Scripture Library

Lakshmi Tantra · Chapter 11

ekādaśo'dhyāḥ - 11
śrīḥ---
nirdoṣo niradhiṣṭheyo niravadyaḥ sanātanaḥ/
viṣṇurnārāyaṇaḥ śrīmān paramātmā sanātanaḥ

ṣāḍ‌guṇyavigraho nityaṃ paraṃ brahmākṣaraṃ param/
tasya māṃ paramāṃ śaktiṃ nityaṃ taddharmadharmiṇīm

2.brahmākṣaraśabdayoḥ prakṛtijīvayorapi prayogāt tadvyudāsāya paramiti viśeṣaṇam/
sarvabhāvānugāṃ viddhi nirdoṣāmanapāyinīm/
sarvakāryakarī sāhaṃ viṣṇoravyayarūpiṇaḥ

11.4

śuddhāśuddhamayairbhāvairvitatyātmānamātmanā/
paravyūhādisaṃbhedaṃ vyūhayantī hareḥ sadā

11.5

śuddhaṣāḍ‌guṇyamādāya kalapayantī tathā tathā/
tena nānāvidhaṃ rūpaṃvyūhādyucitamañjasā

11.6

unmeṣayāmi devasya prakāraṃ bhavaduttaram/
vyāpārastasya devasya sāhamasmi na saṃśayaḥ

11.7

mayā kṛtaṃ hi yat karma tena tat kṛtamucyate/
ahaṃ hi tasya devasya smṛtā vyāpriyamāṇatā

11.8

iti śakra paraṃ rūpaṃ vyūharūpaṃ ca darśitam/
tṛtīyaṃ vibhavākhyaṃ tu rūpamadya niśāmaya

11.9

turyādijāgradantaṃ yat proktaṃ padacatuṣṭayam/
vāsudevādinā vyāptamaniruddhāntimena tu

11.10

tatra tatra pade caiva cāturātmyaṃ tathā tathā/
avyaktavyaktarūpaiḥ svairuditaṃ te yathoditam

11.11

vyūhād vyūhasamutpattau padādyāvatpadāntaram/
antaraṃ sakalaṃ deśaṃ saṃpūrayati tejasā

11.12

pūjitastejasāṃ rāśiravyakto mūrtivarjitaḥ/
viśākhayūpa ityuktastattajjñānādibṛṃhitaḥ

11.13

12. viśākhayūpo nāmāprākṛte divyaloke bhrājamāno jyotirmayaḥ stambhākāro bhagavadrūpaviśeṣaḥ/ tatrādhobhāgamārabhya ūrdhvabhāgaparyantaṃ catvāri parvāṇi krameṇāniruddhapradyumnasaṃkarṣaṇavāsudevādhiṣṭhitāni spaṣṭataraspaṣṭakiṃcitspaṣṭāspaṣṭaśaṅkhacakrādilakṣmāṇi/ pratiparva prāgādikrameṇa caturṣvapi pārśveṣu krameṇa vāsudevādayo vyūhā bhrājante/ evaṃ vibhāgaśca yoginā dhyānālambanārthaṃ bhagavataiva kalpitaḥ/ asya ca vistaraḥ sāttvatasaṃhitāyāṃ draṣṭavyaḥ/
tasmiṃstasmin pade tasmānmūrtiśākhācatuṣṭayam/
vāsudevādikaṃ śakra prādurbhavati vai kramāt

11.14

evaṃ svapnapadājjāgratpadavyūhavibhāvane/
svaprātpadājjāgradante taijasaḥ pūjyate mahān

11.15

viśākhayūpo bhagavān sa devastejasāṃ nidhiḥ/
turyādye svapnaparyante cāturātmyatrike hi yat

11.16

tattadaiśvaryasaṃpanne ṣāḍ‌guṇyaṃ suvyavasthitam/
tadādāyākhilaṃ divyaṃ śuddhasaṃvitpuraḥsaram

11.17

vibhajannātmanātmānaṃ vāsudevādirūpataḥ/
punavibhavavelāyāṃ vinā mūrticatuṣṭayam

11.18

viśākhayūpa evaiṣa vibhavān bhāvayatyuta/
te devā vibhavātmānaḥ padmanābhādayo matāḥ

11.19

padmanābho dhruvo'nantaḥ śakrīśo madhusūdanaḥ/
vidyādhidevaḥ kapilo viśvarūpo vihaṃgamaḥ

11.20

19. eta eva devā vyañjanādhiṣṭhātṛtayā tattanmahiṣībhiḥ sahātraiva viṃśādhyāye vakṣyante/
kroḍātmā baḍavāvaktro dharmo vāgīśvarastathā/
ekārṇavāntaḥśāyī ca tathaiva kamaṭhākṛtiḥ

11.21

varāho narasiṃhaścāpyamṛtāharaṇastathā/
śrīpatirdivyadeho'tha kāntātmāmṛtadhārakaḥ

11.22

rāhujit kālanemighnaḥ pārijātaharastathā/
lokanāthastu śāntātmā dattātreyo mahāprabhuḥ

11.23

nyagrodhaśāyī bhagavānekaśṛṅgatanustathā/
devo vāmanadehastu sarvavyāpī trivikramaḥ

11.24

naro nārāyaṇaścaiva hariḥ kṛṣṇastathaiva ca/
jvalatparaśubhṛdrāmo rāmaścānyo dhanurdharaḥ

11.25

vedavidbhagavān kalkī pātālaśayanaḥ prabhuḥ/
triṃśaccāṣṭāvime devāḥ padmanābhādayo matāḥ

11.26

vibhorviśākhayūpasya tattatkāryavaśādime/
sphūrtayo vibhavāḥ khyātāḥ kāryaṃ caiṣāmasaṃkaram

11.27

śuddhāśuddhādhvanormadhye padmanābho vyavasthitaḥ/
dhruvādayo'pare devā vivṛtā viśvamandire

11.28

rūpāṇyastrāṇi caiteṣāṃ śaktayaścāparā vidhāḥ/
sarvaṃ tat sāttvate siddhaṃ saṃjñāmātraṃ pradarśitam

11.29

śākhāstu vāsudevādyā vibhordevasya kīrtitāḥ/
viśākhayūpo bhagavān vitatābhiḥ karoti tat

11.30

catasṛbhyo'tha śākhābhyaḥ keśavādyaṃ trayaṃ trayam/
dāmodarāntamudbhūtaṃ tad‌ vyūhāntaramucyate

11.31

tābhya eva hi śākhābhyaḥ śriyādīnāṃ trayaṃ trayam/
pūrvatrayānurūpeṇa śaktīnāṃ ca samudgatam

11.32

parādivibhavāntānāṃ sarveṣāṃ devatātmanām/
śuddhaṣāḍ‌guṇyarūpāṇi vapūṃṣi tridaśeśvara

11.33

yāvantyastrāṇi devānāṃ cakraśaṅkhādikāni vai/
bhūṣaṇāni vicitrāṇi vāsāṃsi vividhāni ca

11.34

dhvajāśca vividhākārāḥ kāntayaśca sitādikāḥ/
vāhanāni vicitrāṇi satyādyāni sureśvara

11.35

śaktayo bhogadāścaiva vividhākārasaṃsthitāḥ/
āntaḥkaraṇiko vargastadīyā vṛttayo'khailāḥ

11.36

yacca yaccopakaraṇaṃ sāmānyaṃ puruṣāntaraiḥ/
ṣāḍ‌guṇyanirmitaṃ viddhi tatsarvaṃ balasūdana

11.37

śuddhasaṃvinmayī sāhaṃ ṣāḍ‌guṇyaparipūritā/
tathā tathā bhavāmyeṣāmiṣṭaṃ yaddhi yathā yathā

11.38

na vinā devedevena sthitirmama hi vidyate/
mayā vinā na devasya sthitirviṣṇorhi vidyate

11.39

tāvāvāmekatāṃ prāptau dvidhā bhūtau ca saṃsthitau/
vidhāṃ bhajāvahe tāṃ tāṃ yaddadyatra hyapekṣitam

11.40

śakraḥ---
sindhukanye namastubhyaṃ namaste sarasīruhe/
paravyūhādibhedena kiṃ prayojanamīśituḥ

11.41

śrīḥ---
anugrahāya jīvānāṃ bhaktānāmanukampayā/
paravyūhādibhedena devadevapravṛttayaḥ

11.42

śakraḥ---
devadevapriye devi namaste kamalodbhave/
anugrahāya bhaktānāmekaivāstu vidhā hareḥ

11.43

śrīḥ---
jīvānāṃ vividhāḥ śakra saṃcitāḥ puṇyasaṃcayāḥ/
saṃcinvanti na te jīvāstulyakālaṃ kathaṃcana

11.44

kaściddhi sukṛtonmeṣāt kadācit puruṣo nṛṣu/
śrīmatā kamalākṣeṇa jāyamāno nirīkṣyate

11.45

anyadā puruṣo'nyaścetyevaṃ bhinnāḥ śubhāśayāḥ/
bhedo'dhikāriṇāṃ puṇyatāratamyena jāyate

11.46

vivekaḥ kasyacinmando bhagavattatvavedane/
madyamastu parasyātha divyo'nyasya tu jāyate

11.47

īśānugrahavaiṣamyādevaṃ bhede vyavasthite/
tattatkāryānurodhena paravyūhādibhāvanā

11.48

kriyate devadevena śaktiṃ māmadhitiṣṭhatā/
saṃsiddhayogatattvānāmadhikāraḥ parātmani

11.49

vyāmiśrayogayuktānāṃ madhyānāṃ vyūhabhāvane/
vaibhavīyādirūpeṣu vivekavidhurātmanām

11.50

ahaṃtāmamātārtānāṃ bhaktānāṃ parameśvare/
adhikārasya vaiṣamyaṃ bhaktānāmanudṛśya saḥ

11.51

bhajate vividhaṃ bhāvaṃ paravyūhādiśabditam/
iti te leśataḥ śakra darśitā ubhayātmakāḥ

11.52

bhavadbhāvottarā vyūhā mama nārāyaṇasya ca/
śuddhe śuddhetarasmiṃśca kośavarge madudbhave

11.53

sthitirnau darśitā te'dya pṛthak saha ca kevalā/
evaṃprakārāṃ māṃ jñātvā pratyakṣāṃ sarvasaṃmatām

11.54

upāyairvividhaiḥ śaśvadupāsya vividhātmikām/
kleśakarmāśayātīto madbhāvaṃ pratipadyate

54. kleśakarmāśayā anantarādhyāye vakṣyante/
iti śrīpāñcarātrasāre lakṣmītantre vibhavaprakāśo nāma ekādaśo'dhyāyaḥ
********ityekādaśo'dhyāyaḥ********

Original text: lakṣmītantram · Sanskrit Wikisource contributors · Sanskrit Wikisource · CC BY-SA 4.0