Lakshmi Tantra · Chapter 28

aṣṭāviṃśo'dhyāyaḥ - 28
śakraḥ---
namaste kamalāvāse namasrayyantavāsini/
tvatprasādena vidhivacchrato mantraḥ samādhinā

pratipattiśca sakalā svarūpaṃ ca yathāsthitam/
āhorātrikamācāramidānīṃ vaktumarhasi

śrīḥ---
eko nārāyaṇaḥ śrīmānanādiḥ puṣkarekṣaṇaḥ/
jñānaiśvaryamahāśaktivīryatejomahodadhiḥ

ātmā sa sarvabhūtānāṃ haṃso nārāyaṇo vaśī/
tasya sāmarthyarūpāhamekā taddharmadharmiṇī

sāhaṃ sṛṣṭyādikān bhāvān vidadhānā punaḥ punaḥ/
ārādhitā satī sarvāṃstārayāmi bhavārṇavāt

dadāmi vividhān bhogān dharmeṇa paritoṣitā/
saddharmaparasaṃsthānā mama sattvādikā tanuḥ

6. vividhāniti/ apavargapradāpyānuṣaṅgikānaihikānāmutrikāṃśca bhogān dadāmītyarthaḥ/ saddharmapareṣu saṃsthānaṃ yasyā iti bahuvrīhiḥ/
ācārarūpo dharmo'sāvācārastasya lakṣaṇam/
tamācāraṃ pravakṣyāmi yaḥ sadbhiranupālyate

hitvā yogamayīṃ nidrāmutthāyāpararātrataḥ/
prapadyeta hṛṣīkeśaṃ śaraṇyaṃ śrīpatiṃ harim

8. yogamayīmiti/ abhigamanādiṣu dharmeṣu yogākhyaḥ pañcamo dharmaḥ pūrvadinarātrimārabhya paradinabrāhnamuhūrtāvadhikakālānuṣṭheyaḥ/
prapatteśca svarūpaṃ te pūrvamuktaṃ sureśvara/
bhūyaśca śṛṇu vakṣyāmi sā yathā syāt sthirā tvayi

ācamya prayato bhūtvā smṛtvāsraṃ jvalanākṛti/
tat praviśya viniṣkrāntaḥ pūto bhūtvāsratejasā

prapattiṃ tāṃ prayuñjīta svāṅgaiḥ pañcabhiranvitām/
prātikūlyaṃ parityaktamānukūlyaṃ ca saṃśritam

mayā sarveṣu bhūteṣu yathāśakti yathāmati/
alasasyālpaśakteśca yathāvaccāvijānataḥ

upāyāḥ kriyamāṇāste naiva syustārakā mama/
ato'haṃ kṛpaṇo dīno nirlepaścāpyakiṃcanaḥ

lakṣmyā saha hṛṣīkeśo devyā kāruṇyarūpayā/
rakṣakaḥ sarvasiddhānte vedānte'pi ca gīyate

14. mahāviśvāso'tra vivakṣitaḥ/ sarvasiddhānte; sarveṣu divyaśāsreṣu/ vedānte; upaniṣatsu/
yanme'sti dustyajaṃ kiṃcit putradārakriyādikam/
samastamātmanā nyastaṃ śrīpate tava pādayoḥ

15. ātmātmīyanikṣepamāha--yanme'stītyādinā/ ātmanā; ātmanā sahetyarthaḥ/
śaraṇaṃ bhava deveśa nātha lakṣmīpate mama/
sakṛdevaṃ prapannasya kṛtyaṃ naivānyadiṣyate

16. goptṛtvavaraṇamāha---śaraṇamityādinā/
upāyāpāyamuktasya vartamānasya madhyataḥ/
narasya buddhidaurbalyādupāyāntaramiṣyate

17. madhyato vartamānasya naivānyat kṛtyamiti pūrveṇānvayaḥ/ buddhidaurbalyāditi/ svādhikāramanālocya duṣkare karmaṇi pravṛttirhi buddhidaurbalyaprayukteti bhāvaḥ/ upāyāntaramatra bhaktiyogaḥ/ anena bhaktiyogasya nindā kriyata iti vā mumukṣorbhaktiyogaḥ svarūpaviruddha iti vā na mantavyam/ "narasya buddhidaurbalyādindubimbagrahe spṛhā" ityukte vacanamidamindubimbaṃ nindatīti na kaścidapi prekṣāvān brūyāt/ kiṃca "bhaktyā paramayā vāpi prapattyā vā mahāmate" iti bhaktervaikalpikasādhanatvoktirvirudhyeta/ aśaktasya mumukṣoḥ svarūpaviruddha iti cet, nātra kasyāpi vipratipattiḥ/
ataḥ paraṃ sadācāraṃ procyamānaṃ nibodha me/
āśaṃsānaḥ samuttiṣṭhet sarvabhūtasukhodayam

bhavantu sarvabhūtāni sāttvike vimale pathi/
bhajantāṃ śrīpatiṃ śaśvadviśantu paramaṃ padam

ityāśāsya priyaṃ samyagbhūtebhyo manasā girā/
śarīraśodhanaṃ kṛtvā dharmaśāsravidhānataḥ

śaucaṃ ca vidhivat kṛtvā bhakṣayeddantadhāvanam/
athācamya vidānena pavitraiḥ śāsracoditaiḥ

plāvayitvābhyupāsīta saṃdhyāṃ trailokyapāvanīm/
manmayī trividhā śaktiḥ sūryasomāgnirūpiṇī

śuddhaye sarvabhūtānāṃ saṃdhyā devī pravartate/
upasthāya vivasvantamantaḥsthaṃ puruṣottamam

23. vivasvantaṃ viśiṣṭadīptimantamiti puruṣottamaviśeṣaṇam/ antaḥstham; sūryamaṇḍalāntarvartinam/ "arkamaṇḍalamadhyasthaṃ sūryakoṭisamaprabham" ityādidhyānamatrābhipretam/
kuryādagnividhiṃ samyagupādānamathācaret/
sati vitte na kurvītopādānaṃ tu vicakṣaṇaḥ

24. upādānaṃ nāma bhagavadārādhanopayuktadravyārjanam/ tacca niḥsvasya pañcayajñapañcakālaparāyaṇabhāgavatottamādayācitopanatataṇḍulādisvīkārarūpam/ āḍhyasya tu tadupayuktaphalapuṣpatulasyādisaṃgraharūpam/
sapta vittāgamā dharmyā dāyo lābhaḥ krayo jayaḥ/
prayogaḥ karmayogaśca satpratigraha eva ca

snānaṃ kṛtvā vidhānena trividhaṃ śāsracoditam/
bhūtaśuddhiṃ vidhāyātha yāgamāntaramācaret

svayamutpāditaiḥ sphītairlabdhaiḥ śiṣyāditastathā/
bhogairyajeta māṃ viṣṇumubhau vā śāsrapūrvakam

aṣṭāṅgena vidhānena hyanuyāgāvasānakaiḥ/
svādhyāyamācaret samyagaparāhṇe vicakṣaṇaḥ

28. aṣṭāṅgayajanaṃ yathā jayākhye---antaryāgaḥ, bhogayāgaḥ, madhvādiyāgaḥ, annayāgaḥ, saṃpradānam, vahnisaṃtarpaṇam, pitṛyāgaḥ, anuyāgaśceti (22 a. 75-80)/
divyaśāsrāṇyadhīyīta nigamāṃścaiva vaidikān/
sarvānanucaret samyak siddhāntānātmasiddhaye

29. siddhāntāniti/ mantrāgamādisiddhāntabhedānityarthaḥ/
alolupena cittena rāgadveṣavivarjitaḥ/
na nindenmanasā vācā śāsrāṇyuccāvacānyapi

tāvanmātrārthamādadyāda yāvatā hyartha ātmanaḥ/
bhūtānāṃ śreyase sarve sarvaśāsrāṇi tanvate

tāṃ tāmavasthāṃ saṃprāpya tāni śreyo vitanvate/
ādau madhye ca sarveṣāṃ śāsrāṇāmantime tathā

śrīmānnārāyaṇaḥ prokto vidhayaiva tayā tayā/
ahaṃ nārāyaṇasthāpi sarvajñā sarvadarśinī

33. sarvaśāsrāṇāṃ bhūtahitatvaṃ paratatvaprakāśanena tadārādhanapratipādanena cetyabhisaṃdhāyāha---śrīmāniti/
nidānajñā bhiṣakkalpā tattadgurvādirūpiṇī/
pravartayāmi śāsrāṇi tāni tāni tathā tathā

adhikārānurūpeṇa pramāṇāni tathā tathā/
atyantaheyaṃ na vkāpi śāsraṃ kiṃcana vidyate

sarvatra sulabhaṃ śreyaḥ svalpaṃ vā yadi vā bahu/
tataḥ kāryo na vidveṣo yāvadarthamupāśrayet

samayaṃ na viśettatra naiva dīkṣāṃ kadācana/
tataḥ saṃdhyāmupāsīta paścimāṃ sārdhabhāskarām

vidhāyāgnyarthakāryaṃ tu yogaṃ yuñjīta vai tataḥ/
suvivikte śucau deśe niḥśalāke manorame

mṛdvāstaraṇasaṃkīrṇe celājinakuśottare/
antarbahiśca saṃśuddhe yamādipariśodhitaḥ

āsanaṃ cakramāsthāya padmaṃ svastikameva vā/
yatra vā ramate buddhirnāḍīmārgān nipīḍayan

vijitya pavanagrāmaṃ pratyāhārajitendriyaḥ/
dhāraṇāsu śramaṃ kṛtvā māṃ dhyāyet susamāhitaḥ

anaupamyāmanirdeśyāmavikalpāṃ nirañjanām/
sarvatra sulabhāṃ lakṣmīṃ sarvapratyayatāṃ gatām

sākārāmathavā yogī varābhayakarāṃ parām/
padmagarbhopamāṃ padmāṃ padmahastāṃ sulakṣaṇām

yadvā nārāyaṇāṅkasthāṃ sāmarasyamupāgatām/
cidānandamayīṃ devīṃ tādṛśaṃ ca śriyaḥ patim

bahudhā yogamārgāste veditavyāḥ sureśvara/
teṣvekaṃ dharmamāsthāya bhaktiḥ śraddhā ca yatra te

samyaṅ‌ nidhyānamutpādya samādhiṃ samupāśrayet/
dhyātā dhyānaṃ tathā dhyeyaṃ trayaṃ yatra vilīyate

46. yogasya parā kāṣṭhocyate---dhyātetyādinā/ yatreti/ yasyāṃ samādhidaśāyāmityarthaḥ/
ekaivāhaṃ tadā bhāse pūrṇāhaṃtā sanātanī/
aikadhyamanusaṃprāpte mayi saṃvinmahodadhau

47. aikadhyamekabhāvaṃ yogini saṃprāpte sati nānyat kiṃcit prakāśate/ kiṃtu ahameva bhāsa ityuttareṇānvayaḥ/
nānyat prakāśate kiṃcidahameva tadā parā/
yogācchrānto japaṃ kuryāttacchrānto yogamācaret

tasya kṣipraṃ prasīdāmi japayogābhiyoginaḥ/
nītvaivaṃ prathamaṃ yāmaṃ japayogādinā sudhīḥ

49. yoganidrāṃ nirvakti---nitvaivamiti/
yogastha eva taddhīrastato yāmadvayaṃ svapet/
utthāyāpararātre tu pūrvoktamanusaṃcaret

50. yogo nāma paramātmanyātmanikṣepapuraḥsaraṃ paramātmaguṇagaṇānusaṃdhānam/ tatkurvāṇa eva svāpamanubhavedityarthaḥ/
iti vyāmiśrakṛtyaṃ tat proktaṃ te balasūdana/
acchidrān pañcakālāṃstu bhagavatkarmaṇā nayet

51. vyāmiśreti/ bahuvidhakarmakalāpasahitaṃ bhagavadārādhanamityarthaḥ/ acchidrāniti/ "yanmuhūrtaṃ kṣaṇaṃ vāpi vāsudevo na cintyate/ sā hānistanmahacchidraṃ sā bhrāntiḥ sā ca vikriyā//" (ga. pu. pū. 222-22) ityuktacchidrarahitānityarthaḥ/
dīkṣitaḥ pañcakālajño lakṣmīmantraparāyaṇaḥ/
antaraṃ nānayoḥ kiṃcinniṣṭhāyāṃ balasūdana

ubhāvetau matau bhaktau viśato māṃ tanukṣaye/
cakrapadmadharo nityaṃ bhavellakṣmīparāyaṇaḥ

svadāranirataśca syād brahmacārī sadā bhavet/
manmantramabhyasennityaṃ maccitto matparāyaṇaḥ

sarvānuccāvacāñchabdāṃstadbhāvena vibhāvayet/
agnīṣomavibhāgajñaḥ kriyābhūtivibhāgavit