātṛbhiḥ sahito dhīmānbabhau dharmabaloddhataḥ //

vavarṣa bhagavāndevaḥ kāle deśe yathepsitam /
nirāmayaṃ jagadabhūtkṣutpipāse na kiñcana //

ādhirnāsti manuṣyāṇāṃ vyasane nābhavanmatiḥ /
brāhmṇapramukhā varṇāste svadharmottarāḥ śubhāḥ //

dharmasatyapradhānāśca satyaṃ sadviṣayānvitam / dharmāsanasthaḥ sadbhiḥ sa strībālāturavṛddhakān /
varṇakramānpūrṇabhṛtānsākalyādrakṣaṇodyataḥ //

avṛttivṛttidānādyairyajñādyairvyādhitairapi /
āmuṣmikaṃ bhayaṃ nāsti laukikaṃ kṛtameva //

svargalokopamo lokastadā tasminpraśāsati /
babhūva sukhamevāgraṃ tadviśiṣṭataraṃ param //

nāryaḥ pativratāḥ sarvā rūpavatyaḥ svalankṛtāḥ /
yathoktavṛttāḥ svaguṇairbabhūvuḥ prītihetavaḥ //

pumāṃsaḥ puṇyaśīlāḍhyāḥ svaṃsvaṃ dharmamanuvratāḥ /
sukhinaḥ sūkṣmamapyeno na kurvanti kadācana //

sarve narāṃśca nāryaśca satataṃ priyavādinaḥ /
ajihmamanasaḥ śuklā babhūvuḥ śramavarjitāḥ //

bhūṣitāḥ kuṇḍalairhāraiḥ kaṭakaiḥ kaṭisūtrakaiḥ /
suvāsasaḥ sugandhāḍhyāḥ prāyaśaḥ pṛthivītale //

sarve brahmavido viprāḥ sarvatra pariniṣṭhitāḥ /
valīpalitahīnāstu sukhino dīrghadarśinaḥ //

icchā na jāyate'nyatra varṇeṣu na ca saṅkaraḥ /
manuṣyāṇāṃ mahārāja maryādā suvyavasthitā //

tasmiñśāsati rājendre mṛgavyālasarīsṛpāḥ /
anyonyamapi cānyeṣu na bādhante kadācana //

gāvaḥ sukṣīrabhūyiṣṭhāḥ susvavālamukhodarāḥ /
apīḍitāḥ karṣakādyairhṛtavyādhikavatsakāḥ //

avandhyakālā manujāḥ puruṣārtheṣu ca kramāt /
viṣayeṣvaniṣiddheṣu vedaśāstreṣu codyatāḥ //

suvṛttā vṛṣabhāḥ puṣṭā rasanābhāḥ sukhodayāḥ //

atīva madhuraḥ śabdaḥ sparśaścātisukhaṃ rasam /
karūpaṃ dṛṣṭikṣamaṃ ramyaṃ manojñaṃ gandhavadbabhau //

dharmārthakāmasaṃyuktaṃ mokṣābhyudayasādhanam /
prahlādajananaṃ puṇyaṃ sambabhūvātha mānasam //

sthāvarā bahupuṣpāḍhyāḥ phalacchāyāvahāstathā /
susparśā viṣahīnāśca supatratvakprarohiṇaḥ //

manonukūlāḥ sarveṣāṃ ceṣṭābhūtāpavarjitāḥ /
tathā babhūva rājarṣistadvṛttamabhavadbhuvi //

sarvalakṣaṇasampannāḥ pāṇḍavā dharmacāriṇaḥ /
jyeṣṭhānuvartinaḥ sarve babhūvuḥ priyadarśanāḥ //

siṃhoraskā jitakrodhāstejobalasamanvitāḥ /
ājānubāhavaḥ sarve dānaśīlā jitendriyāḥ //

teṣu śāsatsu dharaṇīmṛtavaḥ svaguṇairbabhuḥ /
sukhodayāya vartante grahāstārāgaṇaiḥ saha //

mahī ca sasyabahulā sarvaratnaguṇodayā /
kāmadhugdhenuvadbhogānphalanti sma sahasradhā //

manvādibhiḥ kṛtāḥ pūrvaṃ maryādā mānaveṣu yāḥ / anatikramya tāḥ sarvāḥ kuleṣu samayāni ca /
anvaśāsata rājāno dharmaputrapriyankarāḥ //

mahākulāni dharmiṣṭhā vardhayanto viśeṣataḥ /
manupraṇītayā vṛttyā te'nvaśāsanasundharām //

rājavṛttirhi sā śaśvaddharmiṣṭhā'bhūnmahītale /
prāyo lokamatistāna rājavṛttānugāminī //

evaṃ bhāratavarṣaṃ svaṃ rājā svargaṃ surendravat /
śaśāsa jiṣṇunā sārdhaṃ gotrāṃ gāṇḍīvadhanvana //