Mahabharata · Chapter 13.125

kṣatriyāścaiva śūdrāśca mantrahīnāśca ye dvijāḥ /
kapilāmupajīvanti kathametatpitarbhavet //
śrīvyāsa uvāca /

kṣatriyāścaiva śūdrāśca mantrahīnāśca ye dvijāḥ /
kapilāmupajīvanti teṣāṃ vakṣyāmi nirṇayam //

kapilāstūttamā loke goṣu caivottamā matāḥ /
tāsāṃ dātā labhetsvargaṃ vidhinā yaśca sevate //

spṛśeta kapilāṃ yastu daṇḍena caraṇena vā /
sa tena sparśamātreṇa narakāyopapadyate //

mantreṇa yuñjyātkapilāṃ mantreṇaiva pramuñcate /
mantrihīnaṃ tu yo yuñjātkṛmiyonau prasūyate //

prahārāhatamarmāṅgā duḥkhena ca jaḍīkṛtā /
padāni yāvadgaccheta tāvallokānkṛmirbhavet //

yāvanto bindavastasyāḥ śoṇitasya kṣitiṃ gatāḥ /
tāvadvarṣasahasrāṇi narakaṃ pratipadyate //

mantreṇa yuñjyātkapilāṃ mantreṇa viniyojayet /
mantrahīnairanuyuto mañjayettamasi prabho //

kapilāṃ ye'pi jīvanti buddhimohānvitā narāḥ /
te'pi varṣasahasrāṇi patanti narake nṛpa //

atha nyāyena ye viprāḥ kapilāmupayuñjate /
tasmiṃlloke pramodante lokāścaiṣāmanāmayāḥ //

vidhinā ye na kurvanti śūdrāstānupadhāraya //