jñānasaṅkalinītantram · Chapter 1

jñānasaṅkalinītantram
kailāśaśikharāsīnaṃ devadevaṃ jagadgurum /
pṛcchati sma mahādevī brūhi jñānaṃ maheśvara

devī uvāca
kutaḥ sṛṣṭirbhaved deva kathaṃ sṛṣṭirvinaśyati /
brahmajñānaṃ kathaṃ deva sṛṣṭisaṃhāravarjitam

īśvara uvāca
avyaktācca bhavet sṛṣṭiravyaktācca vinaśyati /
avyaktaṃ brahmaṇo jñānaṃ sṛṣṭisaṃhāra varjitam

oṅkārādakṣarāt sarvāstvetā vidyāścaturdaśa /
mantra - pūjā - tapo - dhyānaṃ karmākarma tathaiva ca

ṣaḍaṅgaṃ vedāścatvāro mīmāṃsā nyāyavistaraḥ /
dharmaśāstrapurāṇāni etā vidyāścaturdaśa

tāvad vidyā bhavet sarvā yāvad jñānaṃ na jāyate /
brahmajñānaṃ padaṃ jñātvā sarvavidyā sthirā bhavet

vedaśāstrapurāṇāni sāmānyagaṇikā iva /
yā punaḥ śāmbhavī vidyā guptā kulavadhūriva

dehasthāḥ sarvavidyāśca dehasthāḥ sarvadevatāḥ /
dehasthāḥ sarvatīrthāni guruvākyena labhyate

adhyātmavidyā hi nṛṇāṃ saukhyamokṣakarī bhavet /
dharma karma tathā japyametat sarvaṃ nivartate

kāṣṭhamadhye yathā vahniḥ puṣpe gandhaḥ payo'mṛtam /
dehamadhye tathā devaḥ puṇyapāpavivarjitaḥ

iḍā bhagavatī gaṅgā piṅgalā yamunā nadī /
iḍāpiṅgalayormadhye suṣumnā ca sarasvatī

triveṇīsaṃgamo yatra tīrtharājaḥ sa ucyate /
tatra snānaṃ prakurvīta sarvapāpaiḥ pramucyate

devī uvāca
kīdṛśī khecarī mudrā vidyā ca śāmbhavī punaḥ /
kīdṛśyadhyātmavidyā ca tanme brūhi maheśvara

īśvara uvāca
manaḥ sthiraṃ yasya vināvalambanaṃ
vāyuḥ sthiro yasya vinā nirodhanam /
dṛṣṭiḥ sthirā yasya vināvalokanaṃ
sā eva mudrā vicarantī khecarī

bālasya mūrkhasya yathaiva cetaḥ
svapnena hīno'pi karoti nidrām /
tato gataḥ patho nirāvalambaḥ
sā eva vidyā vicarantī śāmbhavī

devī uvāca
devadeva jagannātha brūhi me parameśvara /
darśanāni kathaṃ deva bhavanti ca pṛthak pṛthak

īśvara uvāca
tridaṇḍī ca bhaved bhakto vedābhyāsarataḥ sadā /
prakṛtivādaratāḥ śāktā bauddhā śūnyātivādinaḥ

atordhvaṃ gāmino ye vā tattvajñā api tādṛśāḥ /
sarvaṃ nāstīti cārvākā jalpanti viṣayāśritāḥ

umā pṛcchati he deva piṇḍabrahmāṇḍalakṣaṇam /
pañcabhūtaṃ kathaṃ deva guṇāḥ ke pañcaviṃśatiḥ

īśvara uvāca
asthi māṃsaṃ nakhaṃ caiva tvaṅlomāni ca pañcamam /
pṛthvī pañcaguṇā proktā brahmajñānena bhāsate

śukraśoṇitamajjā ca malaṃ mūtraṃ ca pañcamam /
apāṃ pañcaguṇāḥ proktā brahmajñānena bhāsate

nidrā kṣudhā tṛṣā caiva klāntirālasyapañcamam /
tejaḥ pañcaguṇāḥ proktā brahmajñānena bhāsate

dhāraṇaṃ cālanaṃ kṣepaṃ saṃkocaṃ prasaraṃ tathā /
vāyoḥ pañcaguṇāḥ proktā brahmajñānena bhāsate

kāmaṃ krodhaṃ tathā mohaṃ lajjā lobhañca pañcamam /
nabhaḥ pañcaguṇāḥ proktā brahmajñānena bhāsate

ākāśājjāyate vāyurvāyorutpadyate raviḥ /
raverutpadyate toyaṃ toyādutpadyate mahī

mahī vilīyate toye toyaṃ vilīyate ravau /
ravirvilīyate vāyau vāyurvilīyate tu khe

pañcatattvād bhavet sṛṣṭistattvāt tattvaṃ vīlīyate /
pañcatattvāt paraṃ tattvaṃ tattvātītaṃ nirañjanam

sparśanaṃ rasanaṃ caiva ghrāṇaṃ cakṣuśca śrotrakam /
pañcendriyamidaṃ tattvaṃ manaḥ sādhakamindriyam

brahmāṇḍalakṣaṇaṃ sarvaṃ dehamadhye vyavasthitam /
sākārāśca vinaśyanti nirākāro na naśyati

nirākāraṃ mano yasya nirākārasamo bhavet /
tasmāt sarvaprayatnena sākāraṃ tu parityajet

devī uvāca
ādinātha mayi brūhi saptadhātuḥ kathaṃ bhavet /
ātmā caivāntarātmā ca paramātmā kathaṃ bhavet

īśvara uvāca
śukraśoṇitamajjā ca medo māṃsaṃ ca pañcamam /
asti tvak caiva saptaite śarīreṣu vyavasthitāḥ

śarīraṃ caivamātmānamantarātmā mano bhavet /
paramātmā bhavecchūnyaṃ mano yatra vilīyate

raktadhāturbhavenmātā śukradhāturbhavet pitā /
śūnyadhāturbhavet prāṇo garbhapiṇḍaṃ prajāyate

devī uvāca
kathamutpadyate vācā kathaṃ vācā vilīyate /
vākyasya nirṇayaṃ brūhi paśya jñānamudāhara

īśvara uvāca
avyaktājjāyate prāṇaḥ prāṇādutpadyate manaḥ /
manasotpadyate vācā mano vācā vilīyate

devī uvāca
kasmin sthāne vaset sūryaḥ kasmin sthāne vasechaśī /
kasmin sthāne vased vāyuḥ kasmin sthāne vasenmanaḥ

īśvara uvāca
tālumūle sthitaścandro nābhimūle divākaraḥ /
sūryāgre vasate vāyuścandrāgre vasate manaḥ

sūryāgre vasate cittaṃ candrāgre jīvitaṃ priye /
etadyuktaṃ mahādevi guruvākyena labhyate

devī uvāca
kasmin sthāne vasecchaktiḥ kasmin sthāne vasecchivaḥ /
kasmin sthāne vaset kālo jarā kena prajāyate

īśvara uvāca
pātāle vasate śaktirbrahmāṇḍe vasate śivaḥ /
antarikṣe vaset kālo jarā tena prajāyate

devī uvāca
āhāraṃ kāṅkṣate ko'sau bhuñjate pibate katham /
jāgrat svapnasuṣuptau ca ko vā'sau pratibudhyati

īśvara uvāca
āhāraṃ kāṅkṣate prāṇo bhuñjate'pi hutāśanaḥ /
jāgratsvapnasuṣuptau ca vāyuśca pratibudhyati

devī uvāca
ko vā karoti karmāṇi ko vā lapyeta pātakaiḥ /
ko vā karoti pāpāni ko vā pāpaiḥ pramucyate

śiva uvāca
manaḥ karoti pāpāni mano lipyeta pātakaiḥ /
manaśca tanmanā bhūtvā na puṇyairna ca pātakaiḥ

devī uvāca
jīvaḥ kena prakāreṇa śivo bhavati kasya ca /
kāryasya kāraṇaṃ brūhi kathaṃ kiñca prasādanam

śiva uvāca
bhrāntibaddho bhavejjīvo bhrāntimuktaḥ sadāśivaḥ /
kāryaṃ hi kāraṇaṃ tvañca punarbodho viśiṣyate

mano'nyatra śivo'nyatra śaktiranyatra mārutaḥ /
idaṃ tīrthamidaṃ tīrthaṃ bhramanti tāmasā janāḥ

ātmatīrthaṃ na jānāti kathaṃ mokṣo varānane //
na vedaṃ vedamityāhurvedo brahma sanātanam /
brahmavidyārato yastu sa vipro vedapāragaḥ

mathitvā caturo vedān sarvaśāstrāṇi caiva hi /
sāraṃ tu yogibhiḥ pītaṃ takraṃ pibanti paṇḍitāḥ

ucchīṣṭaṃ sarvaśāstrāṇi sarvā vidyā mukhe mukhe /
nocchiṣṭaṃ brahmaṇo jñānamavyaktaṃ cetanāmayam

na tapastapa ityāhurbrahmacaryaṃ tapottamam /
ūrdhvaretā bhaved yastu sa devo na tu mānuṣaḥ

na dhyānaṃ dhyānamityāhurdhyānaṃ śūnyagataṃ manaḥ /
tasya dhyānaprasādena saukhyaṃ mokṣaṃ na saṃśayaḥ

na homaṃ homamityāhuḥ samādhau tattu bhūyate /
brahmāgnau hūyate prāṇaṃ homakarma taducyate

pāpakarma bhaved bhavyaṃ puṇyaṃ caiva pravartate /
tasmāt sarvaprayatnena tādrūpyaṃ ca tyajed budhaḥ

yāvad varṇaṃ kulaṃ sarvaṃ tāvajjñānaṃ na jāyate /
brahmajñānapadaṃ jñātvā sarvavarṇavivarjitaḥ

devī uvāca
yattvayā kathitaṃ jñānaṃ nāhaṃ jānāmi śaṅkara /
niścayaṃ brūhi deveśa mano yatra vilīyate

śaṃkara uvāca
mano vākyaṃ tathā karma tṛtīyaṃ yatra līyate /
vinā svapnaṃ yathā nidrā brahmajñānaṃ taducyate

ekākī nispṛhaḥ śāntaścintāvivarjitaḥ /
bālabhāvastathā bhāvo brahmajñānaṃ taducyate

ślokārdhaṃ tu pravakṣyāmi yaduktaṃ tattvadarśibhiḥ /
sarvacintāparityāgo niścinto yoga ucyate

nimiṣaṃ nimiṣārddhaṃ vā samādhimadhigacchati /
śatajanmārjitaṃ pāpaṃ tatkṣaṇādeva naśyati

devī uvāca
kasya nāma bhavecchaktiḥ kasya nāma bhavecchivaḥ /
etanme brūhi bho deva paścājjñānaṃ prakāśaya

īśvara uvāca
calaccitte vasecchaktiḥ sthiracitte vasecchivaḥ /
sthiracitto bhaveddevi sa dehastho'pi sidhyati

devī uvāca
kasmin sthāne tridhā śaktiḥ ṣaṭcakraṃ ca tathaiva ca /
ekaviṃśatibrahmāṇḍaṃ saptapātālameva ca

īśvara uvāca
ūrdhvaśaktirbhavet kaṇṭhaḥ adhaśaktirbhavet gudaḥ /
madhyaśaktirbhavennābhiḥ śaktyatītaṃ nirañjanam

ādhāraṃ guhyacakraṃ tu svādhiṣṭhānaṃ ca liṅgakam /
cakrabhedaṃ mayākhyātaṃ cakrātītaṃ namo namaḥ

kāyordhvaṃ ca brahmalokaḥ svādhaḥ pātālameva ca /
ūrdhvamūlamadhaḥśākhaṃ vṛkṣākāraṃ kalevaram

devī uvāca
śiva śaṃkara īśāna brūhi me parameśvara /
daśavāyuḥ kathaṃ deva daśadvārāṇi caiva hi

īśvara uvāca
hṛdi prāṇaḥ sthito vāyurapāno gudasaṃsthitaḥ /
samāno nābhideśe tu udānaḥ kaṇṭhamāśritaḥ

vyānaḥ sarvagato dehe sarvāgātreṣu saṃsthitaḥ /
nāga ūrdhvagato vāyuḥ kūrmastīrthāni saṃsthitaḥ

kṛkaraḥ kṣobhite caiva devadatto'pi jṛmbhaṇe /
dhanañjayo nādaghoṣe niviśeccaiva śāmyati

eṣa vāyurnirālambo yogināṃ yogasammataḥ /
navadvāraṃ ca prātyakṣaṃ daśamaṃ mana ucyate

devī uvāca
nāḍībhedaṃ ca me brūhi sarvagātreṣu saṃsthitam /
śaktiḥ kuṇḍalinī caiva prasūtā daśanāḍikā

īśvara uvāca
iḍā ca piṅgalā caiva suṣumnā cordhvagāminī /
gāndhārī hastijihvā ca prasavā gamanāyatā

alambusā yaśā caiva dakṣiṇāṅge ca saṃsthitāḥ /
kulaśca śaṅkhinī caiva vāmāṅge ca vyavasthitāḥ

etāsu daśanāḍīṣu nānānāḍīprasūtikā /
dvisaptatisahasrāṇi śarīre nāḍikāḥ smṛtāḥ

etā yo vindate yogī sa yogī yogalakṣaṇaḥ /
jñānanāḍī bhaveddevī yogināṃ siddhidāyinī

devī uvāca
bhūtanātha mahādeva brūhi me parameśvara /
trayo devā kathaṃ deva trayo bhāvāstrayo guṇāḥ

īśvara uvāca
rajobhāvasthito brahmā sattvabhāvasthito hariḥ /
krodhabhāvasthito rudrastrayo devāstrayo guṇāḥ

ekamūrtistrayo devā brahmaviṣṇumaheśvarāḥ /
nānābhāvaṃ mano yasya tasya muktirna jāyate

vīryarūpī bhaved brahmā vāyurūpaḥ sthito hariḥ /
manorūpaḥ sthito rudrastrayo devāstrayo guṇāḥ

dayābhāvasthito brahmā śuddhabhāvasthito hariḥ /
agnibhāvasthito rudrastrayo devāstrayo guṇāḥ

ekaṃ bhūtaṃ paraṃ brahma jagat sarvaṃ carācaram /
nānābhāvaṃ mano yasya tasya muktirna jāyate

ahaṃ sṛṣṭirahaṃ kālo'pyahaṃ brahmā'pyahaṃ hariḥ /
ahaṃ rudro'pyahaṃ śūnyamahaṃ vyāpī nirañjanam

ahaṃ sarvātmako devi niṣkāmo gaganopamaḥ /
svabhāvanirmalaṃ svāntaṃ sa evāhaṃ na saṃśayaḥ

jitendriyo bhavecchūro brahmacārī supaṇḍitaḥ /
satyavādī bhaved bhakto dātā dhīro hiterataḥ

brahmacaryaṃ tapomūlaṃ dharmamūlā dayā smṛtā /
tasmāt sarvaprayatnena dayādharmaṃ samāśrayet

devī uvāca
yogeśvara jagannātha umāyāḥ prāṇavallabha /
vedasandhyā tapo dhyānaṃ homakarma kulaṃ katham

īśvara uvāca
aśvamedhasahasrāṇi vājapeyaśatāni ca /
brahmajñānasamaṃ puṇyaṃ kalāṃ nārhati ṣoḍaśīm

sarvadā sarvatīrtheṣu yat phalaṃ labhate śuciḥ /
brahmajñānasamaṃ puṇyaṃ kalāṃ nārhati ṣoḍaśīm

na mitraṃ na ca putrāśca na pitā na ca bāndhavāḥ /
na svāmī ca gurostulyaṃ yaddṛṣṭaṃ paramaṃ padam

na ca vidyāgurostulyaṃ na tīrthaṃ na ca devatāḥ /
gurostulyaṃ na vai ko'pi yaddṛṣṭaṃ paramaṃ padam

ekamapyakṣaraṃ yastu guruḥ śiṣye nivedayet /
pṛthivyāṃ nāsti taddravyaṃ yaddattvā cānṛṇī bhavet

yasya kasya na dātavyaṃ brahmajñānaṃ sugopitam /
yasya kasyāpi bhaktasya sadgurustasya dīyate

mantraṃ pūjāṃ tapo dhyānaṃ homaṃ japyaṃ balikriyām /
saṃnyāsaṃ sarvakarmāṇi laukikāni tyajed budhaḥ

saṃsargād bahavo doṣā niḥsaṅgād bahavo guṇāḥ /
tasmāt sarvaprayatnena yatiḥ saṅgaṃ parityajet

akāraḥ sāttviko jñeya ukāro rājasaḥ smṛtaḥ /
makārastāmasaḥ proktastribhiḥ prakṛtirucyate

akṣarā prakṛtiḥ proktā rakṣaraḥ svayamīśvaraḥ /
īśvarānnirgatā sā hi prakṛtirguṇabandhanā

sā māyā pālinī śaktiḥ sṛṣṭisaṃhārakāriṇī /
avidyā mohinī yā sā śabdarūpā yaśasvinī

akāraścaiva ṛgveda ukāro yajurucyate /
makāraḥ sāmavedastu triṣu yukto'pyatharvaṇaḥ

oṅkārastu pluto jñeyastrināda iti saṃjñitaḥ /
akārastvatha bhūrloka ukāro bhuva ucyate

savyañjano makārastu svarlokastu vidhīyate /
akṣaraistribhiretaiśca bhavedātmā vyavasthitaḥ

akāraḥ pṛthivī jñeyā pītavarṇena saṃyutaḥ /
antarīkṣaṃ ukārastu vidyudvarṇa ihocyate

makāraḥ svariti jñeyaḥ śuklavarṇena saṃyutaḥ /
dhruvamekākṣaraṃ brahma oṃ ityevaṃ vyavasthitam

sthirāsano bhavennityaṃ cintānidrāvivarjitaḥ /
āsu sa jāyate yogī nānyathā śivabhāṣitam

ya idaṃ paṭhate nityaṃ śṛṇoti ca dine dine /
sarvapāpaviśuddhātmā śivalokaṃ sa gacchati

devī uvāca
sthūlasya lakṣaṇaṃ brūhi kathaṃ mano vilīyate /
paramārthaṃ ca nirvāṇaṃ sthūlasūkṣmasya lakṣaṇam

śiva uvāca
yena jñānena he devi vidyate na ca kilbiṣī /
pṛthivyāpastathā tejo vāyurākāśameva ca /
sthūlarūpī sthito'yaṃ ca sūkṣmaśca anyathā sthitaḥ