Liṅgapurāṇa, 1-108 · Chapter 1.43

mayā saha pitā hṛṣṭaḥ praṇamya ca maheśvaram
uṭajaṃ svaṃ jagāmāśu nidhiṃ labdhveva nirdhanaḥ //

yadāgato 'hamuṭajaṃ śilādasya mahāmune
tadā vai daivikaṃ rūpaṃ tyaktvā mānuṣyam āsthitaḥ //

naṣṭā caiva smṛtirdivyā yena kenāpi kāraṇāt
mānuṣyamāsthitaṃ dṛṣṭvā pitā me lokapūjitaḥ //

vilalāpātiduḥkhārtaḥ svajanaiś ca samāvṛtaḥ
jātakarmādikāścaiva cakāra mama sarvavit //

śālaṅkāyanaputro vai śilādaḥ putravatsalaḥ
upadiṣṭā hi tenaiva ṛkśākhā yajuṣas tathā //

sāmaśākhāsahasraṃ ca sāṅgopāṅgaṃ mahāmune
āyurvedaṃ dhanurvedaṃ gāndharvaṃ cāśvalakṣaṇam //

hastināṃ caritaṃ caiva narāṇāṃ caiva lakṣaṇam
sampūrṇe saptame varṣe tato 'tha munisattamau //

mitrāvaruṇanāmānau tapoyogabalānvitau
tasyāśramaṃ gatau divyau draṣṭuṃ māṃ cājñayā vibhoḥ //

ūcatuś ca mahātmānau māṃ nirīkṣya muhurmuhuḥ
tāta nandyayamalpāyuḥ sarvaśāstrārthapāragaḥ //

na dṛṣṭamevamāścaryam āyurvarṣādataḥ param
ityuktavati viprendraḥ śilādaḥ putravatsalaḥ //

samāliṅgya ca duḥkhārto rurodātīva visvaram
hā putra putra putreti papāta ca samantataḥ //

aho balaṃ daivavidher vidhātuśceti duḥkhitaḥ
tasya cārtasvaraṃ śrutvā tadāśramanivāsinaḥ //

nipeturvihvalātyarthaṃ rakṣāścakruś ca maṅgalam
tuṣṭuvuś ca mahādevaṃ triyaṃbakamumāpatim //

hutvā triyaṃbakenaiva madhunaiva ca saṃplutām
dūrvāmayutasaṃkhyātāṃ sarvadravyasamanvitām //

pitā vigatasaṃjñaś ca tathā caiva pitāmahaḥ
viceṣṭaś ca lalāpāsau mṛtavannipapāta ca //

mṛtyor bhīto 'ham acirāc chirasā cābhivandya tam
mṛtavatpatitaṃ sākṣāt pitaraṃ ca pitāmaham //

pradakṣiṇīkṛtya ca taṃ rudrajāpyarato 'bhavam
hṛtpuṇḍarīke suṣire dhyātvā devaṃ triyaṃbakam //

tryakṣaṃ daśabhujaṃ śāntaṃ pañcavaktraṃ sadāśivam
saritaścāntare puṇye sthitaṃ māṃ parameśvaraḥ //

tuṣṭo 'bravīnmahādevaḥ somaḥ somārdhabhūṣaṇaḥ
vatsa nandinmahābāho mṛtyorbhītiḥ kutastava //

mayaiva preṣitau viprau matsamastvaṃ na saṃśayaḥ
vatsainattava dehaṃ ca laukikaṃ paramārthataḥ //

nāstyeva daivikaṃ dṛṣṭaṃ śilādena purā tava
devaiś ca munibhiḥ siddhair gandharvairdānavottamaiḥ //

pūjitaṃ yatpurā vatsa daivikaṃ nandikeśvara
saṃsārasya svabhāvo 'yaṃ sukhaṃ duḥkhaṃ punaḥ punaḥ //

nṛṇāṃ yoniparityāgaḥ sarvathaiva vivekinaḥ
evamuktvā tu māṃ sākṣāt sarvadevamaheśvaraḥ //

karābhyāṃ suśubhābhyāṃ ca ubhābhyāṃ parameśvaraḥ
pasparśa bhagavān rudraḥ paramārtiharo haraḥ //

uvāca ca mahādevas tuṣṭātmā vṛṣabhadhvajaḥ
nirīkṣya gaṇapāṃścaiva devīṃ himavataḥ sutām //

samālokya ca tuṣṭātmā mahādevaḥ sureśvaraḥ
ajaro jarayā tyakto nityaṃ duḥkhavivarjitaḥ //

akṣayaścāvyayaścaiva sapitā sasuhṛjjanaḥ
mameṣṭo gaṇapaścaiva madvīryo matparākramaḥ //

iṣṭo mama sadā caiva mama pārśvagataḥ sadā
madbalaścaiva bhavitā mahāyogabalānvitaḥ //

evamuktvā ca māṃ devo bhagavān sagaṇastadā
kuśeśayamayīṃ mālāṃ samunmucyātmanastadā //

ābabandha mahātejā mama devo vṛṣadhvajaḥ
tayāhaṃ mālayā jātaḥ śubhayā kaṇṭhasaktayā //

tryakṣo daśabhujaścaiva dvitīya iva śaṅkaraḥ
tata eva samādāya hastena parameśvaraḥ //

uvāca brūhi kiṃ te 'dya dadāmi varamuttamam
tato jaṭāśritaṃ vāri gṛhītvā cātinirmalam //

uktā nadī bhavasveti utsasarja vṛṣadhvajaḥ
tataḥ sā divyatoyā ca pūrṇāsitajalā śubhā //

padmotpalavanopetā prāvartata mahānadī
tāmāha ca mahādevo nadīṃ paramaśobhanām //

yasmājjaṭodakādeva pravṛttā tvaṃ mahānadī
tasmājjaṭodakā puṇyā bhaviṣyasi saridvarā //

tvayi snātvā naraḥ kaścit sarvapāpaiḥ pramucyate
tato devyā mahādevaḥ śilādatanayaṃ prabhuḥ //

putraste 'yamiti procya pādayoḥ saṃnyapātayat
sā māmāghrāya śirasi pāṇibhyāṃ parimārjatī //

putrapremṇābhyaṣiñcacca srotobhistanayaistribhiḥ
payasā śaṅkhagaureṇa devadevaṃ nirīkṣya sā //

tāni srotāṃsi trīṇyasyāḥ srotasvinyo 'bhavaṃstadā
nadīṃ trisrotasaṃ devo bhagavānavadadbhavaḥ //

trisrotasaṃ nadīṃ dṛṣṭvā vṛṣaḥ paramaharṣitaḥ
nanāda nādāttasmācca saridanyā tato 'bhavat //

vṛṣadhvaniriti khyātā devadevena sā nadī
jāṃbūnadamayaṃ citraṃ sarvaratnamayaṃ śubham //

svaṃ devaścādbhutaṃ divyaṃ nirmitaṃ viśvakarmaṇā
mukuṭaṃ cābabandheśo mama mūrdhni vṛṣadhvajaḥ //

kuṇḍale ca śubhe divye vajravaiḍūryabhūṣite
ābabandha mahādevaḥ svayameva maheśvaraḥ //

māṃ tathābhyarcitaṃ vyomni dṛṣṭvā meghaiḥ prabhākaraḥ
meghāṃbhasā cābhyaṣiñcac chilādanam atho mune //

tasyābhiṣiktasya tadā pravṛttā srotasā bhṛśam
yasmāt suvarṇānniḥsṛtya nadyeṣā sampravartate //

svarṇodaketi tāmāha devadevastriyaṃbakaḥ
jāmbūnadamayādyasmād dvitīyā mukuṭācchubhā //

prāvartata nadī puṇyā ūcur jambūnadīti tām
etatpañcanadaṃ nāma japyeśvarasamīpagam //

yaḥ pañcanadamāsādya snātvā japyeśvareśvaram
pūjayecchivasāyujyaṃ prayātyeva na saṃśayaḥ //

atha devo mahādevaḥ sarvabhūtapatirbhavaḥ
devīmuvāca śarvāṇīm umāṃ girisutāmajām //

devī nandīśvaraṃ devam abhiṣiñcāmi bhūtapam
gaṇendraṃ vyāhariṣyāmi kiṃ vā tvaṃ manyase 'vyaye //

tasya tadvacanaṃ śrutvā bhavānī harṣitānanā
smayantī varadaṃ prāha bhavaṃ bhūtapatiṃ patim //

sarvalokādhipatyaṃ ca gaṇeśatvaṃ tathaiva ca
dātumarhasi deveśa śailādistanayo mama //

tataḥ sa bhagavāñśarvaḥ sarvalokeśvareśvaraḥ
sasmāra gaṇapān divyān devadevo vṛṣadhvajaḥ //