Jnaneshwari · Chapter 7

maga rāyāteṃ mhaṇe saṃjayo / toci abhiprāvo avadhārijo /
kṛṣṇa sāgaṃtī jo / yogarupa

sahajeṃ brahmarasāceṃ pāraṇeṃ / keleṃ arjunālāgīṃ nārāyaṇeṃ /
kī teci avasarī pāhuṇe / pātaloṃ āmhī

kaisī daivācī thorī neṇije / jaiseṃ tānheliyā toya sevije /
kīṃ teṃci cavī karuni pāhije / taṃva amṛta āhe

taise āmhāṃ tumhāṃ jāhale / jeṃ āḍamuṭhī tatva phāvaleṃ /
taṃva dhṛtarāṣṭre mhaṇitaleṃ / heṃ na pusoṃ tūṃte

tayā saṃjayā yeṇeṃ boleṃ / rāyāceṃ hṛdaya cojavaleṃ /
jeṃ avasarīṃ āhe ghetaleṃ / kumārāṃciyā

heṃ jāṇoni manīṃ hāṃsilā / mhaṇe mhātārā moheṃ nāśilā /
eऱhavīṃ bolu tarī bhalā jāhalā / avasarīṃ ye

pari taiṃ taiseṃ kaiseni hoīla / jātyaṃdhā kaiseṃ pāhela /
tevīṃci yeru se gheīla / mhaṇauni bihe

pari āpaṇa cittīṃ āpulāṃ / nikiyāpari saṃtoṣalā /
je to saṃvādu phāvalā / kṛṣṇārjunāṃcā

teṇeṃ ānaṃdāceni dhālepaṇeṃ / sābhiprāya aṃtaḥkaraṇeṃ /
ātāṃ ādareṃsī bolaṇeṃ / ghaḍela tayā

to gītemājī ṣaṣṭhīṃcā / prasaṃgu ase āyaṇīcā /
jaisā kṣīrārṇavīṃ amṛtācā / nivāḍu jāhalā

taiseṃ gītārthāceṃ sāra / je vivekasiṃdhūce pāra /
nānā yogavibhavabhāṃḍāra / ughaḍaleṃ kāṃ

jeṃ ādiprakṛtīceṃ visavaṇeṃ / je śabdabrahmāsi na bolaṇeṃ /
jethūni gītāvallīceṃ ṭhāṇeṃ / praroho pāve

to adhyāya hā sahāvā / vari sāhityāciyā baravā /
sāṃgijaila mhaṇauni parisāvā / citta deunī

mājhā marāṭhāci bolu kautukeṃ / pari amṛtātehīṃ paijāsīṃ jiṃke /
aisīṃ akṣareṃ rasikeṃ / meḻavīna

jiye koṃvaḻikeceni pāḍeṃ / disatī nādīṃce raṃga thoḍe /
vedheṃ parimaḻāceṃ bīka moḍe / jayāceni

aikā rasāḻapaṇāciyā lobhā / kīṃ śravaṇīṃci hoti jibhā /
bole iṃdriyāṃ lāge kaḻaṃbhā / ekamekāṃ

sahajeṃ śabdu tari viṣo śravaṇācā / pari rasanā mhaṇe hā rasu āmucā / ghrāṇāsi bhāvo jāya parimaḻācā / hā toci hoīla

navala bolatīye rekhecī vāhaṇī / dekhatāṃ ḍoḻyāṃhī puroṃ lāge dhaṇī /
te mhaṇatī ughaḍalī khāṇī / rupācī he

jetha saṃpūrṇa pada ubhāre / tetha manaci dhāṃve bāhireṃ /
bolu bhujāhi āviṣkareṃ / āliṃgāvayā

aiśī iṃdriye āpulaliyā bhāvīṃ / jhoṃbatī pari to sarisepaṇeṃci bujhāvī / jaisā ekalā jaga cevavī / sahastrakaru

taiseṃ śabdāceṃ vyāpakapaṇa / dekhije asādhāraṇa /
pāhātayāṃ bhāvajñāṃ phāvatī guṇa / ciṃtāmaṇīce

heṃ asotu yā bolācīṃ tāṭeṃ bhalīṃ / varī kaivalyaraseṃ vogarilīṃ /
hī pratipatti miyāṃ kelī / niṣkāmāsī

ātā ātmaprabhā nīca navī / teci karunī ṭhāṇadivī /
jo iṃdriyāṃteṃ coruni jevī / tayāsīci phāve

yetha śravaṇāceni pāṃge- / vīṇa śrotayāṃ hoāveṃ lāge /
he manāceni nijāṃgeṃ / bhogije gā

āhāca bolāci vālīpha pheḍije / āṇi brahmāciyāci āṃgā ghaḍije / maga sukheṃsī suravāḍije / sukhācimājīṃ

aiseṃ haḻuvārapaṇa jarī yeīla / tarīca heṃ upegā jāila /
eravhīṃ āghavī goṭhī hoīla / mukiyā bahirayācī

parī teṃ aso ātāṃ āghaveṃ / nalage śrotayāṃte kaḍasāveṃ /
je etha adhikāriye svabhāveṃ / niṣkāmakāmu

jihīṃ ātmabodhāciyā āvaḍī / kelī svargasaṃsārāci kuroṃḍī /
te vāṃcunī ethīṃcī goḍī / neṇatī āṇika

jaisā vāyasīṃ caṃdra noḻakhije / taisā graṃthu hā prākṛtīṃ neṇije /
āṇi to himāṃśuci jevi khājeṃ / cakorāceṃ

taisā sajñānāsī tarī hā ṭhāvo / ajñānāsī āna gāṃvo /
mhaṇauni bolāvayā viṣaya pahāho / viśeṣeṃ nāhīṃ

parī anuvādalo mī prasaṃge / teṃ sajjanī upasāhāveṃ lāge /
ātāṃ sāṃgena kāya śrīraṃge / niropileṃ jeṃ

pari nivṛttikṛpādīpaujiyeḍeṃ / dekhena mī

jeṃ diṭhīhī na pavije / teṃ diṭhīviṇa dekhije /
jarī atīṃdriya lāhije / jñānabaḻa

nā tarī jeṃ dhātuvādāhī na joḍe / teṃ lohīṃci paṃdhareṃ sāpaḍe /
jarī daivayogeṃ caḍhe / parisu hātāṃ

taisī sadgurukṛpā hoye / tarī karitāṃ kāya āpu nohe /
mhaṇauni teṃ apāra māteṃ āhe / jñānadevo mhaṇe

teṇeṃ kāraṇeṃ mī bolena / bolī arupāce rupa dāvīna /
atīṃdriya pari bhogavīna / iṃdriyāṃkaravīṃ

āikā yaśa śrī audārya / jñāna vairāgya aiśvarya /
he sāhī guṇavarya / vasatī jetha

mhaṇoni to bhagavaṃtu / jo niḥsaṃgācā sāṃgātu /
to mhaṇe pārthā dattacittu / hoī ātāṃ

āikeṃ yogī āṇi saṃnyāsī janīṃ / he ekaci sināneṃ jhaṇīṃ mānī / eऱhavī vicārijatī jaṃva donhī / taṃva ekaci te

sāṃḍije dujayā nāmācā ābhāsu / tarī yogī toci saṃnyāsu /
pahātāṃ brahmīṃ nāhī avakāśu / dohīṃmājīṃ

jaiseṃ nāmāceni anārisapaṇeṃ / ekā puruṣāte bolāvaṇeṃ /
kāṃ dohīṃ mārgīṃ jāṇeṃ / ekaci ṭhāyā

nātarī ekaci udaka sahajeṃ / parī sinānāṃ ghaṭīṃ bharijeṃ /
taiseṃ bhinnatva jāṇije / yogasaṃnyāsāṃceṃ

āikeṃ sakaḻa saṃmate jagīṃ / arjunā gā toci yogī /
jo karmeṃ karuni rāgī / noheci phaḻīṃ

jaisī mahī he udbhijeṃ / janī ahaṃbudhdīvīṇa sahajeṃ /
āṇi tethīṃcī tiyeṃ bījeṃ / apekṣīnā

taisā anvayāceni ādhāreṃ / jātīceni anukāreṃ /
jeṃ jeṇeṃ avasareṃ / karaṇeṃ pāve

teṃ taiseṃci ucita karī / parī sāṭopu nohe śarīrīṃ /
āṇi budhdīhī karoni phaḻaverīṃ / jāyecinā

aisā toci saṃnyāsī / pārthā gā pariyesīṃ /
toci bharaṃvasenisīṃ / yogīśvaru

vāṃcūni ucita karma prāsaṃgika / tayāteṃ mhaṇe he sāṃḍīna badhdaka /
tarī ṭāṃkoṭāṃkī āṇika / māṃḍici to

jaisā kṣāḻuniyāṃ lepu eku / saveṃci lāvije āṇiku /
taiseni āgrahācā pāiku / vicaṃbe vāyāṃ

gṛhasthāśramāceṃ vojheṃ / kapāḻī ādhīṃca āhe sahajeṃ /
kī teṃci saṃnyāsasavā ṭhevije / sariseṃ puḍhatī

mhaṇauni agnisevā na sāṃḍitāṃ / karmācī rekhā nolāṃḍitāṃ /
āhe yogasukha svabhāvatā / āpaṇāpāṃci

aikeṃ saṃnyāsī āṇi yogī / aisī ekyavākyatecī jagīṃ /
guḍhī ubhavilī anegīṃ / śāstrāṃtarī

jetha saṃnyāsilā saṃkalpu tuṭe / tethaci yogāceṃ sāra bheṭe /
aiseṃ heṃ anubhavāceni dhaṭeṃ / sāceṃ jayā

ātāṃ yogācaḻācā nimathā / jarī ṭhākāvā āthi pārthā /
tarī sopānā yā karmapathā / cukā jhaṇīṃ

yeṇeṃ yamaniyamāceni taḻavaṭeṃ / rige asanāciye pāulavāṭeṃ /
yeī prāṇāyāmāceni āḍakaṃṭheṃ / varautā gā

maga pratyāhārācā ādhāḍā / budhdīciyāhi pāyā nisaraḍā /
jetha haṭiye sāṃḍitī hoḍā / kaḍelaga

tarī abhyāsāceni baḻeṃ / pratyāhārīṃ nirāḻeṃ /
nakhī lāgela ḍhāḻeṃ ḍhāḻeṃ / vairāgyācī

aisā pavanāceni pāṭhāreṃ / yetāṃ dhāraṇeceni paisāreṃ /
kramī dhyānāceṃ cavareṃ / sāṃḍe taṃva

maga tayā mārgācī dhāṃva / purela pravṛttīci hāṃva /
jetha sādhyasādhanā kheṃva / samaraseṃ hoya

jetha puḍhīla paisa pārukhe / māgīla smarāveṃ teṃ ṭhāke /
aisiyā sarisīye bhūmike / samādhī rāhe

yeṇeṃ upāyeṃ yogārūḍhu / jo niravadhi jāhalā prauḍhu /
tayāciyā cinhāṃcā nivāḍu / sāṃgena āikeṃ

tarī jayāciyā iṃdriyāṃciyā gharā / nāhīṃ viṣayāṃciyā yerajhārā /
jo ātmabodhāciyā vovarāṃ / pahuḍalā ase

jayāceṃ sukhaduḥkhāceni āṃge / jhagaṭaleṃ mānasa cevo neghe /
viṣaya pāsīṃhī āliyāṃ se na rige / he kāya mhaṇauni

iṃdriyeṃ karmācyā ṭhāyī / vāḍhīnalīṃ parī kahīṃ /
phaḻahetūcī cāḍa nāhīṃ / aṃtaḥkaraṇīṃ

asateni deheṃ etulā / jo cetuci dise nidelā /
toci yogārūḍhu bhalā / voḻakheṃ tūṃ

tetha arjuna mhaṇe anaṃtā / heṃ maja vismo bahu āikatāṃ /
sāṃge tayā aisī yogyatā / kavaṇeṃ dīje

taṃva hāṃsoni śrīkṛṣṇa mhaṇe / tujheṃ navala nā heṃ bolaṇeṃ /
kavaṇāsi kāya dijela kavaṇeṃ / advaitīṃ iye

pai vyāmohāciye śeje / baḻiyā avidyā nidrita hoije /
te veḻī duḥsvapna hā bhogije / janmamṛtyūṃcā

pāṭhīṃ avasāṃta ye cevo / taiṃ teṃ avagheṃci hoya vāvo /
aisā upaje nitya sadbhāvo / tohi āpaṇapāṃci

mhaṇaūni āpaṇaci āpaṇapeyā / ghātu kījatu ase dhanaṃjayā /
citta deūni nāthiliyā / dehābhimānā

hā vicāruni ahaṃkāru sāṃḍije / maga asatīca vastu hoije /
tarī āpalī svasti sahajeṃ / āpaṇa kelī

eऱhavīṃ kośakīṭakāciyā parī / to āpaṇayā āpaṇa vairī /
jo ātmabudhdī śarīrīṃ / cārusthaḻī

kaise prāptīciye veḻe / nidaivā aṃdhaḻepaṇāce ḍohaḻe /
kīṃ asate āpule ḍoḻe / āpaṇa jhāṃkī

kāṃ kavaṇu eku bhramalepaṇe / mī to navhe gā coraloṃ mhaṇe /
aisā nāthilā chaṃda aṃtaḥkaraṇeṃ / gheūni ṭhāke

eऱhavīṃ hoya teṃ toci āhe / pari kāī kīje budhdī taiśī nohe /
dekhā svapnīṃceni ghāyeṃ / kī mare sāceṃ

jaisī te śukāceni āṃgabhāreṃ / naḻikā bhovinnalī erī mohareṃ /
teṇeṃ uḍāveṃ parī na pure / manaśaṃkā

vāyāṃci māna piḻī / aṭuveṃ hiyeṃ āṃvaḻī /
ṭiṭāṃtu naḻī / dharuni ṭhāke

mhaṇe bāṃdhalā mī phuḍā / aisiyā bhāvaneciyā paḍe khoḍāṃ /
kīṃ mokaḻiyā pāyāṃcā cavaḍā / goṃvī adhikeṃ

aisā kājeṃvīṇa ātuṃḍalā / to sāṃga pāṃ kāya āṇikeṃ bāṃdhalā /
maga nosaṃḍī jaऱhī nelā / toḍuni ardhā

mhaṇaūni āpaṇayāṃ āpaṇaci ripu / jeṇeṃ vāḍhavilā hā saṃkalpu /
yera svaṃyabudhdī mhaṇe bāpu / jo nāthileṃ neghe

tayā svāṃtaḥkaraṇajitā / sakaḻakāmopaśāṃtā /
paramātmā parautā / durī nāhīṃ

jaisā kiḍāḻācā doṣu jāye / tarī paṃdhare teṃci hoye /
taiseṃ jīvā bramhatva āhe / saṃkalpalopīṃ

hā ghaṭākāru jaisā / nimāliyā tayā avakāśā /
nalage miḻo jāṇeṃ ākāśā / ānā ṭhāyā

taisā dehāhaṃkāru nāthilā / hā samūḻa jayācā nāśilā /
toci paramātmā saṃcalā / ādhīṃci āhe

ātāṃ śītoṣṇāciyā vāhaṇī / tetha sukhaduḥkhācī kaḍasaṇīṃ /
iyeṃ na samātī kāṃhī bolaṇīṃ / mānāpamānāṃcī

je jiye vāṭā suryu jāye / teuteṃ tejāceṃ viśva hoye /
taise tayā pāve teṃ āhe / toci mhaṇaūni

dekhaiṃ meghauni suṭatī dhārā / tiyā na rupatī jaisiyā sāgarā /
taiśī śubhāśabheṃ yogīśvarā / navhatī āneṃ

jo hā vijñānātmaku bhāvo / tayā vicāritāṃ jāhalā vāvo /
maga lāgalā jaṃva pāhoṃ / taṃva jñāna teṃ toci

ātāṃ vyāpaku kīṃ ekadeśī / he ūhāpohī je aisī /
te karāvī ṭhelī āpaiśī / dujenavīṇa

aisā śarīrīci parī kautukeṃ / parabrahmāceni pāḍeṃ tuke /
jeṇeṃ jiṃtalīṃ eke / iṃdriye gā

to jiteṃdriyu sahajeṃ / toci yogayuktu mhaṇije /
jeṇeṃ sāneṃ thora neṇije / kavaṇeṃ kāḻīṃ

dekhe soniyāceṃ nikhaḻa / meruyesaṇeṃ ḍhisāḻa /
āṇi mātiyeceṃ ḍikhaḻa / sariseṃci mānī

pāhatā pṛthvīceṃ mola thoḍeṃ / aiseṃ anarghya ratna cokhaḍeṃ /
dekheṃ dagaḍāceni pāḍeṃ / nicāḍu aisā

tetha suhṛda āṇi śatru / kāṃ udāsu āṇi mitru /
hā bhāvabheda vicitru / kalpuṃ kaiṃcā

tayā baṃdhu koṇa kāhyācā / dveṣiyā kavaṇu tayācā /
mīci viśva aisā jayācā / bodhu jāhalā

maga tayāciye diṭhī / adhamottama ase kirīṭī /
kāya parisāciye kasavaṭī / vāniyā kīje

te jaiśī nirvāṇa varṇuci karī / taiśī jayāci budhdī carācarīṃ /
hoya sāmyācī ujarī / niraṃtara

je te viśvāḻaṃkārāceṃ visure / jarī āhātī ānāneṃ ākāreṃ /
tarī ghaḍale ekaci bhāṃgāreṃ / parabrahmeṃ

aiseṃ jāṇaṇeṃ jeṃ baraveṃ / te phāvaleṃ tayā āghaveṃ /
mhaṇauni āhācavāhāceṃ na jhakave / yeṇe ākāracitreṃ

ghāpe paṭāmājī dṛṣṭī / dise taṃtūṃci saiṃgha sṛṣṭī /
parī to ekavāṃcuni goṭhī / dujī nāhīṃ

aiseni pratītī he gavase / aisā anubhava jayāteṃ ase /
toci samabudhdī heṃ anāriseṃ / navhe jāṇeṃ

jayāceṃ nāṃva tīrtharāvo / darśaneṃ praśastīsi ṭhāvo /
jayāceni saṃgeṃ brahmabhāvo / bhrāṃtāsī

jayāceni boleṃ dharmu jiye / diṭhī mahāsidhditeṃ viye /
dekheṃ svargasukhādi iyeṃ / kheḻu jayācā

vipāyeṃ jarī āṭhavalā cittā / tarī de āpulī yogyatā /
heṃ aso tayāteṃ praśaṃsitāṃ / lābhu āthi

puḍhatī astavenā aiseṃ / jayā pāhaleṃ advaitadivaseṃ /
maga āpaṇapāṃci āpaṇa ase / akhaṃḍita

aisiyā dṛṣṭī jo vivekī / pārthā to ekākī /
sahajeṃ aparigrahī jo tihīṃ lokī / toci mhaṇaūni

aisiyeṃ asādhāraṇeṃ / niṣpannācīṃ lakṣaṇeṃ /
āpuleni bahuvasapaṇeṃ / śrīkṛṣṇa bole

jo jñāniyāṃcā bāpu / dekhaṇeyāṃce diṭhīcā dīpu /
jayā dādulayācā saṃkalpu / viśva racī

praṇavāciye peṭhe / jāhaleṃ śabdabrahma mājiṭheṃ /
teṃ jayāciyā yaśā dhākuṭeṃ / veḍhūṃ na pure

jayāceni āṃgīkeṃ tejeṃ / āvo raviśaśīciye vaṇije /
mhaṇauni jaga heṃ vesaje- / vīṇa ase tayā

hāṃ gā nāṃvaci eka jayāceṃ / pāhatāṃ gaganahī dise ṭāṃce /
guṇa ekeka kāya tayāce / ākaḻaśīla tūṃ

mhaṇoni aso heṃ vānaṇeṃ / sāṃgoṃ neṇoṃ kavaṇāṃcī lakṣaṇeṃ /
dāvāvīṃ miṣeṃ yeṇeṃ / kāṃ boliloṃ teṃ

aikeṃ dvaitācā ṭhāvoci pheḍī / te brahmavidyā kījela ughaḍī /
tarī arjunā paḍhiye he goḍī / nāsela hana

mhaṇoni teṃ taise bolaṇeṃ / navhe sapātaḻa āḍa lāvaṇeṃ /
keleṃ manaci vegaḻavāṇeṃ / bhogāvayā

jayā sohaṃbhāva aṭaku / mokṣasukhālāgoni raṃku /
tayāciye diṭhīcā jhaṇeṃ kaḻaṃku / lāgela tujhiyā premā

vipāyeṃ aṃhabhāva yayācā jāīla / mī teṃci ho jarī hoīla /
tarī maga kāya kījela / ekaleyā

diṭhīci pāhatāṃ nivije / kāṃ toṃḍa bharoni bolije /
nātarī dāṭuni kheṃva dīje / aiseṃ koṇa āhe

āpuliyā manā baravī / asamāī goṭhī jīvīṃ /
te kavaṇeṃsi cāvaḻāvī / jarī aikya jāhaleṃ

iyā kākuḻatī janārdaneṃ / anyopadeśāceni hātāsaneṃ /
bolāmāji mana maneṃ / āliṃguṃ sarale

heṃ parisatāṃ jarī kānaḍeṃ / tarī jāṇa pāṃ pārtha ughaḍeṃ /
kṛṣṇasukhāceṃci rupaḍeṃ / votaleṃ gā

heṃ aso vayaseciye śevaṭīṃ / jaiseṃ ekaci viye vāṃjhoṭī /
maga te mohācī tripuṭī / nācoṃ lāge

taiseṃ jāhale anaṃtā / aiṃse tarī mī na mhaṇatāṃ /
jarī tayācā na dekhatāṃ / atiśayo etha

pāhā pāṃ navala kaiseṃ coja / keṃ upadeśu keuteṃ jhuṃja /
parī puḍheṃ vālabhāce bhoja / nācata ase

āvaḍī āṇi lājavī / vyasana āṇi śiṇavī /
piseṃ āṇi na bhulavī / tarī teṃci kāi

mhaṇauni bhāvārthu to aisā / arjuna maitriyecā kuvāsā /
kīṃ sukhe śrṛṃgāraliyā mānasā / darpaṇu to

yāvarī bāpa puṇyapavitra / jagīṃ bhaktibījāsi sukṣetra /
to kṛṣṇakṛpe pātra / yācilāgīṃ

ho kā ātmanivedanātaḻīṃcī / je pīṭhikā hoya sakhyācī /
pārthu adhiṣṭhātrī tethiṃcī / mātṛkā gā

pāsīṃci gosāvī na varṇije / maga pāikācā guṇa gheīje /
aisā arjune to sahajeṃ / paḍhiye harī

pāhāṃ pāṃ anurāgeṃ bhaje / je priyottameṃ mānije /
te patīhūna kāya na varṇije / pativratā

taisā arjunaci viśeṣeṃ stavāvā / aiseṃ āvaḍaleṃ maja jīvā /
je to tribhuvanāciyā daivāṃ / ekāyatanu jāhalā

jayāciyā āvaḍīceni pāṃgeṃ / amūrtuhī mūrti āvage /
pūrṇāhi parī lāge / avasthā jayācī

taṃva śrote mhaṇatī daiva / kaisī bolācī havāva /
kāya nādāteṃ hana barava / jiṇonī ālī

hāṃ ho navala nohe deśī / maऱhāṭī bolije tarī aisī /
vāṇeṃ umaṭatāhe ākāśīṃ / sāhityaraṃgāceṃ

kaiseṃ unmekhacāṃdiṇeṃ tāra / āṇi bhāvārthā paḍe gāra /
heci ślokārthakumudī tarī phāra / sāviyā hotī

cāḍaci nicāḍāṃ karī / aisī manorathīṃ ye thorī /
teṇeṃ vivaḻale aṃtarī / tetha ḍolu ālā

teṃ nivṛttidāseṃ jāṇitaleṃ / maga avadhāna dyā mhaṇitaleṃ //
navala pāṃḍavakuḻīṃ pāhaleṃ / kṛṣṇadivaseṃ

devakīyā udarīṃ vāhilā/ yaśodā sāyāseṃ pāḻilā //
kīṃ śekhīṃ upegā gelā / pāṃḍavāsī

mhaṇaūni bahu divasa vogaḻāvā / kāṃ avasaru pāhoni vinavāvā /
hāhī sosu tayā sadaivā / paḍecinā

heṃ aso kathā sāṃgeṃ vegīṃ / maga arjuna mhaṇe salagī /
devā iyeṃ saṃtacinheṃ hana āṃgīṃ / na ṭhakatī mājhāṃ

eऱhavīṃ yā lakṣaṇāṃciyā nijasārā / mī apāḍeṃ kīra apurā /
pari tumaceni boleṃ avadhārā / thorāveṃ jarī

jī tumhī citta deyāla / tarī brahma miyāṃ hoījela /
kāya jāhaleṃ abhyāsijela / sāṃgāla je

hāṃ ho neṇoṃ kavaṇācī kāhāṇī / āikoni ślāghata asoṃ aṃtaḥkaraṇīṃ /
aisī jāhalepaṇācī śirayāṇī / kāyasī devā

heṃ āṃge myā hoijo kā / yetuleṃ gosāvī āpulepaṇeṃ kījo kāṃ /
taṃva hāṃsoni śrīkṛṣṇa ho kāṃ / karuṃ mhaṇatī

dekhā saṃtoṣu eka na joḍe / taṃvaci sukhāceṃ saiṃgha sāṃkaḍeṃ /
maga joḍaliyā kavaṇīkaḍe / apureṃ ase

taisā sarveśvaru baḻiyā sevakeṃ / mhaṇoni brahmahī hoya to kautukeṃ /
pari kaiṃsā bhāreṃ ātalā pike / daivāceni

jo janmasahasrāṃciyāsāṭhīṃ / iṃdrādikāṃhī mahāgu bheṭī /
to ādhīnu ketulā kirīṭī / je boluhi na sāhe

maga aikā jeṃ pāṃḍaveṃ / mhaṇitale brahma myāṃ hoāveṃ /
teṃ aśeṣahī deveṃ / avadhārileṃ

tetha aiseṃci eka vicārileṃ / je yā brahmatvāce ḍohaḻe jāhale /
pari udarā vairāgya āhe āleṃ / budhdīciyā

eऱhavīṃ divasa tarī apure / pari vairāgyavasaṃtāceni bhareṃ /
je soṃhabhāva mahureṃ / moḍoni ālā

mhaṇoni prāptiphaḻīṃ phaḻatāṃ / yāsi veḻu na lāgela ātāṃ /
ho viraktu aisā aṃnatā / bharaṃvasā jāhalā

mhaṇe jeṃ jeṃ hā adhiṣṭhīla/ teṃ āraṃbhīṃca yayā phaḻela /
mhaṇauni sāṃgitalā na vacela / abhyāsu vāyāṃ

aiseṃ vivaroniyāṃ śrīharī / mhaṇitaleṃ tiye avasarīṃ /
arjunā hā avadhārīṃ / paṃtharāju

tetha pravṛttitarucyā buḍīṃ / disatī nivṛttiphaḻāciyā koḍī /
jiye mārgīcā kāpaḍī / maheśu ājhuni

paiṃ yogavṛṃde vahilīṃ / āḍavīṃ ākāśīṃ nighālīṃ /
kīṃ tetha anubhavācyā pāulīṃ / dhoraṇu paḍilā

tihīṃ ātmabodhāceni ujukāreṃ / dhāṃva ghetalī ekasareṃ /
kīṃ yera sakaḻa mārga nidasure / sāṃḍuniyāṃ

pāṭhīṃ maharṣī yeṇeṃ āle / sādhakāṃce sidhda jāhāle /
ātmavida thorāvale / yeṇeṃci paṃtheṃ

hā mārgu jaiṃ dekhije / taiṃ tahāna bhūka visarije /
rātridivasu neṇije / vāṭe iye

cālatāṃ pāūla jetha paḍe / tetha apavargācī khāṇī ughaḍe /
āvhāṃṭaliyā tarī joḍe / svargasukha

nigije pūrvīṃliyā moharā / kīṃ yeije paścimeciyā gharā /
niścaḻapaṇeṃ dhanurdharā / cālaṇeṃ yethiṃceṃ

yeṇeṃ mārgeṃ jayā ṭhāyā jāije / to gāṃvo āpaṇaci hoije /
heṃ sāṃgo kāya sahajeṃ / jāṇasī tūṃ

tetha mhaṇitaleṃ devā / tarī teṃci maga kevhāṃ /
kāṃ ārtīsamudrauni na kāḍhāvā / buḍatu jī mī

tavaṃ śrīkṛṣṇa mhaṇatī aiseṃ / heṃ utsaṃkhaḻa bolaṇeṃ kāyaseṃ /
āmhīṃ sāṃgatasoṃ āpaiseṃ / vari puśile tuvāṃ

tarī viśeṣe ātāṃci bolijela / pari teṃ anubhaveṃ upegā jāīla /
mhaṇauni taiseṃ eka lāgela / sthāna pahāveṃ

jetha ārāṇukeceni koḍeṃ / baisaliyā uṭhoṃ nāvaḍe /
vairāgyāsī duṇīva caḍhe / dekhaliyā jeṃ

jo saṃtī vasavilā ṭhāvo / saṃtoṣāsi sāvāvo /
manā hoya utsāvo / dhairyācā

abhyāsuci āpaṇayāteṃ karī / hṛdayāteṃ anubhava vari /
aisī ramyapaṇācī thorī / akhaṃḍa jetha

jayā āḍa jātāṃ pārthā / tapaścaryā manorathā /
pākhāṃḍiyāhī āsthā / samūḻa hoya

svabhāveṃ vāṭe yetāṃ / jarī varapaḍā jāhalā avacitāṃ /
tarī sakāmuhī pari māghautā / nighoṃ visare

aiseni na rāhatayāteṃ rāhāvī / bhramatayāteṃ baisavī /
thāpaṭuni cevavī / viraktīteṃ

heṃ rājya vara sāṃḍije / maga nivāṃtā etheṃci asije /
aise śṛṃgāriyāṃhi upaje / dekhatakheṃvo

jeṃ yeṇeṃ māneṃ baravaṃṭa / āṇi taiseca aticokhaṭa /
jetha adhiṣṭhāna pragaṭa / ḍoḻāṃ dise

āṇikahī eka pahāveṃ / sādhakīṃ vasateṃ hoāveṃ /
āṇi janāceni pāyaraveṃ / ruḻecinā

jetha amṛtāceni pāḍeṃ / muḻehīsakaṭa goḍeṃ /
joḍatī dāṭeṃ jhāḍeṃ / sadā phaḻatīṃ

pāulā pāulā udakeṃ / varṣākāḻeṃhī aticokheṃ /
nirjhareṃ kā viśekheṃ / sulabheṃ jetha

hā ātapuhī aḻumāḻu / jāṇije tarī śītaḻu /
pavana ati niścaḻu / maṃda jhuḻake

bahuta karuni niḥśadba / dāṭa na rige śvāpada /
śuka hana ṣaṭpada / teuteṃ nāhīṃ

pāṇilageṃ haṃseṃ / donī cārī sāraseṃ /
kavaṇeṃ eke veḻe baise / tarī kokiḻahī ho

niraṃtara nāhī / tarī ālīṃ gelīṃ kāṃhīṃ /
hotu kāṃ mayureṃhī / āmhī nā na mhaṇoṃ

pari āvaśyaka pāṃḍavā / aisā ṭhāvo joḍāvā /
tetha nigūḍha maṭha hoāvā / kāṃ śivālaya

dohīṃmājī āvaḍe teṃ / jeṃ mānaleṃ hoya citteṃ /
bahutakaruni ekāṃte / baisije gā

mhaṇoni taiseṃ te jāṇāveṃ / mana rāhāteṃ pāhāveṃ /
rāhela tetha racāveṃ / āsana aiseṃ

vari cokhaṭa mṛgasevaḍī / mājī dhūtavastrācī ghaḍī /
taḻavaṭīṃ amoḍī / kuśāṃkura

sakomaḻa sarise / subadhda rāhatī āpaise /
ekeṃ pāḍeṃ taiseṃ / vojā ghālī

pari sāviyāci uṃca hoīla / tarī āṃga hana ḍolela /
nīca tarī pāvela / bhūmidoṣu

mhaṇauni taiseṃ na karāveṃ / samabhāveṃ dharāveṃ /
heṃ bahu aso hoāveṃ / āsana aiseṃ

maga tetha āpaṇa / ekāgra aṃtaḥkaraṇa /
karuni sadgurusmaraṇa / anubhavije

taiseṃ smarateni ādareṃ / sabāhya sātvikeṃ bhare /
jaṃva kāṭhiṇapaṇa vire / ahaṃbhāvāce

viṣayāṃcā visaru paḍe / iṃdriyāṃcī kasamasa moḍe /
manācī ghaḍī ghaḍe / hṛdayāmājīṃ

aiseṃ aikya heṃ sahajeṃ / phāveṃ taṃva rāhije /
maga teṇeṃci bodheṃ baisije / āsanāvarī

ātāṃ āṃgāte āṃga karī / pavanāteṃ pavanu dharī /
aisī anubhavācī ujarī / hoṃci lāge

pravṛttī māghauti mohare / samādhi ailāḍi utare /
āghaveṃ abhyāsu sare / baisatakheṃvo

mudrecī prauḍhī aiśī / teci sāṃgijela ātāṃ pariyesīṃ /
tarī uru yā jaghanāsī / jaḍoni ghālīṃ

caraṇataḻeṃ devhaḍī / ādhāradrumācā buḍīṃ /
sughaṭiteṃ gāḍhīṃ / saṃcarīṃ pāṃ

savya to taḻīṃ ṭhevije / teṇeṃ sivaṇīmadhyu pīḍije /
varī baise to sahajeṃ / vāmacaraṇu

guda meṃḍhrāāṃtauti / cārī aṃguḻeṃ nigutīṃ /
tetha sārdha sārdha prāṃtī / sāṃḍuniyāṃ

māji aṃguḻa eka nige / tetha ṭāṃceceni uttarābhāgeṃ /
neheṭije vari āṃgeṃ / pelaleni

ucalile kāṃ neṇije / taiseṃ pṛṣṭhāṃta ucalije /
gulphadvaya dharije / teṇeṃci māneṃ

maga śarīra saṃcu pārthā / aśeṣuhī sarvathā /
pārṣṇīcā māthā / svayaṃbhu hoya

arjunā heṃ jāṇa / mūḻabaṃdhāceṃ lakṣaṇa /
vajrāsana gauṇa / nāma yāsī

aisī ādhārīṃ mudrā paḍe / āṇi ādhīṃcā mārgu moḍe /
tetha apānu āṃtalīkaḍe / vohoṃṭo lāge

taṃva karasaṃpuṭa āpaiseṃ / vāma caraṇīṃ baise /
taṃva bāhumuḻīṃ dise / thoravī ālī

mājī ubhāraleni daṃḍeṃ / śirakamaḻa hoya gāḍheṃ /
netradvārīcī kavāḍeṃ / lāgūṃ pahātī

varacileṃ pātī ḍhaḻatī / taḻīṃcī taḻīṃ puṃjāḻatī /
diṭhī rāhoni āṃtulīkaḍe / bāhera pāūla ghālī koḍeṃ /
te ṭhāyīṃ ṭhāvo paḍe / nāsāgrapīṭhīṃ

aiseṃ āṃtucyā āṃtuci race / bāherī māguteṃ na vace /
mhaṇauni rāhaṇeṃ ādhiye diṭhīceṃ / tetheṃci hoya

ātāṃ diśāṃci bheṭī ghyāvī / kāṃ rupācī vāṭa pahāvī /
he cāḍa sare āghavī / āpaisayā

maga kaṃṭhanāḻa āṭe / hanuvaṭī he haḍauti dāṭe /
te gāḍhī hoūni nehaṭe / vakṣaḥsthaḻīṃ

mājīṃ ghaṃṭikā lope / varī baṃdhu jo ārope /
to jālaṃdharu mhaṇipe / paṃḍukumarā

nābhīvarī pokhe / udara heṃ thoke /
aṃtarīṃ phāṃke / hṛdayakośu

svādhiṣṭhānāvaricile kāṃṭhīṃ / nābhīsthānātaḻavaṭīṃ /
baṃdhu paḍe kirīṭī / voḍhiyāṇā to

aisī śarīrābāheralīkaḍe / abhyāsācī pāṃkhara paḍe /
taṃva āṃtu trāya moḍe / manodharmācī

kalpanā nime / pravṛttī śame /
āṃga mana virame / sāviyāci

kṣudhā kāya jāhālī / nidrā keutī gelī /
he āṭhavaṇahī hārapalī / na dise vegāṃ / २१३ //
jo muḻabaṃdhe koṃḍalā / apānu māghautā muraḍalā /
to saveṃci varī sāṃkaḍalā / phugu dharī

kṣobhalepaṇeṃ māje / uvāilā ṭhāyī gāje /
maṇipureṃsī jhuṃje / rāhoniyāṃ

maga thāṃvalī te vāhaṭuḻī / saiṃgha gheūni ghara ḍahuḻī /
bāḻapaṇīṃcī kuhīṭuḻī / bāhera ghālī

bhītarīṃ vaḻī na dhare / koṭhyāmājīṃ saṃcare /
kaphapittāce thāre / uroṃ nedī

dhāṃtuce samudra ulaṃḍī / medāce parvata phoḍī /
āṃtalī majjā kāḍhī / asthigata

nāḍīteṃ soḍavī / gātrāṃteṃ vighaḍavī /
sādhakāṃte bheḍasāvī / pari bihāveṃ nā

vyādhīteṃ dāvī / saveṃci haravī /
āpa pṛthvī kālavī / ekavāṭa

taṃva yerīkaḍe dhanurdharā / āsanācā ubārā /
śaktī karī ujagarā / kuṃḍalinīte

nāgāceṃ pileṃ / kuṃkumeṃ nāhaleṃ /
vaḻaṇa gheūni āleṃ / seje jaiseṃ

taiśī te kuṃḍalinī / moṭakī auṭa vaḻaṇī /
adhomukha sarpiṇī / nijailī ase

vidyulatecī viḍī / vanhijvāḻāṃcī ghaḍī /
paṃdhareyācī cokhaḍī / ghoṃṭīva jaiśī

taisī subadhda āṭalī / puṭīṃ hotī dāṭalī /
teṃ vajrāsaneṃ cimuṭalī / sāvadhu hoya

tetha nakṣatra jaiseṃ ulaṃḍaleṃ / kīṃ suryāceṃ āsana moḍaleṃ /
tejāce bīja viruḍhaleṃ / aṃkureśīṃ

taiśī veḍhiyāteṃ soḍatī / kavatikeṃ āṃga moḍitī /
kaṃdāvarī śaktī / uṭhalī dise

sahajeṃ bahutāṃ divasāṃcī bhūka / varī cevavilīṃ teṃ hoya miṣa /
maga āveśeṃ pasarī mukha / ūrdhvā ujū

tetha hṛdayakośātaḻavaṭīṃ / jo pavanu bhare kirīṭī /
tayā sagaḻeyāci miṭhī / deūni ghālī

mukhīṃcyā jvāḻīṃ / taḻīṃ varī kavaḻī /
māṃsācī vaḍavāḻī /āroguṃ lāge

je je ṭhāya samāṃsa / tetha āhāca joḍe ghāusa /
pāṭhī ekadonī ghāṃsa / hiyāhī bharī

maga taḻave taḻahāta śodhī / urdhvīce khaṃḍa bhedī /
jhāḍā ghe saṃdhī / pratyaṃgācā

ādhāra tarī na saṃḍī / pari nakhīṃceṃhī sattva kāḍhī /
tvacā dhuvūni jaḍī / pāṃjareśīṃ

asthīṃce naḻe nirape / śirāṃce hīra vorape /
taṃva bāherī viruḍhī karape / romabījāṃcī

maga saptadhāṃtūcyā sāgarīṃ / tāhānelī ghoṃṭa bharī /
āṇi saveṃci unhāḻā karī / khaḍakhaḍīta

nāsāpuṭauni vārā / jo jātase aṃguḻe bārā /
to gaciye dharuni māghārā / āṃtu ghālī

tetha adha varauteṃ ākuṃce / ūrdhva taḻauteṃ khāṃce /
tayā kheṃvāmāji cakrāce / padara uratī

eऱhavīṃ tarī donhī tevhāṃci miḻatī / pari kuṃḍalinī nāveku duścitta hotī /
te tayāṃteṃ mhaṇe parautī / tumhīci kāyasīṃ etheṃ

āikeṃ pārthiva dhātu āghavī / ārogitāṃ kāhīṃ nuravī /
āṇi āpāteṃ taṃva ṭhevī / pusoniyāṃ

aisī donī bhuteṃ khāye / te veḻī saṃpūrṇa dhāye /
maga saumya hoūni rāhe / suṣumnepāśīṃ

tetha tṛptīceni saṃtoṣeṃ / garaḻa jeṃ vamī mukheṃ /
teṇeṃ tiyeceni pīyūṣe / prāṇu jiye

to agni āṃtūni nighe / pari sabāhya nivavūṃci lāge /
te veḻī kasu bāṃdhitī āṃge / sāṃḍilā puḍhatī

mārga moḍitī nāḍīce / navavidhapaṇa vāyuceṃ /
jāya mhaṇaūni śarīrāce / dharmu nāhīṃ

iḍā piṃgaḻā ekavaṭatī / gāṃṭhī tinhī suṭatī /
sāhī padara phuṭatī / cakrāṃce he

maga śaśī āṇi bhānu / aisā kalpije jo anumānu /
to vātīvarī pavanu / givasitāṃ na dise

budhdīcī puḻikā vire / parimaḻu ghrāṇī ure /
tohī śaktisaveṃ saṃcare / madhyamemājī

taṃva varilekaḍoni ḍhāḻeṃ / caṃdrāmṛtāceṃ taḻeṃ /
kānavaḍoni miḻe / śaktimukhīṃ

teṇeṃ nātakeṃ rasa bhare / to sarvāṃgāmājīṃ saṃcare /
jethiṃcā tetha mure / prāṇapavanu

tātaliye museṃ / meṇa nighoni jāya jaiseṃ /
koṃdalī rāhe raseṃ / votaleni

taise piṃḍāceni ākāreṃ / te kaḻāci kāṃ avatare /
varī tvaceceni padareṃ / pāṃguralī ase

jaisī ābhāḻācī buṃthī / karuni rāhe gabhastī /
maga phiṭaliyā dīpti / dharūṃ naye

taisā āhācavari koraḍā / tvacecā ase pātavaḍā /
to jhaḍoni jāya koṃḍā / jaisā hoya

maga kāśmīrāce svayaṃbha / kāṃ ratnabījā nighāle koṃbha /
nātari saṃdhyārāgīṃce raṃga / kāḍhūni vaḻileṃ teṃ āṃga /
kī aṃtarjotīceṃ liṃga / nirvāḻileṃ

kuṃkumāce bharīṃva / sidhdarasāṃce votīṃva /
maja pāhatāṃ sāveva / śāṃtici te

teṃ ānaṃdacitrīṃceṃ lepa / nātarī mahāsukhāceṃ rūpa /
kīṃ saṃtoṣatarūceṃ ropa / thāṃvaleṃ jaiseṃ

to kanakacaṃpakācā kaḻā / kīṃ amṛtācā putaḻā /
nānā sāsiṃnalā maḻā / koṃvaḻikecā

ho kāṃ je śāradiyece voleṃ / caṃdrabiṃba pālheleṃ /
kāṃ tejaci mūrta baisaleṃ / āsanāvarī

taiseṃ śarīra hoye / je veḻīṃ kuṃḍalinī caṃdra piye /
maga dehākṛti bihe / kṛtāṃtu gā

vṛdhdāpya tarī bahuḍe / tāruṇyācī gāṃṭhī vighaḍe /
lopalī ughaḍe / bāḻadaśā

vayasā tarī yetulevarī / eऱhavī baḻācā baḻārthu karī /
dhairyācī thorī / nirupama

kanakadrumācāṃ pālavīṃ / ratnakaḻikā nitya navī /
nakheṃ taisīṃ baravīṃ / navīṃ nighatī

dāṃtahī āna hotī / pari apāḍeṃ sānejatī /
jaisī dubāhīṃ baise pāṃtī / hireyāṃcī

māṇikuliyāṃciyā kaṇiyā / sāviyācī aṇumāniyā /
taisiyā sarvāṃgīṃ udhavatī aṇiyā / romāṃciyāṃ

karacaraṇataḻeṃ / jaisīṃ kāṃ rātotpaḻeṃ /
pākhāḻīṃ hotī ḍoḻe / kāya sāṃgo

niḍārāceni koṃdāṭeṃ / motiyeṃ nāvaratī saṃpuṭeṃ /
maga śivaṇī jaiśī utaṭe / śuktipallavāṃcī

taiśīṃ pāticiye kavaḻiye na samāye / diṭhī jākaḻoni nighoṃ pāhe /
ādhilīcī pari hoye / gaganā kaḻitī

āike deha hoya soniyāceṃ / pari lāghava ye vāyūceṃ /
je āpā āṇi pṛthvīce / aṃśu nāhīṃ

maga samudrapailāḍī dekhe / svargīṃcā ālocu āike /
manogata oḻakhe / muṃgiyece

pavanācā vārikā vaḻaghe / cāle tarī udakīṃ pāūla na lāge /
yeṇeṃ yeṇeṃ prasaṃge / yetī bahutā sidhdī

āikeṃ prāṇācā hātu dharuni / gaganācī pāuṭī karunī /
madhyameceni dādarāhunī / hṛdayā ālī

te kuṃḍalinī jagadaṃbā / je caitanyacakravartīcī śobhā /
jayā viśvabījāciyā koṃbhā / sāulī kelī

je śūnyaliṃgācī piṃḍī / je paramātmayā śivācī kaṃraḍī /
je prāṇācī ughaḍī / janmabhūmī

heṃ aso te kuṃḍalinī bāḻī / hṛdayāāṃtu ālī /
taṃva anāhatācāṃ bolīṃ / cāvaḻe te

śaktīciyā āṃgā lāgaleṃ / buddhīceṃ caitanya hoteṃ jāhaleṃ /
teṃ teṇeṃ āikileṃ / aḻumāḻu

ghoṣācyā kuṃḍī / nādacitrāṃcī rupaḍīṃ /
praṇavāciyā moḍī / rekhilīṃ aisīṃ

heṃci kalpāveṃ tarī jāṇije / pari kalpiteṃ kaiceṃ āṇije /
tarī neṇoṃ kāya gāje / tiye ṭhāyīṃ

visaroni geloṃ arjunā / jaṃva nāśu nāhī pavanā /
taṃva vācā āthī gaganā / mhaṇoni ghume

tayā anāhatāceni megheṃ / ākāśa dumadumoṃ lāge /
taṃva brahmasthānīṃceṃ begeṃ / phiṭaleṃ sahajeṃ

āikeṃ kamaḻagarbhākāreṃ / jeṃ mahadākāśa dusareṃ /
jetha caitanya ādhātureṃ / karuni asije

tayā hṛdayācyā parivarīṃ / kuṃḍaliniyāṃ parameśvarī /
tejācī śidorī / viniyogilī

budhdīceni śākeṃ / hātaboneṃ nikeṃ /
dvaita jetha na dekhe / taiseṃ keleṃ

aisī nijakāṃtī hāravilī / maga prāṇuci kevaḻa jāhalī /
te veḻī kaisī gamalī / mhaṇāvī pāṃ

ho kāṃ je pavanācī putaḻī / pāṃghuralī hotī sonesaḻī /
te pheḍuniyāṃ vegaḻī / ṭhevalī tiyā

nātarī vārayāceni āṃgeṃ jhagaṭalī / dīpācī diṭhī nimaṭalī /
kāṃ lakhalakhoni hārapalī / vīju gaganīṃ

taiśī hṛdayakamaḻaveऱhīṃ / dise soniyācī jaiśī sarī /
nātarī prakāśajaḻācī jharī / vāhata ālī

maga te hṛdayabhūmī pokaḻe / jirālī kāṃ eke veḻe /
taiseṃ śaktīce rupa māvaḻe / śaktīcimājīṃ

tevhāṃ tarī śaktīci mhaṇije / eऱhavī to prāṇu kevaḻa jāṇije /
ātāṃ nāda biṃdu neṇije / kalā jyotī

manācā hana māru / kāṃ pavanācā dharu /
dhyānācā ādaru / nāhīṃ parī

he kalpanā ghe sāṃḍī / teṃ nāhīṃ iye paravaḍī /
he mahābhūtāṃcī phuḍī / āṭaṇī dekhāṃ

piṃḍe piṃḍācā grāsu / to hā nāthasaṃketīcā daṃśu /
pari dāūni gelā uddeśu / mahāviṣṇu

tayā dhvanitāceṃ keṇeṃ soḍunī / yathārthācī ghaḍī jhāḍunī /
upalavilī myāṃ jāṇuni / grāhīka śrote

aikeṃ śaktīceṃ teja lope / tetha dehīṃce rupa hārape /
maga to ḍoḻyāṃmājī lape / jagāciyā

eऱhavīṃ ādhilācī aiseṃ / sāvayava tarī dise /
parī vāyūceṃ kāṃ jaiseṃ / vaḻileṃ hoya

nātarī kardaḻīcā gābhā / buṃthī sāṃḍoni ubhā /
kāṃ avayavaci nabhā / nivaḍalā to

taiseṃ hoya śarīra / taiṃ teṃ mhaṇije khecara /
heṃ pada hotāṃ camatkāra / piṃḍajanī

dekheṃ sādhaku nighoni jāya / māgāṃ pāulāṃcī voḻa rāhe /
tetha ṭhāyī ṭhāyī hoye / he aṇimādika

pari teṇeṃ kāya kāja āpaṇayāṃ / avadhārī aisā dhanaṃjayā /
lopa āthī bhūtatrayā / dehīṃcā dehīṃ

pṛthvīteṃ āpa viravī / āpāteṃ teja jiravī /
tejāteṃ pavanu haravī / hṛdayāmājīṃ

pāṭhīṃ āpaṇa ekalā ure / pari śarīrāceni anukāreṃ /
maga tohī nige aṃtareṃ / gaganā miḻe

te veḻī kuṃḍalinī he bhāṣa jāye / māruta aiseṃ nāma hoye /
pari śaktīpaṇa teṃ āhe / jaṃva na miḻe śivīṃ

maga jālaṃdhara sāṃḍī / kakārāṃta phoḍī /
gaganāciye pāhāḍīṃ / paiṭhī hoya

te ॐkārāciye pāṭhī / pāya deta uṭhāuṭhī /
paśyaṃtīciye pāuṭī / māgāṃ ghālī

puḍhāṃ tanmātrā ardhaverī / ākāśācāṃ aṃtarī /
bharatī game sāgarīṃ / saritā jevīṃ

maga brahmaraṃdhrī sthirāvonī / sohaṃbhāvācyā bāhyā pasarunī /
paramātmaliṃgā dhāṃvoni / āṃgā ghaḍe

taṃva mahābhūtāṃcī javanikā phiṭe / maga dohīṃsi hoya jhaṭeṃ /
tetha gaganāsakaṭa āṭe / samarasīṃ tiye

paiṃ meghāceni mukhīṃ nivaḍilā / samudra kāṃ voghīṃ paḍilā /
to māgutā jaisā ālā / āpaṇapeyāṃ

tevīṃ piṃḍāceni miṣeṃ / padīṃ pada praveśe /
teṃ ekatva hoya taiseṃ / paṃḍukumarā

ātāṃ dujeṃ hana hoteṃ / kīṃ ekaci heṃ āiteṃ /
aiśiye vivaṃcanapurateṃ / urecinā

gaganīṃ gagana layā jāye / aiseṃ je kāṃhīṃ āhe /
teṃ anubhaveṃ jo hoye / to hoūni ṭhāke

mhaṇoni tethiṃcī mātu / na caḍheci bolācā hātu /
jeṇeṃ saṃvādāciyā gāṃvāāṃtu / paiṭhī kīje

arjunā eऱhavīṃ tarī / iyā abhiprāyācā garvu dharī /
te pāheṃ pāṃ vaikharī / durī ṭhelī

bhrūlatā māgilīkaḍe / tetha makārāceṃci āṃga na māṃḍe /
saḍeyā prāṇā sāṃkaḍeṃ / gaganā yetāṃ

pāṭhīṃ tetheṃci to bhāsaḻalā / taṃva śabdācā divo māvaḻalā /
maga tayāhi varī āṭu bhavinnalā / ākāśācā

ātāṃ mahāśūnyāciyā ḍohīṃ / jetha gaganasīci ṭhāvo nāhīṃ /
tetha tāgā lāgela kāī / bolācā iyā

mhaṇoni ākharāmājīṃ sāṃpaḍe / kīṃ kānāvarī joḍe /
he taiseṃ navhe phuḍeṃ / triśudhdī gā

jaiṃ kahī daiveṃ / anubhavileṃ phāve /
taiṃ āpaṇaci heṃ ṭhākāveṃ / hoūniyā

puḍhatī jāṇaṇeṃ teṃ nāhīṃci / mhaṇoni aso kitī heṃci /
bolāveṃ ātāṃ vāyāṃci / dhanurdharā

aiseṃ śabdajāta māghauteṃ sare / tetha saṃkalpāceṃ āyuṣya pure /
vārāhī jetha na śire / vicārācā

jeṃ unmaniyeceṃ lāvaṇya / jeṃ turyeceṃ tāruṇya /
anādi jeṃ agaṇya / paramatatva

jeṃ ākārācā prāṃtu / jeṃ mokṣācā ekāṃtu /
jetha ādi āṇi aṃtu / vironi gele

jeṃ viśvāceṃ mūḻa / jeṃ yogadrumāceṃ phaḻa /
jeṃ ānaṃdāceṃ kevaḻa / caitanya gā

jeṃ mahābhūtāṃceṃ bīja / jeṃ mahātejāceṃ teja /
evaṃ pārthā jeṃ nija / svarupa mājheṃ

te he cartubhuja koṃbhelī / jayācī śobhā rupā ālī /
dekhoni nāstikīṃ nokilī / bhaktavṛṃdeṃ

teṃ anirvācya mahāsukha / paiṃ āpaṇaci jāhale je puruṣa /
jayāṃce kāṃ niṣkarṣa / prāptīverīṃ

āmhī sādhana heṃ jeṃ sāṃgitaleṃ / teṃci śarīrīṃ jihīṃ keleṃ /
te āmuceni pāḍeṃ āle / nirvāḻaleyā

parabrahmāceni raseṃ / dehākṛtīciye museṃ /
votīṃva jāhale taise / disatī āṃgeṃ

kāṃ jeṃ āpaṇa ātāṃ devo / hā bolilo jo upāvo /
to prāptīcā ṭhāvo / mhaṇoni ghaḍe

iye abhyāsīṃ je dṛḍha hotī / te bharaṃvaseni brahmatvā yetī /
heṃ sāṃgatiyācī rītī / kaḻaleṃ maja

devā goṭhīci he aikatāṃ / bodhu upajatase cittā /
mā anubhaveṃ tallīnatā / navhela keṃvī

mhaṇaūni etha kāṃhī / anāriseṃ nāhīṃ /
pari nāvabharī citta deī / bolā ekā

ātāṃ kṛṣṇā tuvāṃ sāṃgitalā yogu / to manā tarī ālā cāṃgu /
pari na śakeṃ karuṃ pāṃgu / yogyatecā

sahajeṃ āṃgika jetulī āhe / tetuliyācī jarī sidhdi jāye /
tarī hāci mārga sukhopāyeṃ / abhyāsīna

nātarī devo jaiseṃ sāṃgatīla / taiseṃ āpaṇapāṃ jarī na ṭhakela /
tarī yogyatevīṇa hoīla / teciṃ pusoṃ

jīvīṃciye aisī dhāraṇa / mhaṇoni pusāvayā jāhaleṃ kāraṇa /
maga mhaṇe tarī āpaṇa / citta deijo

hāṃ ho jī avadhārileṃ / jeṃ heṃ sādhana tumhīṃ nirupileṃ /
teṃ āvaḍatayāhi abhyāsileṃ / phāvoṃ śake

kīṃ yogyatevīṇa nāhīṃ / aiseṃ hana āhe kāṃhī /
tetha kṛṣṇā mhaṇatī tarī kāī / dhanurdharā

heṃ kāja kīra nirvāṇa / pari āṇikahī jeṃ kāṃhī sādhāraṇa /
teṃhī adhikārāce voḍaveviṇa / kāya sidhdi jāya

paiṃ yogyatā je mhaṇije / te prāptīcī ādhīna jāṇije /
kāṃ je yogya hoūni kīje / teṃ āraṃbhī phaḻeṃ

tarī taisī etha kāṃhī / sāviyāci keṇī nāhīṃ /
āṇi yogyāṃcī kāī / khāṇī ase

nāveka viraktu / jāhalā dehadharmī niyatu /
tari toci navhe vyavasthitu / adhikāriyā

yetulāliye āyaṇīmāji yevaḍheṃ / yogyapaṇa tūteṃhī joḍe /
aiseṃ prasaṃge sāṃkaḍeṃ / pheḍileṃ tayāceṃ

maga mhaṇe pārthā / te he aisī vyavasthā /
aniyatāsi sarvathā / yogyatā nāhīṃ

jo rasanedriyācā aṃkilā / kāṃ nidresī jīveṃ vikalā /
to nāhīṃ etha mhaṇitalā / adhikāriyā

athavā āgrahāciye bāṃdoḍī / kṣudhā tṛṣā koṃḍī /
āhārāteṃ toḍī / māruniyāṃ

nidreciyā vāṭā na vace / aisā dṛḍhiveceni avataraṇeṃ nāce /
teṃ śarīraci navhe tayāceṃ / mā yogu kavaṇācā

mhaṇoni atiśayeṃ viṣayo sevāvā / taisā virodhu navhāvā /
kāṃ sarvathā nirodhu karāvā / heṃhī nako

āhāra tarī sevije / pari yuktīceni māpeṃ mavije /
kriyājāta ācarije / tayāci sthitī

mapitalāṃ bolije / mitaliyā pāulīṃ cālije /
nidrehī mānu dīje / avasareṃ ekeṃ

jāgaṇeṃ jarī jāhaleṃ / tarī vhāve teṃ mitaleṃ /
yetuleni dhātusāmya saṃcale / asela sukheṃ

aiseṃ yuktīceni hāteṃ / jeṃ iṃdriyāṃ vopije bhāteṃ /
tai saṃtoṣāsī vāḍhateṃ / manaci karī

bāhera yuktīcī mudrā paḍe / taṃva āṃta sukha vāḍhe /
tetheṃ sahajaci yogu ghaḍe / nābhyāsitāṃ

jaiseṃ bhāgyāciye bhaḍaseṃ / udyamāceni miseṃ /
maga samṛdhdījāta āpaiseṃ / ghara righe

taisā yuktīmaṃtu kautukeṃ / abhyāsāciyā moharā ṭhāke /
āṇi ātmasiddhīcī pike / anubhavu tayācā

mhaṇoni yuktī he pāṃḍavā / ghaḍe jayā sadaivā /
to apavargāciye rāṇivā / aḻaṃkarije

yuktī yogāce āṃga pāve / aiseṃ prayāga jeṃ hoya baraveṃ /
tetha kṣetrasaṃnyāseṃ sthirāveṃ / mānasa jayāceṃ

tayāteṃ yogāyukta mhaṇa / heṃhī prasaṃge jāṇa /
teṃ dīpāṃce upalakṣaṇa / nirvātīṃciyā

ātāṃ tujheṃ manogata jāṇoni / kāṃhī eka āmhī mhaṇoni /
teṃ nikeṃ citta deunī / parisāveṃ gā

tūṃ prāptīcī cāḍa vāhasī / pari abhyāsīṃ dakṣa navhasī /
teṃ sāṃga pā kāya bihasī / duvāḍapaṇā

tarī pārthā heṃ jhaṇeṃ / sāyāsa gheśīṃ ho maneṃ /
vāyāṃ bāgūla iye durjaneṃ / iṃdriye karitī

pāheṃ pāṃ āyuṣyācā aḍhaḻa karī / jeṃ sarateṃ jīvita vārī /
tayā auṣadhāteṃ vairī / kāya jivhā na mhaṇe

aiseṃ hitāsi jeṃ jeṃ nikeṃ / teṃ sadāci yā idriṃyāṃ duḥkhe /
eऱhavī sopeṃ yogāsārikheṃ / kāṃhī āhe

mhaṇoni āsanāciyā gāḍhīkā / jo āmhī abhyāsu sāṃgitalā nikā /
teṇe hoīla tarī ho kāṃ / nirodhu yayā

eऱhavī tarī yeṇeṃ yogeṃ / jai idriṃyā viṃdāṇa lāge /
tai citta bheṭoṃ rige / āpaṇapeyāṃ

paratoni pāṭhimoreṃ ṭhāke / āṇi āpaṇiyāṃte āpaṇa dekhe /
dekhatakhevoṃ voḻakhe / mhaṇe tattva heṃ mī

tiye oḻakhīcisariseṃ / sukhāciyā sāmrājyīṃ baise /
maga cittapaṇa samaraseṃ / vironi jāya

jayāparateṃ āṇika nāhīṃ / jayāteṃ idriṃyeṃ neṇatī kahīṃ /
teṃ āpaṇaci āpuliyā ṭhāyīṃ / hoūni ṭhāke

maga merupāsūni thoreṃ / deha duḥkhāceni ḍoṃgare /
dāṭijo pāṃ pari bhareṃ / citta na daṭe

kāṃ śastreṃ varī toḍiliyā / deha agnimājīṃ paḍaliyā /
citta mahāsukhīṃ pahuḍaliyā / cevoci naye

aiseṃ āpaṇapāṃ rigoni ṭhāye / maga dehācī vāsa na pāhe /
āṇikaci sukha hoūni jāye / mhaṇūni visare

jayā sukhāciyā goḍī / maga ārtīcī seci soḍī /
saṃsārāciyā toṃḍīṃ / guṃtaleṃ jeṃ

je yogācī barava / saṃtoṣācī rāṇīva /
jñānācī jāṇīva / jayālāgīṃ

teṃ abhyāsileni yogeṃ / sāvayava dekhāveṃ lāgeṃ /
dekhileṃ tarī āṃgeṃ / hoījela gā

tari toci yogu bāpā / eke pari āhe sopā /
jarī putraśoku saṃkalpā / dākhavije

hā viṣayāteṃ nimāliyā āike / iṃdriyeṃ nemāciyā dhāraṇīṃ dekhe /
tarī hiyeṃ ghālūni muke / jīvitāṃsī

aiseṃ vairāgya heṃ karī / tarī saṃkalpācī sare vārī /
sukheṃ dhṛtīciyā dhavaḻārīṃ / buddhī nāṃde

buddhī dhaiyā hoya vasauṭā / tarī manāteṃ anubhavāciyā vāṭā /
haḻu haḻu karī pratiṣṭhā / ātmabhuvanīṃ

yāhī eke parī / prāptī āhe vicārīṃ /
heṃ na ṭhake tarī sopārī / āṇika aikeṃ

ātāṃ niyamuci hā ekalā / jīveṃ karāvā āpulā /
jaisā kṛtaniścayāciyā bolā / bāherā nohe

jarī yetuleni citta sthirāveṃ / tarī kājā āleṃ svabhāveṃ /
nāhī tarī ghālāveṃ / mokalunī

maga mokalileṃ jetha jāīla / tethūni niyamūci gheūni yeīla /
aiseni sthairyācī hoīla / save yayāṃ

pāṭhīṃ ketuleni eke veḻī / tayā sthairyāceni meḻeṃ /
ātmasvarupājavaḻeṃ / yeīla sahajeṃ

tayāteṃ dekhoni āṃgā ghaḍela / tetha advaitīṃ dvaita buḍela /
āṇi aikyatejeṃ ughaḍela / trailokya heṃ

ākāśīṃ dise dusareṃ / te abhra jaiṃ vire /
tai gaganaci kāṃ bhare / viśva jaiseṃ

taise citta layā jāye / āṇi caitanyaci āghaveṃ hoye /
aisī prāpti sukhopāyeṃ / āhe yeṇeṃ

yā sopiyā yogasthitī / ukalu dekhilā gā bahutīṃ /
saṃkalpāciyā saṃpattī / rusoniyāṃ

teṃ sukhāceni sāṃgāteṃ / āleṃ parabrahmā āṃtauteṃ /
tetha lavaṇa jaiseṃ jaḻāteṃ / sāṃḍu neṇe

taiseṃ hoya tiye meḻīṃ / maga sāmyarasāciyā rāūḻīṃ /
mahāsukhācī divāḻī / jageṃsi dise

aiseṃ āpule pāyavarī / cālije āpule pāṭhīvarī /
heṃ pārthā nāgave tarī / āna aikeṃ

tarī mī taṃva sakaḻa dehīṃ / ase etha vicāru nāhīṃ /
āṇi taiseṃti mājhyā ṭhāyīṃ / sakaḻa ase

heṃ aiseṃci saṃcaleṃ / paraspareṃ misaḻaleṃ /
buddhī ghepe etuleṃ / hoāveṃ gā

eऱhavīṃ tarī arjunā / jo ekavaṭaliyā bhāvanā /
sarvabhūtīṃ abhinnā / māteṃ bhaje

bhūtāṃceni anekapaṇeṃ / aneka nohe aṃtaḥkaraṇeṃ /
kevaḻa ekatvaci mājheṃ jāṇeṃ / sarvatra jo

maga to eka hā miyāṃ / bolatā disatase vāyāṃ /
eऱhavīṃ na bolije tarī dhanaṃjayā / to mīci āheṃ

dīpā āṇi prakāśā / ekavaṃkīcā pāḍu jaisā /
to mājhyā ṭhāyī taisā / mī tayāmājīṃ

jaisā udakāceni āyuṣyeṃ rasu / kāṃ gaganāceni māne avakāśu /
taisā mājheni rupeṃ rupasu / puruṣa to gā

jeṇeṃ aikyāciye diṭhī / sarvatra māteci kirīṭī /
dekhilā jaisā paṭīṃ / taṃtu eku

kāṃ svarupeṃ tarī bahuteṃ āhātī / pari taisī sonīṃ bahuveṃ na hotī /
aisī aikyācaḻācī sthitī / kelī jeṇeṃ

nā tarī vṛkṣāṃcīṃ pāneṃ jetulīṃ / tetulīṃ rope nāhīṃ lāvilīṃ /
aisī advaitadivaseṃ pāhalī / rātrī jayā

to paṃcātmakīṃ sāṃpaḍe / tarī maga sāṃga pā kaiseni aḍe /
jo pratītīceni pāḍeṃ / majasī tuke

mājheṃ vyāpakapaṇa āghaveṃ / gavasaleṃ tayāceni anubhaveṃ /
tarī na mhaṇatāṃ svabhāveṃ / vyāpaku jāhalā

ātāṃ śarīrīṃ tarī āhe / pari śarīrācā to nohe /
aiseṃ bolavarī hoye / teṃ karu ye kāi

mhaṇoni aso teṃ viśeṣeṃ / āpaṇapeyāṃsārikheṃ /
jo carācara dekhe / akhaṃḍita

sukhaduḥkhādi varme / kāṃ śubhāśubhe karmeṃ /
donī aisī manodharmeṃ / neṇeci jo

jeṃ samaviṣama bhāva / āṇikahī vicitra jeṃ sarva /
teṃ mānī jaise avayava / āpule hotī

heṃ ekaika kāya sāṃgāveṃ / jayā trailokyaci āghaveṃ /
mī aiseṃ svabhāveṃ / bodhā āleṃ

tayāhī deha eku kīra āthī / laukikīṃ sukhaduḥkhī tayāteṃ mhaṇatī /
pari āmhāṃteṃ aisīci pratītī / parabrahmaci hā

mhaṇoni āpaṇapāṃ viśva dekhije / āṇi āpaṇa viśva hoīje /
aise sāmyaci eka upāsije / pāṃḍavā gā

heṃ tūteṃ bahutīṃ prasaṃgīṃ / āmhī mhaṇoṃ yācilāgīṃ /
je sāmyāparauti jagīṃ prāpti nāhīṃ

arjuna mhaṇe devā / tumhī sāṃgā kīra āmuciyā kaṇavā /
parī na puroṃ jī svabhāvā / manāciyā

heṃ mana kaiseṃ kevaḍheṃ / aiseṃ pāhoṃ mhaṇoṃ tarī na sāṃpaḍeṃ /
eऱhavī rāhāṭāvayā thoḍeṃ / trailokya yayā

mhaṇoni aiseṃ kaiseṃ ghaḍela / je markaṭa samādhī yeīla /
kāṃ rāhā mhaṇitaliyā rāhela / mahāvātu

jeṃ budhdīteṃ saḻī / niścayāte ṭāḻī /
dhairyesī hātaphaḻī / miḻaūni jāya

jeṃ vivekāteṃ bhulavī / saṃtoṣāsī cāḍa lāvī /
baisije tarī hiṃḍavī / dāhī diśā

jeṃ nirodhaleṃ ghe uvāvo / jayā saṃyamuci hoya sāvāvo /
teṃ mana āpulā svabhāvo / sāṃḍīla kāī

mhaṇoni mana eka niścaḻa rāhela / maga āmhāṃsī sāmya hoīla /
heṃ viśeṣeṃhī na ghaḍela / tayālāgīṃ

taṃva kṛṣṇa mhaṇatī sācaci / bolata āhāsi teṃ taiseṃci /
yayā manācā kīra capaḻaci / svabhāvo gā

pari vairāgyaceni ādhāreṃ / jari lāvileṃ abhyāsāciye mohareṃ /
tari ketuleni eke avasareṃ / sthirāvela

kāṃ jeṃ yayā manāceṃ eka nikeṃ / jeṃ dekhile goḍīciyā ṭhāyā soke /
mhaṇoni anubhavasukhaci kavatikeṃ / dāvīta jāije

eऱhavīṃ viraktī jayāṃsi nāhī / je abhyāsīṃ na righatī kahīṃ /
tayāṃ nākaḻe heṃ āmhīhī / na manū kāyī

parī yamaniyamāṃciyā vāṭā na vacije / kahīṃ vairāgyācī se na karije /
kevaḻa viṣayajaḻīṃ ṭhākije / buḍī deūnī

yā jāliyā mānasā kahīṃ / yuktīcī kāṃbī lāgalī nāhīṃ /
tarī niścaḻa hoīla kāī / kaiseni sāṃge

mhaṇoni manācā nigraha hoye / aisā upāya jo āhe /
to āraṃbhīṃ maga nohe / kaisā pāhoṃ

tarī yogasādhana jitukeṃ / keṃ avagheci kāya laṭikeṃ /
pari āpaṇayāṃ abhyāsa na ṭhāke / heṃci mhaṇa

āṃgī yogāceṃ hoya baḻa / tarī mana ketuleṃ capaḻa /
kāya mahadādi heṃ sakaḻa / āpu nohe

tetha arjuna mhaṇe nikeṃ / devo bolatī teṃ na cuke /
sācaci yogabaḻeṃsīṃ na tuke / manobaḻa

tarī toci yogu kaisā kevīṃ jāṇoṃ / āmhī yetule diyā yācī mātuhī neṇoṃ /
mhaṇoni manāteṃ jī mhaṇoṃ / anāvara

hā ātāṃ āghaveyā janmā / tujheni prasādeṃ puruṣottamā /
yogaparicayo āmhāṃ / jāhalā ājī

pari āṇika eka gosāṃviyā / maja saṃśayo ase sāviyā /
to tūṃvāṃcūni pheḍāvayā / samarthu nāhīṃ

mhaṇoni sāṃge goviṃdā / kavaṇa eku mokṣapadā /
jhoṃbata hotā śradhdā / upāyeṃviṇa

idriṃyagrāmoni nighālā / āstheciyā vāṭā lāgalā /
ātmasiddhīciyā puḍhilā / nagarā yāvayā

taṃva ātmasiddhī na ṭhakeci / āṇi māguteṃ na yevaveci /
aisā astu gelā mājhārīṃci / āyuṣyabhānu

jaiseṃ akāḻīṃ ābhāḻa / aḻumāḻu sapātaḻa /
vipāyeṃ āleṃ kevaḻa / vase nā varse

taisī donhī durāvalīṃ / je prāptī taṃva alaga ṭhelī /
āṇi aprāptīhī sāṃḍavalī / śradhdā tayā

aisā volāṃtaralā kājīṃ / jo śradhdecāṃci samājīṃ /
buḍālā tayā ho jī / kavaṇa gati

taṃva kṛṣṇa mhaṇatī pārthā / jayā mokṣasukhīṃ āsthā /
tayā mokṣāvāṃcuni anyathā / gatī āhe gā

pari etuleṃci eka ghaḍe / jeṃ mājhārī visavāveṃ paḍe /
teṃhī pari aiseni suravāḍeṃ / jo devāṃ nāhīṃ

eऱhavī abhyāsācā ucalatāṃ / pāulīṃ jarī cālatāṃ /
tarī divasāādhīṃ ṭhākitā / so'haṃsidhdīteṃ

pari tetulā vegu navheci / mhaṇaūni visāṃvā tarī nikāci /
pāṭhīṃ mokṣu taṃva taisāci / ṭhevilā ase

aiseṃ kavatika heṃ kaiseṃ / jeṃ śatamakhā loka sāyāseṃ /
te to pāve anāyāseṃ / kaivalyakāmu

maga tethiṃce je amogha / alaukika bhoga /
bhogitāṃhī sāṃga / kāṃṭāḻe mana

hā aṃtarāyo avacitāṃ / kāṃ voḍhavalā bhagavaṃtā /
aisā divibhoga bhogitāṃ / anutāpī nitya

pāṭhīṃ janme saṃsārī / pari sakaḻa dharmāciyā māherīṃ /
lāṃbā ugave āgarīṃ / vibhavaśriyecā

jayāteṃ nītipaṃthe cālije / satyadhūta bolije /
dekhāveṃ teṃ dekhije / śāstradṛṣṭī

veda to jāgeśvaru / jayā vyavasāya nijācāru /
sārāsāravicāru / maṃtrī jayāte

jayācā kuḻīṃ ciṃtā / jālī īśvarācī pativratā /
jayāteṃ gṛhadevatā / ādi ṛdhdi

aisī nijapuṇyācī joḍī / vāḍhinnalī sarvasukhācī kuḻavāḍī /
tiye janme to suravāḍī / yogacyutu

athavā jñānāgnihotrī / je parabrahmaṇya śrotrī /
mahāsukhakṣetrīṃ / ādivaṃta

je siddhāṃtāciyā siṃhāsanīṃ / rājya karitī tribhuvanīṃ /
je kūṃjate kokila vanīṃ / saṃtoṣācāṃ

je vivekagrāmīṃcāṃ muḻīṃ / baisale āhāti nitya phaḻīṃ /
tayā yogiyāṃciyā kuḻīṃ / janma pāve

moṭakī dehākṛtī umaṭe / āṇi nijajñānācī pāhāṃṭa phuṭe /
sūryāpuḍheṃ pragaṭe / prakāśu jaisā

taisī daśecī vāṭa na pahātāṃ / vayaseciyā gāṃvā na yetāṃ /
bāḻapaṇīṃca sarvajñatā / varī tayāteṃ

tiye siddhaprajñeceni lābheṃ / manaci sārasvateṃ dubhe /
maga sakaḻa śāstre svayaṃbheṃ / nighatī mukheṃ

aiseṃ je janma / jayālāgīṃ deva sakāma /
svargīṃ ṭhele japa homa / karitī sadā

amarīṃ bhāṭa hoīje / maga mṛtyulokāteṃ vānije /
aiseṃ janma pārthā gā je / teṃ to pāve

āṇi māgīla je sadbuddhi / jetha jīvitvā jāhālī hotī avadhi /
maga teci puḍhatī niravadhi / navī lāhe

tetha sadaivā āṇi pāyāḻā / vari divyāṃjana hoya ḍoḻāṃ /
maga dekhe jaisīṃ avalīḻā / pātāḻadhaneṃ

taiseṃ durbheda je abhiprāya / kāṃ gurugamya hana ṭhāya /
tetha sauraseṃvīṇa jāya / buddhī tayācī

baḻiyeṃ iṃdriyeṃ yetī manā / mana ekavaṭe pavanā /
pavana sahajeṃ gaganā / miḻoṃci lāge

aiseṃ neṇoṃ kāya āpaiseṃ / tayāteṃci kīje abhyāseṃ /
samādhī ghara puse / mānasāceṃ

jāṇije yogapīṭhīcā bhairavu / kāya āraṃbharaṃbhecā gauravu /
kī vairāgyasiddhīcā anubhavu / rupā ālā

hā saṃsāru umāṇiteṃ māpa / kā aṣṭāṃgasāmagrīceṃ dvīpa /
jaise parimaḻeṃci dharije rupa / caṃdanāceṃ

taisā saṃtoṣācā kāya ghaḍilā / kīṃ siddhibhāṃḍārīhūni kāḍhilā /
dise teṇeṃ māneṃ ruḍhalā / sādhakadaśe

je varṣaśatāṃciyā koḍī / janmasahastrāṃciyā āḍī /
laṃghitāṃ pātalā thaḍī / ātmasiddhīcī

mhaṇoni sādhanajāta āghaveṃ / anusare tayā svabhāveṃ /
maga āyatiye baise rāṇive / vivekāciye

pāṭhīṃ vicāritayā vegāṃ / to vivekuhī ṭhāke māgāṃ /
maga avicāraṇīya teṃ āṃgā / ghaḍoni jāya

tetha manāceṃ mehuḍeṃ vire / pavanāce pavanapaṇa sare /
āpaṇapāṃ āpaṇa mure / ākāśahī

praṇavācā māthā buḍe / yetuleni anirvācya sukha joḍe /
mhaṇoni ādhīṃci bolu bahuḍe / tayālāgīṃ

aisī brahmācī sthitī / je sakaḻāṃ gatīṃsī gatī /
tayā amūrtācī mūrtī / hoūni ṭhāke

teṇeṃ bahutīṃ janmīṃ māgilīṃ / vikṣepāṃcī pāṇivaḻeṃ jhāḍilīṃ /
mhaṇoni upajatakheṃvo buḍālī / lagnaghaṭikā

āṇi tadrūpatesīṃ lagna / lāgoni ṭheleṃ abhinna /
jaise lopaleṃ abhra gagana / hoūni ṭhāke

taiseṃ viśva jetha hoye / māgauteṃ jetha layā jāye /
teṃ vidyamāneṃci deheṃ / jāhalā to gā

jayā lābhāciyā āśā / karuni dhairyabāhūṃcā bhaṃravasā /
ghālīta ṣaṭkarmācā dhārasā / karmaniṣṭha

kāṃ jiye ekī vastulāṃgī / bāṇoni jñānācī vrajāṃgī /
jhuṃjata prapaṃceṃśīṃ samaraṃgīṃ / jñāniye gā

athavā nilāgeṃ nisaraḍā / tapodurgācā āḍakaḍā /
jhoṃbatī tapiye cāḍā / jayāciyā

jeṃ bhajatiyāṃsī bhajya / yājñikāṃce yājya /
evaṃ jeṃ pūjya / sakaḻāṃ sadā

teṃci to āpaṇa / svayaṃ jāhalā nirvāṇa /
jeṃ sādhakāṃceṃ kāraṇa / siddha tatva

mhaṇoni karmaniṣṭhāṃ vaṃdyu / to jñāniyāṃsi vedyu /
tāpasāṃcā ādyu / taponāthu

paiṃ jīvaparamātmasaṃgamā / jayāceṃ yeṇeṃ jāhale manodharmā /
to śarīrīci pari mahimā / aisī pāve

mhaṇoni yākāraṇeṃ / tūṃteṃ mī sadā mhaṇeṃ /
yogī hoī aṃtaḥkaraṇeṃ / paṃḍukumarā

agā yogī jo mhaṇije / to devāṃcā deva jāṇije /
āṇi sukhasarvasva mājheṃ / caitanya to

jayā bhajatā bhajana bhajāveṃ / he bhaktisādhana jeṃ āghaveṃ /
te mīci jāhaloṃ anubhaveṃ / akhaṃḍīta

maga tayā āmhāṃ prītīceṃ / svarupa bolī nirvace /
aiseṃ navhe gā to sāceṃ / subhadrāpatī

tayā ekavaṭaliyā premā / jarī pāḍeṃ pāhije upamā /
tarī mī deha to ātmā / heci hoya

aise bhaktacakoracaṃdreṃ / tribhuvanaikanareṃdre /
bolileṃ guṇasamudreṃ / saṃjayo mhaṇe

tetha ādilāpāsoni pārthā / aikije aisīci āsthā /
duṇāvalī heṃ yadunāthā / pāvoṃ sarale

kīṃ sāviyāci manīṃ toṣalā / je bolā ārisā joḍalā /
teṇeṃ harikheṃ ātāṃ upalavalā / nirupīla

to prasaṃgu āhe puḍhāṃ / jetha śāṃtu dise ughaḍā /
to pālavijela muḍā / prameyabījāṃcā

jeṃ sātvikāceni vaḍapeṃ / geleṃ ādhyātmika kharapeṃ /
sahajeṃ niroḻale vāphe / caturacittāce

varī avadhānācā vāphasā / lādhalā sonayāaisā /
mhaṇoni perāvayā dhiṃvasā / nivṛtīsī

jñānadeva mhaṇe mī cāḍeṃ / sadguruṃnī keleṃ koḍeṃ /
māthāṃ hāta ṭhevilā teṃ phuḍeṃ / bījaci vāileṃ

mhaṇaūni yeṇe mukheṃ jeṃ jeṃ nige / teṃ saṃtāṃcyā hṛdayīṃ sācaci lāge /
heṃ aso sāṃgoṃ śrīraṃge / bolile jeṃ

parī te manācā kānī aikāveṃ / bola buddhīcāṃ ḍoḻāṃ dekhāveṃ /
he sāṃṭovāṭīṃ ghyāveṃ / cittāciyā

avadhānāceni hāteṃ / neyāveṃ hṛdayāāṃtaute /
he rijhavitīla āyaṇīteṃ / sajjanāṃciye

he svahitāteṃ nivavitī / pariṇāmāteṃ jīvavitī /
sukhācī vāhavitī / lākholī jīvāṃ

ātāṃ arjuneṃsīṃ śrīmukuṃde / nāgara bolijela vinodeṃ /
teṃ voṃviyeceni prabaṃdheṃ / sāṃgena mī