Jātakamālā · Verses 47-66

kac cin notkaṇṭhayanti tvāṃ daksiṇāpathacandrikāḥ |
pradhyānastimitātāmraparyantanayanāḥ priyāḥ

anapāyī bhavet kac cid ayatnaḥ satsamāgamaḥ |
kac cid atrābhiramase svadeśa iva bhūpate

atha bodhisattvas taṃ rājānam amlānapraṇayaśībharair vacobhiḥ samuttejayann abravīt ||
dṛṣṭvaiva darśanīyaṃ tvāṃ viśrānto 'haṃ mahīpate |
anāryasyāpi viśrambhaḥ kasya na syād bhavādṛśe

tvayy asaṃstutasadbandhau bāndhave purataḥ sthite |
kiṃ cānyad vallabhataraṃ mamotkaṇṭhānibandhanaṃ

viditāś ca mahārāja mama priyasamāgamāḥ |
vitathālpasukhāsvādavyasanāyāsahetavaḥ

ye 'rthāḥ svapne 'nubhūyante ye ca nidrāparikṣaye |
tesāṃ nirbhuktimuktānāṃ viśeṣo nopalabhyate

svapnamāyopamāneṣu muhūrtapariṇāmiṣu |
prasaṅgaṃ matimān kuryān na priyapraṇayeṣv ataḥ

priyo mamety evam anādikālapravṛttam udvṛttam analpagarbhaṃ |
sukhābhidhānaṃ pravadanti duḥkhaṃ vyatītaduḥkhā munayaḥ purāṇāḥ

kṛpā kṛpāvastuṣu saṃpratāryate striyaḥ kṛpāvastu viśeṣataḥ satāṃ |
ato matir me karuṇānupātinī priyāsu rājan na tu vibhramāturā

svabhāvadīnāḥ paratantravṛttayaḥ sadāturā matsaramānamanmathaiḥ |
pathi prakīrṇā iva māṃsapeśikāḥ kathaṃ nu na syuḥ pramadāḥ kṛpāspadaṃ

atha sa rājā prasāditamānasas tair bodhisattvavacanakusumaiḥ praṇamyainam abravīt ||
ājñāpaya mahārāja yatra māṃ manyase kṣamaṃ |
bhavadvidhānāṃ kṛtyeṣu vayam ānamramūrtayaḥ

prasannamānasaṃ sa cainam avetya bodhisattvaḥ saṃpraharṣayann abravīt ||
tavaiva saphalaṃ janma sujīvaṃ tvaṃ ca jīvasi |
aiśvaryaṃ tava pātrasthaṃ yathārthā śrīs tavaiva ca

yas tvam eṣāṃ bhagavatāṃ bhavasaṃbhogavidviṣāṃ |
satkāravyapadeśena tanoṣi yaśasā jagat

suhṛdaḥ saṃvibhajyante dārair api dhanair api |
saṃvibhāgas tu dharmeṇa durlabho bhuvi nāsti vā

dharmātithyam ato rājan mama tvaṃ kartum arhasi |
na hi saṃbhāvanā satsu dṛṣṭā vandhyaphalodayā

svargo mokṣaḥ sukhāny arthā dharmād eva yaśāṃsi ca |
dadhad dharmam ato yuṅkte svargamokṣasukhādibhiḥ

saddharmapraguṇaṃ mitraṃ karaṇīyaṃ balād api |
eṣaiva suhṛdāṃ loke sādhoḥ sādhīyasī sthitiḥ

atithir mitram arthīva satkārāyatanaṃ paraṃ
mayi caitat trayaṃ yasmād ato me 'bhyarthanāṃ kuru

sravann iva prasādas te lakṣyate mukhapaṅkajāt |
puṇyasaṃbhogavātsalyam udgiraṃl lakṣyase girā

anujñātā tvayā rājann ime praksīṇakalmaṣāḥ |
vasantu dakṣiṇīyāgryā dakṣiṇāpathabhūmiṣu