Mahabharata · Chapter 1.215

aśrutvaivaṃ vacanaṃ te maharṣe mayā pūrvaṃ yatitaṃ saṃvidhātum /
na vai śakyaṃ vihitasyāpayānaṃ tadevedamupapannaṃ vidhānam //

diṣṭasya granthiranivartanīyaḥ svakarmaṇā vihitaṃ tena kiñcit /
kṛtaṃ nimittamiha naikaheto- stadevedamupannaṃ vidhānam //

yathaiva kṛṣṇoktavatī purastā- nnaikānpatīnme bhagavāndadātu /
sa cāpyevaṃ varamityabravīttāṃ devo hi vettā paramaṃ yadatra //

yadi caivaṃ vihitaḥ śaṅkareṇa dharmo'dharmo vā nātra mamāparādhaḥ /
gṛhṇantvime vidhitatpāṇimasyā yathopajoṣaṃ vihitaiṣāṃ hi kṛṣṇā //
vyāsa uvāca /

nāyaṃ vidhirmānuṣāṇāṃ vivāhe devā hyete draupadī cāpi lakṣmīḥ /
prākkarmaṇaḥ sukṛtātpāṇḍavānāṃ pañcānāṃ bhāryā devadevaprasādāt //

teṣāmevāyaṃ vihitaḥ syādvivāho yathā hyeṣa draupadīpāṇḍavānām /
anyeṣāṃ nṛṇāṃ yoṣitāṃ ca na dharmaḥ syānmānavokto narendra //
vaiśampāyana uvāca /

tata ājagmatustatra tau vyāsadrupadāvubhau / kuntī saputrā yatrāste dhṛṣṭadyumnaśca pārṣataḥ /
tato dvaipāyanaḥ kṛṣṇo yudhiṣṭhiramathāgamat //

tato'bravīdbhagavāndharmarāja- madyaiva puṇye'hani pāṇḍaveya /
puṇye puṣye yogamupaiti candramāḥ pāṇiṃ kṛṣṇāyāstvaṃ gṛhāṇādya pūrvaṃ //

evamuktvā dharmarājaṃ bhīmādīnapyabhāṣata //

krameṇa puruṣavyāghrāḥ pāṇiṃ gṛhṇantu pāṇibhiḥ /
evameva mayā sarvaṃ dṛṣṭametatpurā'naghāḥ //
vaiśampāyana uvāca /

tato rājā yajñasenaḥ saputro janyārthaṇuktaṃ bahu tattadagryam /
samarthayāmāsa mahānubhāvo hṛṣṭaḥ saputraḥ sahabandhuvargaḥ / samānayāmāsa sutāṃ ca kṛṣṇā- māplāvya ratnairbahubhirvibhūṣya //

tatastu sarve suhṛdo nṛpasya samājagmuḥ sahitā mantriṇaśca /
draṣṭuṃ vivāhaṃ paramapratītā dvijāśca paurāśca yathāpradhānāḥ //

tato'sya veśmāgryajanopaśobhitaṃ vistīrṇapadmotpalabhūṣitājiram /
balaugharatnaughavicitramābabhau nabho yathā nirmalatārakānvitam //

tatastu te kauravarājaputrā vibhūṣitāḥ kuṇḍalino yuvānaḥ /
mahārhavastrāmbaracandanokṣitāḥ kṛtābhiṣekāḥ kṛtamaṅgalakriyāḥ //

purohitenāgnisamānavarcasā sahaiva dhaumyena yatāvidhi prabho /
krameṇa sarve viviśustataḥ sado maharṣabhā goṣṭhamivābhinandinaḥ //

tataḥ samādhāya sa vedaparāgo juhāva mantrairjvalitaṃ hutāśanam /
yudhiṣṭhiraṃ cāpyupanīya mantravi- nniyojayāmāsa sahaiva kṛṣṇayā //

pradakṣiṇaṃ tau pragṛhītapāṇī samānayāmāsa sa vedaparāgaḥ /
viprāṃśca santarpya yudhiṣṭhiro dhanai- rgobhiśca ratnairvividhaiśca pūrvam //

tadā sa rājā drupadasya putrikā- pāṇiṃ prajagrāha hutāśanāgrataḥ /
dhaumyena mantrairvidhivadbhute'gnau sahāgnikalpairṛṣibhiḥ sametya //

tato'ntarikṣātkusumāni petu- rvavau ca vāyuḥ sumanojñagandhaḥ /
tato'bhyanujñāpya samājaśobhitaṃ yudhiṣṭhiraṃ rājapurohitastadā //

viprāṃśca sarvānsuhṛdaśca rājñaḥ sametya rājānamadīnasatvam /
jagāda bhūyo'pi mahānubhāvo vaco'rthayuktaṃ manujeśvaraṃ tam //

gṛhṇantvathānye naradevakanyā- pāṇiṃ yathāvannaradevaputrāḥ /
tamabhyanandaddrupadastathā dvijaṃ tathā kuruṣveti tamādideśa //

purohitasyānumatena rājña- ste rājaputrā muditā babhūvuḥ /
krameṇa cānye ca narādhipātmajā varastriyāste jagṛhuḥ karaṃ tadā //

ahanyahanyuttamarūpadhāriṇo mahārathāḥ kauravavaṃśavardhanāḥ //

idaṃ ca tatrādbhutarūpamuttamaṃ jagāda devarṣiratītamānuṣam /
mahānubhāvā kila sā sumadhyamā babhūva kanyaiva gate gate'hani //

patiśvaśuratā jyeṣṭhe patidevaratā'nuje / madhyameṣu ca pāñcālyāstritayaṃ tritayaṃ triṣu //

kṛte vivāhe drupado dhanaṃ dadau mahārathebhyo bahurūpamuttamam /
śataṃ rathānāṃ varahemamālināṃ caturyujāṃ hemakhalīnamālinām //

śataṃ gajānāmapi padmināṃ tathā śataṃ giriṇāmiva hemaśṛṅgiṇām /
tathaiva dāsīśatamagryayauvanaṃ mahārhaveṣābharaṇāmbarasrajam //

pṛthakpṛthagdivyadṛśāṃ punardadau tadā dhanaṃ saumakiragnisākṣikam /
tathaiva vastrāṇi vibhūṣaṇāni prabhāvayuktāni mahānubhāvaḥ //

kṛte vivāhe ca tatastu pāṇḍavāḥ prabhūtaratnāmupalabhya tāṃ śriyam /
vijahrurindrapratimā mahābalāḥ pure tu pāñcālanṛpasya tasya ha //