Mahabharata · Chapter 12.330

yadyasti dattamiṣṭaṃ vā tapastaptaṃ tathaiva ca /
gurūṇāṃ vā'pi śuśrūṣā tanme brūhi pitāmaha //
bhīṣma uvāca /

ātmanā'narthayuktena pāpe niviśate manaḥ /
sa karma kaluṣaṃ kṛtvā kleśe mahati dhīyate //

durbhikṣādeva durbhikṣaṃ kleśātkleśaṃ bhayādbhayam /
mṛtebhyaḥ pramṛtā yānti daridrāḥ pāpakarmiṇaḥ //

utsavādutsavaṃ yānti svargātsvargaṃ sukhātsukham /
śraddadhānāśca dāntāśca dhanasyāḥ śubhakāriṇaḥ //

vyālakuñjaradurgeṣu sarpacorabhayeṣu ca /
hastāvāpena gacchanti nāstikāḥ kimataḥ param //

priyadevātitheyāśca vadānyāḥ priyasādhavaḥ /
kṣemyamātmavatā mārgamāsthitā hastadakṣiṇāḥ //

pulākā iva dhānyeṣu pūtyaṇḍā iva pakṣiṣu /
tadvidhāste manuṣyeṣu yeṣāṃ dharmo na kāraṇam //

suśīghramapi dhāvantaṃ vidhānamanudhāvati /
śete saha śayānena yenayena yathākṛtam //

pāpaṃ tiṣṭhati tiṣṭhantaṃ dhāvantamanudhāvati /
karoti kurvataḥ karma cchāyevānuvidhīyate //

yenayena yathā yadyatpurā karma suniścitam /
tattadeva naro bhuṅkte nityaṃ vihitamātmanā //

samānakarmanikṣepaṃ vidhānaparirakṣaṇam /
bhūtagrāmamimaṃ kālaḥ samantādapakarṣati //

acodyamānāni yathā puṣpāṇi ca phalāni ca /
svaṃ kālaṃ nātivartante tathā karma purākṛtam //

samānaścāvamānaśca lābhālābhau jayājayau /
pravṛttā na nivartante nidhanāntāḥ padepade //

ātmanā vihitaṃ duḥkhamātmanā vihitaṃ sukham /
garbhaśayyāmupādāya bhajate pūrvadehikam //

bālo yuvā vā vṛddhaśca yatkaroti śubhāśubham /
tasyāntasyāmavasthāyāṃ bhuṅkte janmanijanmani //

yathā dhenusahasreṣu vatso vindati mātaram /
tathā pūrvakṛtaṃ karma kartāramanugacchati //

malinaṃ hi yathā vastraṃ paścācchudhyati vāriṇā /
upavāsaiḥ prataptānāṃ dīrghaṃ sukhamanantakam //

dīrghakālena tapasā sevitena tapovane /
dharmanirdhūtapāpānāṃ saṃsidhyante manorathāḥ //

śakunānāmivākāśe matsyānāmiva codake /
padaṃ yathā na dṛśyeta tathā puṇyakṛtāṃ gatiḥ //

alamanyairupālabdhaiḥ kīrtitaiśca vyatikramaiḥ /
peśalaṃ cānurūpaṃ ca kartavyaṃ hitamātmanaḥ //