Jayakhya Samhita · Chapter 1

ॐ
paṭalaḥ - 1
śrīpāñcarātre jayākhyāsaṃhitā
śāstrārambhaprayojanaṃ nāma prathamaḥ paṭalaḥ/
namaḥ sakalakalyāṇadāyine cakrapāṇaye/
viṣayārṇavamagnānāṃ (1)samuddharaṇehatave

(1. sadyastaraṇa. A)
[śāstrāvataraṇam.] 1-1
susi(2)ddhapūjite sthāne devabrahmarṣisevite/
tapasvijanasaṅkīrṇe puṇyakṛdbhirniṣevite

(2. susiddhe. A)
tīrthottame prabhāse vai(3) yatra sannihitaḥ sadā/
viśvātmā bhagavān viṣṇurlokānugrahakṛtprabhuḥ

(3. prabhāse ca. A)
tatra śuśrūṣaṇaparaḥ pitrādigurusantateḥ/
nityamevāpavargārthī virāgī vītamatsaraḥ

saṃvartakaḥ kāntinidhirdṛṣṭvā magnaṃ svakaṃ vapuḥ/
prāñjaliḥ praṇato bhūtvā aurvaṃ pitaramabravīt

saṃvartaka :---
saṃsārārṇavamagnasya mamopāyo hi(4) kathyatām/
yaṃ jñātvā na punarjanma syānmamānyasya kasyacit

(4. yo'bhi. A)
aurva :---
purā kṛtayuge vatsa matpūrvaiḥ saṃyamasthitaiḥ/
vedavedāṅgapārajñai ṛṣibhiśca tapodhanaiḥ

kenāpi cātmabhāvena etadālocitaṃ tu vai/
bahūnyabdasahasrāṇi tapastaptvā sudāruṇam

(santoṣaniyamāḍhyaṃ ca vratacaryāsamanvitam)
[niḥśreyasālābhānmaharṣīṇāṃ nirvedaḥ] 1-2
kālena tapaso'nte vai(1) vayaṃ saddharmamāsthitāḥ/
siddhigocaramaprāptāḥ (2)procchvasantaḥ punaḥ punaḥ

(1. tu A.)
(2. proṃcchvasānāḥ S.)
na vidmaḥ kiṃ bhaviṣyāmo hyadyāpi gahane bhave
na sthitiḥ śāsvatī svasthe na ca bandhaparikṣayaḥ

na caiveha sthirā bhogāḥ kiṃ kuryāmo'tra (3)vaiśase
ityevaṃ gahane prāpte tapasaścānavasthiteḥ

(3. vedhase S.)
saṃprāptāḥ sma tato mohaṃ tadā vāṇī mahatya bhūt/
bhagavaddharmajijñāsairdhyānāsaktaiḥ pracoditā

[paratattvajñānasya niḥśreyasahetutvam] 1-3
na yajñavedādhigamairnaca dānaistu kevalaiḥ
kriyābhirna tvanekābhirvrataiścāndrāyaṇādikaiḥ

svarge (4)vai na bhavet sthairyaṃ bandhamokṣaśca vai kutaḥ/
ajñāte paratattve tu śāśvate cākṣaye'cyute

(4. vā C L.)
vyāpake tu jagannāthe nityatṛpte nirañjane/
icchārūpadhare nitye śuddhe buddhe sunirmale

evamādyaḥ paro devo jñāto yāvanna vai dvijāḥ/
tāvadevāpavargastu durlabho yugakoṭibhiḥ

tasmādyatadhvaṃ yenāśu hṛdāvāso (5)jagadguruḥ/
kevalaṃ citsvarūpaśca (6)guṇaguṇyaśca nirguṇaḥ

(5. tprabhuḥ CL.)
(6. guhya. CL)
prasādameti vai kṣipramanāthānāmasaṃśayaḥ/
abhūtapūrvaṃ śrutvaivaṃ sthitāste hṛṣṭamānasāḥ

tasminneva kṣaṇe puṇye śrutamātreṇa putraka/
kimetatkena kathitaṃ kiṃ tadbrahma hyanāmakam

jñāsyāmastatkathaṃ samyagevamūcuḥ parasparam/
saṃśaye'bhiniviṣṭāstu dīrghakālaṃ yadā tadā

punarevotthitā vāṇī gaganādamṛtopamā/
[paratattvavivecanam] 1-4
yattadakṣaramakṣobhyaṃ paraṃ brahma sanātanam

parā gatiryā sarveṣāmacyutaṃ vitta taddvijāḥ/
munayo brahmaniṣṇātā yamāśritya bhavodadhim

taranti puṇḍarīkākṣo(1) devo nārāyaṇsatu saḥ/
śaṅkhacakradharaṃ viṣṇumānandasyandanirbharam

(1. kākṣa. A)
ye saṃśrayanti taṃ bhaktyā sūkṣmamadhyātmacintakāḥ/
te yānti vai padaṃ viṣṇorjarāmaraṇavarjitāḥ

ityuktvā ca (2)tato bhūyaḥ sā vāgastamitā yadā/
tadā vayaṃ hṛṣṭatuṣṭāḥ prāyaśo vigatajvarāḥ

(2. tathā S)
śrīvatsāṅkavapurdevastrātā (3)śāsti jagatrraye/
cetaso'vasthitiṃ kṛtvā ṛṣibhiśca tapodhanaiḥ

(3. cāsmin A)
cintitaṃ ca (4)tadā bhūyo jñāsyāmastaṃ kathaṃ vibhum/
[paratattvādhigamopāyajijñāsayā śāṇḍilyaṃ pratyabhigamanam] 1-5
ko vettā devadevasya trailokye'smin (5)yathārthataḥ

(4. tathā A)
(5. yathāsthitim A)
prasannaḥ kasya bhagavān paramātmā'pyadhokṣajaḥ/
prabhāvāttapasaḥ sarvaṃ cintitaṃ manasā tadā

yathāvadviditaṃ paścātsarveṣāṃ bhāvitātmanām/
kṛtakṛtyo jagatyasmin śāṇḍilyaḥ śrūyate bhuvi

te caivaṃ svāśramātsarve phalapuṣpakarodyatāḥ/
prayātāḥ sa muniryatra kṛtakṛtyo'vatiṣṭhate

sukhāsīno dvijaiḥ sārdhaṃ yogaiśvaryasamanvitaḥ/
tapasā tejasā yuktaḥ parvate gandhamādane

nānāścaryasamāyukte nānāpuṣpopaśobhite/
phaladrumasamākīrṇe nānādhātuvicitrite

siddhairadhyāsite ramye devajuṣṭe manorame/
tapaśśīlaissudāntaiśca yogavrataparāyaṇaiḥ

sacchiṣyairjñānasaṃpūrṇairvṛtaścandra iva grahaiḥ/
dṛṣṭvā(ṣṭo ?) jñānakriyāḍhyo'sāvṛṣibhiḥ prāñjalisthitaiḥ

sa cābhivāditassarvaiḥ kramāttena ca te tathā/
pūjitāḥ phalamūlādyairambunā kusumaissaha

nivṛtte'bhyāgate dharme sotsukairbhagavānmuniḥ/
pṛṣṭastapodhanaissarvaiḥ śāṇḍilyassurapūjitaḥ

[bhagavattattvatadārādhanaprakārapraśnaḥ] 1-6
bhagavanśrotumicchāmo viṣṇoradbhutakarmaṇaḥ/
upāsālakṣaṇaṃ karma kathayasva prasādataḥ

śrutamatyudbhutaṃ yasmādasmābhirgaganāntarāt/
ajñāte bhagavattatve durlabhā paramā gatiḥ

tathā'nārādhite caiva sātvikena tu karmaṇā/
santāraṇārthamasmākamanyeṣāṃ (1)bhavināṃ tathā

(1. bhāvināṃ A)
yathārthaṃ bhagavaddharma vaktumarhasi sarvathā/
[asya śāstrasya pravṛttikramaḥ] 1-7
śāṇḍiṃlya :---
śruṇudhvaṃ saṃyatāssarve viṣṇoradbhutatejasaḥ

sārabhūtamidaṃ śāstraṃ jñānopaniṣadaṃ mahat/
rahasyamaprakāśyaṃ ca brahmagarbhaṃ ca śāsvatam

anugrahārthaṃ ca purā kathitaṃ nāradasya tat/
tathācātirahasyatvālloke'sminna prakāśitam

na cāpi coditaṃ caiva kenaciddharmagauravāt/
tathoktasya (tathā'neka?) dinasyānte antardhānagataṃ tu tam(t?)

bhūyaścaivāvatīrṇena viṣṇunā prabha vaṣṇunā/
munervai svāṃśabhūtasya yaduktaṃ punareva hi

badaryāśramasaṃsthena(2) prabhunā lokakāriṇā/
dharmamārgāvatārārthaṃ vratenānena sattamāḥ

(2. susthena A)
siddhānāṃ śṛṇvatāṃ caiva tathā gaganacāriṇām/
devānāṃ ca ṛṣīṇāṃ ca narādīnāṃ tathaiva ca

mṛkaṇḍutārkṣyapūrvāṇāmādityānāṃ mahātmanām/
kinnarāṇāṃ ca daityānāṃ vasūnāṃ bhāvitātmanām

sāṅkhyānāṃ yogasiddhānāṃ jñānavijñānavedinām/
[gurornāradādadhigatasyāsya śāstrasya munīn prati yathādhigatamupadeśapratijñā]
tacchṛṇudhvaṃ muniśreṣṭhāḥ dharmaṃ saṃsāratārakam

yādṛkprāptaṃ mayā pūrvaṃ parituṣṭācca nāradāt/
sarvajñānakriyāyuktaṃ sarvasiddhiprasādhanam

saṃkṣiptaṃ ca mahārthaṃ yattathā samyagvivekadam/
jñātvaivaṃ sārabhūtaṃ ca adhītaṃ hi purā mayā

yasmādvai dharmakāmārthamokṣāṇāmāśusiddhikṛt/
adhītya ca śrutaṃ paścāt jñānānāṃ jñānamuttamam

yatprasādāttu vai bhūyo bhave'sminna bhavāmyaham/
tadyuṣmabhyaṃ pravakṣyāmi āmnāyena yathāsthitam

[śraddhābhaktipūrvakamupasannasyaiva śāstrasyāsyopadeśe pātratā/] 1-8
rahitaṃ saṃśayaissarvairguruśiṣyakrameṇa tu/
parijñātaṃ krameṇaiva yasmācchāstraṃ phalapradam

tasmānnayaṃ dvijāḥ pūrvamāśrayadhvaṃ prayatnataḥ/
bhaktiśraddhāsametaṃ tu astitve (āstikye?) nāpyalaṅkṛtam

sarvasvamapi yo dadyāt bhaktiśraddhāvivarjitaḥ/
nayācāravinirmukto mānī(1) sāstrārthadūṣakaḥ

(1. rādi A)
na tasya śāstraṃ vaktavyaṃ brūte vā yassa yātyadhaḥ/
samācāreṇa yo brūyācchṛṇuyādyaśca(2) tāvubhau

(2. dvā'pi A)
gacchetāṃ tu jagadyoneḥ padaṃ (3)ghoraviparyayāt/
[gurormahimānuvarṇanagarbhaṃ gurau bhakteḥ śreyaḥsādhanatvavarṇanam] 1-9
śāstrāyattā yataḥ sarve bhogamokṣādayo dvijāḥ

(3. ghore A)
vaiṣṇavaṃ(4) jñānavaktāraṃ yo vidyādviṣṇuvadgurum/
pūjayedvāṅbhanaḥkāyaissa śāstrajñassa vaiṣṇavaḥ

(4. vaiṣṇavajñāna A)
ślokapādasya vaktā'pi yataḥ pūjyassadaiva hi/
kiṃ punarbhagavadviṣṇossvarūpaṃ vivṛṇoti yaḥ

śāstrasya caiva vaktā'pi tadbhāvagatamānasaḥ/
vibhoḥ śāstrasya ca gurostritayasyāsya pūjanāt

phalaṃ bhavatyanūnaṃ vai iha loke paratra ca/
nārāyaṇaḥ paraṃ brahma tajjñānenābhigamyate

jñānasya sādhanaṃ śāstraṃ tacchāstraṃ guruvaktragam/
brahmaprāptirato hetorgurvadhīnā sadaiva hi

ītunā'nena vai viprā gururgurutamaḥsmṛtaḥ/
yasmāddevo jagannāthaḥ kṛtvā martyamayīṃ tanum

magnānuddharate lokān kāruṇyācchāstrapāṇinā/
tasmādbhaktirgurau kāryā saṃsārabhayabhīruṇā

śāstrāñjanena(1) yo'jñānatimiṃraṃ vinipātayet/
śāstraṃ pāpaharaṃ puṇyaṃ pavitraṃ bhogamokṣadam

(1. śāstrajñānena. A)
śāntidaṃ ca mahārthaṃ ca vakti yassa jagadguruḥ/
[atha tattvaśuśrūṣayā munibhiḥ svīkṛtaḥ śiṣyabhāvaḥ]
ityuktāstena munayo muninā brahmavedinā

tyaktāsanāstatassarve babhūvuśśāntamānasāḥ/
tatpādamūle patitāstaccittāstatparāyaṇāḥ

[atopadeśārambhaḥ]
datto mūrdhni tatasteṣāṃ munīnāṃ(2) bhāvitātmanām/
viṣṇuhastaśca (?) tuṣṭena muninā brahmavedinā

(2. ṛṣīṇāṃ. A)
athovāca sa viprendraḥ praṇipatyācyutaṃ harim/
kramāgataṃ mahacchāstraṃ jñānāmṛtaṃphalapradam

[asya śāstrasyārambhakāla--pravartakapuruṣaviśeṣa--ākhyāviśeṣāṇāṃ nirūpaṇam] 1-10
kṛte yuge pravṛtte tu kasmiṃścinmunisattamāḥ/
pauṣkare(1) brahmakalpe tu pratyakṣasthe'pyadhokṣaje

(1. puṣkare. S.)
kāmakrodhavinirmukte pravṛddhe tu pitāmahe/
sthite niṣkaṇṭake samyaktrailokye sacarācare

saṃpravṛddhe tathā dharme adharme nāśamāgate/
nāradena yathā pṛṣṭo devaḥ kamalalocanaḥ

jayārthamapi bhaktānāṃ hitārthamapi cātmanaḥ/
anuṣṭupchandobaddhena(2) sārātsāratarā śubhā

(2. yaṃ. A)
proktā trailokyaguruṇā pṛcchate nāradāya tu/
sārabhūtaṃ samuddhṛtya saṃhitā'mṛtagarbhiṇī

sarvajñatvaguṇenaiva kṛtsnaṃ jñātvā ca tattvataḥ/
sārdhakoṭipramāṇaṃ tu jñātṛjñānopabṛṃhitam

jayāvyaṃ (3)niṣadaṃ tantraṃ brahmamūlādvinissṛtam/
amūrttādgaganādyadvat nirghāto jāyate svayam

(3. nai. A)
śāntātsaṃvinmayāttadvacchāstraṃ śabdātma (4)cotthitam/
avikāramasaṅkalpaṃ yadrūpaṃ tatparaṃ vibhoḥ

(4. tmano. A.)
yadvikāraṃ jagaddhātuśśabdabrahmeti tatsmṛtam/
tataḥprabhṛti kālācca loke'sminmunisattamāḥ

jayeti vimalaṃ nāma praṇītaṃ viśvakarmaṇā/
[adhikaḥ pāṭhaḥ]
(*)pañcarātrasya kṛtsnasya vaktā nārāyaṇaḥ svayam/
iti sarvatra vikhyātaṃ bhagavacchāstragauravam

(*. ayaṃ tu kuṇḍalitaḥ pāṭhaḥ prācīneṣu bahuṣu kośeṣu nopalabhyate, paṭalasyāsyānte kaiścitprakṣiptaḥ syāt, athā'pi (Adyar Library Ms.) yathopalambhaṃ prākaṭhyaṃ nītaḥ)
sāttvataṃ pauṣkaraṃ caiva jayākhyaṃ tantramuttamam/
ratnatrayamiti khyātaṃ tadviśeṣa ihocyate

sāraṃ sāttvataśāstrasya rahasyaṃ prājñasaṃmatam/
ratnatrayamidaṃ sākṣādbhagavadvaktraniḥsṛtam

pravartitaṃ tathaivedamanyūnānadhikatvataḥ/
anyānyāni tu tantrāṇi bhagavanmukhanirgatam

sāraṃ samupajīvyaiva samāsavyāsadhāraṇaiḥ/
vyākhyopabṛṃhaṇanyāyādvyāpitāni tathā tathā

vyākhyāmūlanayenaiṣāṃ gauravaṃ sampratiṣṭhitam/
tantre'pyaṣṭottaraśate pārameśvarasaṃhitā

pauṣkarārthavivṛtyarthā vyākhyārūpā'vatāritā/
sāttvatasya vivṛtyarthamīśvaraṃ tantramuttamam

jayākhyāsyāsya tantrasya vyākhyānaṃ pādmamucyate/
bhagavad‌vyaktideśeṣu svayaṃvyakteṣu bhūtale

aṣṭottaraśate mukhyaṃ ratnabhūtaṃ catuṣṭayam/
śrīraṅgaṃ veṃkaṭādriśca hastiśailastataḥ param

tato nārāyaṇādriśca divyasthānacatuṣṭayam/
veṃkaṭādriṃ vinā'nyeṣu devadevasya dhāmasu

ratneṣu triṣu ratnāni trīṇi tantrāṇyupāsate/
mūlavyākhyānarūpatvādupajīvyaṃ parasparam

tantratrayamidaṃ vidyādekaśāstraṃ tathā budhaḥ/
sāttvataṃ yaduśailendre śrīraṅge pauṣkaraṃ tathā

hastiśaile jayākhyaṃ ca sāmrājyamadhitiṣṭhati/
pādmatantraṃ hastiśaile śrīraṅge pārameśvaram

īśvaraṃ yādavādrau ca kāryakāri pracāryate/
śrīraṅgādyādavādreśca hastiśailo viśiṣyate

padmarāgācca vaiḍūryādyathā vajraṃ mahāguṇam/
purā kṛtayuge brahmā sākṣātkṛtya ramāpatim

svayaṃ samarcayitvā'tha tadarcākramamuttamam/
śiṣyebhyo mahanīyebhya upadiśya kṛpāvaśāt

tairevārādhanaṃ kāle kārayatyabjasaṃbhavaḥ/
ityevaṃ nāradācchrutvā punarevāhamabruvam

bhagavan kamalākāntaḥ kathaṃ sākṣātkṛtaḥ kadā/
tadetad‌brūhi me svāmin hastyadreścāpi vaibhavam

iti pṛṣṭo mayā prāha nārado bhagavān ṛṣiḥ/
sādhu pṛṣṭo'smyahaṃ vatsa ślāghanīyo'si me mataḥ

yadadya kariśailasya vakṣyāmi tava vaibhavam/
purā mayopasannena bhagavān bhūtabhāvanaḥ

jagatsraṣṭā srurādhīśo'nuyuktaścaturānanaḥ/
hastiśailasya māhātmyaṃ varadasya kṛpārasam

satyavratasya kṣetrasya vaibhavaṃ cānvavarṇayat/
tatte'haṃ saṃpravakṣyāmi saṃgraheṇaiva sāravat

sāvadhānaḥ śṛṇu prītyā guhyaṃ sāramidaṃ yataḥ/
bhagavannābhipāthojājjāto dhātā'bjasaṃbhavaḥ

sṛṣṭvā carācaraṃ viśvaṃ garvaṃ paramupāyayau/
ābhijātyaṃ sadācāro vidyā ceti madatrayam

sarvānevābhibhavati kimu sarvādhike pade/
tato'sau mattacittaḥ san devadevaṃ ramāpatim

sākṣāccikīrṣuryogena paraṃ yatnamupāgamat/
devadevasvarūpādisākṣātkāravirodhinā

aprameyena mahatā duṣkṛtenaiṣa vāritaḥ/
punaḥ punaḥ prayatne'pi sumahatyapyanuṣṭhite

na sa siddhimanuprāpat samādhe- pratyahanyata/
atha cintāparo dīnaścintayitvā muhurmuhuḥ

vṛthaivācaritaṃ kaṣṭamiyatā mandabuddhinā/
devāvāsasamārohāvarohābhikhyakelitaḥ

nirmocanārthameko'pi kṣaṇo hanta na yāpitaḥ/
athālambya dhṛtiṃ dhīmān bhūlokaṃ pratyapadyata

gaṅgāmadhye mahadghoraṃ tapastaptumupākramat/
aṅguṣṭāgrapadāttiṣṭanniruddhasvāsaceṣṭitaḥ

ūrddhabāhurnirāhārastapastepe sudāruṇam/
kāpeyacapalaṃ cittaṃ na svāsthyaṃ prāpa tasya yat

kṣaṇamātramapi śrīśaṃ na dyātuṃ prābhavattataḥ/
atha dīne kṛśe dhātaryākāśādaśarīriṇī

vāṇī prādurabhūtpuṇyā bodhayāmāsa padmajam/
adhikāramahānandarasamagnasya te manaḥ

sahasreṇāśvamedhānāṃ vinā śuddhiṃ na gacchati/
aśuddhasyeha manasaḥ svāsthyaṃ saṃpādyatāṃ katham

asvasthe manasi dhyānaṃ sādhu niṣpadyatāṃ katham/
kartavyagauravātkālavilambācca bibheṣi cet

upāyaṃ sukaraṃ vakṣye yathāvadavadhāraya/
gaṅgāyā dakṣiṇe bhāge yojanānāṃ śatadvaye

pañcayojanavistāraṃ pañcayojanamāyatam/
tīrāntaṃ pūrvavārāśeḥ sarvaiḥ sumahitaṃ guṇaiḥ

siddhikṣetraṃ mahāpuṇyaṃ śrīśasyābhimataṃ param/
satyavratamiti khyātaṃ yathārthākhyāvabhāsakam

ekastatra kṛto dharmo vardhate hi sahasradhā/
tatra tvamaśvamedhena yajerekena ceddharim

sahasrasyāśvamedhānāṃ phalaṃ prāpsyasi niścitam/
tatra śarvatare kalpe diggajā viṣṇumavyayam

kasyacidgirivaryasya śikhare paryapūjayan/
teṣāmāvirabhūddeva karuṇāvaruṇālayaḥ

kamalākāmukaḥ kāntavigrahaḥ kañjalocanaḥ/
tataḥ prabhṛti śailendro yayau karigiriprathām

tameva vedikāṃ kṛtvā vājimedhena taṃ yaja/
lakṣmīvallabhakāruṇyavīkṣāvaibhavato mahān

dhanyaḥ kṛtārtho vimalo bhaviṣyasi na saṃśayaḥ/
iti vāṇīṃ samākarṇya viriñco hṛṣṭamānasaḥ

kṣetraṃ satyavrataṃ puṇyaṃ tvaritaṃ samupāgamat/
tvaṣṭrā hastigireḥ śṛṅgaṃ ṭaṅkaiḥ santakṣya śobhanām

yāgārhāṃ yajamāno'yaṃ yāgavedīmakalpayat/
yathāśāstraṃ ca lakṣmīśaṃ sarvakāraṇakāraṇam

īje'jo vājimedhena yāgānāmuttamena saḥ/
tatra sarveṣu mantreṣu tattaddaivatanāmabhiḥ

paṭhyamāneṣu dhātā'yaṃ devadevaṃ ramāpatim/
hṛdaye samanudhyāyaṃstasmai sarvaṃ havirhutam

bhaktyā samarpayannetadalameko'pi veditum/
sarvameva havirdevaḥ puṇḍarīkekṣaṇo hariḥ

svayameva samādāya samāsvādayadādarāt/
svān svān bhāgānparīklṛptānkāleṣvanadhigacchatām

unmukhānāṃ vañcitānāṃ devānāṃ kṣubhitaṃ manaḥ/
brahmāṇamatha te sarve samāgatyānvayuñjata

kimidaṃ vartate mohaḥ kṣobhitā vañvitā vayam/
brahmā tu smayamānastān sāṃtvapūrvamabodhayat

devā mayā purā sṛṣṭāḥ sraṣṭā'haṃ bhavatāṃ pitā/
kimetadyatpitā putrānupāstāṃ vinayāditi

saṃsāramārganiṣṇātaistattatphalamabhīpsubhiḥ/
yūyamārādhanīyā hi tadarthamadhikāritāḥ

sarvāntarātmā sarveśo mama cāpi pitā hariḥ/
kamalāvallabho devastamevoddiśya hūyate

iha sarvaṃ haviryajñe nāmamātraṃ tu mantragam/
bhavatāṃ tattadarthastu bhagavān kamalāpatiḥ

iyaṃ madyajñasārasya dhoraṇī sāramādhurī/
paramaikāntināṃ nṝṇāmapyeṣaiva nibodhata

iti saṃbodhitā devā gatakṣobhāḥ prajāpatim/
sārārthāvagamāttuṣṭāḥ sādhu sādhvityapūjayan

śreyasāṃ kila kāryāṇāṃ pratyūhānāṃ śataṃ śatam/
tathā tatra mahāyajñe vighrānāṃ śatamutthitam

devadevo ramānāthaḥ kṛpayā parayā mudā/
sarvānpraśamayāmāsa pratyūhān samupasthitān

atha kāle bahuguṇe vapāhomocite tadā/
āvirāsannimittāni manohārīṇi sarvasaḥ

meṣamāse site pakṣe caturdaśatame tithau/
śobhane hastanakṣatre ravivāreṇa saṃyute

prātaḥ savanakālīne vapāhome samāpite/
tāṃ vapāmadhare gṛhṇannagnerāvirabhūddhariḥ

sūryakoṭipratīkāśe taptakārttasvarojvale/
vimāne puṇyakoṭhyākhye śrībhūmisahitaḥ prabhuḥ

paścimābhimukho dīptakirīṭamakuṭojjvalaḥ/
ūrdhvapuṇḍrollasatphālapaṭṭo rājīvalocanaḥ

tilaprasūnasaubhāgyanāsākalpalatānvitaḥ/
pravālakhaṇḍasuṣamāmoṣadakṣādharoṣṭhavān

kambugambhīrakaṇṭhāntarlambikaustubhavibhramaḥ/
śrīvatsavakṣā hāraśrīśobhamānabhujāntaraḥ

pañcāyudhollasadbāhucatuṣṭayamanoharaḥ/
sapadmena kareṇoccairvahannabhayamudrikāmra

gadāṃ cāpaṃ ca vāmena pāṇinā paribhūṣayan/
kaṭibandhe dharandivyaṃ naṃdakaṃ khaṅgamuttamam

pītāmbaralasannābhigahvarojvalavihvalaḥ (grahaḥ?)/
kāmārāmīyakadalīkaḻīcororubhāsvaraḥ

mukurākārajānūtthalāvaṇyaprasarādbhutaḥ/
kaḻācikārucispardhijaṅghādvitayasundaraḥ

padmasaubhāgyasarvasvahāripādamanoharaḥ/
karuṇārasapūrṇābhyāmīkṣaṇābhyāṃ caturmukham

ādarādanugṛhṇānaḥ smitāñcadadharāntikaḥ/
evaṃ svayamudāttena rūpayauvanaśobhinā

vigraheṇoditaṃ devaṃ ramākāntaṃ jagatpatim/
āsevya sarve saṃhṛṣṭāḥ kṛtārthanayanodayāḥ

aho bhāgyamaho bhāgyamityuccairudaghoṣayan/
caturmukho'pi nayanairaṣṭābhirdevamacyutam

praṇatārtiharaṃ nāthaṃ varadaṃ samasevata/
saharṣasaṃbhramo nānāceṣṭāstāstāḥ svayaṃ caran

krameṇa śānatsaṃrabhbho devo nābhipracoditaḥ/
vatsa satyavrakṣetramāhātmyaṃ paśya padmaja

ekena hayamedhena sahasrasya phalaṃ tvayā/
kāṃkṣitaṃ tena cittasya śuddhistena ca cetasaḥ

sthairyaṃ tena ca niṣpattirdhyānasyetīpsitaṃ tvayā/
ante pratīkṣitaṃ yatte phalaṃ parvakramātkila

prathame parvaṇi prāptaṃ sukhenaiva prajāpate/
prasanno'smi tavānena hayamedhena suvrata

vapāraso'yaṃ madhuro mama hṛdyo mano'harat/
pāramaikāntisaurabhyasārāmṛtamanoharā

vapeyaṃ sarvabhakṣyebhyo mama prītikarī sadā/
varaṃ varaya tasmāttvaṃ yathā'bhimatamātmanaḥ

sarvaṃ saṃpatsyate puṃsāṃ mayi dṛṣṭipathaṃ gate/
iti devena saṃdiṣṭaḥ prahṛṣṭaḥ paramārthavit

brahmā praṇamya bahuśaḥ stutvā ca prārthayadvibhum/
vaikuṇṭhe tu yathā loke yathaiva kṣīrasāgare

tathā satyavratakṣetre nivāsaste bhavediha/
hastiśailasya śikhare sarvalokanamaskṛte

puṇyakoṭivimāne'smin paśyantu tvāṃ narāssadā/
iti saṃprārthito devo bhagavān bhaktavatsalaḥ

hitāya sarvalokānāṃ tathā'stvityanvamodata/
tasmin kṛtayuge brahmā devadevamadhokṣajam

svayaṃ tenaiva rūpeṇa samārādhayadacyutam/
mahāśāntagajendro'tha tretāyāṃ harimārcayate

svakarāgroddhṛtaiḥ padmairatha grāheṇa pīḍitaḥ/
śaraṇāgatimādhāya varadena vimocitaḥ

hariṇā dhāma ninye svaṃ vāhanena garutmatā/
atha dvāparasaṃjñe tu yuge devaguruḥ svayam

ārādhya varadaṃ devaṃ svābhīṣṭāṃ siddhimāpnuta/
tataḥ kaliyugasyādau brahmāṇaṃ varado'bravīt

parāmṛśan jagatsarvaṃ prahṛṣṭenāntarātmanā/
kālo'yaṃ kalirāyātaḥ sarve svārthaparā janāḥ

na ko'pi tattvato bhakto drakṣyate kālaviplavāt/
ayute vā parārdhe vā yadi ko'pi ca tādṛśaḥ

saṃbhāvyate guṇotkṛṣṭaṃ na taṃ loko'numaṃsyate/
doṣānāropayetkaścinmatsarāttasya mūrddhani

taṃ tathaiveti sarve'nve ghoṣayiṣyanti sarvaśaḥ/
ante tasyāpi nairāśyāccyutireva manogateḥ

bhaviṣyati tathā nāma kālo'yaṃ kalirūrjitaḥ/
ato na rocate vatsa hastiśailasya mūrdhani

divyenānena rūpeṇa vastuṃ kāle kalāviha/
pratijñātaṃ ca kalpāntamavasthānamihaiva me

ato'tra kriyatāmevamahaṃ tvāmanumānaye/
varado'haṃ vidhe bhaktajanānāṃ karuṇākaraḥ

ataḥ sthalamidaṃ puṇyaṃ tyāgamaṇṭapamucyatām/
yogamaṇṭapasaṃjñātu śrīraṅgasya mayā kṛtā

puṣpamaṇṭapamityākhyā veṅkaṭādrervirājatām/
anyadyadugiristhānaṃ vidyāmaṇṭapamucyatām

sarvottamamidaṃ puṇyaṃ kṣetraṃ sthānaṃ ca śobhanam/
mama prītikaraṃ divyaṃ muktikṣetreṣu cottamam

naitasya sadṛśaṃ kiñcit kṣetraṃ vā tīrthameva vā/
ato madājñayā brahman ālayo'tra vidhīyatām

sarvamantrasvarūpatvāt sarvebhyo'bhyadhiko bhuvi/
saṃsthānasyālayasyāsya svarūpaṃ paramārthataḥ

na vettuṃ prabhavedanyo madīkṣāvībhitānnarāt/
kalikālocitāṃ rītimāśritya manasā mayā

pāñcarātrāhvayaṃ tantraṃ yathāvadavatāritam/
taduktena prakāreṇa mūlakarmotsavāśrayāḥ

tisro mūrtīḥ pratiṣṭhāpya pūjanaṃ pratipādaya/
balyarcā ca vidhānena sādaraṃ parikalpyatām

ratneṣu triṣvapi śreṣṭhaṃ jayākhyaṃ tantramucyate/
taduktena vidhānena pratiṣṭhādi pravartyatām

kāṇvīṃ śākhāmadhīyānāvaupagāyanakauśikau/
prapattiśāstraniṣṇātau svaniṣṭhāniṣṭhitāvubhau

jayākhyatantramārgeṇa dīkṣayitvā'bjamaṇḍale/
ācāryake cābhiṣicya tābhyāṃ pūjāṃ prakalpaya

tadgotrasaṃbhavā eva kalpāntaṃ pūjayantu mām/
jayākhyenātha pādmena tantreṇa sahitena vai

mūlavyākhyānarūpābyāṃ samarcayatu māṃ sadā/
na tantrasaṅkaro doṣastantrayoranayoriha

ācāryake tathā''rtvijye pūjane vā mamābjaja/
tāvetau gotriṇau mukhyau mama prītikarau matau

paricaryāsu tattāsu yogyānnirṇīya cetasā/
dīkṣayitvā ca te tatra niyujyantāṃ yathāvidhi

atrādhikāra ubhayostayoreva kulīnayoḥ/
śāṇḍilyaśca bharadvājo munirmauñjāyanastathā

imau ca pañcagotrasthā mukhyāḥ kāṇvīmupāśritāḥ/
śrīprāñcarātratantrīye sarve'smin mama karmaṇi

iha tābhyāṃ ciraṃ vatsa toṣito'smi tapobalāt/
tayorayaṃ varaḥ prītyā prādāyi prārthito mayā

mantraiḥ kātīyasūtreṇa nirdiṣṭairvaidikaiḥ saha/
bhagavacchāstrasaṃsiddhairdivyairmantrairvimiśritaiḥ

garbhādhānādikāḥ sarve saṃskārā nityakarma ca/
naimittikaṃ ca śrāddhādi kartavyaṃ tairatandritaiḥ

ācāreṇaivāmunaivāhaṃ bhavāmi prītimānasaḥ/
śarkarāsahiteneva kṣīreṇa kamalāsana

pratyabdaṃ caitramāse tu svena rūpeṇa māṃ vibhum/
pūrṇimāyāmihāgatya tvaṃ māmārādhayānagha

pratyahaṃ rātrikāle tu śeṣaḥ phaṇabhṛtāṃ varaḥ/
aprākṛtena rūpeṇa māṃ samārādhayiṣyati

iti devena saṃdiṣṭaḥ paratantramanā vidhiḥ/
tathaiva tatsvayaṃ prītyā niravartayadādarāt

devāvatārasamaye vimānamatulaprabham/
sarvadevamayaṃ divyamagnimadhyāt samutthitam

tathaiva devadevasya varadasya nideśataḥ/
bhūtale vāstuvidhinā pratiṣṭhāmadhyagamyata

divyālayasya nirmāṇaprakāro viśvakarmaṇe/
devādeśādviriñcena sphuṭamevātyadiśyata

sa tasyājñāṃ vahanmūrdhnā tadādiṣṭena vartmanā/
ālayaṃ nirmame divyaṃ tenaiva pratyavekṣitaḥ

mūlamantratrayātmatvāddevadevasya sannidhau/
praṇavena samaṃ pūrvaṃ sopānatrayamāsa tat

ṣaḍakṣarasya mantrasya smāraṇāya ramāpateḥ/
ardhamaṇḍamabhāge ṣaṭ sopānāni cakāra saḥ

caturviśatitattvātmā caturviṃśatisaṃkhyakā/
gāyatrīsaṃmitā paścāt sopānāvalirābabhau

atha dvayākhyaṃ paramaṃ mantrarājamanusmaran/
sopānayordvayaṃ dīpraṃ nirmame nirmamāntaraḥ

praṇatārtihṛto mantre divye devasya toṣaṇe/
daśavarṇaā iti vyaktīkurvan daśa tatā'karot

bahunā'tra kimuktena devadevālayo mahān/
uktānāṃ bhagavacchāstre lakṣmaṇāṃ lakṣyatāṃ yayau

karīśaḥ kamalākāntaḥ kāle kamalasambhavam/
svacchandaḥ saṃdiśaṃstena svamālayamakārayat

atha devena nirdiṣṭe kāle kamalasaṃbhavaḥ/
jayākhyatantramārgeṇa pratiṣṭhāvidhimādiśat

dāruṇā mūlaberaṃ tu karmārcāṃ rajatena vai/
autsavaṃ caiva tāmreṇākārayadviśvakarmaṇā

tathaiva cātha balyarcāṃ vidhinā'kārayadvidhiḥ/
aupagāyanamācāryaṃ kauśikaṃ ca tapasvinam

tatputrāṃśca mahābhāgān dvau dvau devasutopamau/
dīkṣayitvā yathānyāyaṃ cakravārijamaṇḍale

taiḥ pratiṣṭhāntikaṃ sarvaṃ karṣaṇādyamakārayat/
vaiśākhe śravaṇarkṣe tu saṃkalpyāvabhṛthaṃ purā

navame'hni dhvajārohaṃ vidhinā'kārayadvidhiḥ/
prathame'hani deveśaṃ maṇḍapena vibhāsinā

vīthīḥ sañcārayāmāsa prātarbhaktānukampayā/
rātrau mṛgendravāhena devasyotsavamācarat

dvitīye divase prātarhaṃsavāhanamācarat/
rātrau mārtaṇḍabimbena mahotsavamakārayat

tṛtīye divase prātargaruḍotsavamācarat/
avatārātparaṃ devasyotsave prathame purā

evo ramāpatirdivyaṃ vainateyamadhiśritaḥ/
prathamaṃ darśayāmāsa nijamaprākṛtaṃ vapuḥ

madhye gopuramukhyasya tato garuḍavāhane/
gopurāgrimamadhye tu devasevā viśiṣyate

sarvapāpaharī puṇyā muktimārga udīritaḥ/
rātrau hanumatā caiva devadevamacārayat

caturthe divase prātaḥ śeṣāsanatale hariḥ/
paravyomnīva bhaktānāṃ svaṃ rupaṃ samadarśayat

rātrau candramasaṃ bimbamāsthitasyotsavoṃ'bhavat/
mohinīrūpamāsthāya prātarāndolikāṃ gataḥ

paṃcame'hani deveśo bhaktānsarvānanandayat/
rātrau tu yālavāhena devasyotsavamācarat

ṣaṣṭhe prātaḥ kalpatarau veṇugānotsavo'bhavat/
rātrau gajendramāsthāya divyaṃ rūpamadarśayat

saptame syandanaṃ divyamāsthāpyotsavamācarat/
aṣṭame tu jaladroṇīmavagāhya divā hariḥ

rātrau turaṅgamāsthāya sarvāllokānapāvayat/
navame śibikāyātrāmāracayya ramāpatiḥ

līlāṃ praṇayakopasya pradarśya kamalābhuvoḥ/
anantasarasīvarye'vabhṛthaṃ mahamāsthitaḥ

rātrau tu puṇyakoṭhyākhye vimāne niṣṭhitaḥ prabhuḥ/
sarvaṃ puraṃ paribhramya sarvāṃllokānapāvayat

daśame'hani madyāhne puṣpayāgamaho'bhavat/
rātrau mahāvimānena purayātrā prakalpitā

sarvāvaraṇaniṣkrāmātparaṃ vihagarāḍ‌dhvajam/
avaropayya vidhivatpūjako bahumānitaḥ

evaṃ saṃrambhayogena mahotsavamakārayat/
prativatsaramevaivaṃ mahotsavavidhiḥ kṛtaḥ

pakṣamāsāyanābdādyā utsavāścābhavankramāt/
maharṣī dīkṣitau tau dvāvaupagāyanakauśikau

paryāyeṇaiva deveśamānarcyaturihādarāt/
tadetanmahitaṃ dhāma hastiśailaprathāṃ gatam

praṇatārtiharo devo varado yatra pūjyate/
pūjakāstasya tadvasyā mahātmāno guṇojjvalāḥ

pāñcarātrikamukhyebhyaḥ sarvebhyo'pyadhikā bhuvi/
evametatsamākhyātaṃ hastiśailasya vaibhavam

devasya tantrasārasya pūjakasya tu saṃgrahāt/
yathā vai nāradamuneḥ mukhātpūrvaṃ śrutaṃ mayā

tathaiva sarvamākhyātaṃ prasaṅgātprītipūrvakam/
atha prakṛtamevādya tantramāraṃbhyate mayā

śrūyatāmavadhānena śraddhābhaktimahīyasā)
iti śrīpāñcarātre jayākhyasahitāyāṃ śāstrarambhaprayojanaṃ nāma prathamaḥ paṭalaḥ/
* * * * *