Jātakamālā · Verses 68-6

viśadāgalitaiḥ śiromaṇīnāṃ kiraṇair yac chalayanti pādapīṭham |
nṛpater anujīvino vinītā madhuraṃ tyāgavanaspateḥ phalaṃ tat

kṛpaṇāsu bavopabhogamātrāsv atha vā kaiva kathā vināśinīṣu |
niravadyasukhānubandhi ramyaṃ phalam āpnoti sanātanaṃ pradānāt

avadhūya balaṃ śamadviṣāṃ yaj jaladānām iva maṇḍalaṃ nabhasvān |
padam avyayam āpnuvanti buddhā bhagavantas tad api pradānabijam

abhibhūya parapravādipūgān paramārthaṃ gamayanti śāsanaṃ svam |
munayo bhuvanaikaśāsitāras tad idaṃ tyāgaparaṃparāvasānam

atha bhagavān pātrīkṛtādhyāśayaṃ taṃ janam avetya ratnatrayāvicalitaprasādaṃ saṃsāravāsavimukhaṃ bhavaduḥkhopaśamapratisaṃyuktām eva kathāṃ āviś cakāra |
duḥkhāny amūni sati janmani saṃbhavanti kṣīṇe ca janmani na duḥkham upaiti bhūyaḥ |
janmakṣayāya matimān prayateta tasmād yaḥ prāptum icchati na duḥkhaśatābhighātam

duḥkhaṃ sakāraṇam idaṃ samupaity anādisaṃtānavartibhayaśokaviṣādayoni |
tṛṣṇāṃ pratītya viparītasukhābhimānavyāmohanīṃ tribhavanāṭakayogadhūrtāṃ

eṣo 'ham ity ucita eva manovidāhī satkāyadarśanamayaḥ puruṣasya kīlaḥ |
janmādhvani bhramayatīdam anādimadhyaṃ saṃsāracakram aparigraham apraśāntam

sthitvā śīle vigatarajasi prāpya cetaḥ samādhiṃ
prajñālokair manasi śayitaṃ dhvāntam ullikhya kṛtsnam |
janmāmbhodher vyasanamahataḥ kṣemam āsādya pāraṃ
saṃśāntātmā na divi bhuvi vā bhikṣur āyāti saṃkhyam

yair nirdagdhā matihutabhujā skandhasaṃbandhalakṣyī
tṛṣṇā naikavyasanaviśikhāpātasaṃdhānamaurvī |
te 'smin dhanyā jagati sukhinas te ta evānavadyās
teṣāṃ bhadraṃ sthitam abhimukhaṃ te bhayebhyo vimuktāḥ

riktākāradravaratirasāsvādaparyastabuddher
leśanāpi vyanusṛtavato jālinīṃ citramāyām |
āyāsinyaḥ śirasi vipadaḥ saṃcaranti pragalbhā
janmābhyastaṃ sucaritaphalaṃ vyartham eva prayāti

āyāsinīṃ bhavavibhūtim avāptukāmaiḥ śāntiṃ parāṃ ca parataḥ kuśalaṃ praceyam |
āśīviṣo narapater nidhanāya mukto hāro babhūva kuśalaiḥ sphuṭacandragauraḥ

kiṃ ca bhūyaḥ
duḥkhadviṣā hṛdi na lobhakalir niṣevyo janmāntaropacitalobhaviṣāśayasya |
śāntātmano 'pi kila nirvivaraṃ babhūva bhaktābhihārasamaye mukham eva bhikṣoḥ

tasmāt pradānasalilaiḥ snapayantu santo mātsaryapaṅkamalināni manogṛhāṇi |
lobhānalendhanam idaṃ nidhanaṃ dhanaṃ vo yāvan na yāti vipadagniśikhāvalīḍham

śrutvā vacāṃsi sa jano jagadekabandhor nandasya tāṃ ca vipadaṃ vipulām udīkṣya |
vikṣipya matsaramayīṃ manasas tamisrāṃ dānādikaṃ sucaritaṃ prathayāṃ babhūva

iti matsaranandāvadānam ||
8. Megha
puṇyair vitṛptim upayānti na bodhisattvāḥ
kāmaiḥ pramādina iva pratipattivāmaiḥ |
rājyāśrayāṇy api sukhāny avadhīrya dhīrāḥ
puṇyāya puṇyanidhayaḥ śramam āśrayante

tadyathānuśrūyate
bodhisattvaḥ kila bhagavān prakṛtidakṣiṇo dakṣiṇāpathe rājā babhūva ||
saṃtarpayām āsa yataḥ sa lokaṃ dānāmbubhiḥ sasyam ivāmbugarbhaḥ |
tato mahāmegha iti kṣitīśo yathārthanāmātiśayo babhūva

na tasya rājyadyutivistareṣu vyāsaktadīnaṃ hṛdayaṃ babhūva |
anarthabhūtān sa parārtham arthān drumaḥ phalānīva babhāra sādhuḥ

babhūva tasmin pitarīva loko viśrambhasaṃbhogasukhapragalbhaḥ |
suteṣv iva premanibaddhabhāvo babhūva so 'pi kṣitipaḥ prajāsu

sagauravo 'sau guruṣu prakṛtyā dīneṣu kāruṇyamṛdusvabhāvaḥ |
kṛtāparādheṣv api maitracittaḥ samantabhadras tu suhṛjjaneṣu

babhūva tasya graharājakīrtes tathāgraho na svaparigraheṣu |
yathā tadīyāsu mamatvam āsīj janasya saṃpatsv atiśāyinīṣu