Mahabharata · Chapter 13.4

evamukto mataṅgastu saṃśitātmā yatavrataḥ /
atiṣṭhadekapādena varṣāṇāṃ śatamacyutaḥ //

tamuvāca tataḥ śakraḥ punareva mahāyaśāḥ /
brāhmaṇyaṃ durlabhaṃ tāta prārthayāno na lapsyase //

mataṅga paramaṃ sthānaṃ prārthayanvinaśiṣyasi /
mā kṛthāḥ sāhasaṃ putra naiṣa dharmapathastava //

vimārgato mārgamāṇaḥ sarvathā nabhaviṣyasi / na hi śakyaṃ tvayā prāptuṃ brāhmaṇyamiha durmate /
aprāpyaṃ prārthayāno hi nacirādvinaśiṣyasi //

mataṅga paramaṃ sthānaṃ vāryamāṇo'sakṛnmayā /
cikīrṣasyeva tapasā sarvathā nabhaviṣyasi //

tiryagyonigataḥ sarvo mānuṣyaṃ yadi gacchati /
sa jāyate pulkaso vā caṇḍālo vā'pyasaṃśayaḥ //

pulkasaḥ pāpayonirvā yaḥ kaścidiha lakṣyate /
sa tasyāmeva suciraṃ mataṅga parivartate //

tato daśaśate kāle labhate śūdratāmapi /
śūdrayonāvapi tato bahuśaḥ parivartate //

tatastriṃśadgaṇe kāle labhate vaiśyatāmapi / vaiśyatāyāṃ ciraṃ kālaṃ tatraiva parivartate /
tataḥ ṣaṣṭiguṇe kāle rājanyo nāma jāyate //

tataḥ ṣaṣṭiguṇe kāle labhate brahmabandhutām /
brahmabandhuściraṃ kālaṃ tatastu parivartate //

tatastu dviśate kāle labhate kāṇḍapṛṣṭhatām /
kāṇḍapṛṣṭhaściraṃ kālaṃ tatraiva parivartate //

tatastu triśate kāle labhate japatāmapi /
taṃ ca prāpya ciraṃ kālaṃ tatraiva parivartate //

tataścatuḥśate kāle śrotriyo nāma jāyate /
śrotriyatve ciraṃ kālaṃ tatraiva parivartate //

tadevaṃ śokaharṣau tu kāmadveṣau ca putraka /
atimānātivādau ca praviśete dvijādhamam //

tāṃścejjayati śatrūnsa tadā prāpnoti sadgatim /
atha te vai jayantyenaṃ tālaṃ pakvamivāpatet //

mataṅga sampradhāryaivaṃ yadahaṃ tvāmacūcudam /
vṛṇīṣva kāmamanyaṃ tvaṃ brāhmaṇyaṃ hi sudurlabham //