Mahabharata · Chapter 13.140

dvijātayo vratopetā haviste yadi bhuñjate /
annaṃ brāhmaṇakāmāya kathametatpitāmaha //
bhīṣma uvāca /

avedoktavratāścaiva bhuñjānāḥ kāmakāraṇe /
vedokteṣu tu bhuñjānā vrataluptā yudhiṣṭhira //
yudhiṣṭhira uvāca /

yadidaṃ tapa ityāhurupavāsaṃ pṛthagjanāḥ /
tapaḥ syādetadeveha tapo'nyadvā'pi kiṃ bhavet //
bhīṣma uvāca /

māsārdhamāsopavāsādyattapo manyate janaḥ /
ātmatantropaghātī yo na tapasvī na dharmavit //

tyāgasya cāpi sampattiḥ śiṣyate tapa uttamam /
sadopavāsī ca bhavedbrahmacārī tathaiva ca //

muniśca syātsadā vipro devāṃścaiva sadā yajet /
kuṭumbiko dharmakāmaḥ sadā'svapnaśca mānavaḥ //

amṛtāśī sadā ca syātpavitraṃ ca sadā paṭhet /
ṛtavādī sadā ca syānniyataśca sadā bhavet //

vighasāśī kathaṃ ca syātsadā caivātithipriyaḥ /
amṛtāśī sadā ca syātpavitrī ca sadā bhavet //
yudhiṣṭhira uvāca /

kathaṃ sadopavāsī syādbrahmacārī ca pārthiva /
vighasāśī kathaṃ ca syātkathaṃ caivātithipriyaḥ //
bhīṣma uvāca /

antarā sāyamāśaṃ ca prātarāśaṃ ca yo naraḥ /
sadopavāsī bhavati yo na bhuṅkte'ntarā punaḥ //

bhāryā gacchanbrahmacārī ṛtau bhavati caiva ha /
ṛtavādī sadā ca syāddānaśīlastu mānavaḥ //

abhakṣayanvṛthā māṃsamamāṃsāśī bhavatyuta /
dānaṃ dadatpavitrī syādasvapnaśca divā'svapan //

bhṛtyātithiṣu yo bhuṅkte bhuktavatsu naraḥ sadā /
amṛtaṃ kevalaṃ bhuṅkte iti viddhi yudhiṣṭhira //

abhuktavatsu nāśnāti brāhmaṇeṣu tu yo naraḥ /
abhojanena tenāsya jitaḥ svargo bhavatyuta //

devebhyaśca pitṛbhyaśca saṃśritebhyastathaiva ca /
avaśiṣṭāni yo bhuṅkte tamāhurvighasāśinam //

teṣāṃ lokā hyaparyantāḥ sadane brahmaṇaḥ smṛtāḥ /
upasthitā hyapsaraso gandharvaiśca janādhipa //

devatātithibhiḥ sārdhaṃ pitṛbhiścopabhuñjate /
ramante putrapautraiśca teṣāṃ gatiranuttamā //