Mahabharata · Chapter 1.221

duryodhana tava prajñā na samyagiti me matiḥ /
na hyupāyena te śakyāḥ pāṇḍavāḥ kuruvardhana //

pūrvameva hi te sūkṣmairupāyairyatitāstvayā /
nigrahītuṃ tadā vīra na caiva śakitāstvayā //

ihaiva vartamānāste samīpe tava pārthiva /
ajātapakṣāḥ śiśavaḥ śakitā naiva bādhitum //

jātapakṣā videśasthā vivṛddhāḥ sarvaśo'dya te /
nopāyasādhyāḥ kaunteyā mamaiṣā matiracyutā //

na ca te vyasanairyoktuṃ śakyā diṣṭakṛtena ca /
śakitāścepsavaścaiva pitṛpaitāmahaṃ padam //

paraspareṇa bhedaśca nādhātuṃ teṣu śakyate /
ekasyāṃ ye ratāḥ patnyāṃ na bhidyante parasparam //

na cāpi kṛṣṇā śakyeta tebhyo bhedayituṃ paraiḥ /
paridyūnānvṛtavatī kimutādya mṛjāvataḥ //

īpsitaśca guṇaḥ strīṇāmekasyā bahubhartṛtā /
taṃ ca prāptavatī kṛṣṇā na sā bhedayituṃ kṣamā //

āryavrataśca pāñcālyo na sa rājā dhanapriyaḥ /
na santyakṣyati kaunteyānrājyadānairapi dhruvam //

tathā'sma putro guṇavānanuraktaśca pāṇḍavān /
tasmānnopāyasādhyāṃstānahaṃ manye kathañcana //

idaṃ tvadya kṣamaṃ kartumasmākaṃ puruṣarṣabha /
yāvanna kṛtamūlāste pāṇḍaveyā viśāmpate //

tāvatpraharaṇīyāste tattubhyaṃ tāta rocatām / asmatpakṣo mahānyāvadyāvatpāñcālako laghuḥ /
tāvatpraharaṇaṃ teṣāṃ kriyatāṃ mā vicāraya //

vāhanāni prabhūtāni mitrāṇi ca kulāni ca /
yāvanna teṣāṃ gāndhāre tāvadvikrama pārthiva //

yāvacca rājā pāñcālyo nodyame kurute manaḥ /
saha putrairmahāvīryaistāvadvikrama pārthiva //

yāvannāyāti vārṣṇeyaḥ karṣanyādavavāhinīm /
rājyārthe pāṇḍaveyānāṃ pāñcālyasadanaṃ prati //

vasūni vividhānbhogānrājyameva ca kevalam /
nātyājyamasti kṛṣṇasya pāṇḍavārthe kathañcana //

vikrameṇa mahī prāptā bharatena mahātmanā /
vikrameṇa ca lokāṃstrīñjitavānpākaśāsanaḥ //

vikramaṃ ca praśaṃsanti kṣatriyasya viśāmpate /
svako hi dharmaḥ śūrāṇāṃ vikramaḥ pārthivarṣabha //

te balena vayaṃ rājanmahatā caturaṅgiṇā /
pramathya drupadaṃ śīghramānayāmeha pāṇḍavān //

na hi sāmnā na dānena na bhadena ca pāṇḍavāḥ /
śakyāḥ sādhayituṃ tasmādvikrameṇaiva tāñjahi //

tānvikrameṇa jitvemāmakhilāṃ bhuṅkṣva medinīm /
ato nānyaṃ prapaśyāmi kāryopāyaṃ janādhipa //
vaiśampāyana uvāca /

śrutvā tu rādheyavaco dhṛtarāṣṭraḥ pratāpavān /
abhipūjya tataḥ paścādidaṃ vacanamabravīt //

upapannaṃ mahāprājñe kṛtāstre sūtanandane /
tvayi vikramasampannamidaṃ vacanamīdṛśam //

bhūya eva tu bhīṣmaśca droṇo vidura eva ca /
yuvāṃ ca kurutaṃ buddhiṃ bhavedyā naḥ sukhodayā //

tata ānāyya tānsarvānmantriṇaḥ sumahāyaśāḥ /
dhṛtarāṣṭro mahārāja mantrayāmāsa vai tadā //