Kashyapa Samhita · Chapter p1

indriyasthānam
pañcamamindriyasthānam oṣadhabheṣajendriyādhyāyaḥ
athāta oṣadhabheṣajīyamindriyaṃ vyākhyāsyāmaḥ

iti ha smāha bhagavān kaśyapaḥ

oṣadhaṃ bheṣajaṃ proktaṃ dviprakāraṃ cikitsitam
tayorviśeṣaṃ vakṣyāmi bheṣajauṣadhayordvayoḥ

oṣadhaṃ dravyasaṃyogaṃ bruvate dīpanādikam
hutavratatapodānaṃ śāntikarma ca bheṣajam

ubhayaṃ tadyadā jantoḥ kṛtaṃ na kurute guṇam
kṣīṇāyuriti saṃjñātvā na cikitsedvicakṣaṇaḥ

yasya gomayacūrṇābhaṃ cūrṇaṃ mūrdhani jāyate
sasnehaṃ bhraśyate caiva māsāntaṃ tasya jīvitam

kukṣiḥ snātānuliptasya pūrvaṃ yasya viśuṣyati
ārdreṣu sarvagātreṣu māsārdhaṃ tasya jīvitam

svapnādhipānago nāśo jyotiṣāṃ patanāni ca
agnidāhopaśāntiśca patanaṃ gṛhavṛkṣayoḥ

guhāṭavīpraveśaśca svapnaṃ svapne vigarhitam
kṛṣṇāṃ daṇḍadharāṃ nagnāṃ muṇḍāṃ lohitalocanām

svapne dṛṣṭvaiva jānīyādyamadūtānupasthitān
dīrghakeśastananakhīṃ virāgakusumāmbarām

svapne dṛṣṭvā striyaṃ kṛṣṇāṃ kālarātrīṃ nivedayet
gandhān puṣpāṇi vāsāṃsi yā raktāni niṣevate

yadā svapne śiśurvā'pi tadā skandagrahādbhayam
mayūraṃ kukkuṭaṃ bastaṃ meṣaṃ vā yo'dhirohati

raktarcitaḥ sahaitairvā tatrāpi skandato bhayam
ghaṇṭāṃ patākāṃ yaḥ svapne vidhvastāṃ bhuvi paśyati

śayanaṃ śoṇitāktaṃ vā tatrāpi skandato bhayam
raktapuṣpāmbaradharā raktacanadanarūṣitā

nṛtyate saha bhūtairvā skandāpasmārato bhayam
raktapadmavanaṃ prāpya dhātryātmānaṃ yadā'rcati

bālaṃ vā padmamālābhistadā skandapiturbhayam
raktapuṣpavanaṃ dhātrī svapne'gniṃ vā yadā viśet

dahyate vā'gninā bālaḥ pauṇḍarīkādbhayaṃ tadā
samudrādiṣu toyeṣu nimagne revatībhayam

śuṣkakūpanadīdarśaṃ nihanyācchuṣkarevatī
māṃsādān pakṣiṇo dṛṣṭvā śakunyā badhyate śiśuḥ

avaḍīnābhidaṣṭastu sadyo maraṇamṛcchati
haritālādibhī raṅgairmaṇḍitaḥ pītakāmbaraḥ

māṃsalo'laṅkṛtaḥ svapne taṃ hanti mukhamaṇḍikā
nakṣatragrahacandrārkatārakā'kṣikanīnikāḥ

dṛṣṭvā prapatitāḥ svapne pūtanābhyo bhayaṃ bhavet
sarvāṇyetāni rūpāṇi naigameṣyāṃ prapaśyati

kīṭavṛścikasarpairvā daṣṭaḥ syādviṣamṛtyuḥka
śvabhirduṣṭaiḥ kharairvā'pi dakṣiṇāṃ yāti muṇḍitaḥ

kṛṣyate mṛdyate tairvā jvarasyāntastaducyate
prārthitaṃ kalpitaṃ dṛṣṭamanubhūtaṃ śrutaṃ ca yat

bhāvitaḥ paśyati svapne hrasvaṃ dīrghaṃ divā ca yat
aphalāḥ sarva evaite nidānoktāstu doṣajāḥ

yathā tu phalavān svapno vṛddhaśīvaka tacchṛṇu
adṛṣṭamaśrutānuktamakalpitamabhāṣitam

kāryamātraṃ ca yaḥ svapno jīrṇānte phalavāṃstu saḥ
etāṃścānyāṃśca duḥsvapnān dṛṣṭvā rogī vinaśyati

svasthastu saṃśayaṃ gatvā dharmaśīlo vimucyate
yadyadeva dvijādīnāṃ svapne śītakṛśātmanām

malināmbarapuṣpāṇāṃ darśanaṃ na praśasyate
teṣāmeva tu hṛṣṭānāṃ śuddhapuṣpāmbarātmanām

darśanaṃ śasyate svapne taiśca saṃbhāṣaṇaṃ śubham
prāsādavṛkṣaśailāṃśca hastigovṛṣapūruṣān

adhirohanti ye svapne teṣāṃ svastyayanaṃ kṛtam
sūryasomāgniviprāṇāṃ nṛṇāṃ puṇyakṛtāṃ gavām

matsyāmiṣasya cāṣasya darśanaṃ puṇyamucyate
śuklapuṣpādarśacchatragrahaṇaṃ toyalaṅghanam

svaraktadarśanaṃ caiva surāpānaṃ ca śasyate
gavāśvarathayānaṃ ca yānaṃ pūrvottareṇa ca

rodanaṃ patitotthānaṃ ripūṇāṃ nigrahastathā
paṅkakūpaguhābhyaśca samuttāro'dhvanastathā

evaṃvidhāni cānyāni siddhaye munayo'bruvan
adāruṇatvaṃ rogāṇāṃ vaidyabhaiṣajyasaṃbhavam

dhṛtirjanmānukūlyaṃ ca sattvaṃ dharmaśca bhūtaye
dṛṣṭvā svapnān dāruṇānvetarān vā
pūtaḥ snātaḥ sarṣapānagnivarṇān
hutvā sāvitryā sarpiṣāktāṃstilāṃśca
pūtaḥ pāpairmucyate vyādhibhiśca

kaumārabhṛtyamativardhanamuktametajjñātvā hi dehagatamindriyamādirūpaiḥ śaścikitsitaparāṃstu vivarjayadhvaṃ śāstraṃ ca dharmamatayaḥ paripālayadhvam

iti ha smāha bhagavān kaśyapaḥ
iti vṛddhajīvakīye kaumārabhṛtye vāstyapratisaṃskṛte indriyasthāne
auṣadhabheṣajīyaṃ nāmendriyam
samāptāni cendriyāni
indriyasthānasyāyamantimo'dhyāya evopalabdhaḥ