Mahabharata · Chapter 1.219

vṛtte svayaṃvare caiva rājānaḥ sarva eva te /
yathāgataṃ viprajagmurviditvā pāṇḍavānvṛtān //

atha duryodhano rājā vimanā bhrātṛbhiḥ saha /
aśvatthāmnā mātulena karṇena ca kṛpeṇa ca //

vinivṛtto vṛtaṃ dṛṣṭvā draupadyā śvetavāhanam /
taṃ tu duḥśāsano'vrīḍo mandammandamivābravīt //

yadyasau brāhmaṇo na syādvindeta draupadīṃ na saḥ /
na hi taṃ tattvato rājanveda kaściddhanañjayam //

daivaṃ ca paramaṃ manye pauruṣaṃ cāpyanarthakam /
dhigastu pauruṣaṃ mantraṃ yaddharantīha pāṇḍavāḥ //

badhvā cakṣūṃṣi naḥ pārthā rājñāṃ ca drupadātmajām /
udvāhya rājñāṃ tairnyasto vāmaḥ pādaḥ pṛthāsutaiḥ //

vimuktāḥ kathametena jatuveśmavirbhujaḥ /
asmākaṃ pauruṣaṃ satvaṃ buddhiścāpi gatā tataḥ //

vayaṃ hatā mātulādya viśvasya ca purocanam /
adagdhvā pāṇḍavānetānsvayaṃ dagdho hutāśane //

matto mātula manye'haṃ pāṇḍavā buddhimattarāḥ /
teṣāṃ nāsti bhayaṃ mṛtyormuktānāṃ jatuveśmanaḥ //
vaiśampāvayana uvāca /

evaṃ sambhāṣamāṇāste nindantaśca purocanam / pañcaputrāṃ kirātīṃ ca viduraṃ ca mahāmatim //

viviśurhāstinapuraṃ dīnā vigatacetasaḥ //

trastā vigatasankalpā dṛṣṭvā pārthānmahaujasaḥ /
muktānhavyabhujaścaiva saṃyuktāndrupadena ca //

dhṛṣṭadyumnaṃ tu sañcintya tathaiva ca śikhaṇḍinam /
drupadasyātmajāṃścānyānsarvayuddhaviśāradān //

vidurastvatha tāñśrutvā draupadyā pāṇḍavānvṛtān /
vrīḍitāndhārtarāṣṭrāṃśca bhagnadarpānupāgatān //

tataḥ prītamanāḥ kṣattā dhṛtarāṣṭraṃ viśāmpate /
uvāca diṣṭyā kuravo vardhta iti vismitaḥ //

vaicitravīryastu nṛpo niśamya vidurasya tat /
abravītparamaprīto diṣṭyā diṣṭyeti bhārata //

manyate sa vṛtaṃ putraṃ jyeṣṭhaṃ drupadakanyayā /
duryodhanamavijñānātprajñācakṣurnareśvaraḥ //

atha tvājñāpayāmāsa draupadyā bhūṣaṇaṃ bahu /
ānīyatāṃ vai kṛṣṇeti putraṃ duryodhanaṃ tadā //

atha sma paścādvidura ācakhyāvambikātmajam /
kauravyā iti sāmānyānna manyethāstavātmajān //

vardhanta iti madvākyādvardhitāḥ pāṇḍunandanāḥ /
kṛṣṇayā saṃvṛtāḥ pārthā vimuktā rājasaṅgarāt //

diṣṭyā kuśalino rājanpūjitā drupadena ca //
vaiśampāyana uvāca /

etacchrutvā tu vacanaṃ vidurasya narādhipaḥ /
ākāracchādanārthāya diṣṭyādiṣṭyeti cābravīt //
dhṛtarāṣṭra uvāca /

evaṃ vidura bhadraṃ te yadi jīvanti pāṇḍavāḥ /
na mamau me tanau prītistvadvākyāmṛtasambhavā //

sādhvācāratayā teṣāṃ sambandho drupadena ca /
babhūva paramaślāghyo diṣṭyādiṣṭyeti cābravīt //

anvavāye vasorjātaḥ pravare mātsyake kule /
vṛttavidyātapovṛddhaḥ pārthivānāṃ ca sammataḥ //

putrāścāsya tathā pautrāḥ sarve sucaritavratāḥ /
teṣāṃ sambandhinaścānye bahavaḥ sumahābalāḥ //

yathaiva pāṇḍoḥ putrāste tato'pyabhyadhikā mama /
seyamabhyadhikānyebhyo vṛttirvidura me matā //

yā prītiḥ pāṇḍuputreṣu na sā'nyatra mamābhibho /
nityo'yaṃ cintitaḥ kṣattaḥ satyaṃ satyena śape //

yatte kuśalino vīrāḥ pāṇḍuputrā mahārathāḥ /
mitravanto'bhavanputrā duryodhanamukhāstathā //

mayā śrutaṃ yadā vahnerdagdhāḥ pāṇḍusutā iti /
tadā'dahyaṃ divārātraṃ na bhokṣye na svapāmi ca //

asahāyāścaṃ me putrā lūnapakṣā iva dvijāḥ / tattvataḥ śṛṇu me kṣattaḥ susahāyāḥ sutā mama /
adya vai sthirasāmrājyamācandrārkaṃ mamābhavat //

ko hi drupadamāsādya mitraṃ kṣattaḥ sabāndhavam /
na bubhūṣedbhavenārthī gataśrīrapi pārthivaḥ //
vaiśampāyana uvāca /

taṃ tathā bhāṣamāṇaṃ tu viduraḥ pratyabhāṣata / nityaṃ bhavatu te buddhireṣā rājañchataṃ samāḥ /
ityuktvā prayayau rājanviduraḥ svaṃ niveśanam //

tato duryodhanaścāpi rādheyaśca viśāmpate /
dhṛtarāṣṭramupāgamya vaco'brūtāmidaṃ tadā //

sannidhau vidurasya tvāṃ doṣaṃ vaktuṃ na śaknuvaḥ /
viviktamiti vakṣyāvaḥ kiṃ tavedaṃ cikīrṣitam //

sapatnavṛddhiṃ yattāta manyase vṛddhimātmanaḥ /
abhiṣṭauṣi ca yatkṣattuḥ samīpe dvipadāṃvara //

anyasminnṛpa kartavye tvamanyatkuruṣe'nagha /
teṣāṃ balavighāto hi kartavyastāta nityaśaḥ //

te vayaṃ prāptakālasya cikīrṣāṃ mantrayāmahe /
yathā no na graseyuste saputrabalabāndhavān //