Kalika Purana · Chapter 69

//śrībhagavānuvāca//
kārpāsaṃ kambalaṃ bālkaṃ kośajaṃ vastramiṣyate/
tat‌pūrvaṃ pūjayitvaiva mantrairdevāya cotsṛjet

nirdaśaṃ malinaṃ jīrṇaṃ chinnaṃ gātrāvaliṅgitam/
parakīyaṃ hyākhudaṣṭaṃ sūcīviddhaṃ tathoṣitam

uptaleśaṃ vidhautaṃ ca śleṣmamūtrādidūṣitam/
pradāne devatābhyāśca daive pitrye ca karmaṇi

varjayet svopayoge na yajñādāvupayojane/
uttarīyottarāsaṅgairnicolo modacelakaḥ

paridhānaṃ ca pañcaitānyasyūtāni prayojayet/
śāṇa vastraṃ niśāraṃ ca tathaivātapavāraṇam

caṇḍātakaṃ tathā dūśyaṃ pañca syūtānyaduṣṭaye/
patākādhvajadaṇḍādau syūtaṃ vastraṃ prayojayet

anyatrāvaraṇādau ca tad‌vināśasya tena tat/
pītaṃ kauśeyavastraṃ ca mahādevyai praśasyate

pītaṃ tathaiva kauśeyaṃ vāsudevāya cot‌sṛjet/
raktaṃ tu kambalaṃ dadyācchivāya paramātmane

vicitraṃ sarvadevebhyo devīrbhyoṃ'śu nivedayet/
kārpāsaṃ sarvatobhadraṃ dadyāt sarvebhya eva ca

naikāntaraktaṃ dadyāt tu vāsudevāya cailakam/
tathā naikāntanīlaṃ tu śivāya vinivedayet

nīliraktaṃ tu yad‌vastraṃ tat sarvatra vivarjitam/
daive pitrye tūpayoge varjayet tu vicakṣaṇaḥ

nīlīraktaṃ pramādāttu yo dadyād viṣṇave budhaḥ/
niṣphalā tasya tat‌pūjā tadā bhavati bhairava

vicitre vāsasi punarlagnaṃ nīlīvirañjitam /
vastraṃ dadyānmahādevyai nānyasmai tu kadācana

dvipadāṃ brāhmaṇo yadvaddevānāṃ vāsavo yathā/
tathā bhūṣaṇavargeṣu vastramuttamamucyate

vastreṇa jīryate lajjā vastreṇa hīyate tvagham/
vastrāt syāt sarvataḥ siddhiścaturvarga pradaṃ ca tat

vastraṃ te kathitaṃ putra sarvaprītipradāyakam/
bhogyaṃ bhūṣottamaṃ nityaṃ bhūṣaṇāni śṛṇuṣva me

kirīṭaṃ ca śiroratnaṃ kuṇḍalaṃ ca lalāṭikā/
tālapatraṃ ca hāraśca graiveyakamathormikā

prālambikāratnasūtramuttaṅgotarkṣamālikā/
pārśvadyoto nakhadyoto hyaṅgulīcchādakastathā

jūṭālakaṃ mānavako mūrdhatārā khalantikā /
aṅgado bāhuvalayaḥ śikhābhūṣaṇa iṅgikā

prāgdaṇḍabandhamudbhāsanābhipūro'tha mālikā/
saptakī śṛṅkhalaṃ caiva dantapatraṃ ya karṇakaḥ

ūrusūtraṃ ca nīvīṃ ca muṣṭibandhaṃ prakīrṇakam/
pādāṅgadaṃ haṃsakaśca nūpuraṃ kṣudraghaṇṭikā

sukhapaṭṭamiti proktā alaṅkārāḥ suśobhanāḥ/
catvāriṃśadamī proktā loke vede tu saukhyadāḥ

alaṅkārapradānena caturvargaprasādhanam/
eteṣāṃ pūjanaṃ kṛtvā pradadyādiṣṭasiddhaye

teṣāṃ daivatamuccārya pūjayet tu vicakṣaṇaḥ/
śirogatāni vā dadyāt sauvarṇāni tu sarvadā

cūḍāratnādikānīha bhūṣaṇāni tu bhairava/
graiveyakādihaṃsāntaṃ sauvarṇaṃ rājataṃ ca vā

nivedayet tu devabyo nānyat taijasambhavam/
rītiraṅgādi saṃjātaṃ pātropakaraṇādikam

dadyādāyasavarjaṃ tu bhūṣaṇaṃ na kadācana/
ghaṇṭācāmara kumbhādipātropakaraṇādikam

tad‌bhūṣaṇāntare dadyādayasmāt tadupabhūṣaṇam/
sarvaṃ tāmramayaṃ dadyād yat kiṃcid bhūṣaṇādikam

sarvatra svarmavat tāmramarghyapātre tato'dhikam/
pūjārghyapapātranaivedyādhārapātraṃ ca pānakam

audumbaraṃ sadā viṣṇoḥ prītidaṃ toṣadaṃ tathā/
tāmre devāḥ pramodante tāmre devāḥ sthitāḥ sadā

sarvaprītikaraṃ tāmraṃ tasmāt tāmraṃ prayojayet/
svopayoge naraḥ kuryād devānāmapi bhairava

grīvordhvadeśe raupyaṃ tu na kadācicca bhūṣaṇam/
prāvāraḥ pānapātraṃ ca gaṇḍako gṛhameva ca

paryaṅkādi yadanyacca sarvaṃ tadupabhūṣaṇam/
ayomayamṛte kāṃsyamṛte yad‌bhūṣaṇaṃ bhavet

svarṇaraupyasya cābhāve tvadhaḥ kāye niyojayet/
eteṣāṃ bhūṣaṇādīnāṃ yad dātuṃ śakyate naraiḥ

tat tad dadyāt sambhave tu sarvameva pradāpayet/
caturvargapradaṃ tvitthaṃ bhūṣaṇaṃ sarvasaukhyadam

tuṣṭipuṣṭiprītikaraṃ yathāśaktīṣṭaye sṛjet/
idaṃ vā bhūṣaṇaṃ proktaṃ sarvadevasya tuṣṭidam

gandhaṃ ca samyak śṛṇutaṃ putrau vetālabhairavau/
cūrṇīkṛto vā ghṛṣṭo vā dāhākarṣita eva vā

rasaḥ sammardajo vāpi prāṇyaṅgodbhava eva vā/
gandhaḥ pañcavidhaḥ prokto devānāṃ prītidāyakaḥ

gandhacūrṇaṃ gandhapātraṃ cūrṇaṃ sumanasastathā/
praśastagandhayuktānāṃ syuḥ patracūrṇāni yāni tu

tāni gandhavahāni syuḥ sagandhaḥ prathamaḥ smṛtaḥ/
ghṛṣṭo malayajo gandhaḥ sacūrṇīkṛtameruṇā

aguruprabhṛtiścāpi yasya paṅkaḥ pradīyate/
gandho dṛṣṭvāmaghṛṣṭo'yaṃ dvitīyaḥ parikīrtitaḥ

devadārvagurupadmagandhasārānta candanāḥ/
priyādīnāṃ ca yo dagdhvā gṛhyate dāhajo rasaḥ

sadāhākarṣito gandhastṛtīyaḥ parikīrtitaḥ/
sugandhakaravībilvagandhīni tilakaṃ tathā

prabhṛtīnāṃ raso yo'sau niṣpīḍya parigṛhyate/
sasammardodbhavo gandhaḥ sammardaja itīṣyate

mṛganābhisamud‌bhūtastat‌koṣod‌bhava eva vā/
gandhaḥ prāṇyaṅgajaḥ prokto modadaḥ svargavāsinām

karpūragandhasārādyāḥ kṣode ghṛṣṭe ca saṃsthitāḥ/
candrabhāgādayaścāpi rase paṅke ca saṅgatāḥ

gandhasāraṃ sarvarasaṃ gandhādau ca prayujyate/
mṛganābhirbhaved ghṛṣṭaścūrṇo'pyanayasya yogataḥ

evaṃ sarvaṃ tu sarvatra gandho bhavati pañcadhā/
ghṛṣṭādibhāvādanyonyaṃ gandhaḥ prītikaraṃ paraḥ

ganadhasya vistaro bhedaḥ proktaḥ kālīyakādayaḥ/
sarvaḥ pañcavidheṣveva praviṣṭo bhavati kṣaṇāt

gandho malayajo yastu daive pitrye ca sammataḥ/
tasya paṅko raso vāpi cūrṇo vā viṣṇutuṣṭidaḥ

sarveṣu gandhajāteṣu praśasto malayodbhavaḥ/
tasmāt sarvaprayatnena dadyānmalayajaṃ sadā

kṛṣṇāguruḥ sakarpūraḥ sahito malayodbhavaiḥ/
vaiṣṇavīprītido gandhaḥ kāmākhyāyāśca bhairava

kuṅkumāgurukastūrīcandrabhāgaiḥ samīkṛtaiḥ/
tripurāprītido gandhastathā caṇḍyāśca śasyate

daivatoddeśapūrveṇa gandhaṃ sampūjya sādhakaḥ/
devāyeṣṭāya vitaret sarvasiddhipradaṃ sadā

gandhena labhate kāmān gandho dharmapradaḥ sadā/
arthānāṃ sādhako gandho gandhe mokṣaḥ pratiṣṭhitaḥ

ayaṃ vāṃ kathito gandhaḥ putrau vetālabhairavau/
puṣpāṇi devyā vaiṣṇavyāḥ priyāṇi śṛṇu samprati

bakulaiścaiva mandāraiḥ kundapuṣpaiḥ kuruṇṭakaiḥ/
karavīrārkapuṣpaiśca śālmalaiścāparājitaiḥ

damanaiḥ sindhuvāraiśca surabhī kuruvakaistathā/
latābirbrahmavṛkṣasya dūrvāṅkuraiśca kaumalaiḥ

mañjarībhiḥ kuśānāṃ ca bilvapatraiḥ suśobhanaiḥ/
pūjayet vaiṣṇavīṃ devīṃ kāmākhyāṃ tripurāṃ tathā

anyāśca yā śivāprītyai jāyante puṣpajātayaḥ/
tā imāḥ śṛṇu kathyante mayā vetāla bhairava

mālatī mallikā jātī yūthikā mādhavī tathā/
pāṭalā karavīraśca javā tarkārikā tathā

kubjakastagaraścaiva karṇikāro'tha rocanā/
campakāmrātakau bāṇo barbarā mallikā tathā

aśoko lodhratilakau aṭarūṣaśirīṣakau/
śamīpuṣpaṃ ca droṇaśca padmotpalabakāruṇāḥ

śvetāruṇastrisandhye ca palāśaḥ khadirastathā/
vanamālā'tha sevantī kumudo'tha kadambakaḥ

cakraṃ kokanadaṃ caiva taṇḍilo girikarṇikā/
nāgakeśarapunnāgau ketakyañjalikā tathā

dohadā bījapuraśca nameruḥ śāla eva ca/
trapuṣī caṇḍabilvaśca jhiṇṭī pañcavidhāstathā

evamādyuktakusumaiḥ pūjayed varadāṃ śivām/
apāmārgasya patraṃ tu tato bhṛṅgārapatrakam

tato'pi gandhinopatraṃ valāhakamataḥ param/
tasmāt khadirapatraṃ tu vañjulastavaka stathā

āmraṃ tu bakagucchaṃ tu jambupatraṃ tataḥ param/
bījapūrasya patraṃ tu tato'pi kuśapatrakam

dūrvākuraṃ tataḥ proktaṃ śamīpatramataḥ param/
patramāmalakaṃ tasmādāmalaṃ patramantataḥ

sarvato bilvapatraṃ tu devyāḥ prītikaraṃ matam/
puṣpaṃ kokanadaṃ padmaṃ javā bandhuka eva ca

patraṃ bilvasya sarvebhyo vaiṣṇavītuṣṭidaṃ matam/
sarveṣāṃ puṣpajātīnāṃ raktapadmamihottamam

raktapadmasahasreṇa yo mālāṃ samprayacchati/
bhaktiyukto mahādevyai tasya puṇyaphalaṃ śṛṇu

kalpakoṭisahasrāṇi kalpakoṭiśatāni ca/
sthitvā mama pure śrīmāṃstato rājā kṣitau bhavet

patreṣu bilvapatraṃ tu devīprītikaraṃ matam/
tat‌sahasrakṛtā mālā pūrvavat phaladā bhavet

kiṃcātra bahunoktena samānyenedamucyate/
uktānuktaistathāpuṣpairjalajaiḥ sthalasambhavaiḥ

patraiḥ sarvairyathālābhaṃ sarvauṣadhigaṇairapi/
vanajaiḥ sarvapuṣpaiśca patrairapi śivāṃ yajet

pūjayet parameśānīṃ puṣpābhāve'pi patrakaiḥ/
patrāṇāmapyabhāve tu tṛṇagulmauṣadhādibhiḥ

auṣadhīnāmabhāve tu t‌phalairapi pūjayet/
akṣatairvā jalairvāpi tadabhāve tu sarṣapaiḥ

sitaistasyāpyalābhe tu mānīsaṃ bhaktimācaret/
vājidantakapatraiśca puṣpaughairapi pūjayet

tulasīkusumaiḥ patrairarcayecchrīvivṛddhaye/
puraścaraṇakāryeṣu bilvapatrayutaistilaiḥ

sākṣataiḥ saghṛtairvāpi śivāmuddiśya yatnataḥ/
juhuyādanalaṃ vṛddhaṃ saṃskṛtaṃ kāmavṛddhaye

saṃsakalpitaḥ kāmasiddhyai saṃkhyayā yaḥ kṛto japaḥ/
tadante pūjanaṃ yattu vihitaṃ kriyate dvijaiḥ

puraścaraṇasaṃjñaṃ tu kīrtitaṃ dvijasāttamaiḥ/
tasmin purāṇake pūrvaṃ pūrvoktaurvistaroditaiḥ

vidhānaiḥ pūyajet devīṃ kāmākhyāṃ vaiṣṇavīmapi/
yathāsambhavamevātra dadyāt ṣoḍaśa sādhakaḥ

upacārāṃstathaivoktān vidhikṛtyānna laṃghayet/
sampūrṇaṃ pūjanaṃ kṛtvā kalpoktaṃ śatadhā japet

japānte juhuyādagniṃ homānte tu balitrayam/
trijātīyaṃ tu vitarettauryatrikamataḥ param

patnī svayaṃ vā bhrātā vā gururvā viniyojayet/
naivedyādīni sarvāṇi svaputraḥ śiṣya eva vā

yajñāvasāne dadyāt tu gurave dakṣiṇāṃ śubhām/
cāmokaraṃ tilān gāñca tadaśaktau tu celakam

aṣṭamyāṃ śuklapakṣasya brahmacāro jitendriyaḥ/
navamyāṃ vā caturdaśyāṃ mahādevyāḥ puraścaret

ādadyād guruvaktrāt tu vidhinā vistareṇa tu/
kalpoditena sampūjya tithiṣvetāsu bhairava

sampūrṇapūjāṃ no kṛtvā nādadyānmantramīpsitam/
na puraścaraṇaṃ vāpi kuryāt kṛtvā'vasīdati

nityapūjā sā tu punaḥ sampūrṇā yadi śakyate/
kalpoditaṃ pūjayituṃ tadā kuryādatandritaḥ

na ced vistaraśaḥ kartuṃ devyāḥ pūjāṃ tu bhairava/
kalpoktāṃ vā'nyadevasya tatrāyaṃ vidhirucyate

mārjanādyaistu saṃskṛtya sthaṇḍile maṇḍalaṃ likhet/
pātrasya pratipattiṃ tu kṛtvā dāha plavaṃ tathā

dhyāyedātmānamatha ca saṃskṛtyāṅgasvarūpataḥ/
aṅguṣṭhādyastraparyantaṃ dvādaśāṅgasya śuddhaye

ardhyapātre'ṣṭadhā japtvā upacārān prasecayet/
ādhāraśaktipramukhaṃ mūlavarṇān prayujya ca

hṛdisthāṃ devatāṃ dhyātvā bahiḥkṛtyaṃ ca vāyunā/
āropya maṇḍale dadyādupacārān yathāvidhi

pūjayitvā ṣaḍaṅgāni tathāṣṭau daladevatāḥ/
puṣpāḍhjalitrayaṃ dattvā japtvā stutvā praṇamya ca

mudrāmagre pradarśyātha tataḥ paścād visarjayet/
sarveṣāmeva devānāmeṣa eva vidhiḥ smṛtaḥ

samyak kalpoditā pūjā yadi kartuṃ na śakyate/
ucārāṃstathā dātuṃ pañcaitān vitaret tadā

gandhaṃ puṣpaṃ ca dhūpaṃ ca dīpaṃ ca naivedyameva ca/
abhāve puṣpatoyābhyāṃ tadabhāve tu bhaktitaḥ

saṃkṣepapūjā kathitā tathā vastrādikaṃ punaḥ/
puraścaraṇakṛtye ca pradīpaṃ śṛṇu bhairava

dīpena lokāñjayati dīpastejomayaḥ smṛtaḥ/
caturvargaprado dīpastasmād dīpairyajecchriyam

satataṃ puṣpadīpābhyāṃ pūjayed yastu devatām/
tābhyāmeva caturvargaḥ kathito nātra saṃśayaḥ

puṣpairdevāḥ prasīdanti puṣpe devāśca saṃsthitāḥ/
carācarāśca sakalāḥ sadā puṣparasāḥ smṛtāḥ

kiṃcāti bahunoktena puṣpasyoktirmatallikā/
paraṃ jyotiḥ puṣpagataṃ puṣpeṇaiva prasīdati

trivargasādhanaṃ puṣpaṃ tuṣṭiśrīpuṣṭimokṣadam /
puṣpamūle vased brahmā puṣpamadhye tu keśavaḥ

puṣpāgre tu mahādevaḥ sarve devāḥ sthitā dale/
tasmāt puṣpairyajed devānnityaṃ bhaktiyuto naraḥ

uccāritaṃ nāmamātraṃ jāyate sarvabhūtaye/
ghṛtapradīpaḥ prathamastilatailodbhavastataḥ

sārṣapaphalaniryāsajāto vā rājikodbhavaḥ/
dadhijaścānnajaścaiva dīpāḥ sapta prakīrtitāḥ

padmasūtrabhavā darbhagarbhasūtrabhavā'thavā/
śaṇajā bādarī vāpi phalakoṣodbhavā tathā

vartikā dīpakṛtyeṣu sadā pañcavidhāḥ smṛtāḥ/
taijasaṃ dāravaṃ lauhaṃ mārttikyaṃ nārikelajam

tṛṇadhvajodbhavaṃ vāpi dīpapātraṃ praśasyate/
dīpavṛkṣāśca kartavyāstaijasādyaistu bhairava

vṛkṣeṣu dīpo dātavyo na tu bhūmau kadācana/
sarvasahā vasumatī sahate na tvidaṃ dvayam

akāryapādaghātaṃ ca dīpatāpaṃ tathaiva ca/
tasmād yathā tu pṛthvī tāpaṃ nāpnoti vai tathā

dīpaṃ dadyānmahādevyai anyebhyo'pi ca bhairava/
kurvantaṃ pṛthivītāpaṃ yo dīpamutsṛjennaraḥ

sa tāmratāpaṃ narakaṃ prāpnotyeva śataṃ samāḥ/
suvṛttavartiḥ susnehaḥ pātramagnaḥ sudarśanaḥ

sūcchrāye vṛkṣakoṭau tu dīpaṃ dadyāt prayatnataḥ/
labhyate yasya tāpastu dīpasya caturaṅgulāt

na sa dīpa iti khyāto hyoghavahnistu sa śrutaḥ/
netrāhlādakaraḥ svarcirdūratāpavivarjitaḥ

susikhaḥ śabdarahito nirdhūmo nātihrasvakaḥ/
dakṣiṇāvartavartistu pradīpaḥ śrīvivṛddhaye

dopavṛkṣasthite pātre śuddhasnehaprapūrite/
dakṣiṇāvartavartyā tu cārudīptaḥ pradīpakaḥ

uttamaḥ procyate putra sarvatuṣṭipradāyakaḥ/
vṛkṣeṇa varjito dīpo madhyamaḥ parikīrtitaḥ

vihīnaḥ pātratailābhyāmadhamaḥ parikīrtitaḥ/
śāṇaṃ vā dāravaṃ vastraṃ jīrṇaṃ malinameva vā

upayuktaṃ ca nādadyād vartikārthaṃ tu sādhakaḥ/
upādadyānnūtnameva satataṃ śrīvivṛddhaye

koṣajaṃ romajaṃ vastraṃ vartikārthaṃ na cādadet/
na miśrīkṛtya dadyāt tu dīpe snehaghṛtādikān

kṛtvā miśrīkṛtaṃ snehaṃ tāmisraṃ narakaṃ vrajet/
vasāmajjāsthiniryāsaiḥ snehaiḥ prāṇyaṅgasambhavaiḥ

pradīpaṃ naiva kuryāt tu kṛtvā paṅke'vasīdati/
asthipātre'tha vā pacyed durgandhāsthipavāsini

naivaṃ dīpaḥ pradātavyo vibudhaiḥ śrīvivṛddhaye/
naiva nirvāpayed dīpaṃ kadācidapi yatnataḥ

satataṃ lakṣaṇopetaṃ devārthamupakalpitam/
na harej‌jñānato dīpaṃ tathā lobhādinā naraḥ

dīpahartā bhavedandhaḥ kāṇo nirvāpako bhavet/
uddīptadīpapratimaṃ kāṣṭhakāṇḍasamud‌bhavaṃ

bilvedhmodbhavamevātha dīpālābhe nivedayet/
ulmukaṃ naiva dīpārthe kadācidapi cotsṛjet

prasannārthaṃ tu taṃ dadyādupacārād bahiṣkṛtam/
evaṃ vāṃ kathito dīpo dhūpaṃ ca śṛṇutaṃ sutau

nāsākṣirandhrasukhadaḥ sugandho'timanoharaḥ/
dahyamānasya kāṣṭhasya prayatasyetarasya ca

parāgasyāthavā dhūmo nistāpo yasya jāyate/
sa dhūpa iti vijñeyo devānāṃ tuṣṭidāyakaḥ

rāśīkṛtairna caikatra tairdravyaiḥ paridhūpayet /
tuṣāgnivartulāṃ kṛtvā na tat phalamavāpnuyāt

śrīcandanaṃ ca saralaḥ śālaḥ kṛṣṇāgurustathā/
udayaḥ surathaskando raktavidruma eva ca

pītaśālaḥ parimalo virmadī kāśalastathā/
namerurdevadāruśca bilvasāro'tha khādiraḥ

santānaḥ pārijātaśca haricandanavallabhau/
vṛkṣeṣu dhapāḥ sarveṣāṃ prītidāḥ parikīrtitāḥ

arālaḥ saha sūtrema śrīvāsaḥ paṭṭavāsakaḥ/
karpūraḥ śrīkaraścaiva parāgaḥ śrīharāmalau

sarvauṣadhīpa jātīca varāhaścūrṇa utkalaḥ/
jātīkoṣasya curṇaṃ ca gandhaḥ kastūrikā tathā

kṣode vṛtte ca gaditā dhūpā ete udāhṛtāḥ/
yakṣadhūpo vṛkṣadhūpaḥ śrīpiṣṭo'guru ḍharḍharaḥ

patrivāhaḥ piṇḍadhūpaḥ sugolaḥ kaṇṭha eva ca/
anyonyayogā niryāsā dhūpā ete prakīrtitāḥ

etairvidhūpayed devān dhūmibhiḥ kṛṣṇavatmanā/
yeṣāṃ dhūpod‌bhavairghrāṇaistuṣṭiṃ gacchanti jantavaḥ

niryāsaśca parāgaśca kāṣṭhaṃ gandhaṃ tathaiva ca/
kṛtrimaśceti pañcaite dhūpāḥ prītikarāḥ parāḥ

na yakṣadhūpaṃ vitarenmādhavāya kadācana/
na raktaṃ vidrumaṃ mahyaṃ surathaṃ kadrilaṃ tathā

yakṣadhūpaḥ putrivāhaḥ pimḍadhūpaḥ sugolakaḥ/
kṛṣṇāguruḥ sakarpūro mahāmāyāpriyaḥ smṛtaḥ

vṛkṣadhūpena vā devīṃ mahāmāyāṃ prapūjayet/
medomajjāsamāyuktān na dhūpān viniyojayet

parakīyāṃstathāghrātāṃste'pi kṛtyābhimarditān/
puṣpaṃ dhūpaṃ ca gandhaṃ ca upacārāṃstathāparān

ghrātvā nivedya devebhyo naro narakamāpnuyāt/
na bhūmau vitared dhūpaṃ nāsane na ghaṭe tathā

yathātathādhāragataṃ kṛtvā tad vinivedayet/
raktavidrumaśālau ca surathaḥ suralastathā

santānako nameruśca kālāgurusamanvitaḥ/
jātīkoṣākṣasaṃyukto dhūpaḥ kāmeśvarīpriyaḥ

tripurāyāstathaivāyaṃ mātṛṇāmapi nityaśaḥ/
sarveṣāṃ pīṭhadevānāṃ rudrādīnāṃ ca putrakau

eṣa vāṃ kathito dhūpaḥ śṛṇu tannetrarañjanam/
yena tuṣyati kāmākhyā tripurā vaiṣṇavī tathā

sauvīraṃ yāmunaṃ tutthraṃ mayūragrīvakaṃ tathā/
darvikā meghanīlaśca añjanāni bhavanti ṣaṭ

sravad‌drumaṃ ca sauvīraṃ yāmunaṃ prastaraṃ tathā/
mayūragrīvakaṃ ratnaṃ meghanīlastu taijasam

ghṛṣṭhāni grāhya caitāni śilāyāṃ taijase'tha vā/
pradadyāt sarvadevebhyo devībhyaścāpi putraka

ghṛtatailādiyogena tāmrādau dīpavahninā/
yadañjanaṃ jāyate tu darvikā parikīrtitā

sarvābhāve tu tad dadyād devībhyo dāhajāñjanam/
mahāmāyā jagaddhātrī kāmākhyā tripurā tathā

āpnuvanti mahātoṣaṃ ṣaḍ‌bhirebhiḥ sadāñjanaiḥ/
vidhavā nāñjanaṃ kuryānmahāmāyārthamṛttamam

nādatte tvañjanaṃ devī vaiṣṇavī vidhavākṛtam/
ta mṛt‌pātre yojayet tu sādhako netrarañjanam

na pūjāphalamāpnoti mṛtpātravihitāñjanaiḥ/
caturvargaprado dhūpaḥ kāmadaṃ netrarañjanam

tasmād dvayamidaṃ dadyād devebhyo bhaktito naraḥ/
iti vāṃ gadito dhūpastathoktaṃ netrarañjanam/
naivedyaṃ tu mahādevyāḥ śṛṇvaikāgramanāḥ punaḥ

iti śrīkālikāpurāṇe ekonaspatatitamo'dhyāyaḥ//