Jātakamālā · Verses 102-12

bhavaprabandhavyasanānuṣaṅginī matir viparyāsatamo'vaguṇṭhitā |
paraṃ samutkṣipya nipātayaty adho vipattipātālatale duruttare

taḍillatānāṃ sphuṭanānukāriṇīm anekarūpavyasanānubandhinīm |
upādadānasya na jātv imāṃ śivaṃ narasya saṃskāravikārasaṃkulām

svayaṃ samutthāpya vikalpavāsanān samīraṇoddhūtaśikhān bhavānalān |
janāḥ saroṣā iva nirdahanty amī svam indriyagrāmam anarthapaṇḍitāḥ

svabhāvaduḥkhān prakṛtiprabhaṅgurān asārakān phenalavān ivāmbhasaḥ |
arīn imān ātmasamudbhavān bhavān sukhābhimānāś chalitāḥ śarīriṇaḥ

niśamya ko nāma viḍambanām imāṃ pumān madīyāṃ śravaṇopatāpinīm |
ratiṃ prakuryād apariplutendriyo vicitrasaṃkleśasamudbhave bhave

ta eva santaḥ sukham adhyupāsate sanātanaṃ śāntam atītamānuṣam |
bhavopabhogapraṇayānupātinī matir na yeṣāṃ pariśuddhakarmaṇām

hatāvalepāḥ pariśuddhavṛttayaḥ sthitās ta evopari sarvasaṃpadām |
na bhāvanāṃ ye ślathayanti sādhavaḥ pravṛttyupādānaviṣopaśāntaye

prakhyāpya doṣakaṇikān vibhavān bhavānāṃ nānāvidhavyasanasaṃkaṭasaṃbhavānām |
saṃvejya parṣadam ṛṣiḥ sa upāsakānāṃ sadyo yayau praśamam agnir ivāmbuṣiktaḥ

iti bhavalubdhakāvadānam ||
4. Kapīśvarajātakam = GoKī
abhyasyanti tathā tathāgatasutās tyāgaṃ yathā svān api
prāṇān prāṇikṛte tyajanti kṛpayā rogān ivāyāsinaḥ |
kṣudrāḥ pāpavidhau tathā tv abhiratiṃ badhnanti niḥsādhvasā
bhūtvā duścaritaikatānamanaso gacchanty adhastād yathā

tadyathānuśrūyate
bodhisattvaḥ kilānyatamasmin vividhavarṇagandharasasaṃpannaphalabhārāvanatadrumopagūḍhe vikacasurabhikusumavallīvirājitaparyante marakatamaṇiprabhāharitaśādvalakuthāstīrṇaviṣamabhūmibhāge kamalakuvalayākaronmīlitavimalajalāśayaparigrahe mahaty araṇye vānarādhipatir babhūva ||
mahākṛpāsvīkṛtamānasatvān nītvāpi puṇyāni paraṃ prakarṣam |
gatiṃ tiraścām adhamāṃ prapede sādhuḥ sa kenāpi tu kāraṇena

śubhāśubhaiḥ karmabhir āryakarmā krīḍann ivāsau bhavaraṅgamadhye |
nidarśayām āsa vicitrarūpām upāyapūrvām upapattimāyām

kṛtvāpy asau durgatisaṃnirodham apāyahetoś ciravipravāsāt |
saṃmohatāmisramayīṃ prapede tiryagvipattiṃ karuṇāparītaḥ

pravartate karmavaśena loko nirāśrayo 'yaṃ gaticakramadhye |
babhūva tasya tv anavadyabuddheḥ śubhāśubhe karmaṇi kāmakāraḥ

mahātmā kāyamātreṇa vinipātaṃ gato 'py asau |
avipannaguṇābhyāsapeśalādhyāśayo babhau

anāryaiś caritair dūrān niśamyaiva vivarjitaḥ |
āryām udbhāvayām āsa paddhatiṃ sa śivodayām

ātmasaṃjñāviparyāsaprahāṇād eva so 'tyajat |
svasukhāsaṅginīṃ caryām anāryajanavartinīm

vṛttaśobhāṃ samālokya tasya jātivirodhinīm |
munayo 'py abhavann ātmany avajñāśithilādarāḥ

sa tatra mātaram andhāṃ vṛddhāṃ ca paricaran vivekakāmatayā ca svayūtham apahāya teṣu teṣu puṣpaphalasamṛddheṣu vanāntareṣv anutkaṇṭhitamanā vijahāra |
aṃsena tāṃ pariharan viṣameṣu deśeṣv amlāyinīṃ srajam ivādhipatiḥ kapīnām |
ānṛṇyam apratisamaṃ sa jagāma mātur garbhādidhāraṇapariśramakheditāyāḥ

pākopapāditarasaiḥ sa phalaprakārair niṣprāṇakaiś ca madhubhiḥ kusumādhivāsaiḥ |
toyaiś ca phullakamalotpalinīmanojñais tāṃ mātaraṃ paricacāra viśuddhasattvaḥ

tayā karuṇayā cāsāv anubaddhaḥ kapīśvaraḥ |
vijahāra vivikteṣu parvateṣu vaneṣu ca