Īśvarapratyabhijñāvimarśinī · Chapter 1.8
tātkālikākṣasāmakṣyasāpekṣāḥ kevalaṃ kvacit /
ābhāsā anyathānyatra tvandhāndhatamasādiṣu //
viśeṣo'rthāvabhāsasya sattāyāṃ na punaḥ kvacit /
vikalpeṣu bhaved bhāvibhavadbhūtārthagāmiṣu //
sukhādiṣu ca saukhyādihetuṣvapi ca vastuṣu /
avabhāsasya sadbhāve'pyatītatvāttathā sthitiḥ //
gāḍhamullikhyamāne tu vikalpena sukhādike /
tathā sthitistathaiva syātsphuṭamasyopalakṣaṇāt //
bhāvābhāvāvabhāsānāṃ bāhyatopādhiriṣyate /
nātmā sattā tatasteṣāmāntarāṇāṃ satāṃ sadā //
āntaratvātpramātraikye naiṣāṃ bhedanibandhanā /
arthakriyāpi bāhyatve sā bhinnābhāsabhedataḥ //
cinmayatve'vabhāsānāmantareva sthitiḥ sadā /
māyayā bhāsamānānāṃ bāhyatvādbahirapyasau //
vikalpe yo'yamullekhaḥ so'pi bāhyaḥ pṛthakprathaḥ /
pramātraikātmyamāntaryaṃ tato bhedo hi bāhyatā //
ullekhasya sukhādeśca prakāśo bahirātmanā /
icchāto bharturadhyakṣarūpo'kṣādibhuvāṃ yathā //
tadaikyena vinā na syātsaṃvidāṃ lokapaddhatiḥ /
prakāśaikyāttadekatvaṃ mātaikaḥ sa iti sthitam //
sa eva vimṛśattvena niyatena maheśvaraḥ /
vimarśa eva devasya śuddhe jñānakriye yataḥ //
Original text: Īśvarapratyabhijñāvimarśinī · Edition: Īśvara-pratyabhijñā-Vimarśinī of Abhinavagupta : doctrine of devine recognition, Sanskrit Text with the commentary Bhāskarī. vol.1-2 / edited by K.A. Subramania Iyer and K.C.Pandey. Delhi, etc. : Motilal Banarsidass , 1986 (repr.) (First Edition: The Princess of Wales Saraswati Bahvana , 1938(text no. 70) and 1950 (text no. 83). · Data entry Masahiro Takano · GRETIL (Göttingen) · CC BY-NC-SA 4.0