Īśvarasiddhi · Verses 1-18

tatra kasyacid ekasya vaśe viśvaṃ pravartate |
iti sādhayituṃ pūrvaṃ pūrvapakṣaṃ pracakṣmahe ||

vyavasthitamitasvārthaṃ na tāvad iha laukikam |
sādhanaṃ tena sarvārthatajjñānāder asiddhitaḥ ||

pratyakṣatve tad apy evaṃ vidyamānaikagocaram |
bhūtādigocaraṃ naiva pratyakṣaṃ pratibhādivat ||

nanv ekacetanādhīnaṃ vivādādhyāsitaṃ jagat |
acetanenānārabdhatvād arogasvaśarīravat ||

tathā sarvārthanirmāṇasākṣātkaraṇakauśalam |
kāryatvād eva jagatas tatkartur anumīyatām ||

kim asya tasminn āyattaṃ kiṃ nu janmātha vā sthitiḥ |
pravṛttir vādyayos tāvat sādhyahīnaṃ nidarśanam ||

cetanādhīnatāmātrasāhdane siddhasādhyatā |
cetanair bhoktṛbhir bhogyaḥ karmabhir janyate hi naḥ ||

upādānaṃ pṛthivyādi yāgadānādi sādhanam |
sākṣātkartuṃ kṣamante yat sarva eva ca cetanāḥ ||

karmaṇaḥ śaktirūpaṃ yadpūrvādipadāspadam |
mā bhūt pratyakṣatā tasya śaktimad dhy akṣagocaraḥ ||

āgamād avagamyante vicitrāḥ karmaśaktayaḥ |
tena karmabhir ātmānaḥ sarvaṃ nirmimatāṃ pṛthak ||

svārthakāruṇyabhāvena vyāptāḥ prekṣāvataḥ kriyāḥ |
īśvarasyobhayābhāvāj jagatsargo na yujyate ||

sukhaikatānaṃ janayej jagatkaruṇayā sṛjan |
tatkarmānuvidhāyitve hīyetāsya svatantratā ||

asiddhatvād viruddhatvād anaikāntyāc ca varṇitāt |
kāryatvahetor jagato na yathoditakartṛtā ||

atra brūmo na kāryatvaṃ kṣityādau śakyanihnavam |
sabhāgatvāt kriyāvattvān mahattvena viśeṣitāt ||

tādṛśād eva mūrtatvād bāhyapratyakṣatānvitāt |
sasāmānyaviśeṣatvād ityādibhyo ghaṭādivat ||

pratyakṣaṃ tat prameyatvāt padārthatvād ghaṭādivat/
ekecchānuvidhāyīdam acaitanyāt svadehavat ||

ekenābhiṣṭhitāḥ kāryaṃ kurvate sarvacetanāḥ |
dehasambandhasāpekṣakāryakṛttvāt tvagādivat ||

ekapradhānapuruṣaṃ vivādādhyāsitaṃ jagat |
cetanācetanātmatvād ekarājakadeśavat ||