Mahabharata · Chapter 13.127

kena varṇavibhāgena vijñeyā kapilā bhavet /
kati vā lakṣaṇānyasyā dṛṣṭāni munibhiḥ purā //
śrīvyāsa uvāca /

śṛṇu tāta yathā goṣu vijñeyā kapilā bhavet / netrayoḥ śṛṅgayoścaiva khureṣu vṛṣaṇeṣu ca /
karṇato ghrāṇataścāpi ṣaḍvidhāḥ kapilāḥ smṛtāḥ //

eteṣāṃ lakṣaṇānāṃ tu yadyekamapi dṛśyate /
kapilāṃ tāṃ vijānīyādevamāhurmanīṣiṇaḥ //

āgneyī netrakapilā khurairmāheśvarī bhavet /
grīvāyāṃ vaiṣṇavī jñeyā pūṣṇo ghrāṇādajāyata //

karṇatastu vasantena svayonimabhijāyate /
gāyatryāśca vṛṣaṇayorutpattiḥ ṣaḍguṇā smṛtā //

evaṃ gāvaśca viprāśca gāyatrī satyameva ca /
vasantaśca suvarṇaśca ekataḥ samajāyata //

netrayoḥ kapilāṃ yastu vāhayeta duheta vā /
sa pāpakarmā narakaṃ pratiṣṭhāṃ pratipadyate //

narakādvipramuktastu tiryagyoniṃ niṣevate /
yadā labheta mānuṣyaṃ jātyandho jāyate naraḥ //

śṛṅgayoḥ kapilāṃ yastu vāhayeta duheta vā /
tiryagyoniṃ sa labhate jāyamānaḥ punaḥ punaḥ //

khureṣu kapilāṃ yastu vāhayeta duheta vā /
tamasyapāre majjeta dhanahīno narādhamaḥ //

kapilāṃ vāladhāneṣu vāhayeta duheta vā /
nirāśrayaḥ sadā caiva jāyate yadi cetkṛmiḥ //

karṇena kapilāṃ yastu jānannapyupajīvati / sahasraśaḥ śucirbhutvā mānuṣyaṃ prāpnuyādatha /
caṇḍālaḥ pāpayoniśca jāyate sa narādhamaḥ //

ghrāṇena kapilāṃ yastu pramādādupajīvati /
so'pi varṣasahasrāṇi tiryagyonau prajāyate //

vyādhigrasto jaḍo rogī bhavenmānuṣyamāgataḥ //

madhusarpissugandhāstu kapilāḥ śāstrataḥ smṛtāḥ /
etāḥ samupajīveta so'pi tiryakṣu jāyate //

sthāvaratvamanuprāpto yadi mānuṣyatāṃ labhet /
alpāyuḥ sa bhavejjāto hīnavarṇakulodbhavaḥ //

ye tu pāpā hyasūyante kapilāṃ vāhayanti ca /
nirayeṣu pratiṣṭhante yāvadābhūtasamplavam //