Mahabharata · Chapter 1.60

śrutvā tu sarpasatrāya dīkṣitaṃ janamejayam /
abhyagacchadṛṣirvidvānkṛṣṇadvaipāyanastadā //

janayāmāsa yaṃ kālī śakteḥ putrātparāśarāt /
kanyaiva yamunādvīpe pāṇḍavānāṃ pitāmaham //

jātamātraśca yaḥ sadya iṣṭyā dehamavīvṛdhat /
vedāṃścādhijage sāṅgansetihāsānmahāyaśāḥ //

yaṃ nāti tapasā kaścinna vedādhyayanena ca /
na vratairnopavāsaiśca na prasūtyā na manyunā //

vivyāsaikaṃ caturdhā yo vedaṃ vedavidāṃ varaḥ /
parāvarajño brahmarṣiḥ kaviḥ satyavrataḥ śuciḥ //

yaḥ pāṇḍuṃ dhṛtarāṣṭraṃ ca viduraṃ cāpyajījanat /
śantanoḥ santatiṃ tanvanpuṇyakīrtirmahāyaśāḥ //

janamejayasya rājarṣeḥ sa mahātmā sadastathā /
viveśa sahitaḥ śiṣyairvedavedāṅgapāragaiḥ //

tatra rājānamāsīnaṃ dadarśa janamejayam /
vṛtaṃ sadasyairbahubhirdevairiva purandaram //

tathā mūrdhābhiṣiktaiśca nānājanapadeśvaraiḥ /
ṛtvigbhirbrahmakalpaiśca kuśalairyajñasaṃstare //

janamejayastu rājarṣirdṛṣṭvā tamṛṣimāgatam /
sagaṇo'bhyudyayau tūrṇaṃ prītyā bharatasattamaḥ //

kāñcanaṃ viṣṭaraṃ tasmai sadasyānumataḥ prabhuḥ /
āsanaṃ kalpayāmāsa yathā śakro bṛhaspateḥ //

tatropaviṣṭaṃ varadaṃ devarṣigaṇapūjitam /
pūjayāmāsa rājendraḥ śāstradṛṣṭena karmaṇā //

pādyamācamanīyaṃ ca arghyaṃ gāṃ ca vidhānataḥ /
pitāmahāya kṛṣṇāya tadarhāya nyavedayat //

pratigṛhya tu tāṃ pūjāṃ pāmḍavājjanamejayāt /
gāṃ caiva samanujñāya vyāsaḥ prīto'bhavattadā //

tathā ca pūjayitvā taṃ praṇayātpratitāmaham /
upopaviśya prītātmā paryapṛcchadanāmayam //

bhagavānāpi taṃ dṛṣṭvā kuśalaṃ prativedya ca /
sadasyaiḥ pūjitaḥ sarvaiḥ sadasyānpratyapūjayat //

tatastu sahitaḥ sarvaiḥ sadasyairjanamejayaḥ /
idaṃ paścāddvijaśreṣṭhaṃ paryapṛcchatkṛtāñjaliḥ //
janamejaya uvāca /

kurūṇāṃ pāṇḍavānāṃ ca bhavānpratyakṣadarśivān /
teṣāṃ caritamicchāmi kathyamānaṃ tvayā dvija //

kathaṃ samabhavadbhedasteṣāmakliṣṭakarmaṇām /
tacca yuddhaṃ kathaṃ vṛttaṃ bhūtāntakaraṇaṃ mahat //

pitāmahānāṃ sarveṣāṃ daivenāviṣṭacetasām / kārtsnyenaitanmamācakṣva yathā vṛttaṃ dvijottama /
icchāmi tattvataḥ śrotuṃ bhagavankuśalo hyasi //
sautiruvāca /

tasya tadvacanaṃ śrutvā kṛṣṇadvaipāyanastadā /
śaśāsa śiṣyamāsīnaṃ vaiśampāyanamantike //
vyāsa uvāca /

kurūṇāṃ pāṇḍavānāṃ ca yathā bhedo'bhavatpurā /
tadasmai sarvamācakṣva yanmattaḥ śrutavānasi //

gurorvacanamājñāya sa tu viprarṣabhastadā /
ācacakṣe tataḥ sarvamitihāsaṃ purātanam //

rājñe tasmai sadasyebhyaḥ pārthivebhyaśca sarvaśaḥ /
bhedaṃ sarvavināśaṃ ca kurupāṇḍavayostadā //