Jātakamālā · Verses 51-2

udyan darśanam ucchinatti savitā naktaṃcarāṇāṃ yathā
nṝṇāṃ dhvāntam apākaroty aviralaṃ rūpopalabdhyai karaiḥ |
doṣas tatra na bhāskarasya bhagavaddviṣtaprasannātmanāṃ
buddho 'py evam apuṇyapuṇyanicayaḥ sāmānyanātho 'pi san

iti tāv upāsakau buddhaguṇamāhātmyakīrtanam |
kṛtvā parasparaṃ sattvaṃ pavitrīkṛtya jagmatuḥ

evaṃ matvā mahārāja saṃbuddhe sadgurau mudā |
śraddhayā satkṛtiḥ kāryā nāpakṛtiḥ kathaṃ cana

śāstary avajñāmalināśayānāṃ bhūmir vidāraṃ na dadāti sadyaḥ |
buddhaprasādadravacetasāṃ vā na jāyate ratnamayī vicitraṃ

ko 'py eṣa karmāntarasaṃnirodhaḥ puṇyaprabhāvātiśayo vicitraḥ |
karmāṇi yat pātraviśeṣajāni sadyo na nṝṇāṃ phalam udvamanti

tasyaiva kāpīyam ṛṣer acintyā vibhūtir āveṇikayogasādhvī |
yenātra kṛtvāpi manaḥpradoṣaṃ sadyo na pātālatalaṃ viśanti

tal lokānām amṛtaphalade jaṅgame puṇyavṛkṣe
kāryā bhaktir bhagavati jine nirjitāntaḥsapatne |
nikṣipyāśāṃ viṣayagahanavrātaviṣvagviṣaktāṃ
yāvan nedaṃ bhavati bhuvanaṃ buddhakāntāraghoram

utpadyante jagati na sadā nāpi sarvatra buddhāḥ
sarvākārāparatavitathagrāhanidrāprasaṅgāḥ |
kaś cit kalpaḥ prabhavati cirāt puṇyasaṃbhāraramyo
yatrotpādo bhavati bhuvanasvāmināṃ bhūtabhūtyai

yātasyāpi praśāntiṃ bhavapuraparikhāṃ jālinīṃ śoṣayitvā
yāvat saṃbuddhabhānoḥ pravacanakiraṇā lokam udbhāvayanti |
tāvat paśyantu santaḥ samaviṣamavatāṃ durvibhāgaprabhedān
loke durdṛṣṭimeghā vipadaśanimukhā durnivārāḥ sphuranti

evaṃ me guruṇākhyātaṃ tathā te kathyate mayā |
tad evaṃ hi parijñāya kartavyaṃ bhajanaṃ muneḥ

ye bhajanti sadā buddhaṃ na te gacchanti durgatim |
niḥkleśāḥ sabalān mārāñ jitvā yānti jinālayam

ye ca śṛṇvanti saddharmaṃ te 'pi na yānti durgatim |
sarvadā satsukhaṃ bhuktvā yānti cānte sukhāvatīm

ye 'rcayanti mudā saṃghān na te 'pi yānti durgatim |
sarvasattvahitaṃ kṛtvā saṃprayānti śubhālaye

evaṃ matvā mahārāja triratnaśaraṇaṃ gataḥ |
sarvasattvahitaṃ kṛtvā saṃvṛtiṃ saṃpracāraya

tena te sarvadā bhadram ihāmutrāpi saṃbhavet |
kramād bodhiṃ samāsādya nirvṛtiṃ vā samāpnuyāḥ

iti śāstrā samādiṣṭaṃ śrutvā sa nṛpatir mudā |
tatheti saṃpratijñāya prābhyanandat sapārṣadaḥ

puṇyarāśyavadānaṃ tad idaṃ ye śraddhayā mudā |
śrāvayanty anumodante śṛṇvanti ca samāhitāḥ

sarve 'pi te mahāsattvāḥ pariśuddhatrimaṇḍalāḥ |
saddharmaguṇasaukhyāni bhuktvā yānti jinālayam

|| śrī || iti puṇyarāśyavadānaṃ samāptam || 13 ||
11. ṛṣipañcaka
mūlaṃ malānāṃ pravadanti jātiṃ jātiprapañcopaśamapravīṇāḥ |
tathāgatāś cāvitathapratijñāḥ saṃbhodhisattvāś ca viśuddhasattvāḥ

tadyathānuśrūyate |
bodhisattvaḥ kila lokābhimataguṇābhilakṣite mahati brāhmaṇakule janma pratijagrāha |
kiraṇair iva śuklapakṣacandraḥ svaguṇair eva sahābhivardhamānaḥ |
paramāṃ svakulasya cihnaśobhāṃ prathimānaṃ gamayāṃ babhūva sādhuḥ