Mahabharata · Chapter 1.67

brahmaṇo mānasāḥ putrā viditāḥ ṣaṇmaharṣayaḥ /
ekādaśa sutāḥ sthāṇoḥ khyātāḥ paramatejasaḥ //

mṛgavyādhaśca sarpaśca nirṛtiśca mahāyaśāḥ /
ajaikapādahirbidhnyaḥ pinākī ca parantapaḥ //

dahano'theśvaraścaiva kapālī ca mahādyutiḥ /
sthāṇurbhagaśca bhagavān rudrā ekādaśa smṛtāḥ //

marīciraṅgirā atriḥ pulastyaḥ pulahaḥ kratuḥ /
ṣaḍete brahmaṇaḥ putrā vīryavanto maharṣayaḥ //

trayastvaṅgirasaḥ putrā loke sarvatra viśrutāḥ /
bṛhaspatirutathyaśca saṃvartaśca dhṛtavratāḥ //

atrestu bahavaḥ putrāḥ śrūyante manujādhipa /
sarve vedavidaḥ siddhāḥ śāntātmāno maharṣayaḥ //

rākṣasāśca pulastyasya vānarāḥ kinnarāstathā /
yakṣāśca manujavyāghra putrāstasya ca dhīmataḥ //

pulahasya sutā rājañśarabhāśca prakīrtitāḥ /
siṃhāḥ kipuruṣā vyāghrā ṛkṣā īhāmṛgāstathā //

kratoḥ kratusamāḥ putrāḥ pataṅgasahacāriṇaḥ /
viśrutāstriṣu lokeṣu satyavrataparāyaṇāḥ //

dakṣastvajāyatāṅguṣṭhāddakṣiṇādbhagavānṛṣiḥ /
brahmaṇaḥ pṛthivīpāla śāntātmā sumahātapāḥ //

vāmādajāyatāṅguṣṭhādbhāryā tasya mahātmanaḥ /
tasyāṃ pañcāśataṃ kanyāḥ sa evājanayanmuniḥ //

tāḥ sarvāstvanavadyāṅgyaḥ kanyāḥ kamalalocanāḥ /
putrikāḥ sthāpayāmāsa naṣṭaputraḥ prajāpatiḥ //

dadau sa daśa dharmāya saptaviṃśatimindave /
divyena vidhinā rājankaśyapāya trayodaśa //

nāmato dharmapatnyastāḥ kīrtyamānā nibodha me /
kīrtirlakṣmīrdhṛtirmedhā puṣṭiḥ śraddhā kriyā tathā //

buddhirlajjā matiścaiva patnyo dharmasya tā daśa /
dvārāṇyetāni dharmasya vihitāni svayambhuvā //

saptaviṃśatiḥ somasya patnyo lokasya viśrutāḥ /
kālasya nayane yuktāḥ somapatnyāḥ śucivratāḥ //

sarvā nakṣatrayoginyo lokayātrāvidhānataḥ / paitāmaho munirdevastasya putraḥ prajāpatiḥ /
tasyāṣṭau vasavaḥ putrāsteṣāṃ vakṣyāmi vistaram //

dharo dhruvaśca somaśca ahaścaivānilo'nalaḥ /
pratyūṣaśca prabhāsaśca vasavo'ṣṭau prakīrtitāḥ //

dhūmrāyāstu dharaḥ putro brahmavidyo dhruvastathā /
candramāstu manasvinyāḥ śvāsāyāḥ śvasanastathā //

ratāyāścāpyahaḥ putraḥ śāṇḍilyāśca hutāśanaḥ /
pratyūṣaśca prabhāsaśca prabhātāyāḥ sutau smṛtau //

dharasya putro draviṇo hutahavyavahastathā / āpasya putro vaitaṇḍyaḥ śramaḥ śāntomunistathā /
dhruvasya putro bhagavānkālo lokaprakālanaḥ //

somasya tu suto varcā varcasvī yena jāyate /
manoharāyāḥ śiśiraḥ prāṇo'tha ramaṇastathā //

ahnaḥ sutastathā jyotiḥ śamaḥ śāntastathā muniḥ /
agneḥ putraḥ kumārastu śrīmāñcharavaṇālayaḥ //

tasya śākho viśākhaśca naigameyaśca pṛṣṭhajaḥ /
kṛttikābhyupapatteśca kārtikeya iti smṛtaḥ //

anilasya śivā bhāryā tasyāḥ putro manojavaḥ /
avijñātagatiścaiva dvau putrāvanilasya tu //

pratyūṣasya viduḥ putramṛṣiṃ nāmnā'tha devalam / dvau putrau devalasyāpi kṣamāvantau manīṣiṇau /
bṛhaspatestu bhaginī varastrī brahmavādinī //

yogasiddhā jagatkṛtsnamasaktā vicacāra ha /
prabhāsasya tu bhāryā sā vasūnāmaṣṭamasya ha //

viśvakarmā mahābhāgo jajñe śilpaprajāpatiḥ /
kartā śilpasahasrāṇāṃ tridaśānāṃ ca vardhakiḥ //

bhūṣaṇānāṃ ca sarveṣāṃ kartā śilpavatāṃ varaḥ /
yo divyāni vimānāni tridaśānāṃ cakāraha //

manuṣyāścopajīvanti yasya śilpaṃ mahātmanaḥ /
pūjayanti ca yaṃ nityaṃ viśvakarmāṇamavyayam //

stanaṃ tu dakṣiṇaṃ bhittvā brahmaṇo naravigrahaḥ /
niḥsṛto bhagavāndharmaḥ sarvalokasukhāvahaḥ //

trayastasya varāḥ putrāḥ sarvabhūtamanoharāḥ /
śamaḥ kāmaśca harṣaśca tejasā lokadhāriṇaḥ //

kāmasya tu ratirbhāryā śamasya prāptiraṅganā /
nandā tu bhāryā harṣasya yāsu lokāḥ pratiṣṭhitāḥ //

marīceḥ kaśyapaḥ putraḥ kaśyapasya surāsurāḥ /
jajñire nṛpaśārdūla lokānāṃ prabhavastu saḥ //

tvāṣṭrī tu saviturbhāryā vaḍavārūpadhāriṇī /
asūyata mahābhāgā sāntarikṣe'svināvubhau //

dvādaśaivāditeḥ putrāḥ śakramukhyā narādhipa /
teṣāmavarajo viṣṇuryatra lokāḥ pratiṣṭhitāḥ //

trayastriṃśata yatyete devāsteṣāmahaṃ tava /
anvayaṃ sampravakṣyāmi pakṣaiśca kulato gaṇān //

rudrāṇāmaparaḥ pakṣaḥ sādhyānāṃ marutāṃ tathā /
vasūnāṃ bhārgavaṃ vidyādviśvedevāṃstathaiva ca //

vainateyastu garuḍo balavānaruṇastathā /
bṛhaspatiśca bhagavānādityeṣveva gaṇyate //

aśvinau guhyakānviddhi sarvauṣadhyastathā paśūn /
ete devagaṇā rājankīrtitāste'nupūrvaśaḥ //

yānkīrtayitvā manujaḥ sarvapāpaiḥ pramucyate /
brahmaṇo hṛdayaṃ bhittvā niḥsṛto bhagavānbhṛguḥ //

bhṛgoḥ putraḥ kavirvidvāñchukraḥ kavisuto grahaḥ / trailokyaprāṇayātrārthaṃ varṣāvarṣe bhayābhaye /
svayambhuvā niyuktaḥ sanbhuvanaṃ paridhāvati //

yogācāryo mahābuddhirdaityānāmabhavadguruḥ /
surāṇāṃ cāpi medhāvī brahmacārī yatavrataḥ //

tasminniyukte vidhinā yogakṣemāya bhārgave /
anyamutpādayāmāsa putraṃ bhṛguraninditam //

cyavanaṃ dīptatapasaṃ dharmātmānaṃ yaśasvinam /
yaḥ sa roṣāccyuto garbhānmāturmokṣāya bhārata //

āruṣī tu manoḥ kanyā tasya patnī manīṣiṇaḥ /
aurvastasyāṃ samabhavadūruṃ bhittvā mahāyaśāḥ //

mahātejā mahāvīryo bāla eva guṇairyutaḥ /
ṛcīkastasya putrastu jamadagnistato'bhavat //

jamadagnestu catvāra āsanputrā mahātmanaḥ / rāmasteṣāṃ jaghanyo'bhūdajaghanyairguṇairyutaḥ /
sarvaśastreṣu kuśalaḥ kṣatriyāntakaro vaśī //

aurvasyāsītputraśataṃ jamadagnipurogamam /
teṣāṃ putrasahasrāṇi babhūvurbhuvi vistaraḥ //

dvau putro brahmaṇastvanyau yayostiṣṭhati lakṣaṇam /
loke dhātā vidhātā ca yau sthitau manunā saha //

tayoreva svasā devī lakṣmīḥ padmagṛhā śubhā /
tasyāstu mānasāḥ putrāsturagā vyomacāriṇaḥ //

varuṇasya bhāryā yā jyeṣṭhā śukrāddevī vyajāyata /
tasyāḥ putraṃ balaṃ viddhi surāṃ ca suranandinīm //

prajānāmannakāmānāmanyonyaparibhakṣaṇāt /
adharmastatra sañjātaḥ sarvabhūtavināśakaḥ //

tasyāpi nirṛtirbhāryā nairṛtā yena rākṣasāḥ /
ghorāstasyāstrayaḥ putrāḥ pāpakarmaratāḥ sadā //

bhayo mahābhayaścaiva mṛtyurbhūtāntakastathā /
na tasya bhāryā putro vā kaścidastyantako hi saḥ //

kākīṃ śyenīṃ tathā bhāsīṃ dhṛtarāṣṭrīṃ tathā śukīm /
tāmrā tu suṣuve devī pañcaitā lokaviśrutāḥ //

ulūkānsuṣuve kākī śyenī śyenānvyajāyata /
bhāsī bhāsānajanayadgṛdhrāṃścaiva janādhipa //

dhṛtarāṣṭrī tu haṃsāṃśca kalahaṃsāṃśca sarvaśaḥ /
cakravākāṃśca bhadrā tu janayāmāsa saiva tu //

śukī ca janayāmāsa śukāneva yaśasvinī /
kalyāṇaguṇasampannā sarvalakṣaṇapūjitā //

nava krodhavaśā nārīḥ prajajñe krodhasambhavāḥ /
mṛgī ca mṛgamandā ca harī bhadramanā api //

mātaṅgī tvatha śārdūlī śvetā surabhireva ca /
sarvalakṣaṇasampannā surasā caiva bhāminī //

apatyaṃ tu mṛgāḥ sarve mṛgyā naravarottama /
ṛkṣāśca mṛgamandāyāḥ sṛmarāśca parantapa //

tatastvairāvataṃ nāgaṃ jajñe bhadramanāḥ sutam /
airāvataḥ sutastasyā devanāgo mahāgajaḥ //

haryāśca harayo'patyaṃ vānarāśca tarasvinaḥ /
golāṅgūlāṃśca bhadraṃ te haryāḥ putrānpracakṣate //

prajajñe tvatha śārdūlī siṃhānvyāgrānanekaśaḥ /
dvīpinaśca mahāsatvānsarvāneva na saśaṃyaḥ //

mātaṅgyapi ca mātaṅgānapatyāni narādhipa /
diśāṃ gajaṃ tu śvetākhyaṃ śvetā'janayadāśugam //

tathā duhitarau rājansurabhirvai vyajāyata /
rohiṇī caiva bhadraṃ te gandharvī tu yaśasvinī //

vimalāmapi bhadraṃ te analāmapi bhārata /
rohiṇyāṃ jajñire gāvo gandharvyāṃ vājinaḥ sutāḥ //

irāyāḥ kanyakā jātāstisraḥ kamalalocanāḥ /
vanaspatīnāṃ vṛkṣāṇāṃ vīrudhāṃ caiva mātaraḥ //

latāruhe ca dve prokte vīrudhāṃ caiva tāḥ smṛtāḥ /
gṛhṇanti ye vinā puṣpaṃ phalāni taravaḥ pṛthak //

latāsutāste vijñeyāstānevāhurvanaspatīn /
puṣpaiḥ phalagrahānvṛkṣānruhāyāḥ prasavaṃ viduḥ //

latāgulmāni vṛkṣāśca tvaksāratṛṇajantavaḥ /
vīrudho yāḥ prajāstasyāstatra vaṃśaḥ samāpyate //

saptapimḍaphalānvṛkṣānanalāpi vyajāyata //

analāyāḥ śukī putrī kankastu surasāsutaḥ /
aruṇasya bhāryā śyenī tu vīryavantau mahābalau //

sampātiṃ janayāmāsa vīryavantaṃ jaṭāyuṣam /
surasā'janayannāgānkadrūḥ putrāṃstu pannagān //

dvau putrau vinatāyāstu vikhyātau garuḍāruṇau / ityeṣa sarvabhūtānāṃ mahatāṃ manujādhipa /
prabhavaḥ kīrtitaḥ samyaṅmayā matimatāṃ vara //

yaṃ śrutvā puruṣaḥ samyaṅmukto bhavati pāpmanaḥ /
sarvajñatāṃ ca labhate ratimagryāṃ ca vindati //