Scripture Library

Īśvarapratyabhijñāvimarśinī · Chapter 2.1

2.1.1

ata eva yadapyuktaṃ kriyā naikasya sakramā /
eketyādi pratikṣiptaṃ tadekasya samarthanāt //

2.1.2

sakramatvaṃ ca laukikyāḥ kriyāyāḥ kālaśaktitaḥ /
ghaṭate na tu śāśvatyāḥ prābhavyāḥ syātprabhor iva //

2.1.3

kālaḥ sūryādisaṃcārastattatpuṣpādijanma vā /
śītoṣṇe vātha tallakṣyaḥ krama eva sa tattvataḥ //

2.1.4

kramo bhedāśrayo bhedo 'py ābhāsasadasattvataḥ /
ābhāsasadasattve tu citrābhāsakṛtaḥ prabhoḥ //

2.1.5

mūrtivaicitryato deśa- kramam ābhāsayaty asau /
kriyāvaicitryanirbhāsāt kālakramam apīśvaraḥ //

2.1.6

sarvatrābhāsabhedo'pi bhavet kālakramākaraḥ /
vicchinnabhāsaḥ śūnyādermāturbhātasya no sakṛt //

2.1.7

deśakramo'pi bhāveṣu bhāti māturmitātmanaḥ /
svātmeva svātmanā pūrṇā bhāvā bhāntyamitasya tu //

2.1.8

kintu nirmāṇaśaktiḥ sāpy evaṃ viduṣa īśituḥ /
tathāvijñātṛvijñeyabhedo yadavabhāsyate //

Original text: Īśvarapratyabhijñāvimarśinī · Edition: Īśvara-pratyabhijñā-Vimarśinī of Abhinavagupta : doctrine of devine recognition, Sanskrit Text with the commentary Bhāskarī. vol.1-2 / edited by K.A. Subramania Iyer and K.C.Pandey. Delhi, etc. : Motilal Banarsidass , 1986 (repr.) (First Edition: The Princess of Wales Saraswati Bahvana , 1938(text no. 70) and 1950 (text no. 83). · Data entry Masahiro Takano · GRETIL (Göttingen) · CC BY-NC-SA 4.0