Jātakamālā · Verses 78-12

vana iva bhavane 'pi bodhisattvā viṣayasukhavyasanāparītasattvāḥ |
munaya iva vanāntavāsanimnāḥ praśamarasaikavihāriṇo bhavanti

bhavana iva vane 'pi sādhavas te jagadudayaikanibandhanaprayogāḥ |
svatanum api parārtham utsṛjanti praṇayijanapraṇayaṃ na khaṇḍayanti

ata iha bhavanaṃ vanaṃ ca tulyaṃ jagadupajīvyavibhūtivistarāṇām |
avikalabhuvanopakārapārapraṇayakṛtavyavasāyamānasānām

tena dattaṃ samādāya svarājyaṃ lokasārathiḥ |
dhanaṃ rājā sa viprāya vāñchitātyadhikaṃ dadau

tasyāścaryam udāradharmasuratiṃ cākarṇya viproditaṃ
tyaktvā vairavikāraduḥsahataraṃ krodhābhidhānaṃ viṣam |
dhṛtvā maulim ivonnate ⏑ ⏑ ⏑ – – – ⏑ rājā svayaṃ
cakre taccaraṇāmbujapraṇayinīm uṣṇīṣamālāṃ kṣaṇāt

tasmin gate nijapuraṃ vinayaprapanne saṃprāpya rājyam arihīnam udārapuṇyaḥ |
dharmeṇa kīrtidhavalāmbudhiphenamālāvelādukūlalalitāṃ pṛthivīṃ śaśāsa

caritam atigatopamānaśobhaṃ na hi vibhavo 'sty anugantum īśvarāṇām |
mama kṛpaṇamates tathāpi caitat kṛtam atisāhasam ātmano hitāya

kuśalam upacitaṃ kṛpātmakānāṃ caritam idaṃ vinibadhya yan mayādya |
bhavatu bhuvanaśāntaye tad āśu jvalatu tathāgataśāsanaṃ tataś ca

iti sarvaṃdadajātakam ||
Śvan = GoŚv
Ed. Michael Hahn.
Cf. Michael Hahn. Der grosse Legendenkranz Mahajjātakamālā. Wiesbaden 195 (Asiatische Forschungen, 88). No. 8: Somajātakāvadāna
16. Śvan
(247b6) paraduḥkhakātarā devarājyam apy avadhīrayanti sādhavaḥ ||
tadyathānuśrūyate
bodhisattvabhūtaḥ (248a) kila bhagavān svapuṇyaparipākaviśeṣopanatam amarapurādhipatyam kārayām āsa | naparidyūtahṛdayena sarvalokātiśayināpi mahimnā kevalaṃ puṇyānām avandhyaphalam āviṣkurvann amarapuranivāsināṃ cānugrahāya ||
jagad dṛṣṭvānantavyasanakuliśāpātavihataṃ
na sa svarge reme prakṛtiramaṇīye 'pi bhagavān |
tadā hy enaṃ sā dhīr hṛdi tudati niḥsaṅgam aniśaṃ
parārthaprāgbhārā paramavidhurā svāduvidhurā

akṛtakuśalavyāpārānāṃ svabhūtinibandhanaṃ
kṛpaṇamanasāṃ – – yad vā mano bahu manyate |
svacaritapariprāptaiśvaryaṃ jagaddhitakāriṇā
na viṣayasukheṣv āsthaṃ ceto mahaty api rakṣyate

sa kadā cij jambūdvīpam avalokayan dadarśa [!] evaṃ lokam aśakyapratīkāravyādhiduḥkhopaplutaṃ viṣamavirasakṛtavaidyasāmarthyaṃ samaraṇam āvarjja(?)vyavasāyaviklavaṃ romanthamānam iva piśitāśanair ihaiva narakaduḥkhāny anubhavantaṃ vismṛtasnehabandhumitrasuhṛcchaucācāraprayojanam ||
kṛtāntakarmānta iva pravṛttas tadā sa rogāntarakalpatulyaḥ |
aśakyarūpapratikārabhīmo mahātyayo vyādhikṛto vikāraḥ

kṣuttṛṣṇācetanaparigatāḥ sānubandhaṃ stananto
vikṣiptāṅgāḥ kṣititalarajoguṇṭhitoddhastakeśāḥ |
smāraṃ smāraṃ jalakaṇamucāṃ mallikāmālutānāṃ
– – – – madhukaragaṇair mārga āsannapātāḥ

śvāsādhmātabṛhatkaṭhorajaṭharavyābhinnanāsāpuṭāḥ
sṛkkāntapratibaddhaśuṣkavirasaśleṣmānanā bhīṣaṇāḥ |
rūkṣasthūlaśirāpratānajaṭilatvaksnāyuśeṣāśrayāḥ
ke cit pūrvakṛtaṃ ninindur aśubhaṃ karmābhisaṃdhisthiram

kvathitapiśitarandhraprodvamatpūyadhārā malinavikṛtadehāḥ ke cid aprekṣaṇīyāḥ |
krimikulapariluptaprāyabāhūdaroruśravaṇanayananāsāḥ prārthayante sma kālam

saṃśuṣkādharakaṇṭhatāluvivarās tṛṣṇāgninā dāhinā
rūkṣakṣāmavidāritānanapuṭāḥ pretā ivāyāsinaḥ |
āmattālikuloddhatotpalavanacchannāmbuviṣyandināṃ
vīkṣantaḥ sarasāṃ payāṃsi viviśuḥ ke cit kṛtāntālayam

dūṣīkāpaṭalaniruddhalocanāntā durgandhā bahalamalopaliptagātrāḥ |
anye tu klamaśithilāśrayā rujānām ājagmur nilayanatāṃ prabandhinīnām

ke cil lālāsalilavisaraklinnasaṃsaktadīrgha-
śmaśruvrātāḥ pathiṣu kṛpaṇāḥ klāntakāyāḥ śayānāḥ |
krūrārāvaiḥ purabalibhujāṃ maṇḍalaiḥ saṃpatadbhir
vyāvṛttāsyā vipadam avaśāḥ pratyapadyanta tīvrām

tasya tad atidāruṇam ālokya lokavyasanaṃ mahat kāruṇyam udapādi | atha sa mahāsattvas tena sattvopadraveṇa vyathitamanāḥ sutarām abhivardhitānukampākampitaḥ pitevaikaputravyasanam asahamānaś cintām apede ||
itthaṃ gatānāṃ ka ivābhyupāyaḥ syād āmayocchittisukhaḥ prajānām |
apīha lokatrayabāndhavānāṃ tathāgatānām anṛṇo bhaveyam

api nāma bhaven mama pratijñā sakalā lokahitaprayogasiddhyai |
api mānuṣajanmaduḥkhabhājo vyasanebhyaḥ parimokṣam aśnuvīran

api nāma na bodhisattvanāmavyapadeśaṃ vitathaṃ samudvaheyam |
api sarvavidām agarhaṇīyāṃ dadhad ājñām animittavatsalānām