Jātakamālā · Verses 42-61

tad ayaṃ samayaḥ kathaṃ cid eva pratilabdhaḥ kuśalaprayogayogyaḥ |
pratipattividhau bhavān pramāṇaṃ śakunānāṃ hi vanaṃ virāvamātram

sa tam arhantam abravīt |
śaknuyāṃ sugatau bhogaspṛhāṃ yady apy upekṣitum |
brūyāḥ pravadatāṃ śreṣṭha naiva māṃ tvaṃ punaḥ punaḥ

yatas tu māṃ haraty eṣā kāmatṛṣṇā niśācarī |
tenātivelakṛpayā tvaṃ māṃ kutsayase vibho

sa taṃ mahātmā punar api sānukrośapeśalair vacobhiḥ saṃvejayann abravīt |
khinnā vayaṃ rudhirabindum upādadānāḥ sāṃkleśikeṣu sabhayeṣu bhaveṣu vatsa |
āyāsinīṃ ca kaṭasīm abhivardhayanto naikāntarāyavivaśāḥ svaparābhavāya

krūraiḥ parasparavirodhibhir apraśāntair dhātūragaiḥ prakupitair iva kṛṣṇasarpaiḥ |
ātudyamānavapuṣām aparāyaṇānāṃ kalpāyutāny abhigatāni ca no mahātman

pratyarthikair iva samudyatamaṇḍalāgraiḥ skandhair hatā vayam akāraṇabaddhavairaiḥ |
āyāsitāś ca viṣayair viṣakumbhakalpais tac chidyatāṃ bhavasukhavyasanānurāgaḥ

sa tam arhantam āha |
nopacchetsyāmi yady atra janmani skandhasaṃtatim |
upapadyoddhariṣyāmi tvadvākyena jitādhinā

sa taṃ pratyāha | yady apy etad evaṃ tathāpi
sakṛn martavye tvaṃ punar api ca mṛtyuṃ mṛgayase
sphuṭaṃ dṛṣṭvālokaṃ tamasi vipule majjasi punaḥ |
śivaṃ labdhvā mārgaṃ kusṛtim upayāsi pratibhayāṃ
bhavān yas tvaṃ vāñchasy amṛtapuram utsṛjya sulabham

samuttīryāgādhāt krimikulacalatpaṅkakalilāt
kathaṃ vijñābālāt pipatiṣasi tasmin punar api |
vimukto rogebhyaḥ punar api ca rogāya yatase
bhavebhyo duḥkhebhyaḥ spṛhayasi punar yas tvam aghṛṇaḥ

a nā śān asvantān sulabhavinipātapratibhayān
sa vairān sodvegān saparibhavasaṃtāpavirasān |
parityajyāyuṣman vyasanaviśikhāpātavihatān
bhavān samyagmārgaṃ bhavabhayaharaṃ bhāvaya sadā

dṛṣṭasaṃsāraduḥkho 'pi so 'bhyāsād rāgapāpmanaḥ |
tam uvāca mahātmānam ārujann iva vākśaraiḥ

bhramanti te bahūn kalpān bodhisattvā bhavādhvani |
sudāntāḥ saptajanmāni bhramatāṃ kīdṛśī vyathā

sa bhikṣus tena vākyena pratodeneva vikṣataḥ |
tam abravīd bhavāsvādakārpaṇyopahatāśayam

na tena viditā bhikṣo yā vyathā bhramatāṃ bhave |
avajñāya vaco 'smākaṃ punar apy avabhotsyase

punaś ca tvāṃ bravīmi |
ye janmaivādhimuktāḥ śamasukhamahatīṃ nirvṛtiṃ śuddhasattvā
yeṣāṃ kleśāvaśeṣo 'py upaśamitabalo yo 'py upādānam eva |
ātmatvenābhyupetā jagad idam akhilaṃ ye kṛpākrāntacittās
teṣāṃ ślāghyā pravṛttir gatiṣu na tu bhavāsvādaparyastabuddhiḥ

spṛśyante sattvavanto na viṣayarajasā ye viviktāśayatvād
duḥkhair naiva vyathante kṣitidharaguravo ye parārthe carantaḥ |
te janmopādadānāḥ parapuraparikhāsetavo bodhisattvāḥ
śobhante na kṣamaṃ tu kṣaṇam api gatiṣu sthātum ātmaṃbharīṇām

yeṣāṃ sarve prayogāḥ śaśina iva kalāḥ sarvasattvopajīvyā
ye lokān pānti kṛtsnān pitara iva sutān duḥkhapātālamagnān |
teṣāṃ janmopadeśaḥ sucaritamahatām utsavaḥ śrīviśeṣaḥ
svārthodyogānurāgād anupatati bhavān mṛtyave kevalaṃ tu

yeṣām utpādakāle sucaritakiraṇair likhyamānaṃ samantād
dhvāntaṃ cetaḥ svaraṅgāvivaraparicayasphītam apy astam eti |
unmajjantīva lokāḥ pratibhayamahato duḥkhapaṅkaughamadhyāt
teṣām evānurūpā parahitaviduṣāṃ janmasaṃtānalīlā

kiṃ bahunā
sarveṣv ācāryavaryā niyamagurudharā dharmayānāgradhairyāḥ
kāruṇyocchrītavīryā rajanikaranibhā bhāskarābhāś ca dīptyā |
janmāṭavyānuyātrā namucividaraṇā jñānadīpolkadhārāḥ
sarvajñatvābhiṣekāḥ puruṣavarayugāḥ sarvadā bodhisattvāḥ

evam apy asāv ucyamānaḥ kuśaladharmasādhanodyogavidhura eva vyāhārṣīt |
samudāgamavaiguṇyavirūkṣakṣāmacetasām |
kuśalapratyayā bāhyāḥ kiṃ kariṣyanti dehinām