Jātakamālā · Verses 53-72

paricayakṛtamārgās tasya raktapraṇālyo gagaṇaparikhabhūte cchidyamāne śarīre |
kṣitidharasaridoghā vistarāṇi pracakrur na ca manasi viṣādo nāpi khedo babhūva

apacitataramāṃsāsṛgvasākardamāsu vyapagatabhayaśaṅkās tasya vistāriṇīṣu |
tanuvivaratareṣu vyāḍasaṃghā vicerur na ca manasi viṣādo na ca khedo babhūva

yad apahṛtam anāryais tasya māṃsaṃ śarīrād yadi tad apariśeṣaṃ piṇḍitaṃ syāt kathaṃ cit |
girim api sa sumeruṃ laṅghayen māṃsarāśir na ca manasi viṣado na ca khedo babhūva

kṣayam upayayur aṅgeṣv eva śastrāṇi tasya prakṛtimṛduṣu sādhor akṣatādhyāśayasya |
abhirucitaparārthaprītisaṃbhogaśānte na ca manasi viṣādo na ca khedo babhūva

ye cāsya raktair vililepur aṅgā te rejire rogaviṣādamuktāḥ |
ye cāpi raktāni papuḥ sarogās te sarvalokāḥ pupuṣur virogāḥ

janam apagatarogaṃ vīkṣamāṇasya harṣo manasi bhuvanabandhor labdhagādho babhūva |
piśitam anupayogaṃ vīkṣamāṇasya bhūyo 'py abhavad aratidolaṃ cañcalaṃ tasya cetaḥ

utkṛttacarmapaṭalasphuṭatāmramāṃso randhrodvamadrudhiraśeṣaviśeṣatāmraḥ |
kāyaḥ sa tasya vikṛtaḥ kṛtaniścayasya reje javākusumarāśir ivābhracumbī

vicchidyamānaḥ suniśātaśastrais tad duḥkham ekāśrayam īkṣamāṇaḥ |
sukhena duḥkhaṃ sa nirācakāra labdhvā paratrātmani caikamatyam

pariṇāmakharā batādhamāyā gatir ātmābhiniveśavāsanāyāḥ |
upadigdhadhiyo yayā manuṣyāḥ pitṛbhūteṣv api sādhuṣu skhalanti

etasya māṃsaṃ bubhuje kṛpālor yo yaḥ sa sa vyādhim apācakāra |
krameṇa kṛcchraṃ jagad uttatāra vipatsamudraṃ tad anena kṛtsnam

atha sarva eva loko vigatanikhilarogopasargas tasmin mahāsattve samupajātapremagauravabahumānaḥ praṇamya śvānaṃ bodhisattvam abravīt ||
aho kṛpābhyāsaviśeṣabhadratā guṇeṣv aho bhaktir apetakalmaṣā |
aho parārthapratipattipeśalaṃ tavārya karmedam atītamānuṣam

aho jagacchreṣṭhamahādayārdratā aho svasaukhyavyavasāyaniḥspṛhā |
śubheṣv aho niścayaniścalaṃ mano manasvināṃ bodhipathānupātinām

aho batācintyam upāyakauśalam aho parārthe 'bhirater udāttatā |
acintyacaryātiśayāya sādhave namo 'stu tubhyaṃ jagadekabandhave

tvaṃ naḥ pitā yadi pitā tvam ivārthakāmaḥ śāstā tvam eva yadi dharmagurus tvam eva |
tvam daivataṃ yadi na taj janavādamātram ārtāyanaṃ tu jagataḥ paramaṃ tvam eva

tasmād ājñābhiṣekeṇa pavitrayitum arhasi |
upadigdham imaṃ lokaṃ yuṣmadāyāsacetasā

atha bodhisattvaḥ samupajātaprasādamānasam avagamya tam enam abravīt ||
pīḍā mameyam iti naivam idaṃ pradhāryaṃ sattvārtham eva gaticakracalasya nityam |
pīḍā mamābhavad udīkṣya vipatparītān yuṣmān nirāmayasukhaṃ tv adhunā mano me

kṛtyaṃ na me parahitād aparaṃ garīyaḥ saṃsāracārakanibandhanam etad eva |
tasmāt kukāryamalinām atilaṅghya caryāṃ matprītaye satatam ātmahitaṃ kurudhvam

lokān imān svakṛtakarmabhujo viditvā mṛtyor aparvaparuṣasya karodarasthān |
pāpāny asahyaparitāpaphalodayāni prāṇātyaye 'pi parivarjayituṃ yatadhvam

svantāny anāśaramaṇīyaphalapradāni janmāṭavīgahanapathyadanopamāni |
puṇyāni saṃcinuta matpratikārabuddhyā kalyāṇamitravacanaṃ hi na laṅghanīyam

iti samanuśiṣya prāṇinas tān mahātmā niśitaparaśudhārājarjaraklāntadehaḥ |
avasitakaraṇīyaḥ paryudasyātmabhāvaṃ tam ativikṛtarūpaṃ svargam evāruroha