Jātakamālā · Verses 69-88

yena niṣkriyam apy etat kriyāvad iva lakṣyate |
kalevaram anātmīyaṃ kva sa cittavidūṣakaḥ

antarātmānam icchanti yam avidyāndhabuddhayaḥ |
vijñānadhūrtakaḥ kvāsau gatas tīrthavimohakaḥ

ciraṃ vyāmohitaṃ yena na tattveṣu pratiṣṭhitam |
jagat kva nu prayāto 'smāc cittacitrendrajālikaḥ

na jānanti gatiṃ yasya kapilādyās tapodhanāḥ |
cittavidyādharaḥ kvāsau viṣayāmbaragocaraḥ

cacāra yo 'sminn aśucau navadvāre calācale |
śarīrapañjare so 'dya kva nu cittavihaṅgamaḥ

yenāviṣṭā bhavajalanidhau kleśasaṃsarpisarpe
tīvracchidravyasananivahakṣāravāriprapūrṇe |
majjanty ajñā maraṇamakarakṣobhacañcattaraṅge
yātas tyaktvā kva nu tanum imāṃ cittanaktaṃcaro 'sau

adāntatvād yo 'sau kṣipati narake vyārtam avaśam
sphuradvahnijvālāvalayakapiladvāravivare |
yamopāyaṃ yasya vyapagatamado vetti bhagavān
kva yāto 'sāv asmāt prakṛticapalaś cittaturagaḥ

atha kuliśamarīciśyāmapīnaprakoṣṭhaḥ
savinayam upagamya prītivispanditākṣaḥ |
anunayaramaṇīyaṃ sādhu sādhv ity uvāca
prakṛtisubhagavācā vāsavaḥ kanyakās tāḥ

navavayasi bhaginyo manmathāvāsabhūte
nṛpatikulavibhūtiśrīsukhaṃ paryudasya |
ṛṣibhir api purāṇair duṣkaraṃ saṃprapannā
vratam idam iti tuṣṭo 'smy adya vaḥ kiṃ vṛṇīdhvam

karatala iva manye kāmadhātvīśvaratvaṃ
tridaśapatisukhaṃ vā niścayasyāsya vo 'dya |
laghu vadata bhaginyaḥ kiṃ karomy eṣa vaśyaḥ
sphurati manasi yad vo devarājo 'smi śakraḥ

atha viṣayasukhebhyo niḥspṛhās tāḥ kumāryaḥ
prakṛtirucirabhāvās tiryag ālokya śakram |
jagur idam anavadyaṃ suṣṭhu citrārthavācaḥ
svakuśalaparipākāṅgāradhīrasvabhāvaḥ

na vayam amarabandho janmaduḥkhāturatvād
bhavasukhalavalolāt tantusaṃtānaneyāḥ | (?)
vratam idam anubaddhāḥ śokabāṣpāmbuleśaiḥ
kaluṣavadanaśobhān bāndhavān apy apāsya

api tu jagad aśeṣaṃ durnayāviddhatīvra-
vyasanaśatasahasrāghātanirbhidyamānam |
kṛpaṇam abhisamīkṣya kṣīṇadoṣānujātaṃ
padam abhayam aśokaṃ prāptum abhyudyatāḥ smaḥ

prabhavasi śatamanyo tvaṃ varaṃ saṃpradātuṃ
yadi jagadanukampāpeśalādhyāśayatvāt |
padam ajaram ahāryaṃ brahmaśāntaṃ tadāryaṃ
bhavabhayaparitaptāḥ prāpayāsmān vimokṣam

kāyāvaskaranirjharasrutamalakledopadigdhāśrayo
niryāṇāsthikaṭāhakārpitaśirā mūrcchāturo niṣpatan |
garbhān mātur amedhyapaṅkagahanād yām aprahāyāśnute
duḥkhaṃ duḥkhaparaṃparāṃ ca paratas tāṃ chinddhi jātiṃ hi naḥ

jagan nirmaryādā daśati śirasi vyāvṛtamukhī
jarā rakṣoyoṣit palitasitadaṃṣṭrāṅkuravatī |
nṛṇāṃ yāsau vīryasmṛtidhṛtimatiśrīpramathinī
tatas trāyasvāsmān prabhavasi yadi tvaṃ surapate

śvāsotkṣepacalatkaṭhorajaṭharo vyāpāṇḍurūkṣacchaviḥ
saṃprāptān api bhoktum apratibalo bhogān vicitrojjvalān |
yenādaṣṭavapuḥ sureśvara tato rogābhidhānād bhayāt
trātā no bhava mṛtyudūtapuruṣād ditsur varaṃ ced bhavān

pratyāvṛttastimitanayano marmavicchedaduḥkha-
kṣobhāyāsapratihatatanuḥ śītaviṣṭabdhagātraḥ |
paśyan bandhūn nayanasalilasnātagaṇḍādharāntān
yenāghrāto vrajati vilayaṃ pāhi mṛtyos tato 'smān

yenāliṅgitamānasaḥ paśur iva vyāpnoti śocyāṃ daśāṃ
kāryākāryavibhāgapelavamatir nindāspadaṃ jāyate |
hlādaṃ naiti tamālaśīkaramucāpy āliṅgito vāyunā
tan no rāgahutāśanaṃ varada he nirvāpayāpāyikam

yasyāveśāt sphuritanayanā daṣṭadantacchadāntāḥ
pāpāḥ pāpaṃ narakam aśivaṃ kurvate tatkṣaṇena |
naivotkhāto munibhir api yaḥ śīrṇaparṇāmbubhakṣais
tan naḥ śakra vyapanaya manaḥkoṭarāt krodhasarpam