Mahabharata · Chapter 12.297

manoratharathaṃ prāpya indriyārthahayaṃ naraḥ /
raśmibhirjñānasambhūtairyo gacchati sa buddhimān //

sevāśritena manasā vṛttihīnasya śasyate /
dvijātihastānnirvṛttā na tu tulyātparasparāt //

āyurnasulabhaṃ labdhvā nāvakarṣedviśāmpate /
utkarṣārthaṃ prayatate naraḥ puṇyena karmaṇā //

varṇebhyo hi paribhraṣṭo na vai sammānamarhati /
na tu yaḥ satkriyāṃ prāpya rājasaṃ karma sevate //

varṇotkarṣamavāpnoti naraḥ puṇyena karmaṇā /
durlabhaṃ tamalabdhā hi hanyātpāpena karmaṇā //

ajñānāddhi kṛtaṃ pāpaṃ tapasaivābhinirṇudet / pāpaṃ hi karma phalati pāpameva svayankṛtam /
tasmātpāpaṃ na seveta karma duḥkhaphalodayam //

pāpānubandhaṃ yatkarma yadyapi syānmahāphalam /
tanna seveta medhāvī śuciḥ kuśalinaṃ yathā //

kinkaṣṭamanupaśyāmi phalaṃ pāpasya karmaṇaḥ /
pratyāpannasya hi tato nātmā tāvadvirocate //

pratyāpattiśca yasyeha bāliśasya na jāyate /
tasyāpi sumahāṃstāpaḥ prasthitasyopajāyate //

viraktaṃ śodhyate vastraṃ na tu kṛṣṇopasaṃhitam /
prayatnena manuṣyendra pāpamevaṃ nibodha me //

svayaṃ kṛtvā tu yaḥ pāpaṃ śubhamevānutiṣṭhati /
prāyaścittaṃ naraḥ kartumubhayaṃ so'śnute pṛthak //

ajñānāttu kṛtāṃ hiṃsāmahiṃsā vyapakarṣati /
brāhmaṇāḥ śāstranirdeśādityāhurbrahmavādinaḥ //

tathā kāmakṛtaṃ nāsya vihiṃsaivānukarṣati /
ityāhurbrahmaśāstrajñā brāhmaṇā brahmavādinaḥ //

ahaṃ tu tāvatpaśyāmi karma yaddhartate kṛtam /
guṇayuktaṃ prakāśaṃ vā pāpenānupasaṃhitam //

yathā sūkṣmāṇi karmāṇi phalantīha yathātatham /
buddhiyuktāni tānīha kṛtāni manasā saha //

bhavatyalpaphalaṃ karma sevitaṃ nityamulvaṇam /
abuddhipūrvaṃ dharmajña kṛtamugreṇa karmaṇā //

kṛtāni yāni karmāṇi daivatairmunibhistathā /
na carettāni dharmātmā śrutvā cāpi na kutsayet //

sañcintya manasā rājanviditvā śaktimātmanaḥ /
karoti yaḥ śubhaṃ karma sa vai bhadrāṇi paśyati //

nave kapāle salilaṃ sannyastaṃ hīyate yathā /
navetare tathā bhāvaṃ prāpnoti sukhabhāvitam //

satoye'nyattu yattoyaṃ tasminneva prasicyate /
taddhi vṛddhimavāpnoti salile salilaṃ yathā //

evaṃ karmāṇi yānīha buddhiyuktāni pārthiva /
samāni caiva yānīha tāni puṇyatamānyapi //

rājñā jetavyāḥ śatravaśconnatāśca samyakkartavyaṃ pālanaṃ ca prajānām /
agniśceyo bahubhiścāpi yajñai rantye madhye vā vanamāśritya stheyam //

damānvitaḥ puruṣo dharmaśīlo bhūtāni cātmānamivānupaśyet /
garīyasaḥ pūjayedātmaśaktyā satyena śīlena sukhaṃ narendra //