Mahabharata · Chapter 12.195

gatīnāmuttamā prāptiḥ kathitā jāpakeṣviha /
ekaivaiṣā gatisteṣāmuta yāntyaparāmapi //
bhīṣma uvāca /

śṛṇu vahito rājañjāpakānāṃ gatiṃ vibho /
yathā gacchanti nirayamanekaṃ puruṣarṣabha //

yathoktametatpūrvaṃ yo nānutiṣṭhati jāpakaḥ //
ekadeśakriyaścātra nirayaṃ sa nigacchati //

avamānena kurute na tuṣyati na śocati /
īdṛśo jāpako yāti nirayaṃ nātra saṃśayaḥ //

ahankārakṛtaścaiva sarve nirayagrāminaḥ /
parāvamānī puruṣo bhavitā nirayopagaḥ //

abhidhyāpūrvakaṃ japyaṃ kurute yaśca mohitaḥ /
yatrāsya rāgaḥ patati tatratatropapadyate //

athaiśvaryaprasaktaḥ sañjāpako yatra rajyate /
sa eva nirayastasya nāsau tasmātpramucyate //

rāgeṇa jāpako japyaṃ kurute yaśca mohitaḥ /
yatrāsya rāgaḥ patati tatra tatropajāyate //

durbuddhirakṛtaprajñaścale manasi tiṣṭhati /
phalasyāpacitiṃ yāti nirayaṃ cādhigacchati //

akṛtavrajñako bālo mohaṃ gacchati jāpakaḥ /
sa mohānnirayaṃ yāti yatra gatvā'nuśocati //

dṛḍhagrāhī karomīti jāpyaṃ japati jāpakaḥ /
na sampūrṇo na vā yukto nirayaṃ so'dhigacchati //

animittaṃ paraṃ yattadavyaktaṃ brahmaṇi sthitam /
tadbhūto jāpakaḥ kasmātsaśarīramihāviśet //

duṣprajñānena nirayā bahavaḥ samudāhṛtāḥ /
praśastaṃ jāpakatvaṃ ca doṣāścaite tadātmakāḥ //