Jātakamālā · Verses 32-51

dine dvitīye dvātriṃśatkārṣāpaṇān upārjya saḥ |
dakṣiṇīyaviśeṣāya [!] mātre tān api dattavān

atha hairaṇyikāpaṇikāḥ puruṣāḥ sametyāgatya ca taṃ tasmāt karmaṇo vinivartanārtham āhuḥ |
śaraccandrāṃśudhavale labdhvā janma kule katham |
kṛpaṇāṃ jīvikāhetor vṛttim āśrayate bhavān

parbhañjanoddhūtaśikhākarāle hutāśane visphuritasphuliṅge |
vivartitaṃ ślāghyam ativa puṃsāṃ na tu svavṛtteś cyavanaṃ pravṛttam

mahoragaśvāsavighūrṇitograis taraṅgabhaṅgair viṣamān payodhīn |
agādhapātālavilagnamūlān pitā vigāhyārjitavān dhanaṃ te

yad āśritaṃ karma janānuvartinā tvayā vidagdhena dhanepsunādhunā |
kathaṃ na saṃprāpsyasi bhāgyasaṃpadaṃ pitur vyatīte 'pi viśālinīṃ śriyam

vitteśvaro 'py arthavibhūtivistarair nāsāsadarthā vibabhāra yasya |
tasyā [!] mahendrāmalatulyakīrteḥ sūnuḥ kathaṃ tvaṃ na bibharṣi lajjām

ye mṛtyuṃ gaṇayanti naiva vipadi grāmaṃ bhajante na ye
gehe bandhuṣu sūnuṣu vyapagatasnehātmanodyoginaḥ |
te tīrtvā jaladhīn agādhasalilān āvartabhīmān budhāḥ
prāpyārthān gajadantabhaṅgasitayā cinvanti kīrtyā jagat

atha maitrakanyako bodhisattvas tebhyo 'py tathānuguṇinīṃ kathām avadhārya samudrāvataraṇakṛtavyavasāyo mātaram upasṛtyovāca | amba sārthavāhaḥ kilāsmākaṃ pitā purā tad anujñāṃ prayaccha yad aham api mahāsamudram avatariṣyāmīti | sā pūrvam eva bhartṛmaraṇaduḥkhena vigatajīvitāśā svasya tanayasya tenāsaṃlakṣitadāruṇena viyogaśokaśastreṇa bhṛśataraṃ pravidāryamāṇahṛdayā svatanayam āha |
vatsa kena tavākhyātaṃ vinākāraṇaśatruṇā |
jīvitaṃ kasya te 'niṣṭaṃ tvayā krīḍāṃ karoti kaḥ

daivāt kathaṃ cit saṃprāptaṃ cakṣur ekaṃ tvam adya me |
putraka kleśabhāginyā mṛtyunā hriyase 'dhunā

na yāvad ekaṃ mama duḥkhaśalyaṃ prayāti nāśaṃ pravidārya śokam |
kathaṃ nu tasyopari me dvitīyaṃ nipātyate pāpamayair amitraiḥ

yeṣāṃ ceto vividhavirasāyāsaduḥkhāprakampyaṃ
yaiḥ saṃtyaktaṃ kṛpaṇahṛdayair jīvitaṃ bhogalubdhaiḥ |
te saṃtyaktvā [!] nayanagalitāśrupravāhārdravaktrān
bandhūn ajñā makaranilaye mṛtyave yānti nāśam

tan mām anāthāṃ pratipālanīyāṃ tvajjīvitāśaikanibandhajīvām |
saṃtyajya yātuṃ katham udyamas te mā sā kathā mānavaro madīyam

svaprāṇasaṃdehakarīm avasthāṃ praviśya naikāntasukhaṃ prasādhyam |
saṃpattayo yena vaṇigjanasya tato 'ham evaṃ suta vārayāmi

sa tasyā hitārthaṃ madhurāṇy api vacanakusumāni tṛṇam ivāvadhūya sapragalbhatayā samavalambitavikatthāśobhaṃ kiṃ cid īdṛśaṃ pratyāha |
varaṃ naiva tu jāyeran ye jātā nirdhanā janāḥ |
jātasya yadi duḥkhāni varaṃ mṛtyur na jīvitam

āśayā gṛham āgatya dīnadīnās tapasvinaḥ |
arthino mama pāpasya yānti niśvasya durmanāḥ [!]

ye śaktihīnā vibhavārjanādau te dehino duḥkhaśataṃ sahante |
lokaṃ punar duḥkhaśatopataptaṃ draṣṭuṃ na śaknomi cirāyamāṇaḥ

tasmād vilaṅghāmi vacas tavedaṃ yāsyāmi taṃ tvaṃ prajahīhi śokam |
tatraiva yāyāṃ nidhanaṃ samudre chinnaṃ mayā vā vyasanaṃ janasya

atha maitrakanyako bodhisattvo mātaram apramāṇīkṛtya nirgatya gṛhād vārāṇasyāṃ puryām ātmānaṃ sārthavāham ity udghoṣayām āsa |
asyām eva purā puraṃdarapurīpraspardhipuryāṃ vaṇiṅ
mitro nāma babhūva yaḥ suranaraprakhyātakīrtidhvajaḥ |
putras tasya mahāsamudram acirād yāsyaty amuṣmin dine
yātuṃ ye vaṇijaḥ kṛtopakaraṇās te santu sajjā iti

atha maitrakanyako bodhisattvo vividhopakaraṇasaṃbhārasādhanānāṃ samāgṛhītapuṇyāhaprasthānabhadrāṇām upahṛtamaṅgalavidhānānāṃ vaṇijāṃ pañcabhiḥ śataiḥ kṛtaparivāraḥ prasasāra | mātā cainaṃ gacchatīti śrutvāha | mamaikaputraka kva yāsyasīti karuṇakaruṇākranditamātraparāyaṇā komalavimalakamalavilāsālasābhyāṃ pāṇikamalābhyāṃ rucirakanakaghaṭitaghaṭavikaṭapayodharavarorubhāsuram uraḥ pragāḍham abhitāḍayati | bāṣpasaliladhārāparaṃparodbhavoparudhyamānakaṇṭhī [!] anilabalākulitagalitasajalajaladapaṭalāvalīmalinakeśapāśā satvaratvaram abhigamya maitrakanyakasya bodhisattvasya pādayoḥ pariṣvajyaivam āha | mā māṃ putraka parityajya yāsīti |
anartharāgagrahamūḍhabuddhayo narā hi paśyanti na kevalaṃ hitam |
satāṃ hitādhānavidhānacetasāṃ giro 'pi śṛṇvanti na bhūtavādinām

maitrakanyako 'pi
dharaṇi tala nimagnāṃ mātaraṃ śokavaśyāṃ
śirasi kupitacittaḥ pādavajreṇa hatvā |
muhur upacitaśokaḥ karmaṇā preryamāṇas
tvaritamatir abhūt – saṃprayātuṃ vaṇigbhiḥ

yadi so 'dya naiti sukhasaumyadarśano mama mūrtimān a vikalo manorathaḥ |
svayam eva dhakṣyati mamedam āśrayaṃ hṛdayajvalas tumulaśokadāruṇaḥ

iti sā rurāva kurarīva viklavā nayanāmbudurdinamukhī tapasvinī |
vasudhātale galitahāramekhalā bhujagāṅganā pativiyogaśaṅkinī

atha sumanā nāma yoṣid bodhisattvam anveṣamānā vārāṇasīṃ nagarīm anuprāptā dadarśa cainaṃ mahāsattvaṃ paramadāruṇām avasthām upagataṃ dṛṣṭvā ca tīvraśokāyāsavyathitahṛdayā provāca |
sphuritakiraṇacchāyāramyāḥ śiromaṇayaḥ kva te
kva dayita gatās tās tā daṃṣṭrā bisāṅkuradhūsarāḥ |
vapur upahataṃ daṇḍāghātair navotpalakomalaṃ
vigalitahṛdayā (?) krūreṇaitat kṛpātmaka kena te

kiṃ dharmo 'stam itaḥ prajāhitakaraḥ kiṃ lokapālā mṛtāḥ
tejaḥ kopaviṣātisaṅgarabhasaṃ kiṃ proṣitaṃ bhoginām |
śūnyaṃ kiṃ nu patiprabhābhir adhunā niḥśuklamūlaṃ jagad
yena tvaṃ vyasanaṃ duruttaram idaṃ prāpto vināśāya te

nāsīt kasya dayā tvayi praharato 'nāryasya śāntātmani
krauryaṃ tvayy api nāma sādhucarite pāpātmanāṃ jāyate |
tvām āyāsayataḥ kathaṃ na patitau tasya prakoṣṭhāt karau
nāthānātha ivāpadaṃ katham imāṃ prāptas tvam āyāsinīm

bodhisattvas tu pratyagrakopaśokakaluṣitādhyāśayātmanām avetya tūṣṇīm eva babhūva || sā punar abravīt ||
kasyāpriyaṃ jīvitam ādyajātaṃ kālena kelī ṃ saha kaḥ karoti |
tvadapriyāriṣṭaniviṣṭaceṣṭo lokāntaraṃ ko 'bhyanugantukāmaḥ

śītābhilāṣī pravivikṣur agniṃ ko mārutoddhataśikhākalāpam |
āditsate krūraviṣaṃ bhujaṅgaṃ kaḥ puṣpadāmākṛtivipralabdhaḥ

udadhiparikhām adyaivaināṃ dahāmi vasundharāṃ
sanaganagaragrāmārāmāṃ svadṛṣṭihutāśanaiḥ |
na mama hṛdayaṃ śānti ṃ yāti tvadapriyatāḍitaṃ
dahati yadi na krodhāgnir māṃ purā niravagrahaḥ

atha bodhisattvas tāṃ tapasvinīm aviṣahyakopāgnipradīptamānasā ṃ hlādayann iva tadāmṛtaśiśirābhir vāgbhir ity abravīt ||
alam alaṃ mā gā bhadre vai kopasya cetovidāhinaḥ |
prakṛtiduḥkheṣu ko bhūyaḥ sattveṣu duḥkhāni cintayet

duḥkhahetau vartamāneṣu śocyeṣu saṃkleśabhāgiṣu kaḥ parākramet || duḥkhāya svahitakramārteṣu dehiṣu na mama daṃṣṭrotpāṭanād duḥkhaṃ na ca daṇḍasaṃpātajā rujāḥ || duḥkhayanti mānasaṃ caṇḍi tvadvākkarkaśās tudanti mām || api ca kānte ||
bodhisaṃprāptaye cittaṃ yadaivotpāditaṃ purā |
vayaṃ tadaiva lokānām ādheyakriyatāṃ gatāḥ

kopavahnimlāyamānā punaḥ saiva tvam anyeva lakṣyase ||
candralekheva cāmbare vikasadghanadhūmasaṃbādhadhūsare

kiṃ ca ||
karmāparādhajanitaṃ yadi duḥkham etat kopāvakāśa iha ko nu mama dvijātau |
karmendhanoddhataśikhāśakalākulebhyaḥ kupyet kathaṃ na matimān narakānalebhyaḥ

tad alaṃ kopadainyena tava cetovidāhinā |
svagṛhān eva gacchasva saṃtyāgaṃ ca kuruṣva me

sā bhartur abhiprāyaṃ saṃpādayantī tadvacanāpyāyitahṛdayā vigatakopasaṃrambhā babhūva ||
kopoparāgavigame vivṛto 'dhimātraḥ snehaḥ priye viṣamavartini nāgavadhvā |
udghāṭitābhrapaṭalasphuṭadigvibhāge khe niḥsapatna iva candramasaḥ prakāśaḥ

śokāśrunayanapariplutā ceti bodhisattvam abravīt ||
kuto me duḥkhabhāginyā gehaṃ ārya tvayā vinā |
ihaiva śoṣam eṣyāmi yā gatis tava sā mama

viṣamasthaṃ parityajya tvām anātha sukhaidhitam |
kānta kena sukhenāhaṃ drakṣyāmi svajanaṃ punaḥ

sukhe samānatāṃ gatvā duḥkhe jahyāṃ yadi priyam |
anāryām akṛtajñāṃ māṃ dhārayiṣyati bhūḥ katham

pratibhāti jagac chūnyaṃ tvayā virahitaṃ mama |
tvaṃ me jīvitasarvasvaṃ tvaṃ bandhus tvaṃ parāyaṇam

bodhisattvo 'tha tāṃ sādhvīṃ bahalasnehaviklavām |
anukampāvaśāt sādhur īdṛśaṃ pratyabhāṣata

adṛṣṭapūrvavyasanā sukhasaṃvardhitā priye |
parikleśam imaṃ soḍhum akṣamā tvam anindite