Mahabharata · Chapter 13.134

cāturvarṇyasya dharmātmandharmāḥ proktā yathā tvayā /
tathaiva me śrāddhavidhiṃ kṛtsnaṃ prabrūhi pārthiva //
vaiśampāyana uvāca /

yudhiṣṭhireṇaivamukto bhīṣmaḥ śāntanavastadā /
imaṃ śrāddhavidhiṃ kṛtsnaṃ vaktuṃ samupacakrame //
bhīṣma uvāca /

śṛṇuṣvāvahito rājañśrāddhakarmavidhiṃ śubham /
dhanyaṃ yaśasyaṃ putrīyaṃ pitṛyajñaṃ parantapa //

devāsuramanuṣyāṇāṃ gandharvoragarakṣasām /
piśācakinnarāṇāṃ ca pūjyā vai pitaraḥ sadā //

pitṝnpūjyāditaḥ paścāddevatāstarpayanti vai /
tasmāttānsarvayatnena puruṣaḥ pūjayetsadā //

anvāhāryaṃ mahārāja pitṝṇāṃ śrāddhamucyate /
tasmādviśeṣavidhinā vidhiḥ prathamakalpitaḥ //

sarveṣvahaḥsu prīyante kṛte śrāddhe pitāmahāḥ / piṇḍānvāhāryakaṃ śrāddhaṃ kuryānmāsānumāsikam /
pitṛyajñaṃ tu nirvartya vipraścandrakṣaye'gnimān //

piṇḍānāṃ māsikaśrāddhamanvāhāryaṃ vidurbudhāḥ / tadāmiṣeṇa kurvīta prayataḥ prāñjaliḥ śuciḥ //

pravakṣyāmi tu te sarvāṃstithyāntithyāṃ dine guṇān / yeṣvahaḥsu kṛtaiḥ śrāddhairyatphalaṃ prāpyate'nagha /
tatsarvaṃ kīrtayiṣyāmi yathāvattannibodha me //

pitṝnarcya pratipadi prāpnuyātsvagṛhe striyaḥ /
abhirūpaprajāyinyo darśanīyā bahuprajāḥ //

striyo dvitīyāṃ jāyante tṛtīyāyāṃ tu vājinaḥ /
caturthyāṃ kṣudrapaśavo bhavanti bahavo gṛhe //

pañcamyāṃ bahavaḥ putrā jāyante kurvatāṃ nṛpa /
kurvāṇāstu narāḥ ṣaṣṭhyāṃ bhavanti dyutibhāginaḥ //

kṛṣibhāgī bhavecchrāddhaṃ kurvāṇaḥ saptamīṃ nṛpa /
aṣṭamyāṃ tu prakurvāṇo vāṇijye lābhamāpnuyāt //

navamyāṃ kurvataḥ śrāddhaṃ bhavatyekaśaphaṃ bahu /
vivardhante tu daśamīṃ gāvaḥ śrāddhāni kurvataḥ //

kupyabhāgī bhavenmartyaḥ kurvannekādaśīṃ nṛpa /
brahmavarcasvinaḥ putrā jāyante tasya veśmani //

dvādaśyāmīhamānasya nityameva pradṛśyate /
rajataṃ bahuvittaṃ ca suvarṇaṃ ca manoramam //

jñātīnāṃ tu bhavecchreṣṭhaḥ kurvañśrāddhaṃ trayodaśīm //

avaśyaṃ tu yuvāno'sya pramīyante narā gṛhe /
yuddhabhāgī bhavenmartyaḥ kurvañśrāddhaṃ caturdaśīm //

amāvāsyāṃ tu nivapansarvakāmānavāpnuyāt //

kṛṣṇapakṣe daśamyādau varjayitvā caturdaśīm /
śrāddhakarmaṇi tithyastu praśastā na tathetarāḥ //

yathā caivāparaḥ pakṣaḥ pūrvapakṣādviśiṣyate /
tathā śrāddhasya pūrvāhṇādaparāhṇo viśiṣyate //