Jātakamālā · Verses 49-68

saṃrāgāruṇatārakāntamukulakṣībeṇa yā cakṣuṣā
kāntaṃ snigdhavidagdhamugdhamadhureṇodīkṣamāṇā purā |
cakre manmathavāgurāhariṇakaṃ saivādya saṃrāgiṇāṃ
saṃtrāsaṃ vihagāpanītanayanā kaṣṭaṃ karoty aṅganā

antarnigūḍhavividhāśucigātrayaṣṭyā rāgāndhabuddhinayanāś chalitā mayeti |
saṃrāgiṇo 'pahasatīva khagāvaluptadantacchadena vadanena varāṅganeyam

vīṇāveṇudhvanikalaravaiḥ kākalīgītakair yā
nidrāṃ bheje priyatamapariṣvaṅgaviśrabdhagarbhām |
saivādyeha svapiti vanitā bhūrajorūkṣitāṅgī
gomāyūnāṃ dhvanitamukharārāvaraudre śmaśāne

vālāgramātram api yatra vicāryamāṇe nekṣāmahe śuci nijāśucigarbharandhre |
tasmin ratiṃ katham amī prakhalā labhante kāyādhame nidhanadharmiṇi roganīḍe

evaṃvidhaṃ jagad idaṃ sakalaṃ bhaginyaḥ
svapnendrajālajalacandracalasvabhāvam |
matvā virāgam upagacchata yāvad etat
prāṇāvaśeṣam upayāti na vo vināśam

prāṇāntikavyasanakaṇṭakabhinnamarmā kurvīta kiṃ nu kuśalaṃ jalaviplutākṣaḥ |
daṣṭaḥ kṛtāntamakareṇa jarāmukhena mūrdhnā ca śuklapalitotkaradantureṇa

ghorāndhakāraparalokamahāprapātasaṃpātacūrṇitatanoḥ kuśalābhilāṣam |
āśīviṣāsyapuṭasaṃkaṭasaṃniruddhamaṇḍūkavāsitasamaṃ pravadanti santaḥ

lokaṃ vākyaiḥ kṛtakamadhurair vañcayitvādya maunaṃ
dhatse kasmāt paruṣapiśunābaddhavādapragalbhaiḥ |
ity ākrośann iva sarabhasaṃ rājadantāgradaṣṭāṃ
jihvāpeśīṃ harati vihagas tuṇḍasaṃdaṃśakena

rāgāndhānāṃ vitathaviṣayābhyāsajihmāśayānāṃ
yad bālānāṃ nayanaviṣayaṃ prāpya dhairyaṃ bibheda |
tasminn adya vyapagatabhayāś cārubimbe nitambe
nāryā gṛdhrā nakhamukhapadanyāsapaṅktiṃ likhanti

yābhyāṃ yātā priyakaratalanyastahastāravindā
bhittau sācīpariṇatamukhī citram udvīkṣamāṇā |
mandaṃ mandaṃ svabhavanatale muktapuṣpottarīye
tāv evādya grasati caraṇau jambuko 'yaṃ yuvatyāḥ

itthaṃbhūte sahajavividhāmedhyajambālapaṅke
kaṣṭaṃ kaṣṭaṃ madanamadirāḥ kṣībacittāḥ patanti |
kāyasyemāṃ prakṛtim aśivāṃ vīkṣamāṇās tu yūyaṃ
nirvidyadhvaṃ pracalitataḍidbhaṅgurāj jīvalokāt

yaḥ sattvānām aviratarasakleśanāḍīvraṇāntaḥ-
saṃtaptānām adhigatayathābhūtadharmādhirājaḥ |
hlādaṃ cakre prakṛtiśiśirair dharmavāgambukumbhaiḥ
śāstre tasmai paramabhiṣaje sarvakāle namo 'stu

durvijñeyaṃ kapaṭam aśivaṃ kleśakarmaprayuktaṃ
sarvākāraṃ vivṛtam akhilaṃ yena janmābhidhānam |
yasmin mūḍho rathacaraṇavad bambhramīty asvatantro
lokas tīvravyasanakuliśāghātaniṣpiṣṭamūrtiḥ

mātā bālye pratisaravatīṃ veṇikāṃ yatra cakre
yasmin kānto maṇimakarikāṃ yauvanāgre babandha |
vipraiḥ siktaṃ sukusumalavair yac ca śāntyambuleśaiḥ
kaṣṭaṃ dhṛṣṭaḥ spṛśati balibhuk tac chiro 'dyāṅganāyāḥ

ye vāsitāḥ sukusumena vivāhakāle mātuḥ kareṇa kṛtakautukamaṅgalena |
te 'dya pracaṇḍapavanair avadhūyamānāḥ keśāḥ śmaśānatarucāmaratāṃ prayātāḥ

prakṛticaturā dṛṣṭiḥ kvāsāv apāṅgavilokinī
salalitapadanyāsā kvāsau gatir madavihvalā |
kva nu khalu gatā hāsās te 'syā radacchadalāsakāḥ
suracitam aho citraṃ māyārahasyam idaṃ kaleḥ

hāsāyāsavilolakuṇḍalamaṇicchāyoparāgāruṇe
yasmin prāṇasamaś cakāra muditaḥ pattrāṅkuraṃ yatnataḥ |
bālāmbhoruhapattrakomaladale tatraiva gaṇḍasthale
vaktraṃ raktakalaṅkitaṃ nikaṣati sthitvā lalāṭe 'ṇḍajaḥ

muktāhāramarīciphenasalile romāvalīśaivale
vistīrṇastanacakravākayugale vakṣastaḍāgodare |
savyājaskhalitāṃśuke vyasanināṃ yatraiva netrālayaḥ
petus tatra vipūyake 'dya nipatanty āśātikā makṣikāḥ

pūrvaṃ candanavāriśīkaramucair yā tālavṛntānilaiḥ
preṣyābhir valayadhvanivyatikaraiḥ saṃvījitā sundarī |
harmye candrakaropahāradhavale bimbopadhānāśritā
tām evādya tu vījayanti paruṣaiḥ pakṣānilair vāyasāḥ

yenāyaṃ kampitaḥ pūrvaṃ śākhāntaravicāriṇā |
kvemaṃ kāyadrumaṃ tyaktvā sa gataś cittamarkaṭaḥ