Mahabharata · Chapter 13.114

śataṃ varṣasahasrāṇāṃ tapastaptaṃ suduṣkaram /
gobhiḥ pūrvaṃ visṛṣṭābhirgacchema śreṣṭhatāmiti //

loke'smindakṣiṇānāṃ ca sarvāsāṃ vayamuttamāḥ /
bhavema na ca lopyema doṣeṇeti parantapa //

asmatpurīṣasnānena janaḥ puyeta sarvadā /
śakṛtā ca pavitrārthaṃ kurvīrandevamānuṣāḥṭha //

tathā sarvāṇi bhūtāni sthāvarāṇi carāṇi ca /
pradātāraśca lokānno gaccheyuriti mānada //

tābhyo varaṃ dadau brahmā tapaso'nte svayaṃ prabhuḥ /
evaṃ bhavanviti vibhurlokāṃstārayateti ca //

uttasthuḥ siddhakāmāstā bhūtabhavyasya mātaraḥ /
tapaso'nte mahārāja gāvo lokaparāyaṇāḥ //

tasmādgāvo mahābhāgāḥ pavitraṃ paramucyate /
tathaiva sarvabhūtānāṃ samatiṣṭhanta mūrdhani //

sammanavatsāṃ kapilāṃ dhenuṃ dattvā payasvinīm //
suvratāṃ vastrasaṃvītāṃ brahmaloke mahīyate //

lohitāṃ tulyavatsāṃ tu dhenuṃ dattvā payasvinīm /
suvratāṃ vastrasaṃvītāṃ sūryaloke mahīyate //

samānavatsāṃ śabalāṃ dhenuṃ dattvā payasvinīm /
suvratāṃ vastrasaṃvītīṃ somaloke mahīyate //

samānavatsāṃ śvetāṃ tu dhenuṃ dattvā payasvinīm /
suvratāṃ vastrasaṃvītāmindraloke mahīyate //

samānavatsāṃ kṛṣṇāṃ tu dhenu dattvā payasvinīm /
suvratāṃ vastrasaṃvītāmagniloke mahīyate //

samānavatsāṃ dhūmrāṃ tu dhenuṃ dattvā payasvinīm /
suvratāṃ vastrasaṃvītāṃ yāmyaloke mahīyate //

apāṃ phenasavarṇāṃ tu savatsāṃ kāṃsyadohanām /
pradāya vastrasaṃvītāṃ vāruṇaṃ lokamāpnute //

vātareṇusavarṇāṃ tu savatsāṃ kāṃsyadohanām /
pradāya vastrasaṃvītāṃ vāyuloke mahīyate //

hiraṇyavarṇāṃ piṅgākṣīṃ savatsāṃ kāṃsyadohanām /
pradāya vastrasaṃvītāṃ kauberaṃ lokamaśnute //

palāladhūmravarṇāṃ tu savatsāṃ kāṃsyadohanām /
pradāya vastrasaṃvītāṃ pitṛloke mahīyate //

savatsāṃ pīvarīṃ dattvā dṛtikaṇṭhāmalaṅkṛtām /
vaiśvadevamasambādhaṃ sthānaṃ śreṣṭhaṃ prapadyate //

samānavatsāṃ gaurīṃ tu dhenuṃ dattvā payasvinīm /
suvratāṃ vastrasaṃvītāṃ vasūnāṃ lokamāpnuyāt //

pāṇḍukambalavarṇābhāṃ savatsāṃ kāṃsyakadohanām /
pradāya vastrasaṃvītāṃ sādhyānāṃ lokamāpnute //

vairāṭapṛṣṭhamukṣāṇaṃ sarvaratnairalaṅkṛtam /
pradadanmarutāṃ lokānsa rājanpratipadyate //

vatsopapannāṃ nīlāṃ gāṃ sarvaratnasamanvitām /
gandharvāpsarasāṃ lokāndattvā prāpnoti mānavaḥ //

dṛtikaṇṭhamanaḍvāhaṃ sarvaratnairalaṅkṛtam /
dattvā prajāpaterlokānviśokaḥ pratipadyate //

gopradānarato yāti bhittvā jaladasañcayān /
vimānenārkavarṇena divi rājanvirājatā //

taṃ coruveṣāḥ suśroṇyaḥ sahasraṃ vārayopitaḥ /
ramayanti naraśreṣṭhaṃ gopradānarataṃ naram //

vīṇānāṃ vallakīnāṃ ca nū purāṇāṃ ca śiñjitaiḥ /
hāsaiśca hariṇākṣīṇāṃ suptaḥ supratibodhyate //

yāvanti romāṇi bhavanti dhenvā- stāvanti varṣāṇi mahīyate saḥ /
svargacyutaścāpi tato nṛloke kule prasūto vipule viśokaḥ //