Kathaka Samhita · Chapter 40

atha catvāriṃśaṃ sthānakam /
hiraṇyagarbhaḥ/
hiraṇyagarbhassamavartatāgre bhūtasya jātaḥ patireka āsīt !
sa dādhāra pṛthivīṃ dyāmutemāṃ kasmai devāya haviṣā vidhema //
yaḥ prāṇato nimiṣataśca rājā patirviśvasya jagato babhūva /
īśe yo asya dvipadaścatuṣpadaḥ kasmai devāya haviṣā vidhema //
ya ojodā baladā yasya viśva upāsate praśiṣaṃ yasya devāḥ /
yasya cchāyāmṛtaṃ yasya mṛtyuḥ kasmai devāya haviṣā vidhema //
yena dyaurugrā pṛthivī ca dṛḍhā yena svasstabhitaṃ yena nākam /
yo antarikṣaṃ vimame varīyaḥ kasmai devāya haviṣā vidhema //
ya ime dyāvāpṛthivī tastabhāne adhārayad rodasī rejamāne /
yasminnadhi vitatassūra eti kasmai devāya haviṣā vidhema //
yasyeme viśve girayo mahitvā samudraṃ yasya rasayā sahāhuḥ /
diśo yasya pradiśaḥ pañca devīḥ kasmai devāya haviṣā vidhema //
āpo ha yanmahatīrviśvamāyan garbhaṃ dadhānā janayantīragnim /
tato devānāṃ niravartatāsurekaḥ kasmai devāya haviṣā vidhema //
ā naḥ prajāṃ janayatu prajāpatirdhātā dadhātu sumanasyamānaḥ /
saṃvatsara ṛtubhiścāklṛpāno mayi puṣṭiṃ puṣṭipatirdadhātu

prāṇāpānābhyāṃ tvā sayujā yujā yunajmyāghārābhyāṃ tvā sayujā yujā yunajmīndrāgnibhyāṃ tvā sayujā yujā yunajmi cchandobhistvā stomebhistvokthebhistvā tejase tvā varcase tvā rayyai tvā poṣāya tvā sajātānāṃ madhyameṣṭheyāya mayā tvā sayujā yujā yunajmi //
tvāmagne vṛṣabhaścekitānaṃ punaryuvānaṃ janayannupāgām /
asthūri ṇau gārhapatyāni santu tigmena nau brahmaṇā sam̐śiśādhi //
saṃvatsarasya pratimāṃ ye tvā rātryupāsate /
teṣāmāyuṣmatīṃ prajāṃ rāyaspoṣeṇa sam̐sṛja

yo apsvantaragniryo vṛtre yaḥ puruṣe yo aśmani /
ya āviveśa bhuvanāni viśvā tebhyo agnibhyo hutamastvetat //
pṛṣṭo divi pṛṣṭo agniḥ pṛthivyāṃ pṛṣṭo viśvā oṣadhīrāviveśa /
vaiśvānarassahasā pṛṣṭo agnissa no divā sa riṣaḥ pātu naktam //
yassome antaryo goṣvantarvayām̐si ya āviveśa yo mṛgeṣu /
ya āviveśa dvipado yaścatuṣpadastebhyo agnibhyo hutamastvetat //
viśvakarmā tvā sādayatvantarikṣasya pṛṣṭhe jyotiṣmatīmantarikṣaṃ yacchāntarikṣaṃ dṛm̐hāntarikṣaṃ mā him̐sīrviśvasmai prāṇāya vyānāyāpānāyodānāya pratiṣṭhāyai caritrāya vāyuṣṭvābhipātu mahyā svastyā chardiṣā śaṃtamena tayā devatayāṅgirasvad dhruvā sīdāntarikṣamadhidyaurbrahmaṇā viṣṭaṃ rudrā rakṣitāro vāyuradhiviyatto asyāṃ tāṃ tvā prapadye sā me śarma ca varma ca bhava tayā devatayāṅgirasvad dhruvā sīda tejo'si tejo me yacchāntarikṣaṃ dṛm̐hāntarikṣaṃ mā pāhi tayā devatayāṅgirasvad dhruvā sīda //
hutādamagniṃ yamu kāmamāhuryaṃ dātāraṃ pratigrahītāramāhuḥ/
yaṃ johavīmi pṛtanāsu sāsahiṃ tebhyo agnibhyo hutamastvetat //
yenendrasya ratham̐ saṃbabhūvurvaiśvānara uta viśvadāvyaḥ/
dhīro yaśśakraḥ paribhūradābhyastebhyo agnibhyo hutamastvetat //
vedirasi sudhāṃ me dhehi varuṇasya kukṣī stho mā mā saṃtāptaṃ tārkṣyāriṣṭaneme'bhi mā saca svastyā chardiṣā śaṃtamena namo'gnervaiśvānarasya harase namaśśarave trāyamāṇa trāyasva no hantaradhi no brūhi //
varca ādhāyi me tanūssaha ojo mahadbalam / trayastrim̐śadvīryāṇi tānyagniḥ pradadātu me //
ā mā varco'gninā dattametu mahi rādhassaha ojo mahadbalam /
dīrghāyutvāya śataśāradāya pratigṛhṇāmi mahata indriyāya //
agne dudhrāgne kahyāgne kim̐śilāgne vanyāgne kakṣya yā ta iṣuryuvā nāma tasyai te vidhema tayā naḥ pāhi tasyai te svāhā

rohiteṣu tvā jīmūteṣu sādayāmyaruṇeṣu tvā jīmūteṣu sādayāmi kṛṣṇeṣu tvā nīleṣu tvāsiteṣu tvā jīmūteṣu sādayāmyambā nāmāsi dulā nāmāsi nitatnī nāmāsi cupuṇīkā nāmāsyabhrayantī nāmāsi meghayantī nāmāsi varṣayantī nāmāsi jyotiṣmatīṃ tvā sādayāmi jyotiṣkṛtaṃ tvā sādayāmi
jyotirvidaṃ tvā sādayāmi jvalantīṃ tvā sādayāmi dīpyamānāṃ tvā sādayāmi malmalābhavantīṃ tvā sādayāmi rocamānāṃ tvā sādayāmi bṛhajjyotiṣaṃ tvā sādayāmi bhāsvatīṃ tvā sādayāmi bodhayantīṃ tvā sādayāmi jāgratīṃ tvā sādayāmyajasrāṃ tvā sādayāmi prasavāya tvopayāmāya tvā kāṭākṣāya tvārṇavāya tvā sindhave tvā samudrāya tvā sarase tvā viśvavyacase tvā dharṇasāya tvā draviṇāya tvā subhūtāya tvāntarikṣāya tvā

dyauraparājitāmṛtena naṣṭādityā rakṣitārassūryo'dhiviyatto asyāṃ tāṃ tvā prapadye sā me śarma ca varma ca bhava tayā devatayāṅgirasvad dhruvā sīda svarasi svarme yaccha divaṃ dṛm̐ha divo mā pāhi tayā devatayāṅgirasvad dhruvā sīda parameṣṭhī tvā sādayatu divaḥ pṛṣṭhe jyotiṣmatīṃ vyacasvatīṃ prathasvatīṃ bhāsvatīṃ raśmivatīmā yā dyāṃ bhāsyā pṛthivīmurvantarikṣaṃ divaṃ yaccha divaṃ dṛm̐ha divaṃ mā him̐sīrviśvasmai prāṇāya vyānāyāpānāyodānāya pratiṣṭhāyai caritrāya sūryastvābhipātu mahyā svastyā chardiṣā śaṃtamena tayā devatayāṅgirasvad dhruvā sīda //
ukṣānnāya vaśānnāya somapṛṣṭhāya vedhase/ vaiśvānarajyeṣṭhebhyastebhyo agnibhyo hutamastvetat//
prāṇo'si vyāno'syapāno'si śrotramasi cakṣurnāma tayā devatayāṅgirasvad dhruvā sīda //
yat te'citaṃ yadu citaṃ te agne yadūnaṃ yadvātrātiriktam /
viśve devā aṅgirasaścinavannādityāste citimāpūrayantu /
yāste agne samidho yāni dhāma yā jihvā jātavedo yo arciḥ/
ye te agne meḍavo ya indavastebhirātmānaṃ cinuhi prajānan //
cittimacittiṃ cinavo vividvān pṛṣṭheva vītā vṛjinā ca martān /
rāye ca nassvapatyāya deva ditiṃ ca rāsvāditimuruṣya //
vayamagne dhanavantassyāmālaṃ yajñāyota dakṣiṇāyai /
grāvā vadedabhi somasyām̐śumaindram̐ śikṣemendunā sutena //
rāyaspoṣaṃ no dhehi jātaveda ūrjo bhāgaṃ madhumat sūnṛtāvat /
dadhāma yajñam̐ sunavāma somaṃ yajñena tvāmupaśikṣema śakra //
īśānaṃ tvā śuśrumā vayaṃ dhanānāṃ dhanapate /
gomadagne aśvavadbhūri puṣṭam̐ hiraṇyavadannavaddhehi mahyam //
duhāṃ te dyauḥ pṛthivī payo jagarastvā sodako visarpatu / prajāpatinātmānamāprīṇe'rikto ma ātmā //
yo rudro agnau yo apsu ya auṣadhīṣu yo vanaspatiṣu /
yo rudro viśvā bhuvanāviveśa tasmai rudrāya namo astu devāḥ

pitā mātariśvācchidrā padā dhādacchidrośijaḥ kavayaḥ padānutakṣiṣussomo viśvavinnetā neṣadbṛhaspatirukthāmadāni śam̐siṣat //
yadakrandaḥ//
yamena dattaṃ trita enamāyunagindra enaṃ prathamo adhyatiṣṭhat /
gandharvo asya raśanāmagṛbhṇāt sūrādaśvaṃ vasavo nirataṣṭa //
asi yamo asyādityo arvannasi trito guhyena vratena /
asi somena samayā vipṛkta āhuste trīṇi divi bandhanāni //
trīṇi ta āhurdivi bandhanāni trīṇyapsu trīṇyantassamudre /
uteva me varuṇaśchantsyarvanyatrā ta āhuḥ paramaṃ janitram //
imā te vājinnavamārjanānīmā śaphānām̐ saviturnidhānā /
atrā te bhadrā vṛṣabhā agṛbhṇāmṛtasya yā abhirakṣanti gopāḥ //
saṃvatsaro'si parivatsaro'sīdāvatsaro'syanuvatsaro'syudvatsaro'mi devasya tvā savituḥ prasave'śvinorbāhubhyāṃ pūṣṇo hastābhyāmindravantaṃ tvā sādayāmi dhāmacchadasi sve yonau sīda sve pṛthivyā yonau sīdartavaste kalpantāṃ māsāste kalpantāmardhamāsāste kalpantāmahorātrāṇi te kalpantāmaṅgāni te kalpantāṃ parūm̐ṣi te kalpantām̐ śarīrāṇi te kalpantāmetyā pretyā saṃ cā ca pra ca sārayāgnirjyotirjyotiragnirindro jyotirjyotirindrassūryo jyotirjyotissūryaḥ //
imam̐ stanamūrjasvantaṃ dhayāpāṃ prapīnamagne sarirasya madhye /
utsaṃ juṣasva madhumantamūrmim̐ samudriyam̐ sadanamāviśasva

samudrādūrmirmadhumām̐ udāradupām̐śunā samamṛtatvamānaṭ /
ghṛtasya nāma guhyaṃ yadasti jihvā devānāmamṛtasya nābhiḥ //
vayaṃ nāma prabravāma ghṛtasyāsmin yajñe dhārayāmā namobhiḥ /
upa brahmā śṛṇavacchasyamānaṃ catuśśṛṅgo'vamīdgaura etat //
catvāri śaṅgā trayo asya pādā dve śīrṣe sapta hastāso asya /
tridhā baddho vṛṣabho roravīti maho devo martyām̐ āviveśa //
tridhā hitaṃ paṇibhirguhyamānaṃ gavi devāso ghṛtamanvavindan /
indra ekam̐ sūra ekaṃ jajāna venādekam̐ svadhayā niṣṭatakṣuḥ //
etā arṣanti hṛdyāt samudrācchatavrajā ripuṇā nāvacakṣe /
ghṛtasya dhārā abhicākaśīmi hiraṇyayo vetaso madhya āsām //
samyak sravanti sarito na dhenā antarhṛdā manasā pūyamānāḥ /
ete arṣantyūrmayo ghṛtasya mṛgā iva kṣipaṇorīṣamāṇāḥ //
sindhoriva prādhvane śūghanāso vātapramiyaḥ patayanti yahvāḥ /
ghṛtasya dhārā aruṣo na vājī kāṣṭhā bhindannūrmibhiḥ pinvamānaḥ //
abhi pravanta samaneva yoṣāḥ kalyāṇyassmayamānāso agnim /
ghṛtasya dhārāssamidho nasanta tā juṣāṇo haryati jātavedāḥ //
kanyā iva vahatumetavā u añjyañjānā abhicākaśīmi /
yatra somassūyate yatra yajño ghṛtasya dhārā abhi tat pavante //
abhyarṣata suṣṭutiṃ gavyamājimasmāsu bhadrā draviṇāni dhatta /
imaṃ yajñaṃ nayata devatā no ghṛtasya dhārā madhumat pavante //
dhāmante viśvaṃ bhuvanamadhiśritamantassamudre hṛdyantarāyuṣi /
apāmanīke samithe ya ābhṛtastamaśyāma madhumantaṃ ta ūrmim

pituṃ nu stoṣaṃ maho dharmāṇaṃ taviṣīm / yasya trito vyojasā vṛtraṃ viparvamardayat //
svādo pito madho pito vayaṃ tvā vavṛmahe / asmākamavitā bhava //
upa naḥ pitavācara śivaśśivābhirūtibhiḥ / mayobhūradviṣeṇyassakhā suśaivo advayāḥ //
tava tye pito rasā rajām̐syanu viṣṭhitāḥ / divi vātā iva śritāḥ//
tava tye pito dadatastava svādiṣṭha te pito / pra svādmāno rasānāṃ tuvigrīvā iverate //
tve pito mahānāṃ devānāṃ mano hitam / akāri cāru ketunā tavāhimavasāvadhīt //
yadadaḥ pito ajagan vivasva parvatānām / atrā cinno madho pito'raṃ bhakṣāya gamyāḥ//
yadapāmoṣadhīnāṃ parim̐śamāriśāmahe / vātāpe pīva idbhava //
yat te soma gavāśiro yavāśiro bhajāmahe / vātāpe pīva idbhava //
karambha oṣadhe bhava pīvo vṛkka udārathiḥ / vātāpe pīva idbhava //
taṃ tvā vayaṃ pito vacobhirgāvo ne havyāṃ suṣūdima /
devebhyastvā sadhamādamasmabhyaṃ tvā sadhamādam

mahyamāpo madhumadairayanta mahyaṃ jyotirabharat sūryastat /
māṃ devā anu viśve tapojā mahyaṃ devassavitā vyaco dhāt //
ahamastabhnāṃ pṛthivīmuta dyāmahamṛtūm̐rajanam̐ sapta sākam /
ahaṃ vācaṃ pari sarvāṃ babhūva ya indrāgnī asanam̐ sakhāyau //
ahaṃ dyāvāpṛthivī ābabhūvāhaṃ viśvā oṣadhīssapta sindhūn /
mahyaṃ viśassamanamanta daivīrahamugraśśatahavyo babhūva //
rāye jātassahase vṛddhaḥ kṣatrāṇāṃ kṣatrabhṛttamo vayodhāḥ /
mahān mahitvā sam̐stambhe kṣatre rāṣṭre ca jāgṛhi //
nava kṛtva indro rājā savitā tvābhiṣiñcatu /
mitro vāyurbṛhaspatirdhātā kṣatraṃ dadhātu te //
aditistvā suṣvatu rājan mahate kṣatrāya mahate jyaiṣṭhyāya mahate rājyāya mahate jānarājyāya mahate viśvasya bhuvanasyādhipatyāya samāstvāgne devasya tvā savituḥ prasave'śvinorbāhubhyāṃ pūṣṇo hastābhyām̐ sarasvatyā vācā yanturyantreṇemamamumāmuṣyāyaṇamamuṣyāḥ putramagnessāmrājyenābhiṣiñcāmīndrasya sāmrājyenābhiṣiñcāmi

mamāgne varco vihaveṣvastu vayaṃ tvendhānāstanvaṃ puṣema/
mahyaṃ namantāṃ pradiśaścatasrastvayādhyakṣeṇa pṛtanā jayema //
mama devā vihave santu sarva indravanto maruto viṣṇuragniḥ /
mamāntarikṣamurulokamastu mahyaṃ vātaḥ pavate kāme asmin //
mayi devā draviṇamāyajantāṃ mamāśīrastu mama devahūtiḥ /
daivyā hotāro vaniṣanna etadariṣṭāssyāma tanvā suvīrāḥ//
mahyaṃ yajantāṃ mama yānīṣṭākūtissatyā manaso me astu /
eno mā nigāṃ katamaccanāhaṃ viśve devā anutiṣṭhantu meha //
agnirmanyuṃ pratinudan purastādadabdho gopaḥ paripātu viśvataḥ /
apāñco yantu nirṛthaṃ punaste'maiṣāṃ cittaṃ prabudhā vinaśyatu //
dhātā dhātṝṇāṃ bhuvanasya yaspatirdevam̐ savitāramabhimātiṣāham /
imaṃ yajñaṃ bṛhaspate'śvinobhendrāvata kāvyairdam̐sanābhiḥ //
trayīṣṣaḍurvīruru ṇaskṛṇota viśve devā iha vīrayadhvam /
mā hāsmahi prajayā mā tanūbhirmā radhāma dviṣate soma rājan //
uruvyacā no mahiṣaśśarma yam̐sadasmin have puruhūtaḥ purukṣuḥ /
sa naḥ prajāyai haryaśva mṛḍendra mā no rīradho mā parā dāḥ //
tisro devīrmahi naśśarma yacchata prajāyai nastanve yacca puṣṭam /
mā no vadhīdabhibhā mo aśastirmā no vṛdhadvṛjanā dveṣyā yā /
ye nassapatnā apa te bhavantvindrāgnibhyāmavabādhāmahe tān /
ādityā rudrā uparispṛśaṃ mograṃ cettāramadhirājamakran //
arvāñcamindramamuto havāmahe yo gojiddhanajidaśvajidyaḥ /
imaṃ no yajñaṃ vihave juṣasveha kṛṇmo harivo medinaṃ tvā

tava śriye vyajihīta parvato gavāṃ gotramudasṛjo yadaṅgiraḥ/
indreṇa yujā tamasā parīvṛtaṃ bṛhaspate nirapāmaubjo arṇavam //
bṛhaspate ati yadaryo ahād dyumadvibhāti kratumajjaneṣu /
yaddīdayacchavasartaprajāta tadasmāsu draviṇaṃ dhehi citram //
bṛhaspatissamajayadvasūni maho vrajān gomato deva eṣaḥ /
apassiṣāsan svarapratīto bṛhaspatirhantyamitramarkaiḥ //
yamo dādhāra pṛthivīṃ yamo dyāmuta sūryam /
yamāya sarvamit tasthe yat prāṇadvāyurakṣitam //
yathā pañca yathā ṣaḍ yathā pañcadaśarṣayaḥ / yamaṃ yo vidyāt sa brūyādyathaikarṣirvijānate //
trikadrukebhiḥ patati ṣaḍurvīrekamidbṛhat /
gāyatrī triṣṭup chandāṃsi sarvā tā yama āhitā //
mṛḍā no rudrota no mayaskṛdhi kṣayadvīrāya namasā vidhema te /
yacchaṃ ca yośca manurāyeje pitā tadaśyāma tava rudra praṇītiṣu //
aśyāma te sumatiṃ devayajyayā kṣayadvīrasya tava rudra mīḍhvaḥ /
sumnāyannidviśo asmākamācarāriṣṭavīrā juhavāma te haviḥ//
tveṣaṃ vayaṃ rudraṃ yajñasādhamaṅkuṃ kavimavase nihvayāmahe /
āre asmaddaivyaṃ haiḍo asyatu sumatimidvayamasyā vṛṇīmahe //
ava te heḍo varuṇa namobhirava yajñebhirīmahe havirbhiḥ /
kṣayannasmabhyamasura praceto rājannenām̐si śiśrathaḥ kṛtāni //
uduttamaṃ varuṇa pāśamasmadavādhamaṃ vi madhyamam̐ śrathāya /
athā vayamāditya vrate tavānāgaso aditaye syāma //
imaṃ me varuṇa śrudhī havamadyā ca mṛḍaya ! tvāmavasyurācake //
tattvā yāmi brahmaṇā vandamānastadāśāste yajamāno havirbhiḥ /
aheḍamāno varuṇeha bodhyuruśam̐sa mā na āyuḥ pramoṣīḥ

havyaṃ prīṇīhi havyam̐ śrīṇīhi havyam̐ śrapaya //
havyaṃ paca havyamasi havyāya tvā havyavāḍasi havye sīda //
svayaṃ kṛṇvāṇassugamaprayāvaṃ tigmaśṛṅgo vṛṣabhaśśośucānaḥ /
pratnam̐ sadhasthamanupaśyamāna ā tantumagnirdivyaṃ tatāna //
tvaṃ nastanturuta seturagne tvaṃ panthā bhavasi devayānaḥ /
tvayāgne pṛṣṭhaṃ vayamāruhemāthā devaissadhamādaṃ madema //
atisargaṃ dadato mānavāya svargaṃ panthāmanupaśyamānāḥ /
ajuṣanta maruto yajñametaṃ vṛṣṭidyāvānamamṛtam̐ svarvidam //
āvartamāno bhuvanasya madhye prajā vikṛṇvañjanayan virūpam /
saṃvatsaraḥ parameṣṭhī dhṛtavrato yajñaṃ naḥ pātu rajasaḥ parasmāt //
prajāṃ pipartu parivatsaro no dhātā dadhātu sumanasyamānaḥ/
bahvīssākaṃ bahudhā viśvarūpā ekavratā māmabhisaṃviśantu

yadākūtāt samasusroddhṛdo vā manasassaṃbhṛtaṃ cakṣuṣo vā /
tamanuprehi sukṛtasya lokaṃ yatrarṣayo jagmuḥ prathamāḥ purāṇāḥ //
etam̐ sadhasthāḥ pari vo dadāmi yamāvahācchevadhiṃ jātavedāḥ/
anvāgantā yajamānassvasti tam̐ sma jānīta parame vyoman //
etaṃ jānīta parame vyomannagne sadhasthā vida lokamasya /
yadāgacchāt pathibhirdevayānairiṣṭāpūrtaṃ kṛṇutādāvirasmai //
imam̐ stanamiṣṭo yajñaḥ //
yena sahasraṃ vahasi yenāgne sarvavedasam / tenemaṃ yajñaṃ no vaha svardeveṣu gantave //
yenāgne sukṛtaḥ pathā madhordhārā vyānaśuḥ / tenemaṃ yajñaṃ no naya svardeveṣu gantave //
yenāgne dakṣiṇāvantaṃ yajñaṃ vahantyṛtvijaḥ / tenemaṃ yajñaṃ no vaha svardeveṣu gantave //
prastareṇa paridhinā srucā vedyā ca barhiṣā / ṛcemaṃ yajñaṃ no naya svardeveṣu gantave //
yatra dhārā madhumatīssadā syandante akṣitāḥ / tadagnirvaiśvakarmaṇassvardeveṣu no dadhat //
apūpakūlā nadyassadā syandante akṣitāḥ/ tadagnirvaiśvakarmaṇassvardeveṣu no dadhat //
upakṣaranti madhuno ghṛtasya kulyāḥ pūrṇāssadamakṣīyamāṇāḥ /
tadagnirvaiśvakarmaṇassvardeveṣu no dadhat //
yāste agne yā vo devāḥ //
rocaya mā brāhmaṇeṣvatho rājasu rocaya /
rocaya mā viśyeṣu śūdreṣu mayi dhehi rucā rucam //
svarṇagharmassvāhā svarṇaśukrassvāhā svarṇasūryassvāhā svarṇārkassvāhā svarṇāgnissvāhā

īḍe agniṃ vipaścitaṃ girā yajñasya sādhanam / śruṣṭīvānaṃ dhitāvānam //
agne śakema te vayaṃ yamaṃ devasya vājinaḥ / ati dveṣām̐si tarema //
pṛthupājā amartyo ghṛtanirṇik svāhutaḥ /
agniryajñasya havyavāṭ //
tam̐ sādho yatasruca itthā dhiyo yajñavantaḥ /
ācakruragnimūtaye //
navaṃ nu stomamagnaye divaśśyenāya jījanam /
vasvaḥ kuvidvanāti naḥ//
spārhā yasya śriyo dṛśe rayirvīravato yathā/
agre yajñasya cetataḥ//
upa tvā raṇvasaṃdṛśaṃ prayasvantassahaskṛta /
agne sasṛjmahe giraḥ //
upa chāyāmiva ghṛṇeraganma śarma te vayam /
agne hiraṇyasaṃdṛśaḥ//
agne mṛḍa mahām̐ asi ya īmā devayuṃ janam /
iyetha barhirāsadam //
sa mānuṣīṣu dūḍabho vikṣu prāvīramartyaḥ /
dūto viśveṣāṃ bhuvat //
aurvabhṛguvacchucimapnavānavadāhuve /
agniṃ samudravāsasam //
ā savam̐ savituryathā bhagasyeva bhujim̐ huve /
agnim̐ samudravāsasam //
huve vātasvanaṃ kaviṃ parjanyakrandyam̐ sahaḥ/
agnim̐ samudravāsasam //
upa tvā jāmayo giro dediśatīrhaviṣkṛtaḥ /
vāyoranīke asthiran //
yasya tridhātvavṛtaṃ barhistasthā asaṃdinam /
āpaścinnidadhā padam //
agnirmūrdhā //
udagne śucayastava śukrā bhrājanta īrate /
tava jyotīm̐ṣyarcayaḥ//
īśiṣe vāryasya hi dātrasyāgne svarpatiḥ/
stotā syāṃ tava śarmaṇi //
tvāmagne manīṣiṇastvām̐ hinvanti cittibhiḥ /
tvāṃ vardhantu no giraḥ //
adabdhasya svadhāvato dūtasya rebhatassadā /
agnessakhyaṃ vṛṇīmahe //
agniśśucivratatamaśśucirvipraśśuciṣkaviḥ /
śucī rocata āhutaḥ

//
ityekottaraśataśākhādhvaryuprabhedabhinne śrīyajuṣi kāṭhake carakaśākhāyāmorimikāyāṃ hiraṇyagarbhaṃ nāma catvāriṃśaṃ sthānakaṃ saṃpūrṇam

// śrīgranthatraye madhyapaṭhitāśca yājyānuvākyāḥ saṃpūrṇāḥ //
// asmin granthatrayābhyantare yājyānuvākyā nāma caturtho granthaḥ//
// saṃpūrṇā ceyamorimikā //