જાતકમાલા · શ્લોક 51-2

ઉદ્યન્ દર્શનમ્ ઉચ્છિનત્તિ સવિતા નક્તંચરાણાં યથા
નૄણાં ધ્વાન્તમ્ અપાકરોત્ય્ અવિરલં રૂપોપલબ્ધ્યૈ કરૈઃ ।
દોષસ્ તત્ર ન ભાસ્કરસ્ય ભગવદ્દ્વિષ્તપ્રસન્નાત્મનાં
બુદ્ધો ઽપ્ય્ એવમ્ અપુણ્યપુણ્યનિચયઃ સામાન્યનાથો ઽપિ સન્

ઇતિ તાવ્ ઉપાસકૌ બુદ્ધગુણમાહાત્મ્યકીર્તનમ્ ।
કૃત્વા પરસ્પરં સત્ત્વં પવિત્રીકૃત્ય જગ્મતુઃ

એવં મત્વા મહારાજ સંબુદ્ધે સદ્ગુરૌ મુદા ।
શ્રદ્ધયા સત્કૃતિઃ કાર્યા નાપકૃતિઃ કથં ચન

શાસ્તર્ય્ અવજ્ઞામલિનાશયાનાં ભૂમિર્ વિદારં ન દદાતિ સદ્યઃ ।
બુદ્ધપ્રસાદદ્રવચેતસાં વા ન જાયતે રત્નમયી વિચિત્રં

કો ઽપ્ય્ એષ કર્માન્તરસંનિરોધઃ પુણ્યપ્રભાવાતિશયો વિચિત્રઃ ।
કર્માણિ યત્ પાત્રવિશેષજાનિ સદ્યો ન નૄણાં ફલમ્ ઉદ્વમન્તિ

તસ્યૈવ કાપીયમ્ ઋષેર્ અચિન્ત્યા વિભૂતિર્ આવેણિકયોગસાધ્વી ।
યેનાત્ર કૃત્વાપિ મનઃપ્રદોષં સદ્યો ન પાતાલતલં વિશન્તિ

તલ્ લોકાનામ્ અમૃતફલદે જઙ્ગમે પુણ્યવૃક્ષે
કાર્યા ભક્તિર્ ભગવતિ જિને નિર્જિતાન્તઃસપત્ને ।
નિક્ષિપ્યાશાં વિષયગહનવ્રાતવિષ્વગ્વિષક્તાં
યાવન્ નેદં ભવતિ ભુવનં બુદ્ધકાન્તારઘોરમ્

ઉત્પદ્યન્તે જગતિ ન સદા નાપિ સર્વત્ર બુદ્ધાઃ
સર્વાકારાપરતવિતથગ્રાહનિદ્રાપ્રસઙ્ગાઃ ।
કશ્ ચિત્ કલ્પઃ પ્રભવતિ ચિરાત્ પુણ્યસંભારરમ્યો
યત્રોત્પાદો ભવતિ ભુવનસ્વામિનાં ભૂતભૂત્યૈ

યાતસ્યાપિ પ્રશાન્તિં ભવપુરપરિખાં જાલિનીં શોષયિત્વા
યાવત્ સંબુદ્ધભાનોઃ પ્રવચનકિરણા લોકમ્ ઉદ્ભાવયન્તિ ।
તાવત્ પશ્યન્તુ સન્તઃ સમવિષમવતાં દુર્વિભાગપ્રભેદાન્
લોકે દુર્દૃષ્ટિમેઘા વિપદશનિમુખા દુર્નિવારાઃ સ્ફુરન્તિ

એવં મે ગુરુણાખ્યાતં તથા તે કથ્યતે મયા ।
તદ્ એવં હિ પરિજ્ઞાય કર્તવ્યં ભજનં મુનેઃ

યે ભજન્તિ સદા બુદ્ધં ન તે ગચ્છન્તિ દુર્ગતિમ્ ।
નિઃક્લેશાઃ સબલાન્ મારાઞ્ જિત્વા યાન્તિ જિનાલયમ્

યે ચ શૃણ્વન્તિ સદ્ધર્મં તે ઽપિ ન યાન્તિ દુર્ગતિમ્ ।
સર્વદા સત્સુખં ભુક્ત્વા યાન્તિ ચાન્તે સુખાવતીમ્

યે ઽર્ચયન્તિ મુદા સંઘાન્ ન તે ઽપિ યાન્તિ દુર્ગતિમ્ ।
સર્વસત્ત્વહિતં કૃત્વા સંપ્રયાન્તિ શુભાલયે

એવં મત્વા મહારાજ ત્રિરત્નશરણં ગતઃ ।
સર્વસત્ત્વહિતં કૃત્વા સંવૃતિં સંપ્રચારય

તેન તે સર્વદા ભદ્રમ્ ઇહામુત્રાપિ સંભવેત્ ।
ક્રમાદ્ બોધિં સમાસાદ્ય નિર્વૃતિં વા સમાપ્નુયાઃ

ઇતિ શાસ્ત્રા સમાદિષ્ટં શ્રુત્વા સ નૃપતિર્ મુદા ।
તથેતિ સંપ્રતિજ્ઞાય પ્રાભ્યનન્દત્ સપાર્ષદઃ

પુણ્યરાશ્યવદાનં તદ્ ઇદં યે શ્રદ્ધયા મુદા ।
શ્રાવયન્ત્ય્ અનુમોદન્તે શૃણ્વન્તિ ચ સમાહિતાઃ

સર્વે ઽપિ તે મહાસત્ત્વાઃ પરિશુદ્ધત્રિમણ્ડલાઃ ।
સદ્ધર્મગુણસૌખ્યાનિ ભુક્ત્વા યાન્તિ જિનાલયમ્

॥ શ્રી ॥ ઇતિ પુણ્યરાશ્યવદાનં સમાપ્તમ્ ॥ 13 ॥
11. ઋષિપઞ્ચક
મૂલં મલાનાં પ્રવદન્તિ જાતિં જાતિપ્રપઞ્ચોપશમપ્રવીણાઃ ।
તથાગતાશ્ ચાવિતથપ્રતિજ્ઞાઃ સંભોધિસત્ત્વાશ્ ચ વિશુદ્ધસત્ત્વાઃ

તદ્યથાનુશ્રૂયતે ।
બોધિસત્ત્વઃ કિલ લોકાભિમતગુણાભિલક્ષિતે મહતિ બ્રાહ્મણકુલે જન્મ પ્રતિજગ્રાહ ।
કિરણૈર્ ઇવ શુક્લપક્ષચન્દ્રઃ સ્વગુણૈર્ એવ સહાભિવર્ધમાનઃ ।
પરમાં સ્વકુલસ્ય ચિહ્નશોભાં પ્રથિમાનં ગમયાં બભૂવ સાધુઃ