Mahabharata · Chapter 13.80

kanyāyāṃ prāptaśulkāyāṃ patiścennāsti kaścana /
tatra kā pratipattiḥ syāttanme brūhi pitāmaha //
bhīṣma uvāca /

yā putrakasya ṛddhasya pratipālyā tadā bhavet /
athavā sā harecchulkaṃ krītā śulkapradasya sā //

tasyārthe'patyamīheva yena nyāyena śaknuyāt /
na tasmānmantravatkāryaṃ kaścitkurvīta kiñcana //

svayaṃvṛtena sājñaptā pitrā vai pratyapadyata /
tattasyānye praśaṃsanti dharmajñā netare janāḥ //

etattu nāpare cakrurapare jātu sādhavaḥ /
sādhūnāṃ punarācāro garīyāndharmalakṣaṇaḥ //

asminneva prakāre tusukraturvākyamabravīt /
naptā videharājasya janakasya mahātmanaḥ //

asadācarite mārge kathaṃ syādanukīrtanam /
anupraśnaḥ saṃśayo vā satāmevamupālabhet //

asadeva hi dharmasya pradānaṃ dharma āsuraḥ /
nānuśuśruma jātvenāmimāṃ pūrveṣu karmasu //

bhāryāpatyorhi sambandhaḥ strīpuṃsostulya eva tu /
ratiḥ sādhāraṇo dharma iti cāha sa pārthivaḥ //
yudhiṣṭhira uvāca /

atha kena pramāṇena puṃsāmādīyate dhanam /
putravaddhi pitustasya kanyā bhavitumarhati //
bhīṣma uvāca /

yathaivātmā tathā putraḥ putreṇa duhitā samā /
tasyāmātmani tiṣṭhantyāṃ kathamanyo dhanaṃ haret //

mātuśca yautakaṃ yatsyātkumārībhāga eva saḥ /
dauhitra eva tadrikthamaputrasya piturharet //

dadāti hi sa piṇḍānvai piturmātāmahasya ca /
putradauhitrayoreva viśeṣo nāsti dharmataḥ //

anyatra jāmayā sārdhaṃ prajānāṃ putra īhate /
duhitā'nyatra jātena putreṇāpi viśiṣyate //

dauhitrakeṇa dharmeṇa tatra paśyāmi kāraṇam /
vikrītāsu hi ye putrā bhavanti pitureva te //

asūyavastvadharmiṣṭhāḥ parasvādāyinaḥ śaṭhāḥ /
āsurādadhisambhūtā dharmādviṣamavṛttayaḥ //

atra gāthā yamodgītāḥ kīrtayanti purāvidaḥ /
dharmajñā dharmaśāstreṣu nibaddhā dharmasetuṣu //

yo manuṣyaḥ svakaṃ putraṃ vikrīya dhanamicchati /
kanyāṃ vā jīvitārthāya yaḥ śulkena prayacchati //

saptāvare mahāghore niraye kālasāhvaye /
svedaṃ mūtraṃ purīṣaṃ ca tasminmūḍhaḥ samaśnute //

ārṣe gomithunaṃ śulkaṃ kecidāhurmṛṣaiva tat /
alpo vā bahu vā rājanvikrayastāvadeva saḥ //

yadyapyācaritaḥ kaiścinnaiṣa dharmaḥ sanātanaḥ /
anyeṣāmapi dṛśyante lobhataḥ sampravṛttayaḥ //

vaśyāṃ kumārīṃ balato ye tāṃ samupabhuñjate /
ete pāpasya kartārastamasyandhe ca śerate //

anyopyatha na vikreyo manuṣyaḥ kiṃ punaḥ prajāḥ /
adharmamūlairhi dhanaistairna dharmo'tha kaścana //